Яке аз аъзои аршад ва зиндонии сиёсии Ҳизби наҳзати нсломии Тоҷикистон аз зиндон озод шуд.
Сайидисҳоқ Бобоев, узви ҲНИТ, ки домулло Исломиддини Файзалиро аз наздик мешиносад, мегӯяд, ин зиндонии сиёсӣ 1-уми феврали соли 2025 аз маҳбас озод шудааст.
Домулло Исломиддини Файзалӣ дар оғози моҳи октябри соли 2020 аз манзили истиқоматиаш дар ноҳияи Шоҳмансури пойтахт тавассути мақомоти Тоҷикистон боздошт шуда буд.
Он замон гуфта мешуд, ки далели боздошти домулло Исломиддини Файзалӣ иштирок ва суханронӣ накардани ӯ алайҳи раҳбарони Ҳизби наҳзати исломии Тоҷикистон дар як филми сохтаи мақомоти амниятӣ зери унвони “Хиёнат” дониста мешавад.
Домулло Исломиддини Файзалӣ собиқ узви Раёсати олии Ҳизби наҳзати исломии Тоҷикистон ва яке аз кормадони илмии Академияи илми ин ҳизб буд.
Гуфта мешавад, мақомоти Тоҷикистон пас аз ҳодисаҳои хунини моҳи сентябри соли 2015 дар шаҳри Душанбе ба сурати густурда алайҳи раҳбарон ва фаъолони Ҳизби наҳзати исломии Тоҷикистон ҳамла карда, садҳо нафарро боздшоту бозпурсӣ ва мавриди шиканҷа қарор доданд. Сипас пушти дарҳои баста раҳбарони ин ҳизбро бо иттиҳоми даст доштан дар он ҳодисаҳо барои солҳои тӯлонӣ равонаи зиндон карданд. Иттиҳоме, ки раҳбарони ин ҳизб онро пурра рад карда, сабаби боздошту зиндонӣ карданҳоро ангезаи сиёсӣ унвон карданд.
