Вазири бесалоҳият ё президенти тарсу?

Аз ҷониби

-

18/04/2023

Дар мувофиқа бо Эмомалӣ Раҳмон, ҳамчун Президенти Тоҷикистон сардорони шуъбаҳои Вазорати корҳои дохилӣ дар хеле аз шаҳру ноҳияҳои кишвар иваз шуданд.

Дафтари Хадамоти матбуоти Президенти Тоҷикистон хабар дода, ки 17-уми апрели соли 2023 Эмомалӣ Раҳмон “дар Қасри миллат кадрҳоеро, ки ба вазифаҳои пурмасъул дар сохторҳои Вазорати корҳои дохилӣ ва Корхонаи воҳиди давлатии “Хоҷагии манзилию коммуналӣ” таъин гардиданд, барои суҳбат ба ҳузур пазируфтанд.”

Ба қавли манбаъ, “дар мувофиқа бо Президенти Ҷумҳурии Тоҷикистон сардорони шуъбаҳои Вазорати корҳои дохилӣ дар ноҳияи Исмоили Сомонии шаҳри Душанбе, шаҳри Хоруғи Вилояти Мухтори Кӯҳистони Бадахшон, шаҳрҳои Ҳисору Турсунзода, ноҳияи Лахш, сардорони шуъбаҳои Вазорати корҳои дохилӣ дар шаҳрҳои Левакант, Хуросон, Восеъ, Данғара, Шамсиддин Шоҳин, Панҷ, Муъминобод, Фархор ва Ховалинги вилояти Хатлон, шаҳрҳои Гулистону Истаравшан, ноҳияҳои Бобоҷон Ғафуров, Ҷаббор Расулов ва Кӯҳистони Мастчоҳи вилояти Суғд аз ҳисоби кадрҳои соҳибтаҷрибаву тахассусманд таъин гардиданд.”

Хадамоти матбуоти Президенти кишвар феҳристи ин кадрҳои навине, ки ба вазифаҳои сардорони шуъбаҳои Вазорати корҳои дохилӣ таъйин шудаанд, нашр накардааст, аммо суол ин аст, ки вақте онҳо дар мувофиқа бо Эмомалӣ Раҳмон ин курсиҳоро соҳиб шуданд, маънои онро дорад, ҳама гузоришҳои махсусро мустақим ба Президент мерасонанд ё ба раёсатҳои корҳои дохилӣ ва вазорат?

Вақте ин ҳама сардорони шуъбаҳои мақомоти корҳои дохилӣ низ дар мувофиқа бо Президенти кишвар ба кор таъйин мешаванд ва ё аз кор озод карда мешаванд, вазири корҳои дохилӣ, муовинони ӯ, сардорони раёсатҳои корҳои дохилӣ дар шаҳри Душанбе ва вилоятҳо дар вақти интихоби кадрҳо чӣ салоҳиятҳое доранд?

Суоли дигар ин ки вақте вазири корҳои дохилӣ дар Тоҷикистон салоҳияти онро надорад, ки ба сурати мустақим ё дар мувофиқа ва ё мушовира бо сардорони раёсатҳои ин вазорат, ба хусус Раёсати кадрҳо ва кор бо ҳайати шахсии Вазорати корҳои дохилии Ҷумҳурии Тоҷикистон ва дар ҳамкорӣ бо Раёсати амнияти дохилии Вазорати корҳои дохилии Ҷумҳурии Тоҷикистон – ин ду раёсат яке вазифааш интихоби кадрҳо ва дувумӣ ҳам ба хотири таъмини амнияти бештар ва муайян кардани шахсияти кадрҳо ва кормандони Вазорати корҳои дохилӣ таъсис дода шудаанд – кадрҳоро интихоб ва ё аз вазифа озод кунанд, вуҷуди онҳо чӣ маъно дорад?

