HRW дар нома ба Байден аз нақзи ҳуқуқи башар дар кишварҳои Осиёи Марказӣ гуфт

Аз ҷониби

-

19/09/2023

Дидбони Ҳуқуқи Башар (HRW) бо нашри изҳороте аз Ҷо Байден, раисҷумҳури Иёлоти Муттаҳидаи Амрико хост, дар мулоқот бо раҳбарони панҷ кишвари Осиёи Марказӣ масъалаи ҳуқуқи инсонро дар маркази музокирот қарор диҳад.

Гуфта мешавад, чанде пеш Ҷо Байден, Президенти Амрико бо ирсоли номаи расмӣ аз сарони кишварҳои Осиёи Марказӣ, аз ҷумла Эмомалӣ Раҳмон хоста буд, ки барои ширкат дар Вохӯрии сарони давлатҳои “Осиёи Марказӣ – ИМА”, ки қарор аст дар ҳошияи иҷлосияи 78-уми Маҷмаи умумии Созмони Милали Муттаҳид дар шаҳри Ню-Йорк баргузор гардад, иштирок намоянд.

Дар изҳороти Дидбони Ҳуқуқи Башар, ки рӯзи 18-уми сентябр нашр шудааст, Искра Кирова, мудири бахши Аврупо ва Осиёи Марказӣ дар ин созмон мегӯяд, Амрико ва Иттиҳоди Аврупо баъд аз ҳамлаи Русия ба Украина дар пайи мустаҳкам кардани робита бо кишварҳои Осиёи Марказӣ ҳастанд ва аз ҳукуматҳои Осиёи Марказӣ даъват мекунанд, ки ба кӯшишҳои Маскав барои истифода аз роҳҳои тиҷоратӣ тавассути Осиёи Марказӣ муқовимат кунанд.

Ба гуфтаи ӯ, ин вазъ набояд ба масъалаи доғи ҳуқуқи башар соя андозад ва давлатҳои ғарбӣ бояд дар пайи кафолати волоияти қонун ва ҳуқуқи башар дар минтақа бошанд.

Инчунин ба гуфтаи ӯ, “Байден бояд қадамҳои мушаххасро барои хотима додан ба таъқиботи дорои ангезаи сиёсӣ, саркӯби озодии баён, беҷазо мондани шиканҷа ва бераҳмии полис аз раҳбарони Осиёи Марказӣ талаб кунад”.

Дар изҳороти HRW аз чанд мавриди ҷиддии поймол шудани ҳуқуқи одамон дар кишварҳои Осиёи Марказӣ ёдоварӣ шудааст. Аз ҷумла, дар он аз саркӯби эътирозҳои моҳи январи соли 2022 дар Қазоқистон, дур шудани Қирғизистон аз ҷойгоҳи қаблии худ ба ҳайси кишвари дорои фаъолтарин ҷомеаи шаҳрвандӣ ва расонаҳо дар минтақа, аз Туркманистон ҳамчунон як кишвари пӯшида ва саркӯбгар дар ҷаҳон ва аз гузаронида нашудани ислоҳоти сиёсӣ дар Узбекистон мисол оварда шудааст.

Инчунин коршиносони Дидбони Ҳуқуқи Башар мегӯянд, ки мақомоти Тоҷикистон дар солҳои 2021-2022 эътирозҳои осоиштаро дар Вилояти Мухтори Кӯҳистони Бадахшон бераҳмона пахш карданд ва алайҳи ҳомиёни ҳуқуқи башар бо иттиҳомҳои сохта парванда кушода, аз онҳо қасос гирифтанд, ичнунин бисёре аз созмонҳои иҷтимоиро аз байн бурданд.

Дар изҳорот гуфта шудааст, ки агар ҳуқуқ ва дархостҳои қонунии аксар шаҳрвандони Осиёи Марказӣ кафолат дода нашаванд, суботи дарозмуддат дар минтақа зери хатар аст.

Таҳдид зиндон барои навиштани “Ҷумъа муборак” дар Тоҷикистон

Аз ҷониби

AZDA.TV

-

19/09/2023

0

Мақомоти Тоҷикистон аз ин ба баъд ирсоли паёмаки “Ҷумъа муборак”-ро дар Тоҷикистон ҷурм дониста, барои он то ҷарима ва ҳатто ҳабсро пешбинӣ кардаанд.

