Бо сабаби даргирии хонаводагӣ як мард дар Душанбе ҳамсари худро бо чанд зарби корд захмӣ кардааст.
Кормандони шуъбаи корҳои дохилии No2-и ШВКД-и ноҳияи Синои шаҳри Душанбе сокини 31-солаи пойтахт Бобомуродов Бобоҷонро ҳамчун гумонбар дар содир намудани ҷинояти хусусияти авбошӣ дастгир намуданд.
Дар ин бора аз Раёсати корҳои дохилии шаҳри Душанбе хабар доданд. Тибқи иттилои тафтишот, Бобомуродов 15-уми марти соли равон ҳангоми дар манзили истиқоматӣ дар кӯчаи Ҷавлибой бо ҳамсараш, сокини 38-солаи Душанбе Бобомуродова М., муноқишаи оилавӣ карда, ҳангоми муноқиша занро латтукӯб намуда, ба қисматҳои гуногуни баданаш чанд корд задааст. Дар натиҷаи ин ҳодиса ҷабрдида ҷароҳатҳои вазнин бардоштааст. Гумонбаршуда боздошт ва ба ҳабс гирифта шуд.
Феълан аз рӯи ин ҳодиса тафтишот идома дошта, нисбати марди боздоштшуда парвандаи ҷиноӣ боз шудааст. Мақомот гуфтаанд, барои муайян кардани тамоми ҳолатҳои ҳодиса кор бурда истодаанд.
Муноқишаи хонаводагӣ дар Тоҷикистон яке аз мавзуҳои доғ боқӣ монда, занҳои зиёде аз ин мавзуъ ба ниҳодҳои дахлдор шикоят мекунанд. Равоншиносон яке аз сабабҳои сар задани муноқишаи оилавиро фишорҳои равонӣ ношӣ аз вазъи иқтисодии хонавадаҳо ва камсаводиии шаҳрвандон медонанд.