Вазири корҳои дохилӣ муовини якум ва чор муовини дигар, ки ҳамагӣ 5 нафар муовинонашро ташкил медиҳанд ва ҳамзамон сардорони раёсатҳои ин вазорат дар шаҳри Душанбе, вилояти Хатлон, вилояти Суғд ва Вилояти Мухтори Кӯҳистон Бадахшон чӣ кора ҳастанд, ки наметавонанда бидуни иҷозат пурсидан аз Эмомалӣ Раҳмон сардори шуъбаи як ноҳияро чӣ маркази пойтахт бошад ва ё чӣ дар яке манотиқи кӯҳистонӣ интихоб кунанд?

Ин чиз ду паёмро метавонад ба ҷомеа бирасонад:

а) бахше аз салоҳиятҳои вазиру муовинонаш ва сардорони раёсатҳои ин вазорат аз ҷониби Президенти кишвар ғасб шудаанд;

б) Эмомалӣ Раҳмон ҳамчун президент ва раиси ҳукумат ба раҳбарияти Вазорати корҳои дохилӣ дар интихоби кадрҳо эътимод надорад.

Амруллоҳи Низом, махсус барои Azda tv

Зиёда аз 100 кушта ва 1000 захмӣ дар задухӯрдҳои мусаллаҳонаи Судон

Аз ҷониби

AZDA TV-2

-

17/04/2023

0

Дар рафти набардҳои шадиде, ки байни Нерӯҳои зудамал ва артиши Судон дар пойтахти ин кишвар, шаҳри Хуртум мегузарад, то кунун дасти кам 100 нафар кушта ва беш аз 1000 каси дигар захмӣ шудааст.

Бино ба иттилои расонаҳо, генерал Абдулфаттоҳ Бурҳон, раиси артиши Судон, ки ҳамзамон раҳбари Шӯрои раҳбарии интиқолии Судон аст ва амалан зимоми давлатдориро дар ин кишвар дар даст дорад, дар охирин иқдоми худ Нирӯҳои зудамали кишварашро барҳам додааст.

Нерӯҳои зудамали Судон, ки гуфта мешавад, теъдодашон ба 100 ҳазор нафар мерасад ва дар гӯшаҳои мухталифи ин кишвар, ба хусус сарҳадот ба сурати проканда амал мекунанд, як ниҳоди низомӣ буда, ҷудо аз артиш ва дигар мақомоти қудратӣ амал мекунад.

Нерӯҳои зудамали Судон бо раҳбарии генерал Муҳаммад Ҳамдон Дақлу, маъруф ба Ҳамидтӣ фаъолияти худро ба сурати гусутрда ҳанӯз дар замони собиқ президенти ин кишвар Умар ал-Башир дар соли 2015 оғоз кардааст.

Муҳаммад Ҳамдон Дақлу дар ҳоли ҳозир аз нигоҳи доштани мақоми расмӣ дувумин фарди ин кишвар пас аз генерал Абдулфаттоҳ Бурҳон, раиси артиш ва раҳбари Шӯрои раҳбарии интиқолӣ мебошад. Генерал Муҳаммад Ҳамдон Дақлу дар Шӯрои раҳбарии интиқолии Судон муовини генерал Абдулфаттоҳ Бурҳон мебошад.

Гуфта мешавад, даъвоҳо барои тасоҳуби бештари қудрат ва ҳифзи манофеи шахсӣ ва гурӯҳӣ байни раису муовинаш дар Шӯрои раҳбарии интиқолии Судон собиқаи тӯлонӣ дорад, вале шурӯъ аз оғози ҳамин моҳи апрели соли 2023 шиддати ихтилофоти онҳо ранги дигаре ба худ касб кард.

Ин дафъа генерал Абдулфаттоҳ Бурҳон пешниҳод карда, ки Нерӯҳои зудамали Судон ҳамчун як шохаи низомӣ ба артиш бипайвандад ва салоҳияти худмухторӣ аз он салб карда шавад. Ин пешниҳоди Шӯрои Раҳбарии Интиқолӣ ба муовинаш генерал Муҳаммад Ҳамдон ки дасту бозӯи пурқудраташро кӯтоҳ мекард, писанд наомадааст.

