Фирори як сарбози зиндонӣ аз зиндони Бритониё

-

08/09/2023

Рӯзи 8-уми сентябри соли ҷорӣ дар майдони “Истиқлол”-и шаҳри Душанбе бахшида ба ҷашни 32-солагии истиқлоли давлатии Тоҷикистон ва 30-юмин солгарди таъсисёбии Қувваҳои Мусаллаҳи кишвар паради ҳарбӣ баргузор гардид.

Дар гузашти наздики 20 ҳазор сарбози Қувваҳои Мусаллаҳ, раисҷумҳур Эмомалӣ Раҳмон ва писараш Рустами Эмомалӣ, шаҳрдори Душанбе ва раиси Маҷлиси миллии Маҷлисӣ Олӣ, сарвазир Қоҳир Расулзода ва дигар мақомдорон иштирок доштанд.

Эмомалӣ Раҳмон зимни суханронияш дар ин паради низоми Истиқлоли давлатиро “азизтарин неъмат ва бузургтарин дастоварде” номид, ки тоҷикон “баъди ҳазор соли бедавлатӣ” ба он муяссар гардидаанд.

Дар идома мисли ҳамеша Раҳмон аз ҷанги солҳои 1992 ёд оварда, онро “таҳмилӣ” ва кори дасти “хоинону бадхоҳони дохиливу хориҷӣ” номид.

Инчунин Эмомалӣ Раҳмон дар ин суханрониаш бе овардани номи созмоне аз “вусъат пайдо кардани фаъолияти ҳаракату созмонҳои террористиву экстремистӣ ва радикалӣ, қочоқи маводи мухаддир, ҷиноятҳои киберӣ ва дигар ҷинояткориҳои муташаккили фаромиллӣ ва илова бар ин, мусаллаҳшавии бошитоб ва шиддат гирифтани «ҷанги сард»” ва аз нигаронии сокинон гуфту мардумро тарс дода, таъкид кард, ки “эҳтимоли шиддати бештар пайдо кардани чунин вазъият” вуҷуд дорад.

Дар идомаи ин гуфтаҳояш Раҳмон аз роҳбарони артиш ва мақомоти ҳифзи ҳуқуқи кишвар хост, ки дар ин шароит дар ҳолати омодабош бошанд.

Раҳмон инчунин аз номи мардуму ҳукумат аз низомиёни кишвар сипосгузорӣ карда, аз онҳо даъват кард, ки Ватанро баробари ҷони худ, мисли модар ва фарзандони худ дӯст доранд ва онро ҷавонмардона ҳимоят кунанд.

Сипосгузории Раҳмон аз сарбозону даъваташ барои ҳимояи Ватан аз онҳо дар ҳоле аст, ки ҷавонон ҳангоми хидмат дар сафи Қувваҳои мусаллаҳи кишвар бо бадрафторӣ ва шароити бад рӯ ба рӯ ҳастанд.

Худи мақомот дар гузорише ба СММ гуфта буд, ки аз соли 2019 то 2021 ва ба сабаби “риоят нашудани оинномаи низомӣ” бештар аз 100 сарбоз ба ҳалокат расидаанд. Аммо огаҳони умур омори расмии мақомотро зери суол бурда, шумораи сарбозони фавтидаро бештар медонанд.

Вуҷуд доштани бадрафторӣ ва марги сарбозон дар сафи Қувваҳои мусаллаҳ боис гаштааст, ки ҷавонон аз рафтан ба хидмати ҳарбӣ худдорӣ кунанд ва мақомот ин мушкилотро бартараф накарда, даст ба “Облава”-и онҳо мезананд.

Толибон даҳҳо ҳазор нерӯи ҷадид ҷазб мекунанд

Аз ҷониби

AZDA TV-2

-

08/09/2023

Дар акс Вазири корҳои дохилии Толибон Сироҷиддин Ҳаққонӣ

Иморати исломии Афғонистон бо раҳбарии Толибон тасмим гирифтааст, ки ба сафи Вазорати корҳои дохилии ин кишвар даҳҳо ҳазор нафар нерӯи ҷадид ҷалб кунад.

Бино ба иттилои расонаҳои Афғонистон, Вазорати корҳои дохилии Толибон эълон кардааст, ки “ба фармони раҳбари Иморати исломӣ” дасти кам 74 ҳазор нафар нерӯи ҷадид ҷазб хоҳанд шуд.

