Ҷустуҷӯ кунед
Ҷустуҷӯ
17.9 C
Dushanbe
Хона блог саҳифа 223

Тазоҳуроти мухолифон дар Олмон алайҳи сафари Раҳмон ба ин кишвар

Аз ҷониби
AZDA-TV
-
0

Ҳаракати сиёсии “Гурӯҳи 24” эълон кардааст, ки рӯзи 28-уми сентябр дар шаҳри Берлини Олмон алайҳи сафари Эмомалӣ Раҳмон ба ин кишвар гирдиҳамоии эътирозӣ барпо хоҳанд кард.

Фаъолони “Гурӯҳи 24” аз тоҷикони муқими Аврупо, бахусус Олмон даъват доранд, ки дар ин гирдиҳамоӣ ширкат кунанд ва дар сарнавишти худ саҳмгузор бошанд.

Дар ин эълон гуфта мешавад, ки тазоҳурот рӯзи 28-уми сентябр, соати 15:00 дар рӯ ба рӯи бинои сафорати Тоҷикистон дар Берлин баргузор мешавад.

Маълум нест, ки мухолифон аз дигар ҳизбу гурӯҳҳо, ба мисли Паймони миллии Тоҷикистон ва Ватандор дар ин тазоҳурот ширкат хоҳанд кард ё на.

Гуфта мешавад, рӯзи 29-уми сентябри соли ҷорӣ қарор аст дар шаҳри Берлин мулоқоти президентҳои Осиёи Марказӣ, аз ҷумла Эмомалӣ Раҳмон ва раисҷумҳури Олмон Френк Валтер Штейнмайер баргузор шавад. Дар ин бора сомонаи расмии Президенти Олмон хабар додааст.

То ҳол мавзуи гуфтугӯҳо нашр нашудааст ва мақомоти Тоҷикистон дар бораи сафари Эмомалӣ Раҳмон чизе нагуфтаанд.

Матни комили эълони Ҳаракати сиёсии “Гурӯҳи 24”:

Диққат!!!

Даъватномаи омавӣ !

Шаҳрвандони азиз, онҳое ки дар Урупо қарор доред! Он гунае ки аз расонаҳои расмӣ огаҳӣ пайдо кардед, рӯзи29-уми сетябри соли ҷорӣ президенти Олмон – Штайнмаер бо 5 роҳбари Осиёи марказӣ дидоре хоҳад дошт. Дар ин дидор Раҳмонов ҳам ширкат хоҳад кард!

Бинобарин, тоҷикони муқими Олмон рӯзи 28-уми сентябр, соати 15:00 дар рӯ ба рӯи бинои Сафорати Тоҷикистон дар Берлин ҳамоиише барпо хоҳанд кард!

Аз тамоми шаҳрвандони Тоҷикистонии муқими Урупо ва ба хусус Олмон даъват мешавад, ки ба ин ҳамоиш ҳузур биёранд ва дар сарнавишти худ саҳмгузор бошанд! Бубинем, ки Раҳмонов оё қодир аст, бо шаҳрвандони худ дар як фазои озод дидоре дошта бошад ва дарду мушкилоти мардумро мустақиман, бидуни хушомадгӯйҳояш, бишунавад ё хайр!

Шаҳрванди азиз, агар дар тарроҳии сарнавишти хеш саҳме нагирӣ, пас сарнавиштат бо даст ва хоҳишоти дигарон навишта хоҳад шуд!

Хоҳишмандон метавонанд ба суроғаи зерин ҳузур биёранд!

Олмон, ш. Берлин 10559, хиёбони Parleberg 43,

⁃ Parlabergerstr.43, 10559 Berlin

6 соли зиндон ба пизишке, ки сабаби марги як ҷавондухтар шуд

Аз ҷониби
AZDA.TV
-
0

Додгоҳи ноҳия Шоҳмансури шаҳри Душанбе пизишки Муассисаи давлатии Ёрии таъҷилии тиббии шаҳри Душанбе Ҳоҷиев А.М-ро барои 6 сол аз озодӣ маҳрум кард.

