Бо пешниҳоду Амрико ва миёнҷигарии давлати Қатар миёни Эрон ва Исроил оташбас барои поён додани ҷанг эълон шуд.
Шоми рӯзи 23-юми июни соли ҷорӣ Эрон дар посух ба ҳамлаи Амрико ба пойгоҳи низомии ин кишвар дар Қатар ба номи “Ал-Адид” бо 14 мушак ҳамла кард. Мақомоти қатарӣ гуфтанд, танҳо як мушак ба макони ғайримаскунӣ исобат кард, боқӣ 13 мушаки дигар роҳгирӣ шуд.
Дар пайи ин ҳамла Доналд Трамп дар шабакаи иҷтимоии “Truth social” эълон кард, ки баъд аз 6 соат оташбас миёни Исроил ва Эрон эълон хоҳад шуд. Трамп иддао кард, ки оташбас аввал аз ҷониби Эрон ва баъд аз ҷониби Исроил, дар қадами аввал 12 соат ва баъдан ба таври доимӣ амалӣ мешавад.
Лаҳзае баъд расонаҳои эронӣ ва бархе мақомдорони ин кишвар дар шабакаҳои иҷтимоӣ навиштанд, ки ин ҳиллаи Амрико ва Исроил аст ва онро бовар накунед. Аммо баъдтар ҳам ҷониби Эрон ва ҳам ҷониби Исроил расман ин пешниҳоди Трампро пазируфтанд ва соати 7-и субҳи имрӯз ба вақти маҳаллӣ оташбас амалан ба иҷро даромад.
Соате пас аз оғози оташбас Исроил эълон кард, ки ду мушак аз ҷониби Эрон партоб шуд, ва бо ин ҳамларо дигарбора ба Теҳрон оғоз кард. Аммо телевизиони давлатии Эрон хабар дод, ки ҳеч ҳуҷуме баъд аз эълони оташбас аз хоки Эрон ба сӯи Исроил сурат нагирифтааст.
Аммо таҳлилгарон бар ин назаранд, ки ба эҳтимоли зиёд Исроил аз ҳуҷуми ахири Эрон, ки лаҳзае пеш аз ҷорӣ шудани оташбас ба 6 нуқтаи Исроил сурат гирифт ва дар шаҳри Биъри Сабаъ 5 кушта ва 26 захмӣ ба ҷо гузошт, сахт асабонӣ шуд ва ба шакли сохта интиқо гирифт.