Мақомоти Иморати исломӣ, дар шарҳи ин фармон гуфтаанд, ин афрод ба хотири баровардасозии ниёзмандиҳо ҷазб карда мешаванд ва дар ин раванд авалавият ба касоне дода мешавад, ки дар 20 соли пасин дар сафи Толибон ҷанг карда бошанд.

Ин ҷазби нерӯ дар ҳолест, ки тайи ду соли ахир нерӯҳои Толибон дар марзҳои Афғонистон зиёда аз 50 маврид бо марзбонони кишварҳои ҳамсояи Афғонистон задухурди низомӣ доштаанд.

Гуфта мешавад, Тоҷикистон тайи ин дусоле, ки Толибон дар Афғонистон сари қудрат омадаанд, беш аз 100 дидбонгоҳҳои ҷадид сохта ба истифода додааст ва ахиран президент Эмомалӣ Раҳмон ҳам эълон кард, ки тайи соли ҷорӣ 90 дидбонгоҳи ҷадид дар марзҳои кишвар бунёд мешавад.

Тоҷикистон бо Афғонистон зиёда аз 1300 километр марзҳои муштарак дорад ва аз замони сари қудрат омадани Толибон дар 15-уми августи соли 2021 то ҳол пайваста Тоҷикистон эълон мекунад, ки хатари нерӯҳои дашҳатафкан амният ва суботи онро таҳдид мекунад.

Юсуф Раҳмон парвандаи ҷиноии раиси ноҳияи Раштро ба Эмомалӣ Раҳмон равон кард

Аз ҷониби

-

07/09/2023

Юсуф Раҳмон, додситони кулли Тоҷикистон бар зидди Раҳимҷон Муқимӣ, раиси ноҳияи Рашт ва вакили Маҷлиси миллии Маҷлиси Олии кишвар парвандаи ҷиноятӣ кушода, ба Эмомалӣ Раҳмон фиристодааст.

Раҳимҷон Муқимӣ ба ҷудо кардани ғайриқонунии қитъаҳои замин ва гирифтани пора гумонбар аст.

Дар ҳисоботи нимсолаи аввали Юсуф Раҳмон ба Президент, ки он ба дасти пойгоҳи хабарии “Бомдод” расидааст, додситонӣ аз чанд ҷинояти раиси ноҳияи Рашт зикр кардааст.

Аз ҷумла, дар ин ҳисобот омадааст, ки “раиси ноҳияи Рашт Муқимӣ Р.Н. бо истифода аз ваколатҳои хидматиаш дар солҳои 2019-2022 ба воситаи раиси ҷамоати деҳоти Ҳоит Аббосзода Д. аз 2 нафар маблағи 29 000 сомонӣ гирифта, ба онҳо аз заминҳои таъиноти кишоварзии ноҳия ғайриқонунӣ дар майдони 0:33 гектар замини наздиҳавлигӣ ҷудо кардааст”.

Гуфта мешавад, Дилшод Аббосзода ҳоло мудири шуъбаи маорифи ноҳияи Рашт аст.

Бино ба иттилои “Бомдод”, ӯ соли 2022 ба ин мансаб таъйин гардид ва моҳи январ бо талаби раҳбари дастгоҳи раиси ноҳияи Рашт барои ин мансаб 100 ҳазор сомонӣ пора дод.

Дар робита ба ин ҳодиса раҳбари дастгоҳи раиси ноҳияи Рашт Холмаҳмадро Ортиқов кормандони Агентии мубориза бо коррупсия дастгир карданд, вале ахиран додгоҳ ӯро ҳамагӣ 60 ҳазор сомонӣ ҷарима баста, аз ҷавобгарӣ озод кард.

Гуфта мешавад, он замон хабари боздошти Раҳимҷон Муқимӣ бо раҳбари дастгоҳаш низ расонаӣ шуда буд, аммо раис ба ҷавобгарӣ кашида нашуда, озод шуд.

