Сафорати Амрико дар Тоҷикистон

Рӯзи 6 сентябр Вазорати умури хориҷии Амрико бо нашри иттилоияе ба  шаҳрвандони ин кишвар тавсия додааст, ки ба сабаби эҳтимоли сирояти коронавируси нав ба Тоҷикистон сафар накунанд, ҳамчунин бинобар эҳтимоли хатари терроризм аз эҳтиёкор кор гиранд.

Вазорати хориҷии Амрико баъди тавсияи Маркази назорат ва пешгирӣ аз бемориҳо, ки  дар Амрико мустақар аст, рӯзи 6-уми август Тоҷикистонро ба қатори кишварҳое ворид кардааст, ки хатари сирояти бемории COVID-19 дар онҷо баланд аст, шаҳрвандони Амрикоро ҳушдор дод.

Дар шарҳи расмии марказ, ки дар вебсайти он нашр шудааст, омадааст, ки “Хатари сирояти COVID-19 дар Тоҷикистон баланд аст. Марказ ба мусофирон тавсия медиҳад, ки аз тамоми сафарҳои нозарур ба Тоҷикистон худдорӣ кунанд”. Сафарҳои зарурӣ ба гуфтаи ин Марказ, кор барои расонидани кумакҳои башарӣ, ба сабабҳои сиҳатӣ ва ё мушкилоти ҳалталаби оилавӣ аст.

“Агар шумо дар Тоҷикистон бемор шавед ва ба кумаки тиббӣ эҳтиёҷ пайдо кунед, имконот маҳдуд аст. Мусофироне, ки ба Тоҷикистон мераванд, мумкин аст, ба сабаби COVID-19 ба карантини ҳатмӣ гирифта шаванд, марзу фурудгоҳҳоро баста бинанд, дастур бигиранд, ки дар хона монанд. Дастрасӣ ба табобат мумкин аст, маҳдуд бошад.”  Омадааст, дар шарҳи Марказ.

Ҳамчунин дар идомаи  шарҳи Маркази назорат ва пешгирӣ аз бемориҳо дар Амрико гуфта шудааст: “Одамони калонсол, афроди синну соли гуногун, ки бемориҳои хоссе доранд ва дигар касоне, ки мумкин аст, ба хатари зиёди бемории сахт рӯ ба рӯ шаванд, бояд сафари худ, аз ҷумла сафарҳои зарурии худро ба Тоҷикистон ба таъхир андозанд.”

Тоҷикистон то рӯзи 5-уми сентябр дар қатори кишварҳое буд, ки ба гуфтаи Марказ мусофирон ҳангоми сафар ба он бояд қоидаҳои маъмулии пешгирӣ аз сирояти ҳаргуна беморӣ ва ё чунин меъёрҳоро "сахт риоят мекарданд."

Вазорати умури хориҷии Амрико дар мавриди эҳтиёткории хос аз терроризм дар Тоҷикистон гуфтааст: “Террористон дучархасаворонро ҳадаф гирифтанд ва мумкин аст, дигар ҷойҳо, ба мисли маҳаллаҳои аҳолинишин, клубу ресторанҳо, ибодатгоҳу, меҳмонхонаҳо, мактабу маконҳои истироҳатӣ ва дигар ҷойҳоро ҳадаф бигиранд.” Ҳарчанд ба гуфтаи Вазорат, “муассисаҳои ҳукумати Тоҷикистон ҳадафи аслии террористон мемонанд.”

Дар Тоҷикистон дар таърихи 29-уми июли соли 2018 сӯйқасд ба ҷони гурӯҳе аз сайёҳони дучархасавори хориҷӣ дар роҳи мошингарди Душанбе-Кулоб сурат гирифта буд, ки чор нафар ба ҳалокат расида буд, аз ҷумлаи ду шаҳрванди Амрико. Масъулияти ин ҳамларо гурӯҳи ба ном “Давлати исломӣ” бар дӯш гирифта буд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.