Дар ин бора Додситони кулли Тоҷикистон рӯзи 25-уми сентябр хабар дод. Дар хабари гуфта мешавад, ки Додгоҳи ноҳияи Шоҳмансур Хоҷаевро 19 сентябри соли 2023 мувофиқи “моддаи 129 қисми 2 КҶ Ҷумҳурии Тоҷикистон гӯнаҳгор дониста”, ӯро барои 6 сол равонаи зиндон кард.

Дар ҳукми додгоҳ гуфта мешавад, ки номбурда бар иловаи 6 соли зиндон то 3 соли дигар низ аз ҳуқуқи ишғоли вазифаҳо дар соҳаи тиб маҳрум карда шуда, ӯ муддати ҷазояшро дар колонияи ислоҳии низоми умумӣ мегузаронад.

Дар шарҳи ин қизия Додситонӣ менависад, тафтишот муайян кард, ки пизишки ҷарроҳи “навбатдори шуъбаи 1-уми Муассисаи давлатии Ёрии таъҷилии тиббии шаҳри Душанбе Ҳоҷиев А.М. 8 апрели соли 2023 соати 11-50 дақиқа бемор Шукурова Севинч Умедовна, соли таваллудаш 3 марти соли 2006-ро, ки бо шикояти дарди сахт дар қисмати поёни шикам муроҷиат карда буд, қабул намуда, бе гузаронидани ташхиси дахлдор ва муайян кардани сабаби ба миён омадани дард дар қисмати поёни шиками Шукурова С.У., ба номбурда маҳлули дорувории “Лидаза” ва “Новокаин” таъин намудааст.“

Додситонӣ мегӯяд, пас аз оне, ки пизишк доруро фармоиш дод, ҳамшираи шавқат онро ба ноболиғ Шукурова гузаронид, “дар натиҷа шоки анафилактикӣ оғоз ёфта, ин ҳолат боиси марги номбурда гардидааст.”

Додситонии кулли кишвар дар иттилоияи худ рафтори пизишкро “таъиноти рӯякӣ ва муносибати бепарвоёнаи дараҷаи олӣ” хондааст, аммо назари худи пизишк вобаста ба ин ҳодиса то ҳол дастраси расонаҳо нагаштааст.

Сомон Маҳмадбеков қаҳрамони Бозиҳои Осиё

Аз ҷониби
AZDA TV-2
-
0

Варзишкори хушноми тоҷик Сомон Маҳмадбеков дар Чин қаҳрамони Бозиҳои тобистонаи осиёӣ шуд.

Бино ба иттилои расонаҳо, 25-уми сентябри соли 2023 варзишкори тоҷик Сомон Маҳмадбеков дар Бозиҳои тобистонаи осиёӣ дар вазни то 81 кг соҳиби медали тилло шуд.

Сомон Маҳмадбеков дар ҳайати варзишкорони Тоҷикистон барои иштирок дар Бозиҳои тобистонаи осиёсӣ вориди шаҳри Ҳангжоуи Чин шуда буд.

Вай имрӯз дар финали мусобиқот ҳарифи худ Ли Ҷунванро аз Кореяи Ҷанбуиро шикаст дода, соҳиби медали тилло ва яке аз қаҳрамонони Тоҷикистон дар ин бозиҳои тобистонаи осиёӣ гардид.

Сомон Маҳмадбеков пеш аз ин дар майдонҳои ин мусобиқот ҳарифони худ аз кишварҳои Фаластин, Қирғизистон ва Қазоқистонро ҳам шикаст дода, зина ба зина ба финал баромада буд.

Гуфта мешавад, Сомон Маҳмадбеков ҷудокори 24-соали Тоҷикистон аст. Ӯ дар шаҳри Иркутски Русия таваллуд шудааст. Падараш Моёншоҳ Маҳмадбеков ва модараш Ҷамила Парвонаева ҳар ду зодагони Вилояти Мухтори Кӯҳистони Бадахшон мебошанд.