Рӯзи 19-уми сентябри соли ҷорӣ ба дасти Azda tv чанд сабти садоие расид, ки шаҳрвандон аз вилояти Хатлон ба наздиконашон ҳушдор медиҳанд, ки рӯзҳои ҷумъа ба онҳо паёмаки “Ҷумъа муборак” нафиристанд, зеро имкон дорад бо баҳонаи ин паёмак онҳо зиндонӣ шаванд.

Дар як сабти садо гуфта мешавад, кормандони амниятӣ ва интизомии кишвар дар вилояти Хатлон хона ба хона гашта, шаҳрвандонро ҳушдор додаанд, ки рӯзҳои ҷумъа ба ҳамдигар фиристодани паёмакҳои “Ҷумъа муборак” ва ё дигар навъи табрикоти исломӣ ва саловат фиристодан ба Паёмбари ислом мамнуъ эълон шудааст.

“Имрӯз эълон карданд, овардан коғазҳоро имзо кардем, қонун бароварданд, ки ба ҳамдигаратон “Ҷумъаи саид муборак” ва дигар чизҳои мусалмонӣ фиристодан манъ шудааст. Дигар нафиристед ин паёмакҳоро, ки мушкиламон мешавад“, гуфта мешавад дар як сабти садо.

То ҳол Azda tv натавонист ин хабарро аз манобеи дигар тасдиқ кунад, таҳқиқи он идома дорад. Вале маълум нест ин навъи паёмак мутобиқи кадом қонуни ҷиноии кишвар ҷурм дониста шуда, фиристонандаи он ҳатто ба ду соли ҳабс муҷозот мешавад.

Ҳамчунин аз бинандагон ва мухотабони гиромӣ хоҳиш мешавад, ки агар дар ин бора чизе медонад ва ё мақомот онҳоро низ таҳдид карда бошад, метавонад маълумотро ба рақами Azda tv (+48571608008) дар вотсап ирсол кунанд. Ҳувияти ирсолкунанда пурра махфӣ мемонад.

Сохти беш аз 100 дидбонгоҳи марзии ҷадид

Аз ҷониби

AZDA TV-2

-

19/09/2023

0

Толибон дар марз байни Афғонистон ва кишварҳои ҳамсояи он зиёда аз 100 дидбонгоҳи марзии нав сохтанд.

Бино ба иттилои расонаҳои Афғонистон, Толибон аз замони дубора сари қудрат омадан дар ин кишвар зиёда аз 100 дидбонгоҳи марзии ҷадид сохта ба итифода додаанд.

Ба қавли ин онҳо, ин дидбонгоҳҳои ҷадид бо дастури вазири дифои ҳукумати муваққати Толибон дар Афғонистон дар дарозоии хатти марзии маконҳое сохта шудаанд, ки дар гузашта мавриди ҳамлаи марзбонони покистонӣ қарор мегирифтанд.

Толибон гуфтаанд, ки маконҳое дар онҳо дидбонгоҳҳои ҷадид сохта шудааст, ҷойҳое дониста мешаванд, ки дар замони ҳукуматҳои қаблии Покистон ҷониби Афғонистон иҷозаи сохтани чунин посгоҳҳро надоштанд.

Пеш аз ин дар солҳои гузашт марзбонони Покистон ба иддаои таҳкими субот дар марзҳои худ бо Афғонистон қисматҳои зиёдеро дар ин хатти марзӣ бо симхор ҳисоркашӣ карда буданд.

Гуфта мешавад, Афғонистон дар ҷануб ва шарқ ҳамсояи Покистон аст. Марз байни ин ду кишварро хатти Дюрванд (Durand Line) ташкил медиҳад, ки он соли 1893 тибқи як муоҳада муайян шудааст. Дарозоии ин хат ҳудуди 2 ҳазору 630 километрро ташкил медиҳад.

