Мақомоти корҳои дохилӣ ва амниятии Тоҷикистон бо гузашти 8 сол аз кушта шудани собиқ муовини аввали вазири мудофиа то ҳол фишорҳои худро алайҳи ворисони ӯ афзоиш медиҳанд.
Низомуддин Назаров, бародари хурдии собиқ муовини аввали вазири мудофиаи Тоҷикистон Абдуҳалим Назарзода, ки дар ғурбат ба сар мебарад, бо нашри як матлаб дар саҳфаи фейсбукиаш аз Кумитаи ҳуқуқи башари Созмони Милали Муттаҳид кумак хостааст.
Ба гуфтаи Низомуддин Назаров, “мақомоти корҳои дохилӣ ва амниятии Тоҷикистон таҳдиду фишорҳои худро болои хонаводаи онҳо ва ба хусус ҳамсару фарзандонаш аз нав шиддат бахшидаанд.”
Ин бародари Ҳоҷӣ Ҳалим аз тарси он ки мисли чор бародараш тавассути мақомоти Тоҷикистон кушта нашавад, дар хориҷ ба сар мебарад. Вай акнун аз раҳбари Кумитаи ҳуқуқи башари СММ хонум Мишел Бачелет ва дигар созмонҳои байналмилалӣ ҳомии ҳуқуқи башар хоҳиш карда, ки “барои наҷоти хонаводаи ман аз асорати 8-солаи режими тоҷик кумак кунед.”
Гуфта мешавад, ҳадаф аз шиддат бахшидани фишорҳо болои мухолифин ва наздикону пайвандони онҳо дар Тоҷикистон агар аз як сӯ тарс додани онҳо бошад, аз сӯи дигар рӯпӯш кардани бархе ҷиноятҳои сангин ва зидди башарии мақомоти Тоҷикистон аст, ки мехоҳанд ба сурати муваққат ҳам бошад аз ошкор шудани онҳо ҷилавгирӣ кунанд. Дар ин қазия низ мақомот қасди рӯпӯш кардани ҷиноятҳои худро доранд.
Ёдовар мешавем, ки сентябри соли 2015 байни низомиён ва дигар мақомоти Тоҷикистон дар дохили шаҳри Душанбе ва сипас дар шаҳри Ваҳдат задухӯрдҳои шадиде сурат гирифт ва дар натиҷа собиқ муовини аввали вазири мудофеа Абдуҳалим Назарзода ва ҳамроҳонаш кушта шуданд.
Мақомоти Тоҷикистон дар ҳамон ду ҳафтаи аввал садҳо нафарро боздошт ва даҳҳо каси дигарро низ бо баҳонаҳои мухталиф ба қатл расонид. Се бародари Абдуҳалим Назарзода ва чанди каси дигар аз наздикону пайвандон ва собиқ ёру дӯстонаш низ дар ҳамон рӯзҳои аввал ба сурати бераҳмона кушта шуданд.
Мақомоти Тоҷикистон дар раъси онҳо Эмомалӣ Раҳмон бо иттиҳоми он, ки Ҳизби наҳзати исломии Тоҷикистон дар ин ошӯб даст дорад, даҳҳо нафар аз раҳбарони онро боздошт ва пушти дарҳои баста ба муддатҳои тӯлонӣ равонаи зиндон кард, аммо раҳбарони ин ҳизб ин иддаои мақомоти Тоҷикистонро рад мекунанд ва онро як баҳонае барои аз саҳна рондани ин ҳизби сиёсӣ медонанд.
