Бино ба гузориши "Радиои Озодӣ" Мансурҷон Умаров – муовини вазири адлия ва сардори Сарраёсати иҷрои ҷазои ҷиноятии Вазорати адлияи Тоҷикистон – ба бемории "илтиҳоби шуш" гирифтор шуда дар беморхонаи касалиҳои сироятӣ бистарӣ шудааст.

Рӯзи сешанбе 18 август ду манбаъ аз Сарраёсати иҷрои ҷазои ҷиноятӣ бо шарти зикр нашудани номашон ба "Радиои Озодӣ" хабари гирифтор шудани Умаров ба бемории "илтиҳоби шуш" ва бистарӣ шуданаш дар беморхонро таъйид карда гуфтаанд, "тақрибан як моҳ боз ба кор наомадааст".

Дар расонаҳои давлатӣ дар ин бора то ҳол чизе гуфта нашудааст. Аммо баъзе афроди наздик ба хонаводаи Мансурҷон Умаров хабари бемор будани ӯро тасдиқ карданд, вале дар бораи вазъи саломатиаш тафсилот надодаанд.

Радои Озодӣ аз қавли манобеаш менависад, ки Мансурҷон Умаров аввал дар шифохонаи "Истиқлол"-и шаҳри Душанбе бистарӣ буд, вале феълан ӯро ба беморхонаи касалиҳои сироятӣ, воқеъ дар кӯчаи ба номи Чапаеви пойтахт, овардаанд. "Ҳамкорон чанд дафъа ба диданаш рафтанд, аммо нагузоштанд", - гуфтанд онҳо.

Ба бемории "илтиҳоби шуш" гирифтор шудани мақомоти баландпояи кишвар бори аввал нест, ки расонаи мешавад. Аз ин пештар Маҳмадтоҳир Зокирзода, раиси Маҷлиси Намояндагон ва Юсуф Раҳмон, додситони кулли кишвар низ ба ин беморӣ мубтало шуда, пас аз табобат шифо ёфтанд. Аз ин ки мақомот то ҳол номи ин бемориро "илтиҳоби шуш" мегӯянд, аксари огоҳони умур ба он шубҳа доранд, ба назари онҳо ин беморӣ ба эҳтимоли зиёд ҳамон вируси COVID-19 аст, ки мақомот бо ҳар баҳонае аз бурдани номаш худдорӣ мекунанд.

Рӯзи 05 майи соли равон расонаҳо аз марги бародари Мансурҷон Умаров, Носир Умаров, ки дар ширкати "Барқи тоҷик" кор мекард, хабар дода буданд. Носир Умаров дар дар беморхонаи касалиҳои сироятии воқеъ дар минтақаи Зарафшони шаҳри Душанбе табобат мегирифт ва дар ҳамонҷо аз олам даргузашт.  Агарчи он замон мақомот расман дар бораи сабаби марги ӯ чизе нагуфтанд, аммо наздиконаш бар ин бовар буданд, ки ба эҳтимоли зиёд ӯ аз коронавирус даргузаштааст, зеро табибон ҷасадро ба пайвандонаш надоданд ва ҳатто таъкид карданд, ки падараш аз деҳа барои ҷанозаи писарш наояд.

Мансурҷон Умаров аз моҳи ноябри соли 2018 бо як фармони Эмомалӣ Раҳмон сардори Сарраёсати иҷрои ҷазои ҷиноятии Вазорати адлияи Тоҷикистон интихоб шуд. Пеш аз он муовини аввали раиси Кумитаи давлатии амнияти миллии Тоҷикистон буд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.