Даъвоҳои ҳар ду ҷониб рӯз то рӯз зиёдтар шуда ва билохира субҳи шанбеи 15-уми апрели соли ҷорӣ алайҳи якдигар сангар гирифтанд. Дар натиҷаи ин сангаргириҳо ва даргириҳои мусаллаҳона то кунун дасти кам 100 нафар кушта ва зиёда аз 1000 каси дигар маҷрӯҳ шудааст. Тибқи иттилооти ахир, бемористони марказии шаҳри Хартум мавриди ҳамлаҳои мушакӣ қарор гирифта, дасти кам 50 нафар аз беморон зери харобаҳо банд монда ва ё кушта шудаанд.

Шикоят хабарнигор аз бадрафтории кормандони милиса

Аз ҷониби

AZDA TV

-

17/04/2023

0

Кормандони Вазорати корҳои дохилии Тоҷикистон ба хабарнигор таҳдид карда гуфтанд, ки агар аз рафти намозгузории мардум дар масҷиди марказии шаҳри Душанбе наворгирӣ кунад, ӯро 15 рӯзи маҳбас таҳдид мекунад.

Нурангез Рустамзода, хабаринори бахши тоҷикистонии ВАО-Дарӣ (Садои Амрико) бо ирсоли як нома ба хонум Озода Раҳмон, раҳбари Дастгоҳи Президент аз он шикоят кардааст, ки 14-уми апрели соли ҷорӣ се нафар кормандони Вазорати корҳои дохилӣ дар шаҳри Душанбе бо ӯ дағалрафторӣ ва дуруштгуфторӣ кардаанд.

Ин хабариноги тоҷикистонии муқими Душанбе мегӯяд, ки дар рӯзи рӯшан се нафар аз кормандони мақомоти корҳои дохилӣ дар пойтахт бо ӯ рафтори бад карда, монеи рисолати касбиаш гардидаанд.

Вай гуфтааст, “Рӯзи 14 уми апрели соли равон дар назди Масҷиди марказии шаҳри Душанбе мехостам чанд кадр аз рафти намози ҷумъа наворбардорӣ кунам, то барои гузориш дар мавзуъи таҷлили Иди Сайиди Фитр дар Тоҷикистон истифода намоям. Аммо 3 корманди милитсия нагузоштанд, ки рисолати касбии худро ҳамчун журналист иҷро кунам. Сарфи назар аз он, ки ман худро муаррифӣ намудам, ҳуҷҷати шахсиамро нишон додам, онҳо худро муаррифӣ нанамуданд, иҷозатномаи Вазорати корҳои хориҷиро (аккредитатсия) эътироф накарданд.”

Бону Нурангез Рустамзода таъкид мекунад, ки барои сабти навор ва таҳия гузориш бо мактуб ба Кумитаи дин ҳам муроҷиат карда ва онҳо мусоидат карданд, “вале ин 3 корманди милитсия дағалона нисбати ман муносибат намуда, бо суханҳои қабеҳ маро аз назди масҷид дур карданд. Яке аз онҳо таҳдид ҳам кард, ки 15 рӯз маро ба маҳкама мебарад ва ақламро дар ҷояш меорад ва дигар фикри наворбардориро нахоҳам кард.”

Ин милисаҳои назди масҷид дар идомаи таҳдидҳояшон ба хабарнигор санадҳои расмии Вазорати корҳои хориҷӣ ва Кумитаи дин, ки ба онҳо пешниҳод шуда, ба эътибор нагирифта гуфтаанд, “ин ҷо як намуд одамову вазиро миёян, ки агар ту камера бкни медонӣ чӣ меша? Ин аккредитатсияи ту пеши уво ҳичиай, кумитаи дини ту да иҷа ҳичкаай” (гуфтаҳои корманди милиса айнан оварда шудааст).