Муоҳадаи “Хатти Дюрванд” тавассути Амир Абдураҳмон Хон аз Афғонистон ва аз сӯи дигар Котиби маъмурияти мустамликавии Хиндустон Мортимер Дюранд барои васеъ кардани паҳнои сарзамини Ҳиндустон ба имзо расида буд. Аммо аз замони таъсиси Покистон дар соли 1947, ки бахше аз Ҳиндустон буд, то ҳол ҳукуматҳои Афғонистон онро қабул надорад.

Мулоқоти Эмомалӣ бо Дабири кулли СММ

Аз ҷониби

AZDA.TV

-

19/09/2023

0

Раисҷумҳури Тоҷикистон Эмомалӣ Раҳмон дар Ню-Йорк бо Дабири кулли Созмони Милали Муттаҳид Антониу Гутерриш мулоқот кард.

Ба иттилои АМИТ “Хоавар”, ин мулоқот рӯзи 18-уми сентябри соли ҷорӣ дар ҳошияи 78-умин нишасти Маҷмаи умумии Созмони Миалали Муттаҳид дар шаҳри Ню-Йорки Амрико сурат гирифтааст.

Гуфта мешавад, ҷонибҳо дар ин дидор масоили ҳамкории Тоҷикистон ва СММ ва инчунин ниҳодҳои онро мавриди баррасӣ қарор додаанд. Эмомалӣ таъкид карда, ки Тоҷикистон барои густариши равобит бо СММ аҳаммияти зиёде қоил аст ва онро яке аз шарикони калидии худ дар арсаи байналмилалӣ медонад.

Аммо ин дар ҳолест, ки ба қавли мухолифони ҳукумати Эмомалӣ, борҳо Кумитаи ҳуқуқи башари СММ ва дигар созмониҳои байналмилалии ҳомии ҳуқуқ аз Тоҷикистон озодии фаврии зиндониёни сиёсӣ, эътиқодӣ ва рӯзноманигорону озоданшеонро, ки бегуноҳ зиндонӣ шудаанд, талаб карда буданд, аммо дар ҳеч мавриде, Раҳмонов талаби СММ-ро иҷро накардааст. Ва боз дар ин дидор таъкид карда, ки дар робита бо ин созмони ҷаҳонӣ эҳтироми зиёд қоил аст.

Ба иттилои манбаъ, инчунин ҷонибҳо дар бораи мушкилоти иқтисодӣ, иҷтимоӣ, сиёсӣ ва амниятии ҷомеаи байналмилалӣ, аз ҷумла танишҳои геополитикӣ, даргириҳои мусаллаҳона, таҳдидҳои терроризму ифротгароӣ, буҳронҳои иқтисодӣ ва молӣ, тағйироти иқлимӣ ва ғайра гуфтугӯ кардаанд.

Яке аз мавориди муҳими ин мулоқот гуфтугӯ дар мавриди Афғонистон будааст. Эмомалӣ бо Гутерриш на дар мавриди хатари Толибон ва таҳдид ба амнияти кишвар, балки дар мавриди кумакҳо ба ҳамсоя ва ҳусни таъомул гуфтааст. Ӯ таъкид карда, ки Тоҷикистон бо тамоми тавон кумакҳои башардӯстонаи худро ба кишвари ҳамсоя мерасонад. Аз ҷумла, Эмомалӣ Раҳмон ифтитоҳи бозорчаҳои марзиро ҳамчун далели кумак ба кишвари ҳамсоя зикр кардааст.

Озодии 10 зиндонӣ бо пардохти 6 миллиард доллар

Аз ҷониби

AZDA TV-2

-

18/09/2023

0

10 нафар аз зиндониёни эронӣ ва амрикоӣ бо “пардохт”-и 6 миллиард доллар озод шуданд.

Бино ба иттилои расонаҳои эронӣ, раиси Бонки марказии Эрон эълон кардааст, Қатар 6 миллиард доллари озодшудаи Эронро дар ҳисоби 6 бонки ин кишвар вориз кардааст.

Ба қавли ББС, ин 6 миллиард долллари озодшуда, пули фурӯши нафти Эрон буданд, ки бар асоси таҳримҳои Амрико дар Кореаи Ҷанубӣ банд монда буданд, пас аз талошу музокироти зиёд нахуст ба Қатар ва сипас ба бонкҳои Эрон таҳвил дода шуданд.

