Хона блог саҳифа 680

Боздошти як ҷавон бо иттиҳоми истеҳсоли асали сунъӣ

Аз ҷониби
shukhrat
-
0

Як ҷавони сокини ноҳияи Деваштичи Тоҷикистон бо иттиҳоми истеҳсоли асали сунъӣ ва бо роҳи фиреб фурӯхтани он ба мардум аз ҷониби ШВКД ноҳияи мазкур боздошт ва нисбаташ парвандаи ҷиноӣ боз шудааст.

Дар хабарномаи ВКД Тоҷикистон аз ин ҷавон Қосимов Шаҳриёр Акрамович ёдшуда, мутавиллиди соли 1999, сокини ҷамоати деҳоти Росровути ноҳияи Деваштич (собиқ ноҳияи Ғончӣ) будааст.

Гуфта мешавад, “гумонбаршуда наздики як сол инҷониб ба истеҳсоли асали сунъӣ машғул шуда бо истифода аз шакар, кислотаи лиму, оби нӯшокӣ ва иловагиҳои маззадиҳанда маҳсулоти ба асал монандро таҳия ва дар ҳудуди шаҳру ноҳияҳои Деваштич, Зафаробод, Спитамен, Ҷ.Расулов, Хуҷанд, Б.Ғафуров, Мастчоҳ ва Конибодому Исфара ҳамчун асали табии дар шароити куҳистон истеҳсолшуда ба фурӯш мебаровард”.

Ба гуфтаи мақомот, бино ба додаҳои ташхисӣ асали сунъии ин шаҳрванд барои одам ҳассосият меовардааст. “Ташхис муайян кардааст, ки маҳсулоти истеҳсол намудаи Шаҳриёр Қосимов дар таркибаш кислотаи лиму ва миқдори зиёди крахмал дорад, ки барои истеъмол ба саломатии инсон зараровар мебошад ва метавонад ҳассосият (аллергия), яъне аксуламали музмини системаи масъунияти организми одам ба маводу маҳсулотеро ба вуҷуд орад, ки маъмулан безарар ҳастанд”.

Нархи як кило асали сунъии Шаҳриёр аз 20 то 30 сомонӣ арзиш дошта, барои сохтани ин як кило то 10 сомонӣ масраф доштааст. Мардум асали арзон гуфта мехаридаанд.

Ба иттилои ВКД айни ҳол нисбати Шаҳриёр Қосимов бо моддаи 294 Кодекси ҷиноятӣ – фиреби истеъмолкунанда парвандаи ҷиноятӣ оғоз карда шудааст, ҳамзамон зимни банду басти парвандаи ҷиноятӣ зам гардидани моддаи 209-и ҳамин Кодекс эҳтимол дорад.

Мавзӯи қочоқи 90 кило тилло намояндагони Афғонистонро ба Тоҷикистон овард?

Аз ҷониби
shukhrat
-
0

Мирзо Катавозай, муовини раиси парлумони Афғонистон гуфт, ки дар интиқоли 90 кило тилло ва 15 миллион доллар аз Афғонистон ба Тоҷикистон ва кӯшиши интиқол додани онҳо ба кишвари сеюм даст надорад. Дар ин бора ӯ дар як суҳбати кутоҳ ба Радиои Озодӣ гуфт.

Бино ба иттилои Радиои Озодӣ Катавозай дар ин суҳбат ба сиёсатмадор будани худ ишора намуда гуфтааст, ки “Чунин як чизе вуҷуд надорад, чун ман сиёсатмадор ҳастам, на тоҷир.”

Ҳамчунин муовини раиси парлумон дар вокуниш ба ин хабар ба расонаҳои афғонӣ гуфтааст, ки “Комилан ҳама гузоришҳое, ки дар онҳо маро ба қочоқ айбдор мекунанд, дурӯғ аст”, аммо шарҳ надод, ки чаро маҳз номи ӯ дар парвандаи қочоқи тилло ва пул пайдо шудааст.

Дар ҳамин ҳол расонаҳои афғонӣ навиштанд, ки 90 кило тилло ва 15 миллион доллари мусодирашудаи мақомоти Тоҷикистон ба Муҳаммад Мирзо Катавозай, муовини раиси палатаи поёнии парлумони Афғонистон рабт доранд.

Ёдовар мешавем, ки рӯзи 27 феврал шабакаи телевизионии Афғонистон 1 бо такя ба манбаъҳои худ хабар дод, ки тилло ва миллионҳо доллари дар Тоҷикистон мусодирашуда ба Муҳаммад Мирзо Катавозай рабт доранд ва ӯ ҳоло “тамоми кӯшишҳоро ба харҷ медиҳад, то ин ҳодиса ба таври васеъ паҳн нашавад.”

Ба гуфтаи хабарнигорони ин шабака ба ин далел Катавозай чанде қабл бо сафири Тоҷикистон дар Афғонистон мулоқот кардааст. Ҳамчунин ин расона мегӯяд, ки роҳбарияти Афғонистон аз ин масъала огаҳӣ дорад ва ба мулоқоти Саймумин Ятимов, раиси Кумитаи давлатии амнияти миллии Тоҷикистон ва Абдулло Абдулло, раиси Шӯрои олии оштии миллии Афғонистон ишора мекунанд.