Инчунин дар ин ҳисобот гуфта мешавад, ки “Раҳимҷон Муқимӣ дар солҳои 2022-2023 аз шахсони алоҳида дар 44 ҳолат, аз ин дар 42 ҳолат барои ҷудо намудани майдони 371,6 гектар замин ба воситаи раиси кумитаи идораи замини ноҳия Ҷабборов А. маблағи 228 ҳазор сомонӣ ва 3000 доллари ИМА, дар 2 ҳолат барои ҷудо намудани майдони 6,11 гектар замин ба воситаи ёрдамчии раиси ноҳияи Кабутов Б. маблағи 30 ҳазор сомонӣ, инчунин барои сохтмони ҳар гуна иншоот ва корхонаҳои истеҳсолӣ маблағи 287 ҳазор сомонӣ ва 1000 доллари ИМА гирифтааст”.

Раиси Кумитаи замини ноҳияи Рашт Алимардон Ҷабборов, ки дар ҳисоботи додситони кул зикр шудааст, моҳи майи соли 2023 аз сӯи кормандони Кумитаи давлатии амнияти миллӣ бо иттиҳоми ғайриқонунӣ фурӯхтани қитъаҳои замин ва гирифтану додани пора дастгир шуд.

Ин бори аввал нест, ки номи Раҳимҷон Муқимӣ бо иттиҳоми гирифтани ришва расонаӣ мешавад.

Раҳимҷон Муқимии 61- сола то таъйин шуданаш ба ҳайси раиси ноҳия дар соли 2019, солҳои зиёд дар идораи андоз ва сипас ба ҳайси раҳбари шуъбаи молияи ноҳияи Рашт кор кардааст.

Инчунин Муқимӣ вакили Маҷлиси миллӣ буда, аз масунияти вакилӣ бархӯрдор аст.

Мақомот волидайни як мухолифи тоҷикро боздошт карданд

Аз ҷониби

-

07/09/2023

Мақомоти ноҳияи Рашт падару модар ва як хоҳари Фарҳод Худоёровро, ки дар Аврупо паноҳанда аст, боздошт кардаанд.

Фарҳод Худоёров рӯзи панҷшанбе дар тамос бо Azda tv гуфт, ки як гурӯҳ одамон, аз ҷумла раиси маҳалла, Сафаров Маҳмадраҳим, имомхатиб, Назриев Абдуллоҷон ва ҳамсари Абдуллоҳ Азимов, нафаре, ки дар қатли бародарзодааш даст доштааст, Судобаи Искандар ҳамроҳи модару хоҳараш шаби 3-ум ба 4-уми сентябри соли ҷорӣ ба хонаи онҳо рафта, талаб кардаанд, ки ба берун бароянд.

“Вақте падару модар ва хоҳарам ба берун баромадаанд, онҳо гуфтанд, ки шумо лулаи оби моро қатъ кардед. Дар ҳамин ҳол Судобаи Искандар давида телефони хоҳарамро аз дасташ гирифта мешиканад. Ҷанҷолу занозанӣ шуруъ мешавад, ҳатто ин зан хоҳари маро дар замин хоб карда, мезанад.“- гуфт Фарҳод Худоёров.

Ӯ ҳамчунин афзуд, ки пас аз ин ҳодиса рӯзи 6-уми сентябр мақомоти пулиси ноҳия падари 78-сола ва модари 68-солаашро ҳамроҳи хоҳараш боздошт карда, ба боздоштгоҳи ноҳияи Рашт бурдаанд. Аллакай бар зидди онҳо бо моддаи 237 қисми 2 (Авбошӣ) парванда боз кардаанд. Ва ҳоло мехоҳанд онҳоро ба Боздоштгоҳи муваққатии шаҳри Душанбе (СИЗО) итнтиқол бидиҳанд.

Мусоҳиби мо гуфт, ки эҳтимол падару модарашро ба хотири солманд будан ва ин ки дар он ҷанҷол мустақиман дасте надоштаанд, раҳо кунанд, аммо ҳоло маълум нест чӣ мешавад. Ӯ ҳамчунин афзуд, ки то ҳол аз хонаводаашон касе онҳоро надидааст.

