Барои фаъолияти Маҷлиси намояндагони Маҷлиси Олии Тоҷикистон дар соли 2024 ба фарқ аз соли гузашта 212 ҳазору 540 сомонӣ бештар маблағ ҷудо гардидааст.
Дар ин бора “Азия-Плюс” дар истинод ба раиси Кумитаи назорати дастур ва ташкили кори парлумони кишвар Ҷамшед Муртазозода хабар додааст.
Бино ба иттилои манбаъ, вакилони палатаи поёнии парлумон, рӯзи 22-юми декабри соли 2023 “сметаи ягонаи даромад ва хароҷот” барои соли 2024-ро тасдиқ карда, буҷети умумии онро нагуфта буданд.
Аммо Ҷамшед Муртазозода гуфтааст, ки буҷети парлумони кишвар 27 млн 401 ҳазору 380 сомониро ташкил дода, ин маблағ барои 343 нафар вакилону кормандони он дар тули сол сарф мешавад.
Ин дар ҳолест, ки барои кори парлумони кишвар дар соли 2023 27 миллиону 188 ҳазору 840 сомонӣ ҷудо гардида буд, ки дар муқоиса бо буҷети соли 2022-и Маҷлиси намояндагон 6 млн сомонӣ бештар аст.
Инчунин барои фаъолияти Маҷлиси миллӣ, палатаи болоии парлумони Тоҷикистон, ки раҳбарии онро Рустами Эмомалӣ, шаҳрдори Душанбе ва писари раисҷумҳур Эмомалӣ Раҳмон ба уҳда дорад, 5 миллион сомонии дигар ҷудо шудааст.
Гуфта мешавад, бо вуҷуди маълум будани буҷаи парлумон маоши вакилон маълум нест. Ба ғайр аз маош, барои вакилон хона, мошини хидматӣ ҳам дода мешаваду дар духтурхонаҳо бепул табобат мегиранд.
Сокинони кишвар мегӯянд, ки бо вуҷуди доштани имтиёзҳои зиёд, ки он ҳам аз ҷайби мардум аст, вакилони парлумон бештар қонунҳои зиддимардумиро қабул мекунанду санадҳоеро ба тасвиб мерасонанд, ки хилофи манфиатҳои миллӣ аст.
Коршиносон мегӯянд, ки парлумон танҳо расмиятро ба ҷо меорад ва “намояндагони мардумӣ” бе мамониат ҳар санади фиристодашуда ё лоиҳаи қонуни ҳукуматро тасвиб мекунанд. Ба ибораи дигар, ҳукумат ин мақоми олии қуонунгузорро аз як дастгоҳи чопкунӣ боло намедонад. Яъне, ҳар чизе тақдим кунад, дар ҳол “намояндагони мардумӣ” онро бидуни ҳеч тағйиру иловае чоп карда, ба ҳукумат мефиристанд.
Бояд гуфт, мувофиқи Сарқонун вакилони парлумон дорои салоҳиятҳои васеъ ҳастанд, сар аз ташаббусҳои қонунгузорӣ то эълон кардани изҳори нобоварӣ ба раисҷумҳуру ҳукумат ва қатъ кардани фаъолияти онҳо. Аммо ба гуфтаи коршиносон дар амал вакилони парлумони тоҷик ҳатто аз фиристодани талаби оддие ба ягон кумита ё хадамоти назди ҳукумат метарсад.
Хонандагонии гиромии сомонаи Azda.tv, барои огоҳии бештар пайдо кардан, ки чӣ гуна вакилони ба ном мардумӣ интихоб мешаванду аз чӣ имтиёзҳо бархӯрдоранд ва кадом қонунҳову қарордодҳои зиддимардумиро имзо кардаанд, навори зерро тамошо кунед.