Гуфта мешавад, тибқи қонунгузории Тоҷикистон кормандони давлатӣ дар рӯзҳои корӣ ва дар идораҳои давлатӣ ҳаққи баргузор кардани маросими динӣ, ба хусус намоз хонданро надоранд. Аммо, рӯзҳои ҷумъа бархе аз онҳо бо баҳонаҳои мухталиф ҷои корашонро тарк карда, пинҳонӣ ба масҷидҳо рафта намози ҷумъаро мехонанд.

Баррасии ҳамкориҳои Тоҷикистону Ироқ

Аз ҷониби

AZDA TV

-

17/04/2023

0

Сафири Тоҷикистон дар чор кишвари арабӣ дар мулоқот бо президенти Ироқ ҳамкориҳои дуҷонибаро мавриди баҳсу баррасӣ қарор доранд.

Бино ба иттилои Вазорати корҳои хориҷӣ, 16 апрели соли 2023, Президенти Ҷумҳурии Ироқ Абдулатиф Ҷамол Рашид сафири Ҷумҳурии Тоҷикистон дар Ҷумҳурии Ироқ (бо қароргоҳ дар кишвари Кувайт) Зубайдулло Зубайдзодаро ба ҳузур пазируфт.

Ба қавли манбаъ, дар рафти ин мулоқот ҷонибҳо дар бораи масоиили сиёсӣ, иқтисодӣ, тиҷоратӣ ва дигар масоили муҳимме барои ҳар ду ҷониб зарурро мавриди баррасӣ қарор доданд.

Гуфта мешавад, Тоҷикистону Ироқ ба сурати мустақим ҳамкориҳои тиҷоратӣ ва иқтисодии тавсеаёфта надоранд, вале таҷрибаи ҳамкории онҳо дар чанд соли ахир, ба хусус пас ҷангҳои шадиде, ки тайи 10 соли ахир Ироқ таҷриба кард, ҳамкориҳои Душанбеву Бағдод дар бахши ҳамкориҳои амниятӣ ва табодули иттилоот хеле рушд кардааст.

Боздошти як шаҳрванди Тоҷикистон дар Қирғизистон бо иттиҳоми терроризм

Аз ҷониби

AZDA TV

-

17/04/2023

0

Пулиси вилояти Чуйскйи Қирғизистон 17-уми апрели соли ҷорӣ як шаҳрванди 30-солаи Тоҷикистонро бо иттиҳоми даст доштан дар ҷиноятҳои дорои хусисяти террористӣ боздошт кард.

Дар ноҳияи Аламудунский Қирғизистон як шаҳрванди Тоҷикистон бо иттиҳоми узвият дар созмони байналмилалии террористӣ боздошт шудааст. Гуфта мешавад, ӯ дар пайгарди қонунӣ қарор дошт ва аз деҳаи Лебединовкаи ноҳияи Аламудунский боздошт шудааст. Дар ин бора Раёсати корҳои дохилии вилояти Чуйский хабар медиҳад.

Пулис мегӯяд, шаҳрванди Ҷумҳурии Тоҷикистон З.М. соли таваллудаш 1993 қаблан бо ҷурми “Убури ғайриқонунии марзи давлатӣ” дар Қирғизистон боздошт шуда ва бо пардохти ҷарима озод шуда буд.

“Тибқи маълумоте, ки аз ҳамкорон аз кишварҳои ҳамсоя ба мо расид, З.М. борҳо барои ҷиноятҳои вазнин суд шуда, ҳоло дар ҷустуҷӯ қарор дошт. Ӯ узви созмони байналмилалии террористӣ мебошад”, – омадааст дар хабар.

Гуфта мешавад, ҳоло ин шаҳрванди боздоштшудаи Тоҷикистон дар боздоштгоҳи муваққатӣ қарор дорад. Вале то ҳануз назари боздоштшуда ва наздиконаш дастраси расонаҳо нашудааст. Ва маълум ҳам нест, ки вакили дифоъ дорад ё на.