Ошкоркории расонаи афғонӣ дар ҳоле садо медиҳад, ки шоми 27-уми феврал бо як сафари корӣ раиси палатаи поёнии парлумони Афғонистон Мирраҳмон Раҳмонӣ ба Тоҷикистон омад.

Дар ин сафари корӣ ҷониби Афғонистон бояд бо Эмомалӣ Раҳмон, вазири корҳои хориҷӣ ва раиси Маҷлиси намояндагони Тоҷикистон мулоқот анҷом диҳанд.

Тибқи иттилои Радиои Озодӣ Муҳаммад Мирзо Катавозай низ узви ҳайат аст. Раиси палатаи поёнии парлумони Афғонистон Мирраҳмон Раҳмонӣ ба расонаҳои афғонӣ гуфтааст, ки сафари кории онҳо барои “баррасии масоили гуногун, аз ҷумла рушди муносибатҳои байнипорлумонӣ, тақвияти мубориза бо терроризм ва гуфтугӯ дар бораи сулҳи Афғонистон аст”.

Ёдовар мешавем, ки Мақомоти ҳифзи ҳуқуқи Тоҷикистон моҳи ноябри соли 2020 дар фурудгоҳи Душанбе як гурӯҳи иборат аз 7 нафарро ҳангоми кӯшиши интиқоли 90 кило тилло ва 15 миллион доллар ба Аморати Муттаҳидаи Араб боздошт карданд.

Юсуф Раҳмон прокурори генералии Тоҷикистон ахиран боздошти гурӯҳи қочоқбар бо наздики 90 кило тиллою миллионҳо долларро тасдиқ карда буд.

Ҳамчунин Раҳмоналӣ Раҳимзода, сардори Раёсати ташкилоти мубориза бо ҳуқуқвайронкунии гумрукии Тоҷикистон низ ҷой доштани ин ҳолатро тасдиқ карда, гуфт ки дар доираи парвандаи талоши қочоқи тилло ва пул ба хориҷа се корманди ин ниҳодаш низ боздошт шудаанд. Қарори додгоҳ дар мавриди ин парванда феълан эълон нашудааст.

Дар Систон ва Балучистони Эрон чӣ мегузарад?

Аз ҷониби
shukhrat
-
0

Дар вилояти Систону Балучистони Эрон мардум даст ба эътироз ва корпартоӣ заданд. Дар чанд рӯзи ахир домани эътирозҳо дар ин манотиқ густариш меёбад.

Бино ба иттилои расонаҳои маҳаллӣ рӯзи душанбе 22 феврал сӯхтбарон (касоне, ки маводи сӯзишвориро аз минтақаи марзии Эрон ба Покистон тавассути мошинҳои шахсӣ интиқол медиҳанд ва аз ин ҳисоб рӯзгори худро мечархонанд) аз ҷониби нерӯҳои Сипоҳи посдорон мавриди ҳамла қарор мегиранд. Ва дар натиҷа чанд сӯхтбар кушта мешавад. Дар пайи ин ҳодиса мардуми Систону Балучистон даст ба эътироз мезананд.

Дар ҳамин ҳол созмонҳои ҳуқуқи башари Эрон аз бархӯрди мақомот бо эътирозгарон нигаронӣ намуданд. Ҳамчунин Мавлавӣ Абдулҳамид, имомҷумъаи аҳли суннати Зоҳидон тирандозӣ ба сӯи сӯхтбаронро маҳкум намуда ва ҳамзамон мардумро ба хунсардӣ ва оромиш даъват кардааст.

Хабаргузории “Sunnionline” дар шарҳи воқеъа мениависад:

“Рӯзи душанбе (22 феврал) дар шаҳристони Саровон ва дар нуқтаи марзии Эрон бо Покистон шуморе аз сӯхтбарон таҷаммӯъ мекунанд. Ба самти онҳо тир кушода мешавад ва чанд нафар кушта мешаванд. Рӯзи сешанбе таҷаммӯи эътирозомезе дар шаҳри Саровон, ба хусус дар рӯбарӯи идораи Ҳукумати шаҳр баргузор мешавад. Эътирозот ба хушунат кашида мешавад. Бахше аз муътаризон ба сохтмони фармондорӣ ҳамла мекунанд ва баъзе ҷойҳои сохтмонро тахриб мекунанд”.

Аммо расонаҳои наздик ба Ҳукумат мегӯянд, ки нерӯҳои Сипоҳи посдорони Эрон тирандозӣ накардаанд ва ба гуфтаи онҳо эътирозгарон худ мухолифи низоми Эронанд. Муовини амниятии вилояти Систону Балучистон гуфта, ки тир аз ҷониби маъмурони Покистон ба сӯи таҷаммӯъ кушода шуда, як нафар кушта шудааст.

Мақомоти Эрон сӯхтбаронро гунаҳкор меҳисобанд, ба гуфтаи масъулон худи сӯхтбарон ба як постгоҳи марзӣ ҳамла кардаанд, ки дар натиҷа як нафар кушта шудааст ва он ҳам шояд бо тири шилликкардаи ҷониби Покистон кушта шуда бошад.

