Артиши Исроил ба сӯи анбуҳи аҳолии осоиштаи Ғазза, ки барои ба даст овардани орду ғизо ҷамъ омада буданд, тир кушод, ки дар натиҷа садҳо нафар кушта ва захмӣ гаштанд.
Субҳи рӯзи панҷшанбе, 29-уми феврал дар кӯчаи назди соҳилии Рашиди Навори Ғазза сокинони зиёд барои дарёфти орду ғизо ба назди мошинҳои ҳомили кумакҳои инсонӣ рафтанд, вале нерӯҳои Исроил ба сӯи онҳо тир кушоданд, ки дар натиҷа беш аз 112 нафар ҷон бохта, 760 нафари дигар захмӣ шуданд.
Бархе расонаҳо гуфтаанд, ки дар натиҷаи издиҳоми шадиди мардум мошинҳои боркаш чанд нафарро зер кардааст. Аммо артиши Исроил мегӯяд, мардум ба пойгоҳи низомии онҳо наздик омаданд, маҷбур шуданд ба сӯи онҳо тир кушоянд, касеро онҳо қасдан накуштанд, балки мардум ҳангоми гурехтан якдигарро зер кардаанд, ки дар натиҷа чанд нафар ҷон бохтааст.
Вале наворҳои нашршуда аз ин ҳодиса нишон медиҳад, ки ҳеч мошини боркаши ҳомили маводи ғизоӣ касеро зер накардааст ва мардум ҳам якдигарро зери по накардаанд, балки садои шиллику таркиш шунида мешавад. Ва низ дар наворҳо дида мешавад, ки аз бадани кушташудаҳо хун ҷорӣ аст, ки баёнгари оташ кушодани нерӯҳои исроилӣ ба сӯи мардуми осоишта аст.
Дар ҳамин ҳол, бархе расонаҳо аз манобеи расмии фаластинӣ менависанд, ки мардум аз гуруснагӣ ранҷ мебаранд. Гуфта мешавад, аллакай чанд кӯдак ба сабаби гуруснагӣ дар Ғазза ҷони худро аз даст доданд. Шуруъ аз Созмони Милали Муттаҳид то давлатҳои дуру наздик қаблан аз хатари гуруснагӣ ҳушдор медоданд, вале ба гуфтаи таҳлилгарон, то ҳол ҳеч кишвар ва ё созмоне барои пешгирии он кори амалие анҷом надодааст.
Коршиносон Исроилро ба он муттаҳам мекунанд, ки чун дар давоми 5 моҳ натавониста ба аҳдофи эълонкардааш даст ёбад, дар баробари куштори занону кӯдакон ва тахриби хонаву роҳҳо, қасдан гуруснагиро низ ҳамчун силоҳ алайҳи мардуми Ғазза истифода мебарад.
Вазорати беҳдошти Фаластин мегӯяд, дар натиҷаи бомборонҳои бетаваққуфи Исроил болои мардуми Ғазза шуруъ аз 7-уми октябри соли 2023 то имрӯз беш аз 30 ҳазор нафар ҷон бохтаанд, ки 70 дарсади онҳоро занону кӯдакон ва пиронсолон ташкил медиҳанд.
