Собиқ додварз ва вакили мудофеъ, Саиднуриддин Шамсиддинов, ки дар шабакаҳои иҷтимоӣ аз рафтори баъзе додситону додрасҳо интиқод мекард, аз ноадолатиҳои онҳо мегуфт, дар ноҳияи Вахш ба ҳаштуним сол зиндон маҳкум шудааст.
Гуфта мешавад, додгоҳ ӯро бар асоси ҳафт моддаи Кодекси ҷиноӣ, аз ҷумла харидуфурӯши замин, қаллобӣ ва паҳн кардани маълумоти дурӯғ гунаҳкор донистааст, вале наздиконаш гуфтаанд, ӯро барои танқидҳояш аз беадолатӣ ва рафтори баъзе аз додситону додрасҳои минтақа ба маҳкум ба зиндон кардаанд.
Бародараш Қамариддин Шамсиддинов, ба Радиои Озодӣ гуфтааст, ӯ дар шабакаҳои иҷтимоӣ бо имзои Саиди Садр аризаву мақола менавишт ва “зоҳиран ба мақомот хуш наомадааст”.
Навиштаҳояш ҳанӯз дар саҳифааш маҳфузанд ва аз ҷумла дар яке аз онҳо ба унвони раисҷумҳури кишвар гуфта, “баъзе судяҳои Хатлон … ба хатокорӣ роҳ дода, тақдири инсонҳоро бо роҳи хато ҳал карда, чандин камбағалро беасос “говсуд” карда гаштаанд.”, – мегуяд, бародари Шамсиддинов.
Аҳлиддин Назарзода судяе, ки Шамсиддиновро ба 8,5 сол равони зиндон намудааст, ба суоли хабарнигорон дар ин маврид посух надода ба зангҳои телефонӣ ҷавоб нагардонидааст.
Нусратулло Мирзоев вакили мудофеи Саиднуриддин Шамсиддинов ба Радиои Озодӣ гуфт, додрас эътирофи шахси зери ҳимояташро ҳангоми тафтишот ҳамчун далел пеш овардааст.
Ба гуфтаи ӯ, воқеан Шамсиддинов дар зери ҳар айбнома имзо гузоштааст, вале иддао кард, ки “ин худиқрорӣ маҷбурӣ ва парванда фармоишӣ аст”.
Радиои Озодӣ навишта, ки ба дасташ сабти садоие расида, ки Абдумаҷид Саидзода, додситон ё айбдоркунандаи давлатӣ аз додрас талаб кардааст, “озодии Шамсиддинов барои шаҳрвандон хатар дорад ва ба ҳабс кашида шавад.”
Яке аз иттиҳомҳои эълон гардида нисбати Шамсидинов аз ҷониби Додситонии ноҳияи Вахш фурӯши ғайриқонунии замин гуфта шудааст, аммо наздикон ва вакили мудофеаш гуфтааст, ки он замин дар замони падараш, ки ҳоло дар қайди ҳаёт нест, фурӯхта шудааст.
Файзи Олӣ вакили мудофеъ гуфтааст, “Дар мавриди харидуфурӯши ғайриқонунии замин ҳамаи ҳуҷҷатҳоро баррасӣ кардем. Заминро падараш фурӯхтааст, ки ҳоло дар ҳаёт нест. Имзои падараш дар ҳуҷҷатҳо ҳаст. Дар хусуси паҳн кардани маълумоти бардурӯғ нисбат ба прокурор, ягон маълумоти ғайриқонунӣ нашр накардааст. Бо такя ба ҳамин далелҳо ариза пешниҳод кардем”.
