Эмомалӣ Раҳмон, раисҷумҳури худкомаи Тоҷикистон имрӯз, 22-уми апрел ба Италия ва Ватикан сафар кард.
Бино ба иттилои расонаҳои ҳукуматӣ, Раҳмонро дар ин сафар вазирони корҳои хориҷӣ ва дохилӣ Сироҷиддин Муҳриддин ва Рамазон Раҳимзода, ёвари Президент дар масъалаҳои робитаҳои хориҷӣ, вазирони саноат ва технологияҳои нав, кишоварзӣ, энергетика, нақлиёт, фарҳанг, раиси Кумитаи давлатии сармоягузорӣ, директори Агентии назорати маводи нашъаовар ва дигар мақомдорон ҳамроҳӣ доранд.
Мақомоти Тоҷикистон то ҳол аз ҷузъиёти барномаи сафар ва мулоқотҳои Раҳмонов дар Италия чизе нагуфтаанд.
Аммо cомонаи расмии Ҳукумати Италия бо нашри хабари кӯтоҳе аз мулоқоти дар пешбудаи сарвазири Итолиё хонум Ҷорҷия Мелонӣ бо Эмомалӣ Раҳмонов дар рӯзи 23-уми апрели соли 2024 дар дафтари кории сарвазирдар Рум иттилоъ дода буд.
Инчунин Azda.tv аз баргузории нишасте дар бораи Тоҷикистон, ки онро Вазорати корҳои хориҷӣ ва ҳамкории байналмилалии Итолиё дар якҷоягӣ бо Оҷонсии савдои ин кишвар ташкил мекунанд, хабар дода буд.
Интизор меравад, ин нишаст 24-уми апрели соли ҷорӣ дар қароргоҳи Оҷонсии ICE дар шаҳри Рум баргузор шавад.
Бино ба навиштаи баргузоркунандагон, ҳадафи ин нишаст ба ассотсиатсияҳои тиҷоратӣ ва ширкатҳои итолиёвӣ намоиш додани имкониятҳои бозори иқтисодии Тоҷикистон, мавқеи стратегии ҷуғрофӣ, вуҷуди захираҳои табиӣ ва нақши марказии энергетикии Тоҷикистон дар минтақа, мебошад.
Муҳаммадҷон Кабиров, мудири пойгоҳи хабарии Azda.tv мегӯяд, ки нуқтаи қобили аҳмият дар сафари Раҳмонов ба Италия ҳамроҳии Рамазон Раҳимзода, вазири корҳои дихила аст, чун Эмомалӣ Раҳмон на ҳамеша вазирони қудратиро дар сафарҳои хориҷӣ бо худ мебарад ва будани Раҳимзода дар ин сафар шояд ба боздошти тоҷике, ки бо иттиҳоми узвият дар ДИШШ дар пайгард қарор дошту дар Итолиё боздошт шуда буд, рабт дошта бошад.
“Мутаассифона Ҳукумати Тоҷикистон тамоми мухолифонашро бо иттиҳоми терроризм дар рӯйхати пайгарди “Интерпол” қарор додааст. Як муддат Аврупо ин дархостҳои Тоҷикистонро ба инобат намегирифт ва танҳо ба хотири он ки афрод дар рӯйхати “Интерпол” ҳастанд, депорт намекард. Вале солҳои охир дида мешавад, ки вазъият тағйир кардааст ва мо шоҳиди он будем, ки аз кишварҳои мухталиф, аз ҷумла Литва, Лаҳистон, Олмон, Утриш ва ғайра шаҳрвандони Тоҷикистон бо иттиҳоми терроризм ва баҳонаҳои дигар истирдод шудаанд” – гуфт Муҳаммадҷон Кабиров.
Инчунин Кабиров мегӯяд, ки Тоҷикистон бо як қатор кишварҳо қарордоди истирдоди дутарафаро бастааст ва эҳтимол дорад дар ин сафар якчунин қарордоде бо баъзе кишварҳои аврупоӣ, ба мисли Итолиё баста шавад.