Хабаргузории “Тасним” аз қавли волии Сараван Саид Таҷллӣ навиштааст, ки гуфтугӯ бо мардум дар рӯзи ҳамла ба дафтари волии Сараван сурат гирифтааст ва онҳо идораи Ҳукуматро бидуни “ҳеҷ задухӯрд” “ором” тарк карданд. Ӯ ба хушунат кашида шудани эътирозотро такзиб кард. Аммо фаъолони ҷомеаи мадании Систону Балучистон ин гуфтаҳои мақомотро рад мекунанд.

Бино ба гузориши ВВС мардуми вилояти Систону Балучистон аз фақру нодории шадид маҷбуранд барои таъмини рӯзгор ба сӯхтбарӣ рӯ биёранд. Суди ин кор кам асту хатараш хеле зиёд.

Гуфта мешавад, давлати Эрон чанд соли пеш интиқоли маводи сӯхтро барои сокиноне, ки то 20 километр наздик ба марз зиндагӣ мекунанд, иҷозат дод, аммо ахиран Сипоҳи посдорон интиқоли онро зери контроли худ гирифта намегзорад мардум ба ин кор даст бизананд.

Вилояти Систону Балучистони яке аз минтақаҳои дурафтодаи Эрон ба шумор меравад ва мардуми ин манотиқ дар фақри шадид гирифторанд. Бахши муҳимми мардуми ин минтақа дар таъмини қути рӯзонаи худ мушкили доранд.

Ба Тоҷикистон 55,8 млн $ кумак ворид шуд, Ҳукумат низ кишварҳои дигарро кумак кардааст

Аз ҷониби
shukhrat
-
0

Тоҷикистон соли гузашта ба маблағи умумии беш аз 55,8 миллион доллар кумаки башардӯстона дарёфт кард ва ба кишварҳои дигар дар ҳаҷми 543 000 доллар кумак расонд.

Тавре ба хабаргузории “Авеста” аз Хадамоти гумрук иттилоъ доданд, Тоҷикистон аз кишварҳои донор кумаки башардӯстона дар шакли доруворӣ, таҷҳизот ва ғизо дарёфт кардааст. Дар маҷмӯъ кишвар зиёда аз 22,5 ҳазор тонна кумаки башардӯстона гирифтааст.

Ба Тоҷикистон ҳамчун кумаки башардӯстона орд ба андозаи беш аз 14,6 ҳазор тонна, маҳсулоти нафтӣ – 36 тонна, равғани растанӣ – 353 тонна дода шудааст.

Ҳаҷми кумаки башардӯстона, ки аз моҳи январ то декабри соли гузашта ба даст омадааст, беш аз 55 миллиону 852,4 ҳазор долларро ташкил медиҳад.

Дар ин давра Тоҷикистон аз 62 кишвари хориҷӣ кумаки башардӯстона дарёфт кард. Се донори асосии Тоҷикистон Чин – 37,3%, Русия – 8,5%, Узбекистон ва Туркия – 7,6% ба шумор мераванд.

Қайд карда мешавад, ки Тоҷикистон инчунин ба дигар кишварҳо ба маблағи умумии 543 000 доллар кумак расонидааст. Аммо Ҳукумати Тоҷикистон ба кадом кишварҳо ва чӣ гуна кумак расонидааст чизе гуфта намешавад.

Гази моеъ дар Тоҷикистон гаронтар шуд, роҳкиро низ гарон мешавад?

Аз ҷониби
shukhrat
-
0

Аҳолии Тоҷикистон, ба хусус мошиндорон ва онҳое, ки ба мусофиркашонӣ машғуланд аз гарон шудани гази моеъ дар нуқтаҳои фурӯши сӯзишворӣ нигаронӣ доранд.

Ба гуфтаи сокинон гази моеъ дар пойтахт ва дигар навоҳии кишвар якбора аз 4 ба 4,5 сомонӣ боло рафт. Мардум мегӯянд, давоми ду ҳафта аст, ки газ боло меравад ва аз он нигаронанд, ки боз ҳам гаронтар мешавад.

Ба навиштаи “Азия-Плюс” фурӯшандагони гази моеъ сабаби болоравии нархи онро афзоиши арзиши яклухти он дар кишварҳои содиркунанда маънидод мекунанд.

Хадамоти зиддиинҳисории назди ҳукумати Тоҷикистон сабабҳои болоравии нархи газро таҳқиқ дорад. Вале коршиносон мегӯянд, ҳар боре, ки гази моеъ дар Тоҷикистон гарон мешавад Хадамоти зиддиинҳисорӣ чунин посух дорад ва пеши гароншавии онро гирифта наметавонанд.

Ба қавли ронандагони мусофиркаш нархи газ андак-андак ба нархи бензин баробар мешавад, аксари сокинон ба хотири аз бензин арзон будани он истифода мекарданд, аммо ҳоло қариб бо бинзин баробар шудааст.

Мусофиркашон мегӯянд, маҷбуранд ҳар вақт, ки газ гарон шавад, қиммати роҳкироро низ баланд бардоранд.

Мувофиқи маълумоти оморӣ, имрӯз дар Тоҷикистон зиёда аз 60%-и нақлиёти автомобилӣ ба сифати сӯзишворӣ аз гази моеъ истифода мекунанд.