Фарҳод Худоёров мегӯяд, сабаби боздошти волидайнаш дигар масъала аст на ҷанҷоли шаби 3-уми сентябр. Ӯ гуфт, рӯзи 2-уми сентябр модараш ба шуъбаи милисаи ноҳияи Рашт рафта, мехоҳад аз парвандае, ки ин ниҳод алайҳаш кушода буд, огоҳ шавад. Дар аснои суҳбат модараш хитоб ба додситони ноҳияи Рашт Кишварзода Абдурашид ва сардори милисаи ноҳия Сафолзода мегӯяд, ки аз ноадолитӣ ва рафторҳои ғайриқонунии ҳардуи онҳо ба раисҷумҳур шикоят мекунад. Як рӯз пас аз ин гуфтугӯ ин тавтиаро дар назди хонаашон месозанду волидайн ва хоҳарашро боздошт мекунанд.

Ин бори аввал нест, ки номи ин хонавода расонаӣ мешавад. Ба гуфтаи Фарҳод Худоёров, хонаводаи Азимовҳо, ки аз пайвандони Маҳмадтоҳир Зокирзода, раиси Маҷлиси намояндагони Тоҷикистон ҳастанд, борҳо алайҳи хонаводаи онҳо зулму зӯрӣ кардаанд. Ӯ мегӯяд, ҳатто соли 2021 бародарзодааш Алиризо Худоёрови 20-соларо ин хонавода ба қатл расондаанд.

Манобеъ ба рост гуфтани Юсуф Раҳмон шубҳа доранд

Аз ҷониби

-

06/09/2023

Додситони кулли Тоҷикистон Юсуф Раҳмон кушта шудани гумонбар Акбар Ахмедовро дар боздоштгоҳ рад кард. Дар ҳоле, ки чанд манобеъ бо шиканҷа кушта шудани ӯро таъйид кардаанд.

Юсуф Раҳмон 5-уми сентябри соли ҷорӣ дар раддияе ба Радиои Озодӣ хабари фавти Акбар Ахмедов, яке аз гумонбарон дар рабудану куштани муовини раиси “Ориёнбонк” Шуҳрат Исматуллоевро “маълумоти нодуруст” номид. Ба иддаои ӯ, Акбар Ахмедов ҳоло “дар тавқифгоҳи тафтишотӣ қарор дорад”.

Додситони кул таъкид кардааст, ки бо нашри хабари марги Ахмедов ва боздошти модараш “манфиати давлат, ҳуқуқу озодиҳо, манфиатҳои қонунии инсон ва шаҳрвандон вайрон гардид”.

Раддияи Юсуф Раҳмон ба хабари марги Акбар Ахмедов дар ҳоле аст, ки 3 манбаъи Радиои Озодӣ дар бораи дуруст будани маълумоти фавти ин гумонбар пойфишорӣ кардаанд.

Ёдовар мешавем, ки Радиои Озодӣ дар истинод ба манобеаш хабар дода буд, ки мақомот аввали моҳи августи соли ҷорӣ модари Акбар Ахмедовро дастгир карда, ба боздоштгоҳ бурдаанд ва барои фишор ба писараш чанд муддат онҷо нигоҳ доштанд.

Бино ба навиштаи манбаъ, Акбар Ахмедов миёнаҳои моҳи август ночор аз Маскав ба Душанбе бармегард ва худро ба мақомоти интизомӣ таслим мекунад. Аммо чанд рӯз баъд аз боздошташ ҳангоми бозпурсӣ дар натиҷаи шиканҷа ва латтукӯби бераҳмонаи кормандони мақомот дар боздоштгоҳ мефавтад ва ӯро пинҳонӣ дар зодгоҳаш ба хок месупурданд.

Гуфта мешавад, Акбар Ахмедов яке аз 16 гумонбари рабудану қатли муовини раиси “Ориёнбонк” Шуҳрат Исматуллоев ба шумор меравад. Ӯ 36-сол дошта соҳиби 6 фарзанд будааст. То замони ин ҳодиса ҳамчун мутахассиси компютер фаъолият доштааст.

Бино ба иттилои мақомот, Шуҳрат Исматуллоев, муовини Ҳасан Асадуллозода 23-юми июни соли ҷорӣ рабуда ва дар натиҷаи шиканҷа ҷон додааст. Ҷасади ӯро нимаи аввали моҳи август дар минтақаи Саразми Панҷакент пайдо карда, 30-юми август дар Душанбе ба хок супориданд.

То ҳол мақомот бо гумони даст доштан дар қатли Исматуллоев 13 нафарро боздошт кардаанд, ки номи баъзеи онҳо расонаӣ нашудааст. Аммо яке аз гумонбарон хабарсоз дар қатли Исматуллоев, Рустам Ашӯров, собиқ корманди ВКД буд, ки дар пайи як тирпаронӣ дар Фурӯдгоҳи Кишинёви Молдова ҷароҳати вазнин бардошта, дар бемористон фавтид.