“Ҳузури Рамазон Раҳимзода дар ин сафар бе аҳамият нест ва ин бояд барои паноҳандагон ва мухолифини сиёсӣ, ки дар Аврупо қарор доранд, ҷойи нигаронӣ бошад. Ва бояд талош шавад, ки мақомоти кишварҳои аврупоӣ ба ҳар дархост ё аризаҳои бардурӯғи мақомоти Тоҷикистон таваҷҷуҳ накунанд ва ҳадди ақал бо чашми тардид нигоҳ кунанд” – таъкид мекунад Муҳаммадҷон Кабиров.
Гуфта мешавад, Ҳукумати Раҳмон талош мекунад сафарҳои аврупоии ӯро аз тарси тазоҳуроти мухолифин то охирон лаҳза пинҳон дорад ва ин сафар дар ҳоле сурат мегирад, ки мақомоти амниятии Тоҷикистон чанд моҳи ахир фишор болои пайвандони фаъолони тоҷикистонии муқими Аврупоро дар дохили кишвар бештар кардаанд. Мақомоти тоҷик ба онҳо ҳушдор доданд, ки дар ҷараёни сафари Эмомалиӣ Раҳмон ба Аврупо дар тазоҳуротҳои зидди ӯ ширкат накунанд ва дар сурати ширкати пайвандони онҳо дар чунин тазоҳурот хешовандони онҳо дар Тоҷикистон муҷозот хоҳанд шуд.
Салим Султонзода, сухангӯи Паймони миллии Тоҷикистон, имрӯз ба Azda tv гуфт, ин эътилоф ба таври ҳатмӣ дар тазоҳурот бар зидди сафари Раҳмон ширкат намекунад, аммо намояндагони ин эътилоф дар назди сафорати Италия дар кишварҳои аврупоӣ пикетҳои эътирозӣ ташккил мекунанд.
Сухангӯи ПМТ мегӯяд, ба ду сабаб натавонистанд дар Рум тазоҳурот ташкил кунанд: “Якум, ки сафари Раҳмон дар рӯзҳои корӣ рост омадааст ва мардум дар ин кишварҳо кор мекунанд ва наметавонанд барои ду рӯз кори худро тарк кунанд. Ва бояд барои чунин кор ҳадди ақал ду ҳафта қабл ба корфармоҳо иттилоъ додан лозим аст, ки то ду ҳафта қабл сафари Раҳмон маълум набуд.” Ӯ иллати дигари иштирок накарданро барои баъзе мухолифон, ки дар кишварҳои дуртар зиндагӣ мекунанд, гаронии роҳу шароити иқтисодӣ арзёбӣ кард.
Дар ҳамин ҳол намояндаи ПМТ дар Литва Илҳомҷон Яъқубов дар тамос бо Azda tv гуфт, имрӯз ҳудуи 15 нафар дар назди сафорати Италия дар Вилнюс тазоҳурот барпо карданд. Ба гуфтаи ӯ, намояндаи сафорат ба назди онҳо баромада, шикояташонро қабул кардааст ва ваъда дода, ки эътирозашонро ба мақомоти Италия мерасонад.
То ҳол маълум нест, ки дигар мухолифон ва фаъолони тоҷики муқими Аврупо, аз ҷумла аъзои “Гурӯҳи 24” алайҳи сафари Эмомалӣ Раҳмон ба Италия дар шаҳри Рум тазоҳурот ташкил мекунанд ё на.
Ин дар ҳолест, ки мухолифон қаблан дар ҷарёни сафарҳои Эмомалӣ Раҳмон ба Чехия, Швейтсария, Фаронса ва Олмон тазоҳурот баргузор карда буданд. Аз ҷумла, дар сафари охири Раҳмон ба Берлин аъзои “Гурӯҳи 24” ба корвони мошинҳои ӯ тухм партоб карданд ва ин боиси хашми мақомоти тоҷик гашта, пайвандони мухолифнро дар дохили Тоҷикистон зери фишори сахт қарор доданд.
Дар ҳамин ҳол сомонаи “Isloh.net” дар истинод ба манобеаш аз фиристодани даҳҳо нафар аз Тоҷикистон ба Рум “барои таъмини амнияти ҷараёни сафари Раҳмонов” ва ҷалби даҳҳо донишҷӯ ва варзишггарони тоҷики муқими Аврупо барои пешвози ӯ хабар додааст.
