Рӯзи 13-уми март баъд аз музокироти 7-соатаи Тоҷикистону Қирғизистон боз марзбонони қирғиз ба ҳавлаии як сокини деҳаи Сомониёни ҷамоати Чоркӯҳ 3 тир кушоданд.
Бино ба иттилои манбаи “Азия-Плюс”, нисфирӯзии 13-март тахминан соати 13:00 марзбонони қирғиз ба ҳавлии Наим Абдуллоев, сокини 39-солаи деҳаи Сомониён се тир холӣ кардаанд.
“Хонаи Наим Абдуллоев, наздик ба мактаби рақами 64-и деҳаи Сомониён ва дар рӯ ба рӯи масҷиди Абӯбакри Сиддиқ воқеъ аст. Аз се тири холикардаи марзбонони қирғиз, ду тир ба дарахти себи ҳавлии ин сокини деҳа, ки дар кӯчаи Сомониён 144 ҷойгир аст, расида, баъдан ба тарафи масҷид гузаштааст”,-омадааст дар хабар.
То ҳол дар бораи тирпарронии рӯзи 13-уми март, ки баъд аз музокироти тарафҳо рух додааст, мақомоти ду кишвар расман ҷизе нагуфтаанд.
Тиркушоии марзбонони Қирғизистон ба сӯйи ҳавлиҳои сокинон ва халалдор кардани оромии мардуми осоиштаи ноҳияи Исфара дар ҳолест рӯзи 12-уми март мақомоти ду ҷониб баъд аз даргирии рӯзи 10-уми март гирди мизи музокирот нишаста ба чанд масъала ба тавофуқ расида буданд. Аз ҷумла яке аз тавофуқоти ҳайати музокиракунандаи ҷонибҳо ин буд, ки дигар истифодаи силоҳ ва ноором кардани сокинон қатъиян манъ аст, магар дар ҳолатҳои махсус. Вале аз музокирот як рӯз ҳам нагузашта боз аз ҷониби марзбонони қирғиз тиркушоӣ мушоҳида шуд.
Ёдовар мешавем, ки рӯзи 10-уми март дар пайи тирпарронӣ миёни марзбонони тоҷику қирғиз як низомии нерӯҳои марзбонии Тоҷикистон кушта ва як сокини маҳаллӣ захмӣ шуд. Ва ҳамчунин шаби 11-уми март тахминан соати 01:20 нерӯҳои марзбонии Қирғизистон чанд маҳалларо дар Чоркӯҳ мавриди тирборон қарор доданд.