Мансабдорони тоҷик аз ин пас аз дороиҳои худ ҳисобот медиҳанд

Аз ҷониби
shukhrat
-
0

Мансабдорони тоҷик метавонанд эъломия дар бораи дороиҳои худро дар шакли электронӣ пешниҳод кунанд. Дар ин бора “Sputnik” хабар дод.

Бино ба иттилои ин сомона барои осон кардани пешниҳоди эъломияҳо Кумитаи андози Тоҷикистон чанде пеш барномаи компютериро таҳия ва ба кор даровард, ки имкон медиҳад, эъломияҳо дар шакли электронӣ пешниҳод карда шаванд.

Ба иттилои Кумитаи андоз, дар вебсайти расмии шӯъба “Ҳисоби шахсии андозсупоранда” мавҷуд аст, ки тартиби пешниҳоди эъломияи даромади шахсони мансабдори Тоҷикистонро осон мекунад.

Ёдовар мешавем, ки мансабдорони тоҷик бояд то 1-уми апрели имсол дар бораи дороиҳои худ маълумот диҳанд.

Дар хабари расмӣ, ки дар сомонаи ҳукуматии “Ховар” нашр шудааст, ба мансабдорон ҳушдор дода шуда, ки дар сурати пешниҳод накардан ё нодуруст додани маълумот дар бораи дороиҳо, аз мақом барканор мешаванд.

Ҳамчунин Кумитаи андоз таъкид кардааст, ки тибқи қонунгузории Тоҷикистон, ҳамаи хизматчиёни давлатӣ, инчунин шаҳрвандони кишвар, ки ба хизмати давлатӣ ворид мешаванд вазифадоранд, ки ин қоидаҳоро риоя кунанд.

Шумораи умумии хизматчиёни давлатӣ дар Тоҷикистон тақрибан 20 ҳазор нафарро ташкил медиҳад, ки тибқи қонунгузорӣ, вазифадоранд ҳар сол то аввали апрел ба мақомоти андоз дар бораи даромади солона ва манбаъҳои асосии худ ҳисобот диҳанд.

Бар асоси талаботи қонунгузорӣ қаблан дар эъломияи вазъи моликият, ба ҷуз аз амволи ғайриманқул ва мошинҳо, онҳо бояд шумораи ҳайвонот, паррандаҳо, пасандозҳо, металлҳо ва сангҳои қиматбаҳоро низ нишон медиҳанд.

Соли гузашта шаклҳои нави эъломияҳо дар бораи даромадҳо ва амволи хизматчиёни давлатӣ қабул карда шуд, ки мансабдорони тоҷик вазифадоранд то даромадҳо аз фаъолияти илмӣ, эҷодӣ ва омӯзгорӣ, даромад аз амволу заминҳои ба иҷора гирифташуда, даромад аз қитъаи шахсӣ, даромад аз пасандозҳои бонкӣ ва коғазҳои қиматнокро низ пешниҳод кунанд.

Тартиби пешниҳоди эъломия дар бораи дороиҳо ва амволи мансабдорони Тоҷикистон аз соли 2004 инҷониб амал мекунад, аммо дар муддати 17 сол ин маълумотҳо боре оммавӣ нашудаанд. Мақомот оммавӣ нашудани маълумот дар бораи амволи мансабдоронро чунин шарҳ дода мегӯянд, ки як сӯ хоҳиши худи онҳост ва аз тарафи дигар, ба қавли раиси Ожонсии хидмати давлатӣ, ҷомеаи Тоҷикистон барои қабули он омода нест.

Мақомот як додситонро дар шаҳри Душанбе дар ҷустуҷӯ қарор дод

Аз ҷониби
shukhrat
-
0

Мақомоти интизомии Тоҷикистон гуфтаанд, алайҳи як дастёри додситони ноҳияи Шоҳмансури шаҳри Душанбе бо иттиҳоми қаллобӣ парвандаи ҷиноятӣ боз кардаанд, вале худи ӯ, ки куҷое паноҳ бурдааст, то ҳол боздошт накардаанд ва дар ҷустуҷӯ қарор дорад.

Як манбаъ аз Додситонии кулли Тоҷикистон рӯзи 26-уми феврал ба Радиои Озодӣ боз шудани парвандаи ҷиноятӣ нисбати ин дастёри додситони ноҳияи Шоҳмансурро тасдиқ намуда ва аз ӯ Сайфиддин Баҳриддинзода ном бурдааст. Ба гуфтаи манбаъ ӯ ҳоло таҳти ҷустуҷӯ қарор дорад.

“Парвандаашро бо моддаи «қаллобӣ дар ҳаҷми махсусан калон» калон таҳқиқ мекунанд ва парванда дар дасти Раёсати парвандаҳои махсусан муҳим аст. Ба гуфтаи мусоҳиби Радиои Озодӣ: “Маълум нест, ки Баҳриддинзода дар куҷо ҳаст, вале расман имрӯз дар ҷустуҷӯ қарор дода шуд.” Додситонии кулл расман қазияро шарҳ надодааст”, омадааст дар хабар.

Куштори Меҳроншоҳ: тасодуфӣ ё амдӣ?

