Масъулони шаҳри Душанбе мехоҳанд бо гузарондани корҳои фаҳмондадиҳӣ миёни мардум мушкилии партовҳои пойтахтро бартараф кунанд.
Дар ин бора рӯзи 26-уми июл муовини раиси шаҳри Душанбе Толиб Раҳимзода зимни нишасти матбуотӣ ба рӯзноманигорон хабар дод.
Раҳимзода дар ин нишаст ифлосшавии кӯчаҳои пойтахтро эътироф кард, аммо ба ҷуз корҳои фаҳмондадиҳӣ дар бораи тадбирҳо барои бартараф намудани ин мушкилӣ чизе нагуфт.
Муовини Рустами Эмомалӣ гуфтааст, дар 6 моҳи аввали соли ҷорӣ нисбати шаҳрвандоне, ки партовҳоро дар ҷойҳои барои он пешбининашуда мепартоянд, 806 протокол тартиб додаанд.
Инчунин дар ин муддат аз ҷониби Кумитаи ҳифзи муҳити зист 71 аксияи рӯбучин ва тозакунии маҳаллаҳо, 43 аксияи “Соҳили тоза”, инчунин 63 аксияи “Тозагии роҳҳо” гузаронида шудааст.
Ба иддаои Раҳимзода дар пойтахти кишвар 18 ҳазору 600 контейнери ҷамъоварии партов, аз ҷумла 563-то дар назди хонаҳои баландошёна гузошта шудааст ва баҳори имсол дар 50 нуқтаи ҷамъоварии партови шаҳри Душанбе камераҳои назоратӣ насб кардаанд.
Дар ҳоле масъалаи мушкилии партовҳо дар Душанбе дар нишасти матбуотӣ бо иштироки мақомдорон бардошта мешавад, ки сокинони пойтахт тозагии шаҳри Душанберо хело “ташвишовар” мегӯянд.
Ба гуфтаи сокинон, пештар партовҳоро дар як хафта як ё ду бор аз пеши хонаҳои истиқоматӣ ва партовгоҳои шаҳр тоза мекарданд, аммо ҳоло дар ин гармии ҳаво дар як моҳ як ё ду бор тоза мекунанд, ки ин боиси касалиҳои сироятӣ ва хатар ба саломатии сокинони шаҳр мебошад.
Гуфта мешавад, раҳбарии шаҳрдории Душанберо Рустами Эмомалӣ, писари раисҷумҳур Эмомалӣ Раҳмон аз соли 2017 бар дӯш дорад ва сокинони шаҳр аз мудирияти ӯ ба шиддат интиқод карда, мегӯянд, ки наметавонад мушкилоти шаҳрро бартараф кунад.