Пеш аз ин мақомоти Амрико 5 нафар эрониро бо иттиҳоми дур задани таҳрим боздошт ва зиндонӣ карда буданд. Ҳамчунин аз сӯи дигар, мақомоти Эрон низ 5 нафар эрониёни дорои душаҳрвандӣ-Эрон ва Амрикоро боздошт ва зиндонӣ карда буданд.

Гуфта мешавад, чанде қабл Эрону Амрико бо миёнаравии Қатар ва чанд кишвари дигар ба тавофуқ расиданд, ки дар ивази 6 миллаирд доллари масдуд шудаи Эрон дар Кореаи Ҷанубӣ Амрико 5 нафар зиндонии эронӣ ва Эрон ҳам 5 нафар эронии зидонии дорои душаҳрвандиро озод мекунанд.

Имрӯз пас аз вориз шудани пулҳои озодшудаи Эрон ба ҳисоби 6 бонки эронӣ ҳавопаймои Қатар низ вориди Теҳрон шуд то зиндониёни амрикоиро аз Теҳрон ба Давҳа интиқол диҳад.

Зеленский ҷаҳонро аз оғози ҷанги ҷаҳонии сеюм ҳушдор дод

Аз ҷониби

AZDA.TV

-

18/09/2023

0

Владимир Зеленский, раисҷумҳури Украина 17-уми сентябр дар мусоҳибае бо телевизиони амрикоии CBS гуфт, ки шикасти Украина дар ин ҷанг ба маънои оғози ҷанги ҷаҳонии сеюм хоҳад буд.

Раисҷумҳури Украина дар остонаи баргузории нишасти навбатии Маҷмаи умумии Сзмони Миллали Муттаҳид дар Ню-Йорк Владимир Путин, раисҷумҳури Русияро бо Гитлер муқоиса карда, қудратҳои ҷаҳониро аз сар задани ҷанги ҷаҳонии сеюм тавассути ӯ ҳушдор дод.

Зеленский дар барномаи “60-дақиқа”-ии ин шабака гуфт, ки Русия эътиборашро дар сатҳи ҷаҳонӣ аз даст додааст. “Онҳо Путинро интихоб карда ва аз ӯ як Гитлери дигар парвариш додаанд“, афзуд ӯ. Раисҷумҳури Украина ҳамчунон таъкид кард, ки наметавон замонро ба қафо бозгардонд, аммо метавон Путинро мутаваққиф кард.

Валидимир Зеленский дар ин мусоҳиба афзуд, агар Украина дар ин ҷанг шикаст бихӯрад, Русия чанде пас по ба Лаҳистон мегузорад ва агар русҳо ба Лаҳистон бирисанд, ҷанги ҷаҳонии сеюм шуруъ хоҳад шуд. Ӯ гуфт, бо ин далел пеши роҳи тамоми қудратҳои ҷаҳонӣ ба ҷуз ду роҳ дигар роҳе вуҷуд надорад, ё тасмим мегиранд Путинро шикаст бидиҳанд ва ё ин ки ҷанги ҷаҳонии сеюме оғоз шавад.

Раисҷумҳури Украина дар ҳоле аз вуқуи эҳтимолии ҷанги ҷаҳоние дунёро ҳушдор медиҳад, ки қарор аст аз фардо, 19-сентябр то як ҳафта дар Ню-Йорк 78-умин иҷлоси Маҷмаи умумии Созмони Милали Муттаҳид бо ҳузури раҳбарони беш аз 140 давлати дунё оғоз шавад.

Гуфта мешавад, яке аз масоили мавриди баррасӣ дар ин нишасти ҷаҳонӣ масъалаи ҷанг дар Украина низ хоҳад буд. Аммо ба андешаи коршиносон, ҳоло баъид аст, ки қудратҳои ҷаҳонӣ битавонанд оташи ин ҷангро хомӯш кунанд.