Аз ҷониби
shukhrat
-
0

Бо гузашти чанд ҳафта аз ҳодисаи куштори Меҳроншо Ҷумъаев, нозири минтақавӣ, лейтенанти калони ШКД-и ноҳияи Панҷ мақомоти вазорати корҳои дохилӣ ва Додситонии кулли Тоҷикистон дар ин бора ҳеҷ тавзеҳи расмие мунташир накарданд. Дар сайтҳои ин ду ниҳоди давлатӣ низ хабаре роҷеъ ба ин ҳодисаи фоҷиавӣ ба назар наомад.

Ин ҳам дар ҳоле аст ки куштори ин ҷавони 25 сола дар дохили бинои шӯъбаи корҳои дохилии ноҳия ва бо силоҳи ҷангии Калашников сурат гирифтааст. Бад-ин ҷиҳат ин ҳодиса ва ҷузъиёти он мебоист дар расонаҳо ва шабакаҳои иҷтимоӣ бозтоби густарда касб мекард, вале ин тавр ҳам нашуд. Танҳо чизе, ки то ба ҳол маълум шудааст ин аст ки додситони ноҳияи Панҷ тафтиши ин ҳодисаро бар мабнои қисми 2-и моддаи 108-и Кодекси ҷиноятии Тоҷикистон (аз беэҳтиётӣ ба марг расонидан) шурӯъ кардааст.

Ҳодисаи куштори Меҳроншоҳ Ҷумъаев субҳи 7 феврали соли ҷорӣ дар дохили “оружейка”-и бинои ШКД-и ноҳияи Панҷ рух додааст. Дар ибтидо масъулини ШКД-и ноҳияи Панҷ талош карданд, ки кушторро пӯшонанд ва ҳатто бори дӯши худи Меҳроншоҳ кунанд. Гӯиё вай “аз беэҳтиётӣ” ҳадафи тири Калашников, ки дар даст дошт, қарор гирифта ва ҷон бохтааст.

Баъдан боз гапро “тоб” медиҳанду мегӯянд, ки “вақте ӯ силоҳро супорид ва хам шудаву ба дафтар қайд мекард” ҳамкораш аз беэҳтиётӣ куланги Калашниковро пахш мекунад ва як тир ба арши силоҳхона ва тири дигар аз ноҳияи миёни Меҳроншоҳ дохил ва аз китфи ӯ берун мешавад. Аммо бинобар навиштаи Холиқназар Ҷумъаев, рӯзноманигор ва амаки Меҳроншоҳ дар сафҳаи фейсбукиаш вақти шустани ҷасади ҷавони шаҳид манзара комилан баракс намоён мешавад:

“Вале баъзе коршиносон баъди дидани ҳарду сӯрохӣ (ҷои даромад ва баромади тир) шарҳ доданд, ки ҳодиса баръакс рух дода, тир аз китф даромада аз миён баромадааст. Зеро сӯрохии боло ниҳоят хурд буда, ба андозаи як тангаи даҳдирама низ нест, вале сӯрохии миён хеле васеъ буда, мисле, ки маҳз аз ҳамонҷо пӯстро канда баромада бошад”.

Дар идомаи навиштааш Холиқназар Ҷумъаев шубҳаи дигари худро доир ба фарзияи ин ки ду тир шиллик шудааст ва инки агар ду тир шиллик шуд, онро бар кадом асосе метавон тасодуфӣ ва беэҳтиётӣ донист, низ баён кардааст:

“Сардори ШКД дар сӯҳбат бо хабарнигорон иброз дошта, ки “тири яроқ ҳамчун далели шайъӣ аз бадани марҳум гирифта шудааст. Вале ҷасад нишон медиҳад, ки тир худ даромада, худ баромадааст. Агар ин тир аз бадани марҳум гирифта шуда бошад, паси тири ба берун баромада куҷо шуд? Агар воқеан ду тир парронида шуда бошад, пас оё ин метавонад тасодуфӣ бошад? Ба назари ман не”.

Воқеъан ҳам саволгузории муаллиф баҷо ва мантиқӣ аст. Беш аз ин, агар тир задаву баромада бошад, ки инро сардори ШКД ҳам таъйид кардааст, пас, чӣ тавр боз як тири дигар аз бадани марҳум пайдо мешавад? Яъне, се тир шиллик шудааст? Дар ин ҳолат кӣ ба фарзияи “беэҳтиётӣ” ва “тасодуфӣ” будани ин куштор бовар мекунад?

Бар пояи маълумоти мунташира феълан Амирзода Насим, ҳамкори Меҳроншоҳ, ки бо тири ӯ Меҳроншоҳ кушта гардид, дастгир шудааст ва мақомоти тафтишотӣ корҳои ташхиси тиббиву судӣ ва криминалистиро анҷом медиҳанд.

Ҳолати дигаре, ки шакку гумонҳоро дар мавриди ин ҳодисаи куштор ба бор овардааст, ин аст ки маҳз дар ҳамон шаби 7 феврал, шабе, ки ҳодиса ба амал меояд, камераҳои назоратӣ, дурусттараш “жесткий диск”-и компютер тахриб шудааст. Як мутахассиси арсаи техноложӣ тахриби худбахуди ба истилоҳ “жесткий диск”-диски сахтро кори ношуданӣ хонд. Вай гуфт, ки ин диск дар идораҳое мисли милисахона, ки бо компютер сару кор камтар аст, баъид аст ки бидуни дахолати берунӣ хароб шавад.