Як зодаи Тоҷикистон дар Русия бо иттиҳоми терроризм ба ҳукми абад маҳкум шуд

Аз ҷониби

AZDA TV

-

17/04/2023

0

Хадамоти федеролии амният (ФСБ)-и Русия аз боздошти яке аз раҳбарони ДИИШ, ки зодаи Тоҷикистон будааст хабар дод.

Бино ба маълумоти мақомоти амниятии Русия, ин шаҳрванди Тоҷикистон аз раҳбарони ДИИШ ба шумор рафта, дар шаҳрҳои Новосибирск ва Москва қасди ҳамлаи террористиро доштааст.

Дар хабар гуфта мешавад, ки “шаҳрванди Ҷумҳурии Тоҷикистон Назаров Т.М., соли таваллудаш 1989 бо мақсади анҷом додани амалиёти харобкорӣ ва террористӣ дар қаламрави вилояти Маскав ва Новосибирск як шохаи ин созмонро таъсис додааст”.

Инчунин Назаров гуфта мешавад, қасд доштааст дар ҷойҳои серодам, аз ҷумла дар роҳи оҳан аз маводи тарканда истифода кунад.

Ба навиштаи расонаҳои русӣ, боздоштшуда барои анҷоми ҳамлаҳои террористӣ шаҳрвандони Тоҷикистонро ҷалб карда, истеҳсоли ғайриқонунии маводи таркандаро ташкил кардааст.

Ин зодаи Тоҷикистонро мақомоти рус дар 21 ҷиноят гунаҳкор дониста, ӯро ба ҳабси абад ва пардохти якуним миллион рубл ҷарима маҳкум кардаанд.

Назари худи гумонбар дастраси расонаҳо нест. Инчунин гуфта нашудааст, ки гурӯҳи ташкил кардаи Назаров аз чанд нафар иборат буда, чанд зодаи Тоҷикистон шомили он шудаанд.

Ҳамзамон замони боздошту муҳокимаи ин зодаи Тоҷикистон низ маълум нест.

Мухолифи Путин барои 25 сол равонаи зиндон шуд

Аз ҷониби

AZDA TV

-

17/04/2023

0

Оппозиционный политик, журналист и политзаключённый Владимир Кара-Мурза

Додгоҳи шаҳри Маскав 17-уми апрел сиёсатмадор ва рӯзноманигор Владимир Кара-Мурзаро ба 25 соли зиндон маҳкум кард.

Ин мухолифи рус бо ҷурми хиёнат ба давлат, паҳн кардани иттилои нодуруст дар бораи артиши Русия ва ҳамкорӣ бо “созмони номақбул” муттаҳам дониста шудааст. Худи Владимир Кара-Мурза иттиҳомоти мақомотро қабул надорад.

Дар охирин мурофиаи додгоҳии ин мухолифи Путин дипломатҳо, аз ҷумла намояндагони сафоратҳои Британия Кабир, ИМА ва Канада дар Русия, рӯзноманигорону расонаҳои мустақил дар назди бинои Додгоҳи Маскам ҷамъ омада буданд. Аммо онҳоро ба толори мурофиа роҳ надоданд. Ҷамъомадагон мурофиаро дар пахши мустақим аз як толори дигар тамошо карданд.

Баъд аз эълони ҳукми додгоҳ дар суҳбат бо рӯзноманигорон дипломатҳои хориҷӣ аз ин ҳукми додгоҳ ва амали мақомот интиқод намуда, гуфтаанд, ки аз мақомоти Русия талаби озодии Владимир Кара-Мурза идома медиҳанд.

Ёдовар мешавем, ки Владимир Кара-Мурзаи 41-сола рӯзи 11-уми апрели соли 2022 дар Маскав “барои итоат накардан ба пулис” барои 15-рӯз боздошт шуд. Дар муддати боздошташ мақомоти рус алайҳи ӯ парвандаи ҷиноӣ боз карданд.

