Бино ба иттилои манобеи Azda tv, мақомоти Кореяи Ҷанубӣ дар ин чанд рӯзи ахир бархе аз муҳоҷирони тоҷикро дастаҷамъона боздошт ва аз ин кишвар ихроҷ кардаанд.
Имрӯз, 15-уми апрел як манбаъ бо шарти зикр нашудани номаш ба Azda tv гуфт, ки мақомоти кишвари Кореяи Ҷанубӣ чанд муҳоҷири кории тоҷикро, ки чанд сол боз дар ин кишвар кор мекарданд, ихроҷ карда ва як нафари дигарро аз фурӯдгоҳ роҳ надодаанд, ки ба ин кишвар ворид шавад ва ӯро ба Душанбе бозпас фиристодаанд.
Манбаъ афзуд, ки ҳоло тамоми сохторҳои қудратии ин кишвар дастур гирифтаанд, ки тоҷиконро боздошт ва ихроҷ кунанд. Дар ин шабу рӯзҳо муҳоҷирони тоҷик аз тарси ихроҷ нашудан аз хонаҳо намебароянд. Ба гуфтаи онҳо, агар ба кӯча бароянд шояд аз тарафи пулис боздошт ва ихроҷ мешаванд, дар ҳоле, ки баъзе онҳо аз бонкҳо қарздоранд ва намехоҳанд дар ин вазъият ихроҷ шаванд.
Аммо то ҳанӯз барои Azda tv муяссар нашуд, ки хабарро аз роҳҳои расмӣ тасдиқ кунад. То ҳол дар ин бора на ҷониби Тоҷикистон ва на Кореяи Ҷануби изҳороте нашр накардаанд.
Azda tv аз хонандагон ва бахусус муҳоҷироне, ки дар ин кишвар қарор доранд, хоҳиш мекунад, ки ҳар маълумоте дар ин бора дошта бошанд, ба унвонии расона бифиристанд, то маълумоти онҳо дар матлабҳои баъдӣ илова шавад.
Ёдовар мешавем, ки пас аз ҳодисаи хунини Маскав, ки тоҷикон гумонбарони аслии он ҳастанд, вазъи муҳоҷирон дар Русия ва баъзе кишварҳое, ки шаҳрвандони Тоҷикистон дар он ҷойҳо кору зиндагӣ мекунанд, ногувор шуда, ҳатто бидуни далел ихроҷ мешаванд.