Боздошти писари ректори Донишгоҳи славянӣ

Аз ҷониби
AZDA-TV
-
0

Пулиси шаҳри Душанбе Файзулло Комёб Машраби 18-cола ва Аҳтамзода Оятулло Хушбахти 19-cоларо боздошт кардааст. 

Ин ду ҷавон гумонбарони аслии ҳодисаи тасодуфи нақлиётии шаби 21-уми сентябр, ки бар асари он овозхони ҷавони тоҷик Некрӯз Ниёзов ҳалок шуд, мебошанд. 

“Азия-Плюс” дар истинод ба Раёсати Вазорати корҳои дохилии дар шаҳри Душанбе хабар дод, ки  аз рӯи ин ҳодисаи тасодуф мутобиқи моддаи 212, қисми 2-и Кодекси ҷиноии Тоҷикистон (Вайрон кардани қоидаҳои ҳаракати роҳ ва истифодаи воситаҳои нақлиёт, ки аз беэҳтиётӣ боиси марги инсон гаштааст) парвандаи ҷиноятӣ боз шуда, тафтишот идома дорад ва то ҳол гунаҳкори асосӣ маълум нашудааст. 

Дар ҳолати исботи гуноҳ, ин моддаи Кодекси ҷиноятӣ ба Комёб ва Хушбахт то 5 солии зиндон ва маҳрум шудан аз ҳуқуқи ишғоли вазифаҳои муайян ё машғул шудан ба фаъолияти муайян ба муҳлати то 3 сол пешбинӣ мекунад.

Ёдовар мешавем, ки шаби 21-уми сентябр соатҳои 22:30 дар наздикии тарабхонаи “Боми Ҷаҳон”-и шаҳри Душанбе ду мошини гаронарзиши “Lexus RX350” бо ҳам бархӯрда, Некрӯз Ниёзовро, ки дар канори роҳ меистод, пахш кардаанд.  

Пайвандони овозхони ҷавон ба Радиои Озодӣ гуфтанд, ки Некрӯз дар пайи зарбаи сахти мошин ба ҷӯйбори канори роҳ афтида, асосан аз сараш захм бардоштааст. Ӯро ронандаи таксӣ ба беморхона овард ва субҳи 22-юми сентябр овозхон дар Беморхонаи “Қарияи боло” даргузашт ва ҷасади ӯро дар деҳаи Возми ноҳияи Шуғнони ВМКБ ба хок супурданд.

Гуфта мешавад, ки яке аз ронандагон Комёб Файзулло 18-сола, писари ректори Донишгоҳи славянии Русияву Тоҷикистон Файзулло Машраб Файзулло мебошад. То ҳол назари ректори Донишгоҳ дастраси расонаҳо нашудааст. 

Нафари дуввум, ки аз ӯ Аҳтамзода Оятулло Хушбахт ном бурда мешавад, маълум нест, ки писари кӣ аст ва оё касе аз пайвандонаш дар мақомҳои баланди ҳукуматӣ кор мекунанд ё на. 

Тибқи хабарҳои охир, Комёб ва Оятулло ҳарду донишҷӯёни Донишгоҳи славянии Русияву Тоҷикистон буда, дар гурӯҳҳои ҷудогонаи як курс таҳсил мекунанд ва ҳоло ки дар ҳабс қарор доранд, вақти пурсиш гуноҳро ба дӯши ҳамдигар вогузор кардаанд.

Ин бори аввал нест, ки номи писарони мансабдорон дар робита ба тасодуфҳои нақлиётӣ расонаӣ мешавад. Аз ҷумла, моҳи октябри соли 2013 бо иштироки Расули Амонуллоҳ, писари Амонулло Ҳукумов, раиси собиқи ширкати Роҳи Оҳани Тоҷикистон садамаи маргбор сурат гирифт, ки дар пайи он се нафар ҷон бохт. Инчунин дар як тасодуфи дигар, ки соли 2016 бо иштироки Фаромӯз Саидов, писари Давлаталӣ Саид, собиқ муовини аввали нахуствазир ва раиси феълии вилояти Хатлон рух дод, ду нафар ҳалок шуда буданд.

