Дар пасманзари ҷангҳои иқтисодии Амрико дар минтақа мардум нигарони зарар дидани иқтисоди Тоҷикистон ҳастанд.
Бар асоси гузориши нави Бонки Рушди Авруосиё, ҷангҳои тиҷоратии Иёлоти Муттаҳидаи Амрико таъсири мустақим ба кишварҳои узви Иттиҳоди иқтисодии Авруосиё, аз ҷумла ба Тоҷикистон ва Узбакистон нахоҳанд дошт. Аммо ин танишҳо метавонанд ба иқтисоди кишварҳои зикршуда таъсири ғайримустақим расонанд. Ин таъсир тавассути тағйироти нархҳо дар бозорҳои ҷаҳонии ашёи хом сурат мегирад.
Ба гуфтаи коршиносони БРА, барои баъзе кишварҳо нархи металлҳои ранга ва гаронбаҳо афзоиш ёфта, шароити иқтисоди хориҷӣ беҳтар мешавад, аммо барои кишварҳои дигар коҳиши нархи захираҳои энержӣ метавонад ба вазъи иқтисодӣ таъсири манфӣ расонад.
Ҳамзамон, беэътимодии глобалӣ ҷалби сармояи хориҷиро барои ҳамаи ин кишварҳо мушкилтар мекунад. Дар чунин шароит, рушд ва истифодаи “потенсиали дохилии сармоягузорӣ” метавонад омили калидии рушди иқтисодӣ гардад.
Бонки Рушди Авруосиё (БРА) пешгӯӣ кардааст, ки иқтисоди Тоҷикистон дар соли 2025 то 8,4% рушд мекунад. Ин нишондиҳанда (8%) бештар аз пешбинии ҳукумат аст.
Ба гуфтаи коршиносон, сабаби асосии ин рушд афзоиши содироти тилло, сармоягузорӣ дар сохтмон ва кам шудани харҷи воридоти энергия мебошад.
Ҳамзамон БРА мегӯяд, ки кишвари Тоҷикистон бо мушкилоти иқтисодӣ, аз ҷумла таваррум, кам шудани пулҳои муҳоҷирон ва ноустувории қурби сомонӣ рӯбарӯ хоҳад шуд.
Бонк тавсия медиҳад, ки Тоҷикистон бештар ба сармоягузориҳои дохилӣ такя кунад.