Ҳамакнун саволи асосӣ ин аст ки ин амал тасодуфӣ анҷом шудааст ё амдӣ? Агар амдӣ ва огоҳана буд, чаро? Магар он ҳамкораш ӯро барқасд куштааст? Дар ҳоле, ки хуб медонад, ки ин ҳодиса чӣ авоқибе дар пай хоҳад дошт? Ва, оё дар ҳақиқат Меҳроншоҳ аз дасти ҳамин ҳамкораш ва дар дохили “оружейка” ҳадафи тири Калашников қарор гирифтааст?

Яқин аст ки мақомот то анҷоми ниҳоии муоина ва ташхис чизе намегӯянд ва ташхис муваззаф аст муайян кунад, ки ин иттифоқи мусибатбор тасодуфу нохоста сурат гирифт ва ё огоҳонаву дониста? Зеро агар дидаву дониста бошад ҳукм, муҳлати ҷазо ва низоми зиндон иваз мешавад. Вале саволи дигаре, ки сари забони ҳар нафари як каме огоҳ аз кору фаъолияти мақомоти милиса давр мехурад ин аст ки чаро як “участковий”-нозири минтақаӣ, аз “оружейка” Калашников мегирад? Барои як нозири минтақаӣ Калашников чи лозим аст? Ва, аслан “участковий” чаро ва бар чи асосе дар пост меистад ва боз соати 2-и шаб онро ҳамроҳ бо ҳамкораш месупорад?

Ин ҳодисаи кушторро мо бо як нафар аз собиқ афсарони милисаи тоҷик дар миён гузошта ва ба истилоҳ версия –фарзияи тасодуфӣ будани онро суол кардем. Вай гуфт барои ӯ норӯшан ва номафҳум аст, ки чаро як нозири минтақаӣ (участковий) бинои ШКД-ро посбонӣ мекунад.“Нозири минтақавӣ набояд дар назди бинои ШВКД навбатдор истад. Барои ин кор Хадамоти муҳофизати ВКД ҳаст, ки муҳофизати тамоми биноҳои милиса дар саросари кишварро бар ӯҳда дорад.

Нозири минтақавӣ ҷавобгӯи минтақаи худ мебошад” Истихдом ва истифодаи нозири минтақаӣ ба гуфтаи ин афсари пешини умури дохилӣ аз сӯи сардори ШКД-и ноҳияи Панҷ маънои баромадан аз ҳадди ваколатҳои хидматиро дорад. Зеро ҳеҷ зарурати ҷалби “участковий” барои посбонии милисахона вуҷуд надорад. Кадом ҳолати казармавӣ ва фавқуллода (ЧП) набуд. Аз тарафи дигар дастури эълон намудани шароити казарма ё омодабошӣ аз тарафи роҳбарият ва мақомоти марказии ВКД содир мешавад. Дар ҳоле, ки ҳолати фавқулодда дар н.Панҷ вуҷуд надошт.

Ҳамсӯҳбати мо дар идомаи сӯҳбаташ бо ин паҳлӯи масъала ҳам таъкид кард, ки дар шӯъбаҳои умури дохилӣ навбатдори қисми ҳарбӣ масъулияти “оружейник”-ро бар уҳда дорад.

”Вақте Меҳрон ва ҳамкораш вориди “оружейник” шуданд,навбатдори қисми навбатдорӣ ҳам бо онҳо бояд дар онҷо ҳузур дошта бошад. Тибқи қоида силоҳҳо дар “оружейник” бидуни ҷаъба-тирдон ва ё ҳамон магазин нигоҳ дошта мешаванд. Тирдонро ин ду нафар чи тавр гирифта ва ба силоҳ насб карданд? Вақте як корманди милиса ба Калашникови холӣ тирдонро насб кард, агар ӯ ҳатто маст ҳам буд, ҳушёр мешавад,ки автомат дигар тир дорад ва куланги онро ба ҳеҷ ваҷҳ барои шӯхӣ ва тасодуф пахш намекунад”.

Ин афсари собиқи корҳои дохили аз дастуруамали ВКД низ ёдовар шуд, ки дар чи шароите силоҳу муҳиммоти ҷангӣ дар ихтиёр як корманди дохилӣ гузошта мешавад:

“Дар вақти супоридани яроқ мувофиқи Дастурамали ВКД ҶТ дар бораи ба кормандони мақомоти корҳои дохилии Ҷумҳурии Тоҷикистон додани силоҳҳои оташфишон, лавозимоти ҷангӣ ва лавозимоти махсуси хидматӣ барои нигаҳдорӣ ва интиқоли доимӣ бояд пас аз қабули яроқ аз Меҳроншоҳ аз Амирзода Насим яроқ қабул мекарданд. (Яъне аз ҳар кадом алоҳида-алоҳида, на инки баробар ва ҳамзамон). Маълум мешавад, ки ин дастурамал аз тарафи шахси масъули шӯъбаи навбатдории ШВКД н. Панҷи вилояти Хатлон риоя карда нашуд, ки сабаби ҳолати марги Меҳроншоҳ гардидааст. Умуман, афзуд ин корманди собиқи милиса “ҳама хабарҳое, ки дар рӯзи аввал аз тарафи мақомоти корҳои дохила нисбати ин ҳодиса паҳн гардид, дар оянда маълум гашт, ки дурӯғ будаанд. Сабаби асосии ин ҳодисаи фоҷиавӣ, ки боиси ба ҳалокат расидани як ҷавони ҳанӯз аз сад гул як гулаш ношукуфта гардид, хунукназарии кормандони шӯъбаи навбатдории ШВКД н. Панҷ ва шахсе, ки барои додан ва қабули яроқ мутассадӣ буд, мебошад.”