Дертар маълум шуд, ки сабаби расмии оғози парвандаи ҷиноӣ алайҳи Владимир Кара-Мурза суханронии ӯ зидди ҳамлаи Русия ба Украина дар Палатаи намояндагон дар Аризонаи Иёлоти Муттаҳида дар 15 марти соли 2022 будааст.

Владимир Кара-Мурза рӯзи 22 апрел ба боздоштгоҳи муваққатӣ фиристода шуда, худи ҳамон рӯз Вазорати адлияи Русия ӯро “агенти хориҷӣ” эълон кард. Баъдан, нисбати ин сиёсатмадор, ки аллакай дар боздоштгоҳ қарор дошт, бар асоси ду моддаи дигари Кодекси ҷиноӣ, аз ҷумла ҳамкорӣ бо “созмони номақбул” ба далели ташкили мизи мудаввар ба ҳимоят аз зиндониёни сиёсӣ дар маркази Сахарова ва “хиёнат ба давлат” муттаҳам шуд.

Ба иддаои муфаттишон, вай дар ивази 30 ҳазор доллар моҳона гуё солҳои дароз ба созмонҳои вобаста ба кишварҳои узви НАТО кумак расонидааст, ки “кумакҳо”-и ӯ зидди амнияти Русия унвон шуда буд.

Аммо, ба гуфтаи ҳуқуқшинос Вадим Прохоров, парвандаи хиёнат ба давлат ба далели суханрониҳои Кара-Мурза дар чорабиниҳои оммавӣ дар Лиссабон, Ҳелсинки ва Вашингтон, ки ӯ дар бораи таъқиби сиёсӣ, интихобот ва сензура дар Русия ҳарф мезад, оғоз шудааст.

Гуфта мешавад, вазъи саломатии ин сиёсатмадори рус дар як соли боздошт бад шуда, чанд маротиба ба утоқи ҷаримавӣ фиристода шудааст, инчунин дар рафти тафтишот бо фишори мақомот рӯ ба рӯ шудааст.

Созмонҳои ҷаҳонӣ ва кишварҳои ҳомии ҳуқуқ Влалимир Кара-Мурзаро зиндонии сиёсӣ медонанд ва озодии ӯро аз мақомоти рус талаб доранд.

Ҳамсояҳои Афғонистон Толибонро ба расмият мешиносанд?

Аз ҷониби

AZDA TV

-

14/04/2023

0

Амирхон Мутаққӣ, сарпарасти Вазорати корҳои хориҷии Толибон мегӯяд, ки тамоми кишварҳои минтақа, ки дар ҷамъи онҳо Тоҷикистон ҳам шомил мешавад, хоҳони беҳтар кардани равобит бо Афғонистон мебошанд.

Асри имрӯз, 14-уми апрели соли 2023 нишасти дурӯзаи вазирони корҳои хориҷии кишварҳои ҳамсояи Афғонистон бар иловаи Русия, ки субҳи дирӯз дар шаҳри Самарқанд шурӯъ гардида буд, ба кори худ поён дод.

Амирхон Муттақӣ, сарпарасти Вазорати корҳои хориҷии Афғонистон дар раъси як ҳайате бо намояндагӣ аз ҳукумати муваққати Толибон дар он ширкат кард. Ӯ дар поёни ин нишаст ба расонаҳо гуфт: “мо хушҳол шудем, ки имрӯз дар ин иҷлос ҳама кишварҳои минтақаро дидем.”