Эмомалӣ бо ваъдаи истихроҷи маъданҳои кӯҳӣ сармояи Олмонро ҷалб карданист

Аз ҷониби

-

06/09/2023

Михаэл Ҳармс, мудири Бахши шарқии иқтисоди Олмон 6-уми сентябри соли ҷорӣ бо Эмомалӣ Раҳмон дар Қасри миллат мулоқот кард.

Хадамоти матбуоти Президенти Тоҷикистон иттилоъ дод, ки “дар мулоқот вазъ ва дурнамои ҳамкории тиҷоратию иқтисодӣ ва сармоягузории Тоҷикистон ва Олмон баррасӣ гардид.”

Дар ин мулоқот Эмомалӣ Раҳмон ба масъули олмонӣ ишора карда, ки муносибатҳои ду кишвар бар асоси эътимод, ҳамдигарфаҳмӣ ва робитаҳои барои тарафайн судманд асос ёфтаанд.

Эмомалӣ зимни мулоқот ба Михаэл Ҳармс гуфта, ки кишвараш метавонад дар Тоҷикистон дар бахшҳои гидроэнергетика, саноат, кишоварзӣ, нақлиёт ва сайёҳӣ сармоягузорӣ кунад. Ва ин бахшҳоро барои ҳарду ҷониб судманд донистааст.

Ҳамчунин раисҷумҳури Тоҷикистон ҳамсуҳбати худро ташвиқ карда, ки соҳаҳои саноати сабуку нассоҷӣ, хӯрокворӣ, истихроҷу коркарди маъданҳои кӯҳӣ ва металлҳои нодир, мошинсозӣ, кимиё, фарматсевтика ва бунёди корхонаҳои муштараки истеҳсолӣ самтҳои ояндадоре ҳастанд, ки минбаъд метавон дар ин ҷонибҳо ҳамкорӣ кард.

Эмомлаӣ Раҳмон таъкид карда, ки ҷалби ҳарчи бештари сармояи Олмон ба Тоҷикистон зарур буда, бояд воридоти технологияи нав аз ин кишварро ба Тоҷикистон бештар кард.

Ин дар ҳолест, ки Эмомалӣ Раҳмон истихроҷи маъданҳои куҳӣ ва металҳои гаронбаҳоро дар ихтиёри тоҷирони чинӣ гузошта ва қисме аз бойгариҳои бузурги кишвар, аз ҷумла обанборҳо ва истеҳсоли барқро дар ихтиёри русҳо додааст.

КДАМ се нафарро дар ноҳияи Дарвоз кушт

Аз ҷониби

-

06/09/2023

Субҳи рӯзи 5-уми сентябри соли ҷорӣ Кумитаи давлатии амнияти миллии Тоҷикистон зимни як амалиёти махсус се нафар аз аъзои “Ансоруллоҳ”-ро дар марз бо Афғонистон куштааст.

Бино ба иттилои КДАМ, ин гурӯҳ шаби 29 ба 30 августи соли ҷорӣ аз ҷониби Афғонистон тариқи минтақаи Кеврони ноҳияи Дарвоз ғайриқонунӣ вориди хоки Тоҷикистон шуда, мехостаанд амалиёти террористӣ анҷом диҳанд, ки пас аз чанд лаҳзае ин минтақа аз ҷониби нерӯҳои амниятӣ иҳота шудааст.

Ба гуфтаи ин ниҳод, “субҳи 5 сентябри соли ҷорӣ, дар лаҳзаи мувофиқ, дастаи зиддитеррористии амниятӣ ҳалқаи иҳотавиро дар макони будубоши террористон маҳдуд сохта, аз аъзоёни гурӯҳи террористӣ талаб намуд, ки таслим шаванд.” Аммо онҳо таслим нашуда, тир кушодаанд.