Ҳамсӯҳбати мо дар фароварди сӯҳбаташ аз таҷриба ва ҳолатҳои мушобеҳи рухдода дар гузашта, ёдоварӣ карда гуфт, ки ин ҳама гувоҳи он аст ки дар чунин ҳолатҳо масъулин талош мекунанд, бори масъулият ва ҷавобгариро аз дӯши худ раҳо кунанд:

“Дар бисёр ҳолатҳо, вақте ки дар муҳавватаи биноҳои ВКД, КДАМ ва дигар мақомоти қудратӣ куштор рух медиҳад, роҳбарият кӯшиш мекунад, ки ҳодисаи кушторро ҳамчун ҳодисаи тасодуфӣ нишон диҳад”.

Аммо боз ҳам саволҳои дигаре пеш меоянд, ки чаро як ҷавоне тоза ба маҳалли кори нав омадааст, бо чунин сарнавишти талх мувоҷеҳ шуд. Ӯ ҳамагӣ як милисаи “участковий” буд ва ҳоло 6 моҳ шудааст, ки ба Панҷ омадааст. Ва, ё шояд инҷо ҳадафу мақсад чизе дигар аст?

Меҳроншоҳ ҳанӯз ба он пояе нарасида буд, ки сари роҳи касе сабз шавад, дарди сар дуруст кунад. Аммо сардори милисаи ноҳияи Панҷ полковник Шамсулло Маҳмудзода аст. Шамсулло Маҳмудзода бародари Маҳмадсаид Убайдуллоев, шаҳрдори собиқ ва раиси қаблии Маҷлиси Миллии Тоҷикистон мебошад. Ҳоло, ки афроди вафодор ба Убайдуллоевро яке, яке рӯфта истодаанд…

Сорбон Азимӣ, таҳлилгар

Аз Идораи сомона: Матолибе, ки дар гӯшаи “Блоги Шумо” ба нашр мерасанд, назари шахсӣ ва ё таҳлили муаллифон буда, баёнгари мавқеи “Аздо тв” нестанд.

Шоимзода: бахши тоҷикии CASA-1000 имсол ба анҷом мерасад

Аз ҷониби
shukhrat
-
0

Татбиқи бахши тоҷикии лоиҳаи “CASA-1000” имсол ба итмом мерасад. Дар ин бора муовини аввали вазири энергетика ва захираҳои об Ҷамшед Шоимзода хабар дод.

Ба гуфтаи Шоимзода, то имрӯз тақрибан 70% корҳои сохтмони хатти интиқоли барқ ​​ва зеристгоҳи конвертерӣ ба анҷом расидаанд.

Ҳамчунин муовини аввали вазир қайд кард, ки барои сохтани иншоот тамоми таҷҳизоти зарурӣ фармоиш дода шуда, 80% -и он ба кишвар оварда шудаанд. Барои корҳои сохтмонӣ 115 миллион доллар сарф шудааст.

Ба гуфтаи ӯ интизор меравад, ки лоиҳаи CASA-1000 то охири соли равон ё аввали соли оянда ба кор шурӯъ кунад.

“Лоиҳа дар тӯли 15 сол хароҷоти худро мебарорад. Харидорони нерӯи барқи Тоҷикистон Покистон ва Афғонистон мебошанд. Афғонистон метавонад ҳиссаи барқи худро тавассути хати 220 кВ гирад. Дар ин бора созишнома ҳаст”,- гуфт муовини аввали вазири энергетика ва захираҳои об Ҷамшед Шоимзода.

Ёдовар мешавем, ки лоиҳаи “CASA-1000” интиқоли нерӯи барқро аз кишварҳои Осиёи Марказӣ ба Осиёи Ҷанубӣ дар назар дорад. Кишварҳои иштирокчии лоиҳаи “CASA-1000” Тоҷикистон, Қирғизистон, Афғонистон ва Покистон мебошанд.

Дар бораи боздошти аъзоёни “Гурӯҳи 24” омори вазир нодуруст буд?

Аз ҷониби
shukhrat
-
0

Масъулони “Гурӯҳи 24” изҳороти вазири дохилаи Тоҷикистон Рамазон Рамҳимзодаро дар бораи боздошти 8 узви ин гурӯҳ такзиб кардаанд. Саидалӣ Ашӯров, сухангӯи ҳаракати сиёсии “Гурӯҳи 24” дар мусоҳиба бо торнамои “Равзана” иддаои Раҳимзодаро, ки гӯё байни шаҳрвандони боздоштшуда 8 нафар аъзои ин ҳаракати сиёсӣ буддаанд, беасос донист.

Ӯ гуфта, ки ин омори бардурӯғро дарҳол муовини роҳбари ҳаракати сиёсии “Гурӯҳи 24” Ҳусейн Ашӯров аз тариқи Радиои Озодӣ рад карда, онро беасос хонд ва таъкид намуд, ки соли гузашта 3 нафар аъзои ин гурӯҳи сиёсӣ дар Русия боздошт ва бо дархости Тоҷикистон ба кишвар истирдод шуданд.

