Хадамоти зиддиинҳисории Тоҷикистон мегӯяд, ки дар шашмоҳаи аввали соли ҷорӣ воридоти орд 14,2% ва истеҳсоли орд дар дохили кишвар 35% коҳиш ёфтааст.
Имрӯз, 20-уми июли соли 2022, Сафаралӣ Қурбонзода, муовини якуми Сардори Хадамоти зиддиинҳисории Тоҷикистон дар нишасти матбуотиаш гуфт, ки тибқи оморҳои расмӣ, дар шаш моҳи аввали соли ҷорӣ ба ҳудуди Тоҷикистон 23,1 ҳазор тонна орд ворид шудааст.
Ба гуфтаи ӯ, ин ордҳои воридшуда, ба ҳисоби миёна бо нархи 354 доллари амрикоӣ барои як тонна ба ҳудуди гумрукии Тоҷикистон ворид шудаанд, ки нисбат ба ҳамин давраи соли гузашта 94 долларӣ сари ҳар тонна қиматтар будааст.
Инчунин муовини якуми Сардори Хадамоти зиддиинҳисории Тоҷикистон гуфт, дар ин давраи ҳисоботӣ 227,5 ҳазор тонна орд дар дохили кишвар истеҳсол шудааст, ки нисбат ба ҳамин давраи гузашт 35% камтар мебошад.
Хадамоти зиддиинҳисории Тоҷикистон таъкид мекунад, ки дар шаш моҳи аввали соли ҷорӣ ба ҳудуди гумрукии Тоҷикистон 374,2 ҳазор тонна гандум ба маблағи 119,3 миллион доллар ворид шудааст, ки ба ҳисоби миёна барои ҳар як тонна гандум 319 доллари амрикоӣ рост меояд. Ин омор ҳам нишон медиҳад, ки воридоти гандум низ ба ҳудуди гумгукии Тоҷикистон 67,3 ҳазор тонна ва ё худ 15,2% кам гардидааст.
Гуфта мешавад, Тоҷикистон ҳудуди 97,2% гандуми воридотии худро аз Қазоқистон харидорӣ мекунад ва ба гуфтаи Хадамоти зиддииҳисорӣ тоҷирон дар аввали соли ҷорӣ як тонна гандумро бо нархи 280-285 доллари амрикоӣ ворид мекарданд, вале дар ҳоли ҳозир воридоти ҳар як тонна гандум ба Тоҷикистонро 400-405 доллари амрикоӣ ташкил медиҳад.
