16-уми июли соли 2025 Дар пойтахти Тоҷикистон таҳти раёсати Ҳаким Холиқзода, муовини якуми Сарвазири ҷумҳурӣ, ҷаласаи кумитаи тадорукоти Форуми байналмилалии сармоягузории “Dushanbe Invest-2025” баргузор шуд.
Чорабинӣ бо ҳадафи баррасии ҷанбаҳои омодагӣ ба форум, ки рӯзҳои 14 то 16 октябри соли 2025 баргузор мегардад, сурат гирифт. Форуми имсола таҳти шиори «Иқтисоди сабз имкониятҳои имрӯза барои фардои устувор» баргузор мешавад.
Ин чорабинии байналмилалӣ ба ҷалби сармоягузорони хориҷӣ, таблиғи имкониятҳои сармоягузорӣ дар бахши иқтисоди сабз ва таҳкими ҳамкорӣ бо ниҳодҳои молиявӣ ва тиҷоратии байналмилалӣ равона шудааст.
Дар ҷаласа масъалаҳои ташкилии баргузории форум, фароҳамсозии шароити мусоид барои иштирокчиён ва пешниҳоди лоиҳаҳои афзалиятноки сармоягузорӣ муҳокима гардиданд.
Мақомот изҳор доштанд, ки форум метавонад ба рушди босуботи иқтисоди миллӣ ва густариши равобити байналмилалӣ саҳми назаррас гузорад.
Бо вуҷуди талошҳо, муҳити сармоягузорӣ дар Тоҷикистон то ҳол пурра муносиб нест ва ниёз ба ислоҳоти амиқ дорад.