Дар садамаи якум мақомот гуфта буданд, ки ҳангоми рӯй додани ин ҳодиса Расули Амонулло дар сари чамбараки мошин набуд. Дар садамаи дуюм мақомот мошинро айбдор карда гуфта буданд, ки садама бар асари мушкилоти техникии мошин сар задааст ва Фаромузро ба ҷавобгарии ҷиноятӣ накашиданд. 

Сафари Эрдуғон ба Нахҷавон

Аз ҷониби
AZDA TV-2
-
0

Пас аз тасарруфи минтақаи Қарабоғи Кӯҳӣ Раҷаб Тайиб Эрдуғон нахустин раисҷумҳурест, ки бо сафари расмӣ вориди Озарбойҷон шудааст.

Бино ба иттилои расмӣ, субҳи 25-уми сентбяри соли ҷорӣ Президенти Туркия дар раъси як ҳайати воломақоми кишвараш ба минтақаи худмухтори Нахҷавони Озарбойҷон сафар кард.

Ба қавли манбаъ, дар ин сафар Президенти Туркияро вазирони хориҷӣ, дифоъ, амният, тиҷорат, алоқои мобилӣ, нақлиёт, мушовири калони раисҷумҳур ва ғайра ҳамроҳӣ мекунанд.

Аз сӯи дигар, мақомоти Арманистон хабар додаанд, ки нахустин гурӯҳи муҳоҷирони армание, ки минтақаи Қарабоғи Кӯҳиро баъд аз тасарруфи он аз ҷониби Озарбойҷон тарк карда буданд, дар деҳаи Корнидзори вилояти Сюник, дар ҷануби ин кишвар ба сурати муваққат маскун кардаанд.

Ҳукумати Арманистон эълон карда, ки то зуҳри имрӯз ҳудуди 4 ҳазор 850 нафар гуреза аз минтақаи Қарабоғи Кӯҳӣ вориди Араманистон шудааст. Инчунин гузориш мешавад, ки дар ҳоли ҳозир даҳҳо хонаводаи арманитабор барои тарки минтақа омода шудаанд. Арманистон ҳам гуфт, касоне мехоҳанд ин минтақаро тарк намоянд, нерӯҳои муҳофизи сули Русия онҳоро то Арманистон ҳамроҳӣ хоҳанд кард, то ба саломат бирасанд.

Пеш аз ин кишвари Туркия бо раҳбарии раисҷумҳури кунунии он дар набардҳои сиёсӣ ва низомӣ байни Озарбойҷон ва Арманистон бар сари минтақаи Қарабоғи Кӯҳӣ пайваста аз Боку ҳимоят мекард.

14-уми сентябри соли ҷорӣ қабл аз баргузории ҳамлаи низомӣ ба ин минтақа Президенти Озарбойҷон дар як сафари аз пеш эълон нашуда вориди Тоҷикистон шуда, бо сарони кишварҳои Осиёи Марказӣ, ки барои дидори навбатии худ ҷамъ шуда буданд, мулоқот карда буд.

Гуфта мешавад, минтақаи Қарабоғи Кӯҳи дар муддати беш аз 30 соли ахир дар тасарруфи кишвари Арманистон қарор дошт, ахиран дар 19-уми сентябри соли ҷорӣ Озарбойҷон бо баргузории як амалиёти низомӣ ин минтақаи кӯҳистониро ба тасарруфи худ даровард.

Раҳбарияти Арманистон гуфта буд, ки дар бораи арманиҳои муқими ин минтақа дар ҳоли ҳозир ҳеч гуна нигаронии ҷиддие вуҷуд надорад. Инчунин мақомоти Озарбойҷон низ таъкид карда буданд, ки айни замон дунболи таъмини суботи сиёсӣ ва амнияти шаҳрвандон дар ин минтақа мебошанд.