Freedom Now озодии маҳбусони сиёсии тоҷикро талаб кард

Аз ҷониби

AZDA-TV

-

18/09/2023

0

Созмони “Freedom Now” аз мақомоти Тоҷикистон хост, ки Маҳмадалӣ Ҳаит ва дигар раҳбарони зиндонии Ҳизби наҳзати Исломии Тоҷикистонро фавран озод кунанд.

Freedom Now, як созмони ҳуқуқии мустақар дар Вашингтон рӯзи 16-уми сентябр дар ҳисоби X (собиқ твиттер)-и худ аз раҳбарони зиндонии ҲНИТ ёдовар шуда, навиштааст, ки “8 сол пеш Тоҷикистон Маҳмадалӣ Ҳаит, раҳбари мухолифони сиёсӣ ва 12 ҳамкасбашро бо иттиҳоми сохта боздошт карданд. Онҳо бо вайрон кардани қонунҳои байналмилалӣ то ҳол дар зиндон боқӣ мемонанд. Мо даъват мекунем, ки онҳо фавран ва бечунучаро озод карда шаванд”.

Ёдовар мешавем, ки Маҳмадалӣ Ҳаит ҳамроҳи дигар аъзоёни аршади ҲНИТ 16-уми сентябри соли 2015 боздошт шуд.

Дертар яъне, моҳи июни соли 2016 пушти дарҳои баста дар Боздоштгоҳи муввақатии шаҳри Душанбе додрас Сатторзода А, ки он замон муовини раиси Додгоҳи олии кишвар буд, ҳукми ноодилона ва сангини аъзои боздоштшудаи ин ҳизбро эълон кард. Бо ҳукми ӯ, аз ҷумла муовинони раиси ҲНИТ Саидумар Ҳусайнӣ ва Маҳмадалӣ Ҳаит ба ҳукми абад, Раҳматуллоҳи Раҷаб, Қиёмиддин Аввазов, Абдуқаҳҳори Давлат ба 28 соли зиндон, Зарафо Раҳмонӣ, ки дар ҷараёни мурофиа ба зидди аъзои дигари раёсати ҲНИТ баёнот дода буд, ба 2 сол ва дигарон аз 14 то 26 солӣ равонаи зиндон шуданд.

Гуфта мешавад, ҷараёни тафтиши парвандаи аъзои ҲНИТ ба таври махфӣ сурат гирифта буд ва дар рафти он шоҳидон ва боздоштшудаҳо мавриди фишору шиканҷаи фаровони мақомоти кишвар қарор гирифта буданд.

Мақомот сабаби боздошт ва зиндонӣ кардани аъзои аршади ҲНИТ-ро тавре шарҳ медиҳанд, ки гӯё ин ҳизб ва раҳбаронаш дар ошӯби нофарҷоми Абдуҳалим Назарзода, муовини собиқи вазири дифои Тоҷикистон, ки 4-уми сентябри соли 2015 сурат гирифт ва даҳҳо нафар кушта шуд, даст доранд. Аммо борҳо раҳбарияти ҲНИТ ва худи боздоштшудаҳо иттиҳоми мақомотро рад карда, онро барои дур кардани ин ҳизб аз саҳнаи сиёсии кишвар ва зиндонӣ кардани аъзои он номида буданд.

Дар ин муддат борҳо созмонҳои байналмиллалӣ, аз ҷумла Созмони Милали Муттаҳид, Иттиҳоди Аврупо ва дигар созмонҳои ҳуқуқибашарӣ аз Ҳукумати Тоҷикистон талаб карда буданд, ки зиндониёни сиёсии ҲНИТ, Гурӯҳи 24, Бузургмеҳр Ёров, Зайд Саидов, Маҳмадрӯзи Исканадаров ва дигар фаъолони сиёсиро фавран озод кунанд, аммо ин дархостҳо аз ҷониби Ҳукумати Тоҷикистон ба инобат гирифта намешаванд.

Сафари Раҳмон ба Амрико

Аз ҷониби

AZDA TV-2

-

18/09/2023

0

Президенти Тоҷикистон Эмомалӣ Раҳмон бо даъвати Президенти Амрико Ҷо Байдан ба шаҳри Ню-Йорк рафт.

