Имрӯз, 26-уми июли соли 2024, Мавлавӣ Муҳаммадалии Файзмуҳаммад, зиндонии сиёсӣ ва узви Раёсати олии Ҳизби наҳзати исломии Тоҷикистон дар умри 65-солагӣ дар зиндони шаҳри Ваҳдат аз олам даргузашт.
Тибқи хабарҳои расида, ин зиндонии сиёсӣ дар шароити хеле бад дар маҳбас нигаҳдорӣ мешуд ва аз бемориҳои қанду фишорбаландӣ ва қалб ранҷ мекашид. Дар гузашта борҳо хабари шиканҷа шудани ӯ, инчунин ба бемористон интиқол ёфтанаш расонаӣ шуда буд.
Бино ба иттилои манобеи “Ислоҳ. нет”, Мавлавӣ Муҳаммадалии Файзмуҳаммад пеш аз вафот ҳарду пойҳояш аз кор монда буданду роҳгашт наметавонист.
Бояд гуфт, Мавлавӣ Муҳаммадалӣ аввалин узви аршади ҲНИТ нест, ки бо сабаби шароити бади зиндонҳо, беморӣ ва бетаваҷҷуҳии масъулини зиндон мефавтад. Пештар аз ӯ Ҷалолиддини Маҳмуд, яке аз собиқадорон ва узви аршади ҲНИТ дар зиндони шаҳри Ваҳдат шаби 12-уми августи соли 2023 дар 63-солагӣ даргузашт.
Паймони миллии Тоҷикистон, эътилофи чанд созмони мухолифони тоҷик дар хориҷ аз кишвар зимни нашри изҳороте марги Ҷалолиддин Маҳмудро ба “муносибати зиддиинсонӣ”-и мақомоти зиндонҳои кишвар марбут дониста буд.
Инчунин Саттор Каримов маъруф ба махдуми Саттор, узви Раёсати олии ҲНИТ рӯзи 19-уми майи соли 2019 дар зиндони “Кирпичний” шаҳри Ваҳдат кушта шуда буд.
Ёдовар мешавем, ки Муҳаммадалии Файзмуҳамад ҳамроҳ бо 12 узви дигари Раёсати олии ҲНИТ моҳи сентябри соли 2015 аз ҷониби мақомот боздошт ва бо иттиҳомҳои сохта барои 23 сол равонаи зиндон гардид.
Созмонҳои байналмилалӣ, аз ҷумла СММ борҳо аз мақомоти Тоҷикистон раҳоии беқайду шарти ӯ ва ҳамраҳонашро хоста буданд, аммо мақомот ин талаби созмонҳоро ҳамеша нодида гирифтааст.
Муҳаммадалии Файзмуҳамад то боздошт раиси Комиссияи тафтишоти ҲНИТ буд. Ин зиндонии сиёсӣ дар гузашта узви Комиссияи оштии миллӣ буд ва дар барқарори сулҳ дар Тоҷикистон саҳми арзанда дошт.
Мавлаӣ Муҳаммадалӣ дар ҷомеаи Тоҷикистон бар иловаи чеҳраи сиёсӣ будан, ҳамчун фақеҳ ва олими динӣ низ машҳур буд. Ӯ дар ҷавонӣ назди Мавлавӣ Муҳаммадҷони Ҳиндустонӣ низ таълим гирифтааст.