Саидалӣ Ашӯров мегӯяд, ҳадаф аз чунин оморҳои бардурӯғи вазир таъсири манфӣ расонидан ба рӯҳияи шаҳрвандони кишвар ва пурзӯру тавоно нишон додани ҳокимият ва мақомот мебошад. Ӯ умедворӣ карда, ки мардуми кишвар бардурӯғ будани ин оморро мефаҳманд ва фирефтаи ин таблиғоти дурӯғин нахоҳанд шуд.

Ба гуфтаи ин масъули “Гурӯҳи 24”, бо вуҷуди он ки ин ҳаракат тибқи қонунгузории Федератсияи Русия дар қаламрави ин кишвар ҳамчун ҳаракати ифротӣ эътироф нашудааст, аммо се тан аз аъзои ин гурӯҳро истирдод кардаанд, ки ин кор мухолифи қонунгузории ин кишвар ва қонунҳои байналмилалӣ буда, поймолшавии ҳуқуқи инсон мебошанд.

Ашӯров дар рабуда шудани аъзоёни ин гурӯҳ баъзе аз сохторҳои Русия ва афроди ҷоҳталабро гунаҳгор донистааст, ки ба гуфтаи ӯ, барои манфиатҳои шахсии худ ва ба даст овардани маблағҳои зиёд ин амалҳои ғайриқонунӣ ва ғайриинсониро анҷом медиҳанд. Дар натиҷа Русияро дар арсаи ҷаҳонӣ ҳамчун  кишвари ноамн, фосид ва ғайридемократӣ муаррифӣ менамоянд.

Мақомоти Тоҷикистон то ба ҳол оид ба рабуда шудан ва истирдоди 3 нафар аъзои зикршудаи ин гурӯҳ ҳеч иттилое надоданд. Аммо Русия дар номаи расмӣ ба “Гурӯҳи 24” посух дода, ки Шобуддин Бадалов санаи 1-уми сентябри соли 2020 аз роҳи фурӯдгоҳи Домодедово ба Душанбе парвоз кардаст.

Ба огаҳии сӯхангӯи ин гурӯҳи сиёсӣ, Шобуддин Бадалов ба 7 сол, Холов Фахриддин ба 7 сол ва Қамаров Низомиддин ба 14 соли зиндон маҳкум шудаанд. “Гурӯҳи 24” ин ҳукмҳоро муғризона ва сиёсӣ донистааст.

Дар идомаи гузориш, ки торнамои “Равзан” омода кардааст, низ Шокирҷон Ҳакимов, муовини раиси Ҳизби сотсиал-демократи Тоҷикистон дар мавриди боздошти Маҳмурод Одинаев назар додааст.

Ӯ дар робита ба гуфтаҳои вазири корҳои дохилии Тоҷикистон, ки гуфт, Додгоҳ гуноҳи Маҳмурод Одинаевро исбот кардааст, мегӯяд, аз баски дар мурофиа иштирок надошт дар ин маврид чизе гуфта наметавонад, аммо таъкид кард, ки мурофиа на дар шаҳри Ҳисор, балки дар ноҳияи Рӯдакӣ доир гаштааст.

“То чи андоза ҷонибҳо, яъне айбдоркунандаю судшаванда ва шоҳидону дигар иштирокчиёни мурофиа аз ҳуқуқҳояшон озоду бо риояи тартиби муқаррарнамудаи Кодекси мурофиаи ҷиноятӣ истифода бурданд ва ба далелҳои асоснок чӣ вокуниш буду суд онҳоро ба инобат гирифт, ба мо ноаён аст”, – гуфт Шокирҷон Ҳакимов.

Ҳакимов ҳамзамон гуфта, ки бо мақсади сиёсӣ нашудани қазия мо кӯшиш кардем, ки ба рафти тафтишот ва мурофиа дахолат накунем ва умедвор будем, ки шояд барои кирдораш ба ҷавобгарии маъмурӣ ҷалб намуда, ӯро то як сол аз озодӣ маҳрум ё ба микдори муайян ҷарима мекунанд. Аммо новобаста аз синну сол ва ба ҷомеа хатарнок набудани ӯ мувофиқи мақсад донистанд, ки Одинаев Маҳмуродро ба муҳлати тӯлонӣ ҳабс кунанд.

Дар охир ӯ мегӯяд, гунаҳкории ҳар шаҳрвандро бо риояи усули эътирофи бегуноҳӣ бояд Суд дар муҳокимаи ошкору одилона ва шаффофу рақобатпазиру баробарии иштирокчиёни қазия муқаррар намояд.

Муовини ҲСДТ таъкид карда, ки зиндонӣ шудани Маҳмурод Одинаев на танҳо ба рӯҳияи аъзои ҳизб, балки ба шаҳрвандони огоҳу бедор низ таъсири манфӣ расонд.

Дар мавриди боздоштҳои ахир ва хусусан аъзоёни ҲНИТ сухангӯи ин ҳизб Бобоҷон Қаюмов ба “Аздо тв” чунин гуфт.  

1...679680681...802саҳифаи 680 аз 802