Ба гуфтаи Вазири корҳои хориҷии Толибон, ҳамсояҳои Афғонистон “ҳама ба ин фикру назар аст, ки бо ҳукумати ҷадиди Афғонистон таъомул (ҳамкориҳо)-и хубе дошта бошанд. Ҳам дар арсаи сиёсат, ҳам дар арсаи иқтисод ва ҳам дар арсаи тронзит, дар ҳама арсаҳо таъаллуқот (робитаҳо) ва таъомули мусбате дошта бошанд. Ин як нуктаи бисёр хуберо дар ин иҷлоси Самарқанд ёфтем.“

Пеш аз ин дирӯз ҳам дар вақти суханрониаш вазири корҳои хориҷаи Толибон ба ҳамаи ҳамсояҳои Афғонистон итминон дода буд, ки Афғонистон як хонаи амн аст ва ҳеч гуна хатаре аз хоки он алайҳи ҳеч як аз кишварҳои ҳамсоя таҳдид намекунад ва онҳо низ ин иҷозаро нахоҳанд дод, ки Афғонистон ба майдони ҷангҳои ниёбатӣ байни дигар давлатҳо табдил дода шавад.

Гуфта мешавад, дар шабакаҳои иҷтимоӣ аксу наворҳои зиёде мечарханд, ки дида мешавад, ин ҳайати Толибон бо раҳбарии Амирхон Муттақӣ бо ҳайатҳои кишвраҳои Чину Эрон ва Узбекистону Туркманистон дидору мулоқотҳое анҷом додааст, аммо тавре ӯ мегӯяд, “дар ин иҷлос ҳама кишварҳои минтақаро” дидаанд, ҳеч аксу навори мушаххасе дар бораи дидору мулоқотҳои бо ҳайати Тоҷикистон, ки бо раҳбарии Сироҷиддин Муҳриддин, вазири корҳои хориҷии кишвар дар он нишаст щузур дошт, нашр на шудааст. Вазорати корҳои хориҷии Тоҷикистон дар ин бора то ҳол иттилоъе надодааст.

Писари шоирон Фарзона ва Озарахш даргузашт

Аз ҷониби

AZDA TV

-

14/04/2023

0

Нимаи дуюми дирӯз, 13-уми апрел Ҳумоюн Каримов, писари шоирони шинохтаи кишвар Фарзона ва Озарахш дар дарё ғарқ шуда, аз дунё гузашт.

Шоҳона Каримова, хоҳари бузурги Ҳумоюн Каримов, шоми 13-уми апрели соли 2023 дар сафҳаи фейсбукиаш дар бораи ин ҳодиса хабар дода гуфтааст: “Хабари марги Ту омад, ки ситонад ҷонам!!!” ва дар идома афзуда, “Аллоҳи ман, сабр деҳ ба мо, аз Ту ҳастем ва ба сӯи Ту бармегардем.”

Мақомоти Тоҷикистон ҳам ин ҳодисаро тасдиқ кардаанд, вале на мақомот ва на дигар пайвандони ӯ ба сурати расмӣ дар бораи ҷузъиёти он шарҳу тафсире ироа накардаанд. Аммо сомонаи ҳафтаномаи Оила бо нашри як хабар сабаби ҳалок шудани ӯро “худкӯшӣ” эълон кардааст.

Ин ҳодиса на танҳо волидони марҳумро ба мотам шинонд, балки ҷомеаи адабии Тоҷикистон ва мухлисону пайравони ин шоирони шинохтаро ҳам шука кардааст, ки аз дирӯз то ҳол ҳазорҳо нафар аз корбарони шабакаҳои иҷтимоӣ бо нашри паёмҳои изҳори тасаллият ва шарҳ ва фиристодани паёмҳо ҳамдардии худро бо онҳо баён кардаанд.

Гуфта мешавад, Ҳумуюн Каримов, писари ягонаи шоирони шинохтаи кишвар Толиб Каримов маъруф ба Озарахш ва Иноят Хоҷаева, машҳур ба Фарзона, донишҷӯи бахши шуъбаи Шарқшиносии Донишгоҳи давлатии шаҳри Хуҷанд буд ва дар гузашта, гоҳо овозхонӣ ҳам мекард.