Дар хабар гуфта мешавад ки “дар натиҷаи амалиёти ҷангӣ се нафар аъзои гурӯҳи террористии саропо мусаллаҳ безарар гардонида шуданд.“

Кумитаи давлатии амнияти миллии Тоҷикистон иддао карда, ки ин гурӯҳ дар баробари силоҳҳои доштаашон боз навъҳои гуногуни зиёди аслиҳа, “лавозимоти ҷангӣ, маводи тарканда, воситаҳои алоқа барои таъмини террористон” қаблан аз кишвари Афғонистон оварда ва дар паноҳгоҳҳои махсус пинҳон карданд, ки ҳамааш аз ҷониби ин ниҳод мусодира шудааст.

Ҳоло маълум нест, ки ин гурӯҳ дар умум чанд нафар буданд ва оё касе аз онҳо тавониста фирор кунад ё на. Зеро, мувофиқи хабари нашршуда, аз онҳо аслиҳаи хеле зиёде мусодира шудааст, ки тавони бардошти онҳо барои се нафар намерасад. Ва КДАМ ҳам танҳо аз кушта шудани се нафар хабар додааст.

Ин ниҳоди амниятии кишвар мегӯяд, кушташудаҳо ҳарсе шаҳрвандони Тоҷикистон, зодагони ноҳияи Нуробод, шаҳрҳои Исфара ва Кӯлоб будаанд.

КДАМ аз онҳо, Бобоҷонов Зариф, зодаи шаҳри Исфара, Баҳодуров Фарҳод, зодаи ноҳияи Нуробод ва Қосимов Аҳтам, зодаи шаҳри Кӯлоб ном бурдааст, ки мегӯяд, нисбати ҳарсеи онҳо бо моддаи 401-и Кодекси ҷиноятии Тоҷикистон қаблан парванда боз шуда ва дар пайгард қарор доштанд.

Мулоқои мақомоти тоҷик бо Дабири кулли СПАД дар Душанбе

Аз ҷониби

-

05/09/2023

Дабири кулли Созмони Паймони Аҳдномаи Дастаҷамъӣ Имангали Тасмагамбетов 5-уми сентябри соли ҷорӣ бо вазири корҳои хориҷӣ ва дигар мақомти тоҷик мулоқот кард.

Дафтари матбуоти СПАД иттилоъ дод, ки Имангали Тасмагамбетов ҳамроҳи Сироҷиддин Муҳриддин, Вазири мудофиаи Тоҷикистон Шералӣ Мирзо ва Дабири Шӯрои амнияти кишвар Маҳмудзода Насрулло Раҳматҷон масъалаи омодагӣ ба нишастҳои навбатии ин созмонро баррасӣ карданд.

Вазорати корҳои хориҷии Тоҷикистон низ аз ин мулоқот хабар додааст. Гуфта мешавад, ҷонибҳо дар рафти вохӯрӣ вобаста ба “муҳтавои ҷаласаи муштараки Шурои вазирони корҳои хориҷӣ, Шурои вазирони мудофиа ва Кумитаи котибони шуроҳои амният, инчунин иҷлоси Шурои амнияти дастаҷамъии СААД, ки нимаи дуюми моҳи ноябри соли ҷорӣ дар Ҷумҳурии Беларус ба нақша гирифта шудааст”-ро гуфтугӯ карданд.

Вазорати корҳои хорҷии Тоҷикистон аз зикри тафсилоти ин вохӯрӣ худдорӣ кардааст, аммо дафтари матбуоти СПАД менависад, ки яке аз мавзуоти муҳими ин мулоқот масъалаи таъмини амният дар марзҳо бо Афғонистон буд.

Гуфта мешавад, Имангали Тасмагамбетов ҳамчунин дар мавриди омодагии Котиботи Конфронси байналмилалии илмӣ-амалии СПАД дар мавзуи “Вазъият дар Афғонистон ва таъсири он ба амнияти кишварҳои узви СПАД”, ки қарор аст моҳи октябри соли ҷорӣ баргузор шавад, суҳбат кардааст.

Инчунин Дабири кулли СПАД дар ин мулоқот бо мақомоти тоҷик вазъ дар марзи Тоҷикистону Қирғизистонро баррасӣ карда, аз талошҳои дипломатии кишварҳо изҳори сипос намуда ва барои ҳалли ниҳоии мушкилоти мавҷуда, ба мақомоти тоҷик тавсияҳо додааст.

Ба муҳоҷирон дар шаҳру ноҳияҳои Русия даъватномаи ҳарбӣ дода истодаанд

Аз ҷониби

-

05/09/2023