Бо шиддат гирифтани нооромиҳо дар минтақаи Сувайдои Сурия, ки қисме аз сокинони онро дурзиҳо ташкил медиҳанд, ҳамалоти Исроил алайҳи Сурия афзоиш ёфтааст.
Бино ба иттилои расонаҳои хабарӣ, имрӯз, 16-уми июли соли 2025, нерӯҳои ҳавоии Исроил ҳамзамон бо ҳамла ба наздики қасри раёсати ҷумҳурӣ дар шаш навбат ба бино Ситоди кулли артиши Сурия низ ҳамла каранд.
Мақомоти Сурия бо маҳкум кардани ин ҳамалот мегӯянд, ҳамалоти нерӯҳои ҳавоии артиши Исроил ба хоки ин кишвар тайи се рӯзи ахир талафоти ҷонӣ ва хисороти зиёдеро ба бор оврадаанд.
Аз сӯи дигар расонаҳои исроилӣ ба нақл аз артиши ин кишвар эълон кардаанд, ки нерӯҳои ҳавоии Телавив аз дишаб то ҳол ба 160 ҳадафи худ дар Сурия, ки аксари онҳо дар Сувайдо ва атрофи он мебошанд, ҳамла кардаанд.
Илова бар ин, артиши Исроил ба ду баталёни худ дар Ғазза ва дигар маконҳо низ дастур додааст, ки ба Ҷулони ишғолӣ, минтақаи ҳаммарз бо Сурия бираванд, зеро артиши ин кишвар барои ҳамлаҳои иловагии худ дар Сурия омода мешавад.
Исроил мавҷи ҷадиди ҳамалоти худ алайҳи Сурияро аз замони рӯи кор омадани ҳукумати ҷадид бо раҳбарии Аҳмад Аш-Шаръ, раиси ҷумҳури феълӣ оғоз карда буд, аммо пас аз оғози нооримиҳои ахир дар Сувайдо, ки аксари сокинони он дурзиҳо мебошанд, онҳоро густариш додааст.
Гуфтанист, дурзиҳои Сурия ба монанди исмоилиҳо, алавиҳо, шиаёни дувоздаҳимомӣ, насрониҳо, ва яҳудиён гурӯҳе аз аққалиятҳои мазҳабӣ дониста мешаванд, ки як қисме аз онҳо дар он сӯи марзҳои Сурия дар Исроил зиндагӣ мекунанд. Исроил даъво дорад, ки ҳомии ақаллиятҳо, аз ҷумла дурзиҳо мебошад. Ба ҳамин баҳона, ахиран ҳамолоти худро алайҳи Сурия густариш додааст.