Ҳайати кормандони Идораи Аздо тв низ ҳамдардии худро нисбат ба ин ҳодиса баён карда, ба шоирони шинохта, наздикону пайвандон ва мухлисону роҳравони онҳо аз боргоҳи Илоҳӣ сабру шикебоӣ мехоҳад.

Мақомот бародари як фаъоли тоҷикро боздошт кардаанд

Аз ҷониби

AZDA TV

-

14/04/2023

0

Мақомоти қудратӣ дар ноҳияи Фархори вилояти Хатлон рӯзи 14-уми апрели соли ҷорӣ сокини ҳамин ноҳия Қурбонов Самаридинро аз назди хонааш боздошт ва ба макони номаълум бурдаанд.

Қурбонов Самариддин бародари фаъоли сиёсӣ, Қурбонов Илҳомҷон мебошад. Номбурда дар суҳбат ба Azda tv гуфт, субҳи имрӯз 5-6 нафар аз кормандони амниятии ноҳияи Фархор бародараш Самариддинро аз назди хонаашон ғайриқонунӣ бидуни даъватнома зӯран ба як мошин савор карда, ба ҷои номаълум бурдаанд.

Ин фаъоли тоҷик мегӯяд, то ҳол сабаби аслии боздошти бародарашро мақомот эълон накардааст, “вале маълум аст, ки ба фаъолиятҳои сиёсии ман рабт дорад”.

Ӯ мегӯяд, пас аз бурдани бародараш, пайвандонаш барои ҷустуҷӯи ӯ назди идораҳои мақомот рафтаанд, вале то ҳол ҳеч хабаре нест.

“Дар аввал ду нафар омада дар беруни хона бо бародарам дар бораи ман суҳбат кардаанд ва ӯро ба такрор мегуфтаанд, ки биё ҳамроҳи мо равем ва баёнот навис ҷавобат медиҳем. Дар аҳмин ҳол як мошини дигар расид ва чор нафар поин шуданду якбора ӯро лату кӯбкунон ба мошин савор карда бо худ бурданд.”, – мегӯяд Қурбонов Илҳомҷон аз қавли пайвандон ва шоҳидони ҳодиса.

Гуфта мешавад, чандест мақомоти тоҷик фишорро болои хонаводаҳои мухолифини дар хориҷбуда шиддат бахшидаанд. Ба гуфтаи онҳо, аксари ин фишорҳо хусусан баъди иштирок дар гирдиҳамоии эътирозии шаҳри Берлин, ки рӯзи 25-уми март дар робита ба сафари Раҳмон ба Амрико барпо шуд, марбут аст.

ШАБАКАИ ХАБАРРАСОНӢ ВА ТАҲЛИЛӢ

Вазири бесалоҳият ё президенти тарсу?

Зиёда аз 100 кушта ва 1000 захмӣ дар задухӯрдҳои мусаллаҳонаи Судон

Шикоят хабарнигор аз бадрафтории кормандони милиса

Баррасии ҳамкориҳои Тоҷикистону Ироқ

Боздошти як шаҳрванди Тоҷикистон дар Қирғизистон бо иттиҳоми терроризм

Як зодаи Тоҷикистон дар Русия бо иттиҳоми терроризм ба ҳукми абад маҳкум шуд

Мухолифи Путин барои 25 сол равонаи зиндон шуд

Ҳамсояҳои Афғонистон Толибонро ба расмият мешиносанд?

Писари шоирон Фарзона ва Озарахш даргузашт

Мақомот бародари як фаъоли тоҷикро боздошт кардаанд

Дар бораи мо

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

<img class="tdb-logo-img td-retina-data" data-retina="https://azda.tv/wp-content/uploads/2023/05/AzdaTV_logo-RGB-PNG-transparent.png" src="//azda.tv/wp-content/uploads/2023/05/AzdaTV_logo-RGB-PNG-transparent.png" alt="Logo" title="" width="2237" height="450" />

Дар бораи мо