Бино ба иттилои расмӣ, субҳи 18-уми сентябри соли 2023 Президент Тоҷикистон Эмомалӣ Раҳмон дар раъси як ҳайати расмӣ Душанберо бо қасади Ню-Йорк тарк кард.

Чанд моҳе пеш Ҷо Байдан, Президенти Амрико бо ирсоли номаи расмӣ аз сарони кишварҳои Осиёи Марказӣ, аз ҷумла Эмомалӣ Раҳмон хоста буд, ки барои ширкат дар Вохӯрии сарони давлатҳои “Осиёи Марказӣ – ИМА”, ки қарор аст дар ҳошияи иҷлосияи 78-уми Маҷмаи умумии Созмони Милали Муттаҳид дар шаҳри Ню-Йорк баргузор гардад, иштирок намоянд.

Ба қавли Хадамоти матбуоти Президенти Тоҷикистон дар ин сафар “Эмомалӣ Раҳмонро вазири корҳои хориҷӣ, ёвари Президенти кишвар дар умури равобити хориҷӣ, вазири тандурустӣ ва ҳифзи иҷтимоии аҳолӣ ва дигар шахсони расмӣ ҳамроҳӣ мекунанд.

Нишасти навбатии сарони кишварҳои Осиёи Марказӣ-Амрико маъруф ба (С5+1) қарор аст рӯзҳои 19-20 сентябри соли ҷорӣ дар ҳошияи 78-умин иҷлосияи Маҷмаи умумии Созмони Милали Муттаҳид дар шаҳри Ню-Йорк гузаронида шавад.

Президенти Тоҷикистон, ки дар чанд соли ахир хеле кам дар нишастҳои умумии Созмони Милалили Муттаҳид иштирок мекард, тайи камтар аз 6 моҳи ахир бори дуюм аст, ки барои иштирок дар нишастҳои Созмони Милалии Муттаҳид ба Амрико меравад.

Гуфта мешавад, аз замони оғози ҳамлаҳои низомии Русия алайҳи Украина, фишорҳои кишварҳои ғарбӣ ва дар раъси онҳо Амрико алайҳи мақомоти Кремлин ва шарикони роҳбурдии онҳо, ки талош доранд, дар дур задни таҳримҳо ба Маскав кумаке кунанд, низ зиёд шудааст.

Инчунин ахири моҳи августи соли ҷорӣ хабаргузории “Reuters” бо нашри як гузориши таҳқиқотӣ кишварҳои Чин, Қирғизистон ва ду ширкат аз Тоҷкиистон бо номҳои “Истиқлолият 20” ва “Кафолати комил”-ро ба дур задани таҳримҳо алайҳи Русия аз тариқи Имороти Муттаҳидаи Арабӣ муттаҳам карда буд.

Занозании гурӯҳии муҳоҷирон дар Красногорск

Аз ҷониби

AZDA-TV

-

15/09/2023

0

Дар шаҳри Красногорски вилояти Маскав занозании оммавӣ бо иштироки шаҳрвандони Қирғизистон, Тоҷикистон ва Узбекистон рух додааст.

Бино ба иттилои шабакаи телеграмии “Mash”, 13 шаҳрванди Узбекистон чун диданд, ки шумораашон аз муҳоҷирони дигар кишварҳо бештар аст, болои панҷ шаҳрванди Қирғизистон ва чаҳор шаҳрванди Тоҷикистон фишор оварданд, ки дар натиҷа кор ба занозанӣ анҷомидааст.

Гуфта мешавад, пас аз вуқуъи ҳодиса, кормандони пулис сари вақт ба ҷойи ҳодиса расида, муҳоҷиронро пароканда ва аксари онҳоро боздошт кардаанд.

Ба иддаои манбаъ, ин муҳоҷирон дар корхонаҳои гирду атрофи шаҳри Красногорск кор мекардаанд ва қаблан ҳам чанд маротиба баҳсу мунозираҳое кардаанд, аммо ин дафъа муноқишаи муҳоҷирон ба занозанӣ печидааст.

Пештар аз ин дар деҳаи Илинское-Усовои ноҳияи Красногорск низ бар асари як занозании оммавӣ 16 муҳоҷир аз ҷониби пулис боздошт шуда буданд.