Кӯчаҳои пур аз партови шаҳри Хуҷанд

Аз ҷониби
AZDA-TV
-
0

Сокинони шаҳри Хуҷанд аз бемасъулиятии масъулон дар робита ба тозакорӣ ва таъмири вайронаҳои ин шаҳр шикоят доранд. 

Фарангис Шарипова, сокини вилояти Суғд дар остонаи “Рӯзи шаҳри Хуҷанд” бо нашри чанд аксе аз кӯчаҳои ин шаҳр дар саҳфаи фейбукиаш гуфтааст, ки “фикр мекунам, ки ҷашни рӯзи шаҳр танҳо дар он вақт сазовор хоҳад буд, ки кӯчаҳо, боғҳо, ҷӯйборҳо ва дигар ҷойҳо ҲАМЕША тоза бошанд!!!! Ва на танҳо дар рӯзҳои ид”. 

Дар аксҳое, ки ин корбар нашр кардааст, дида мешавад, ки кӯчаҳои шаҳри Хуҷанд пур аз партов аст ва роҳравҳои назди ҳайкали Исмоилии Сомонии шикастаанду ба таъмир ниёз доранд. 

Хонум Шарипова дар идома мегӯяд, замоне ки ҳама ҷойҳо таъмир ва кӯчаҳо ҳар рӯз тоза карда шаванд, ин барои шаҳри мо ҷашн ва дастоварди воқеӣ хоҳад буд, дар ғайри ин сурат он танҳо ба ҷуз намоиш чизи дигаре нест. 

Инчунин ин сокини шаҳри Хуҷанд мегӯяд, ки беҳтар мебуд он пули зиёдеро, ки барои консертҳо сарф мекунанд, ба тозакорон медоданд ва шояд шаҳр пур аз партов намешуд.

Гуфта мешавад, ҳамасола рӯзи 26-уми сентябр дар ин шаҳр бо харҷи маблағи зиёде “Рӯзи шаҳри Хуҷанд” ҷашн гирифта мешавад. 

Дар зери навиштаи Фарангис Шарипова корбарони дигар низ гуфтаҳои ӯро тасдиқ ва дастгирӣ кардаанд, аз ҷумла ҳунарманди шинохтаи кишвар Муқим Абдуфаттоев навиштааст, ки ба гуфтаҳоятон “100% розӣ”. 

Инчунин корбарони дигар гуфтаанд, ки борҳо дар ин бора шикоят кардаанд, аммо масъулин чора намебинанд ва дар назди меҳмонон ва сайёҳон аз дигар кишварҳо аз ифлосии шаҳр шарм медоранд. 

Сокинони шаҳри Хуҷанд дар ҳоле пур аз партов ва таъмирталаб будани баъзе аз маконҳои ин шаҳр шикоят мекунанд, ки мақомдорони тоҷик аз бештар шудани сайёҳон ва рушди он дар кишвар мегӯянд. 

Чунин шикоятҳо бори аввал нест, ки дар шабакаҳои иҷтимоӣ роҳ меёбанд. Сокинони дигар минтақаҳо, аз ҷумла шаҳри Душанбе низ борҳо аз ифлос ва таъмирталаб будани кӯчаҳои шаҳр шикоят карда буданд. 

Сокинон чун мебинанд, ки масъулини маҳаллу ноҳия ба додашон намерасанд ва ба мушкилоташон касе расидагӣ намекунад, ночор дар саҳфаҳои фейбукияшон аз мушкилоташон мегӯянд ва ба зинаҳои болоӣ, аз ҷумла худи Эмомалӣ Раҳмон муроҷиат мекунанд, то мушкилоти мавҷуда рафъ шавад. Аммо дар баъзе ҳолатҳо ин муроҷиату шикоятҳои сокинон баръакс, барояшон дарди сарсоз мешавад.  

