35.9 C
Dushanbe

Журналисти шинохтаи тоҷик Мавлуда Рофиева дар Хуҷанд даргузашт

Мавлуда Рофиева, рӯзноманигори минтақавии “Азия-Плюс” рӯзи 13 октябр дар беморхонаи клиникии ба номи С.Қутбиддинов дар шаҳри Хуҷанд дар синни 57-солагӣ аз олам даргузашт.

Ин беморхона ба дармонгоҳи муолиҷаи беморони илтиҳоби шуш ва коронавирус мутобиқ гардонида шудааст. Далели марги ӯро дар Раёсати тандурустии вилояти Суғд тасдиқ намуда, лекин аз ҷузъиёти сабабҳои маргаш маълумот надоданд.

Ҳамкорон ва дӯстони ӯ хабар доданд, ки ҳафтае пеш Мавлуда аз сулфа, зукому шамолхӯрӣ ва нотавонии ҷисмаш шикоят дошт. Ӯ дар хона муолиҷа мегирифт, лекин пас аз бад шудани вазъи солимиаш дар бемористон бистарӣ шуд.

Ба гуфтаи ҳамкорон, Мавлуда ба солимии худ таваҷҷуҳи ҷиддӣ зоҳир мекард ва дар шароити пандемия ҳамаи чораҳои пешгириро риоя менамуд.

“Як ҳафта пеш мо бо ӯ телефонӣ суҳбат кардем, – мегӯяд дӯст ва ҳамкорӣ ӯ Муҳаббат Ҷӯраева. – Ӯ изҳор дошт, ки аллакай сиҳат шуда истодааст ва рӯзи душанбе ба кор мебарояд. Лекин воқеа чунин сурат гирифт, ки боиси таассуф аст. Мо натанҳо мутахассиси босаводи кори худу ташкилотчии моҳир, балки як зани ҷасуру ғаюр ва адолатхоҳро аз даст додем. Аз неру ва талошҳое, ки ӯ дошт, ҷавонон бояд сабақ бигиранд”.

Давоми фаъолият ба ҳайси намояндаи Анҷумани миллии воситаҳои ахбори оммаи мустақили Тоҷикистон (НАНСМИТ) дар вилояти Суғд ӯ тез-тез барои рӯзноманигорон мизҳои мудаввар ва чорабиниҳои ҳадафнок баргузор мекард.

Мавлуда Рофиева дар шаҳраки Адрасмон ба дунё омада, дар шаҳри Гулистон (Қайроққум) зиндагӣ мекард. Волидонаш зодагони деҳаи Бободархони ноҳияи Ашт мебошанд. Падараш 90-сола буда, ҳамроҳи писараш дар Гулистон умр ба сар мебарад.

Раиси ҷамоати шаҳраки Адрасмон Ориф Бобоҷонов хабар дод, ки барои анҷоми маросими гӯру чӯб оила омадани духтари Мавлударо, ки айни замон дар Маскав иқомат дорад, интизор аст.

Ба гуфтаи пайвандони марҳум, алҳол дар бораи дар куҷо гӯронидани ҷасади рӯзноманигор тасмиме гирифта нашудааст. Маросими гӯронидан зери назорати табибони санитарӣ баргузор мешавад.

Манбаъ: “Азия-Плюс”

Хабарро таблиғ кунед:

БЕШТАР БИХОНЕД
БЕШТАР БИХОНЕД

Мулоқоти сафири Тоҷикистон бо Додситони кулли Туркия

Ашрафҷон Гулов, домоди Эмомалӣ Раҳмон ва сафири Тоҷикистон дар Туркия, 8-уми июни соли ҷорӣ бо Додситони кулли Туркия Бекир Шоҳин мулоқот карда, ба густариши ҳамкориҳо таъкид кард.

Ифтитоҳи бузургтарин масҷиди Осиёи Марказӣ дар Тоҷикистон

Бузургтарин масҷиди Осиёи Марказӣ бо ҳузури Амири давлати Қатар Шайх Тамим ибни Ҳамад Оли Сонӣ ва Эмомалӣ Раҳмон, Президенти Тоҷикистон дар шаҳри Душанбе мавриди баҳрабардорӣ қарор гирифт.

Имзои 15 санади ҳамкорӣ байни Тоҷикистон ва Қатар

Маросими имзои 15 санади ҳамкорӣ байни Тоҷикистон ва Қатар бо ҳузури сарони ду кишвар дар шаҳри Душанбе баргузор шуд.

Идомаи боздошти муҳоҷирони тоҷик дар Русия

Нерӯҳои интизомии Федератсияи Русия субҳи имрӯз, 8-уми июн беш аз 27 муҳоҷири тоҷикро аз сохтмоне дар шаҳраки Котелникии вилояти Маскав боздошт карда, ба шуъбаи пулис бурдаанд.