То ҳол сабаби аслии ин даргирии гурӯҳӣ аз ҷониби пулиси Маскав эълон нашудааст. Ва назари боздоштшудаҳо низ вобаста ба даргирӣ то ҳол маълум нест.

Ҳодисаи занозании гурӯҳӣ дар байни муҳоҷирони кории кишварҳои Осиёи Марказӣ дар шаҳрҳои Русия бори аввал нест, ки рух медиҳад. Чунин ҷанҷолҳо борҳо ба далоили мухталиф, ки ба гуфтаи коршиносон, бештараш бартарихоҳӣ ва худбузургбинӣ аст, байни муҳоҷирон рух медиҳад.

“Пешво” аз “пешво” қадрдонӣ кард

Аз ҷониби

AZDA.TV

-

15/09/2023

0

Президентҳои Осиёи Марказӣ бо тақдими мукофоти “Нишони фахрӣ” ба собиқ президенти Туркманистон Қурбонгули Бердимуҳаммадов аз ӯ қадрдонӣ карданд.

Бердимуҳаммадов ҳоло ҳамчун “пешво”-и халқи туркман хонда мешавад ва ҳам раиси Халқ Маслахати Туркманистонро бар уҳда дорад. Ба таҳлили коршиносон, ин ба он маъност, ки ӯ то ҳол кишварашро худаш идора мекунад.

Маркази матбуоти Президенти Тоҷикистон бо нашри ин хабар дод, ки 14-уми сентябир соли ҷорӣ дар ҳошияи нишасти панҷуми машваратии раҳбарони кишварҳои Осиёи Марказӣ дар Душанбе дар Қасри миллат Эмомалӣ Раҳмон ба Қурбонгулӣ Бердимуҳаммадов ин “мукофоти олии сарони давлатҳои Осиёи Марказӣ”-ро супорид.

Дар хабар гуфта мешавад, ки қадрдонии раҳбарони кишварҳои Осиёи Марказӣ аз Қурбогнгулӣ Бердимуҳаммадов ба далели “саҳми барҷастаи ӯ дар таҳкими муносибатҳои дӯстӣ ва ҳамсоягии нек байни давлатҳои минтақа” будааст.

Ҳамчунин дар хабар таъкид мешавад, ки собиқ раисҷумҳури Туркманистон дар “таъмиқи ҳамкории мутақобилан судманди давлатҳои минтақа дар соҳаҳои сиёсӣ, тиҷоративу иқтисодӣ ва фарҳангию гуманитарӣ, пешбурди манфиатҳо ва ташаббусҳои муштараки мамлакатҳои минтақа дар арсаи ҷаҳонӣ” саҳми бузурге доштааст.

Бархе коршиносон бар ин назаранд, ки қадрдонии Эмомалӣ Раҳмон аз Қурбонгулӣ Бердимуҳаммадов аввалан, метавонад нишони посухи қадрдонии Бердумуҳаммадов аз Раҳмонов аст, ки чанде пеш дар Туркманистон қадрдноӣ шуда буд ва сониян, ӯ шояд мехоҳад ба дигарон бифаҳмонад, ки пас аз рафтанаш фаромӯшаш накунанд ва қадри ӯро низ бидонанд.

ШАБАКАИ ХАБАРРАСОНӢ ВА ТАҲЛИЛӢ

HRW дар нома ба Байден аз нақзи ҳуқуқи башар дар кишварҳои Осиёи Марказӣ гуфт

Таҳдид зиндон барои навиштани “Ҷумъа муборак” дар Тоҷикистон

Сохти беш аз 100 дидбонгоҳи марзии ҷадид

Мулоқоти Эмомалӣ бо Дабири кулли СММ

Озодии 10 зиндонӣ бо пардохти 6 миллиард доллар

Зеленский ҷаҳонро аз оғози ҷанги ҷаҳонии сеюм ҳушдор дод

Freedom Now озодии маҳбусони сиёсии тоҷикро талаб кард

Сафари Раҳмон ба Амрико

Занозании гурӯҳии муҳоҷирон дар Красногорск

“Пешво” аз “пешво” қадрдонӣ кард

Дар бораи мо

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

Дар бораи мо