Фаросна сафир ва низомиёни худро аз Нигер мебарорад

Аз ҷониби
AZDA.TV
-
0

Дар пайи инқилоби низомиён дар Нигер, Эмануэл Макрон, раисҷумҳури Фаронса рӯзи якшанбе эълон кард, ки сафири худ ва ҳамчунин низомиёнашро аз хоки ин кишвари африқоӣ берун мекунад.

Шӯрои низомиёни Нигер, ки пас аз инқилоби охири моҳи июли соли ҷорӣ ҳукуматро дар ин кишвари зери султаи Фаронса ба даст гирифтаанд, аз ин қарори Макрон истиқбол карданд. Онҳо мегӯянд, билохира бо пофишориҳои зиёд тавонистанд Фаронсаро аз кишварашон берун кунанд.

Эмануэл Макрон рӯзи гузашта зимни мусоҳибаи телевизионие гуфт, ки давоми чанд соати оянда сафираш хоки Нигерро тарк хоҳад кард. Аммо 1500 сарбозе, ки дар он кишвар мустақар аст, давоми чанд ҳафтаи оянда онҳо низ аз Нигер тахлия мешаванд.

Ба гузориши расонаҳо, ҷавонони зиёде дар Ниамей, пойтахти Нигер дар назди пойгоҳи низомии Фаронса даст ба тазоҳуроти эътирозӣ зада ва бо парчами ин кишвар тобуте сохта, онро рӯи шонаҳои хуб мебардоранд.

Аз ин пештар Шӯрои низомиёни Нигер аз сафири Фаронса дар кишаварашон Силвен Итте хоста буданд, ки хоки Нигерро тарк кунад, аммо сафир ба ин кор розӣ нашуд. Дар ниҳоят мақомоти кунунии Нигер дахлнопазирии дипломатияшро бекор карданд ва ӯро барои хориҷ шудан фурсат дода буданд.

Ёдовар мешавем, ки охирҳои моҳи июли соли ҷорӣ бахше аз низомиёни Ҷумҳурии Нигер кудето ташкил карда, раисҷумҳури феълии ин кишвар Муҳаммад Бозумро сарнагун ва қудратро ба даст гирифтанд.

Гуфта мешавад, аз соли 2020 баъд аз давлати Чад ва Молӣ Нигер сеюмин давлатест дар Африқо, ки низомиён алайҳи ҳукуматҳо кудето мекунанд.

Инчунин, субҳи рӯзи 30-юми августи соли ҷорӣ баъд аз Нигер, бархе нерӯҳои вобаста ба артиши Ҷумҳурии Габон бо анҷоми як кудетои низомӣ раиси ҷумҳури ин кишварро боздошт ва ба ҳасби хонагӣ гирифта буданд.

Як муҳоҷири афғонистонӣ 9 ҳамватани худро оташ зад

Аз ҷониби
AZDA.TV
-
0

Як шаҳрванди Афғонистон бо гумони оташ задани 9 нафар аз ҳамватанони худ дар Эрон боздошт шуд.

Бино ба гузориши расонаҳои эронӣ, як муҳоҷири афғонистонӣ дар ҷануби шаҳри Теҳрон 9 афғони дигарро оташ задааст, ки дар натиҷа ду нафар дар бемористон ҷон бохта, вазъи саломатии нафарони дигар вахим арзёбӣ мешавад.

Пулиси Теҳрон дар шаҳри ин қазия гуфта, ки муттаҳам дар ҷануби Теҳрон махфиёна ба як хонае, ки онҷо муҳоҷирони афғонистонӣ зиндагӣ мекардаанд, ворид шуда, бар рӯи 9 нафаре, ки хоб будаанд, бензин пошида ва оташ задааст.

Гуфта мешавад, шахси гумонбар ҳангоми фирор аз ҷониби мардуми маҳаллӣ боздошт гардид, худи ӯ низ дучори сӯхтагӣ дар ноҳияи по, даст ва сурат шудааст.

