Дар шабакаҳои иҷтимоӣ наворе паҳн гашта, ки аз шароити бисёр сахти як мактабе нақл мекунад, ки бо як хайма сохта шудааст.
Гуфта мешавад, ин мактаби зери хайма дар деҳаи Сафедоби ноҳияи Тоҷикобод, сохта шуда, хонандагон дар зери он дарс мехонанд. Дар навор дида мешавад, ки тақрибан барои 12 донишомӯз дар зери хаймаи содда дар рӯи замин ҷойкарда шудааст, ки ин шароит ба талаботи бехатарӣ ва саломатии кӯдакон ҷавобгӯ нест.
Ин ҳолат дар остонаи Рӯзи байналмилалии ҳифзи кӯдакон, ки 1-уми июн таҷлил мешавад, нигаронии зиёдеро ба миён овардааст. Баъзе шаҳрвандон изҳор медоранд, ки дар чунин шароит дарс хондани кӯдакон барои саломатии онҳо хатарнок аст ва ҳукумат бояд шароити беҳтареро барои таълими онҳо фароҳам созад.
Ба гуфтаи баъзе корбарон, мактаби асосии деҳа пас аз заминларза хароб шудааст ва хайма ҳамчун мактаби муваққатӣ истифода мешавад, то ки донишомӯзон аз таълим дур намонанд.
Бо вуҷуди ин, норозиён бар онанд, ки ҳукумат метавонист шароити беҳтареро, масалан, хонаи муваққатии (вагон) бо шароити беҳтар, барои таълими кӯдакон муҳайё созад.
Ин ҳолатро корбарон ба минтақаҳои ҷангзадаи ҷаҳон ташбеҳ кардаанд, ки кӯдакон дар шароити душвор, аз ҷумла дар хаймаҳо, таҳсил мекунанд.
Коршиносон мегӯянд, шароити беҳтар муҳайё сохтан барои донишомӯзон масъулияти Вазорати маориф ва илми Тоҷикистон аст, вале ин ниҳод яке аз фасодтарин ниҳодҳои ҳукумат башумор рафта, ҳамеша мавриди интиқод ҷомея қарор мегирад.
