Агентии мубориза бо коррупсия аз боздошти зане бо иттиҳоми қаллобӣ хабар дод. Бино бар иттилои Агентӣ Минбоева Саодат Иззатовна, ки ба фурӯши чиптаҳои ҳавопаймо машғул будааст ба боварии чанд шаҳрванди Тоҷикистон даромада, даст ба қаллобӣ задааст.
Дар хабар гуфта мешавад, ки Минбоева шаҳрвандонро бовар мекунонад, ки бо дастрас намудани даъватнома барои табобат ворид шудани онҳоро ба ҳудуди Федератсияи Россия таъмин менамояд ва бар ивази ҳар як даъватнома маблағи 4000 сомонӣ муайян намуд.
Дар умум ӯ аз шаҳрвандон 16000 сомониро гирифта, даъватномаҳоро низ ба онҳо додааст. Вақте шаҳрвандони Тоҷикистон вориди фурудгоҳи байналмиллалии шаҳри Красноярски Федератсияи Русия мешаванд, ҳангоми санҷиши ҳуҷҷатҳо муайян мегардад, ки даъватномаҳо барои табобат қалбакӣ будаанд. Онҳоро ба Русия роҳ надода ба Ҷумҳурии Тоҷикистон бозпас мегардонанд.
Дар натиҷа Агентии назорати молиявӣ ва мубориза бо коррупсия нисбати Минбоева С.И. бо моддаҳои 247 қисми 2 бандҳои “б,в” ва 340 қисми 2 бандҳои “б,в” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда, тафтиши пешакии он идома дорад.
Ёдовар мешавем, ки моҳи марти соли гузашта парвозҳо аз Тоҷикистон ба Русия ба хотири ҷилавгирӣ аз паҳншавии коронавирус маҳдуд шуда буд. Бо гузашти беш аз як сол пас аз 1-уми апрел дубора иҷозаи парвоз ба Русия дода шуд.
Баъд аз кушода шудани марзҳо ва иҷозаи парвозҳо, шаҳрвандони Тоҷикистон аз бонкҳо қарз намуда, барои муҳоҷирати корӣ рафтан ба Русия чипта хариданд. Ҳамчунин сокинон аз нархи гарони чиптаҳо шикоят карда буданд.
Дар натиҷа Агентии авиатсияи гражданӣ парвози чанд ширкати русиро барои гуарон будани нархи чиптаҳо манъ карда буд ва аз сокинон хоста буд ба фиреби қаллобон наафтанд. Аммо дида мешавад, ки баъзе нафароне ҳастанд аз ин ҳолат истифода бурда, даст ба қаллобӣ мезананд.