Мақомоти пулиси Теҳрон сабаби даст задани ин мардро ба чунин ҷинояти мудҳиш “хусумати шахсӣ” гуфтааст. Пулис мегӯяд, муттаҳам ба гуноҳи худ эътироф карда, сабаби ба ин кор даст заданашро чунин шарҳ додааст: “Чанде қабл аз Афғонистон ба Эрон омадам ва машғули кор шудам. Қаблан се рӯз дар он хона зиндагӣ кардам, аммо соҳибхона маро аз хона берун кард.“

Ба иттилои пулиси Теҳрон, гумонбар дар эътирофи худ ҳамчунин афзуда, ки бародараш низ бо баъзе аз нафароне, ки оташ зада шуданд, дар як мағозаи доруфурӯшӣ кор мекард, аммо ӯро ба хотири ихтилофот аз кораш ронданд.

Ӯ ронанда шудани худро аз хона ва бародарашро аз ҷои кораш сабаби даст задан ба ин ҷиноят гуфтааст.

Сарбози зӯргӯ ба зиндон маҳкум шуд

Аз ҷониби
AZDA.TV
-
0

Муҳриддин Исмоилов, сарбозе, ки наваскаронро латтукӯб карду дар сарашон “КОНИБОДОМ” навишт, ба 5 соли зиндон маҳкум шуд.

Бино ба иттилои “Pressa tj”, Додгоҳи ҳарбии шаҳри Хуҷанд гурӯҳвар (сержанти хурд) Муҳриддин Исмоиловро мувофиқи моддаи 391, қисми 1-и Кодекси ҷиноятии Тоҷикистон барои 5 сол равонаи зиндон кард.

Мақомоти додгоҳ Исмоиловро ба он гунаҳкор донистаанд, ки ӯ ҳангоми адои хидмати сарбозӣ “бо мақсади нишон додани бартарию тавонмандии худ шаъну шарафи наваскаронро паст зада, сари онҳоро тарошидааст.”

Ёдовар мешавем, ки моҳи июни соли ҷорӣ аксе нашр шуд, ки дида мешуд сарбозони калонсолтар сари 9 сарбози қаториро таҳқиромез ба шакли “КОНИБОДОМ”, яъне дар сари ҳар нафар як ҳарфро тарошида, онҳоро рост монда ва хандаомез акс гирифтаанд.

Додситонии кулли кишвар пас аз нашри он хабар таҳқиқро оғоз кард ва дар натиҷа муайян гардида, ки ин амалро 14-уми январи соли 2022 сартароши ротаи гурӯҳи мобилии Комендатураи қисми ҳарбии 0215 ҚС КДАМ Ҷумҳурии Тоҷикистон дар шаҳри Исфара гурӯҳвар (сержанти хурд) Исмоилов Муҳриддин Насиббоевич анҷом додааст.

Он замон гуфта мешуд, ин корро Исмоилов ҳамроҳи ҳамхидмати худ дар ин қисми низомӣ Давлатов А.М. анҷом додааст. Давлатов ин саҳнаи таҳқиркуниро бо телефони мобилияш акс гирифта ва он аксро баъди адои хидмати ҳарбӣ “15 июни соли 2023 ҳамчун воситаи таҳқири хизматчиёни ҳарбӣ дар шабакаҳои интернетӣ паҳн намудааст.”

Додситонии кулли кишвар вобаста ба ҳодисаи мазкур 16 июни соли 2023 нисбати Исмоилов М.Н. ва Давлатов А.М. бо моддаи 391 қисми 1 КҶ Ҷумҳурии Тоҷикистон парвандаи ҷиноятӣ оғоз карда буд.

Ин бори аввал нест, ки латтукӯб ва ё таҳқири сарбозон аз ҷониби ҳамхидматони калонсолтар дар шабакаҳои иҷтимӣ нашр мешавад. Чанде пеш латтукӯби бераҳмаонаи гурӯҳе аз сарбозон нашр шуда буд, ки дар ниҳоят омилони он саҳна барои солҳои тӯлонӣ равонаи зиндон шуданд.

“Дедовшина” ва ё кеҳтарсолорӣ дар дохили суфуфи Қувваҳои мусаллаҳи кишвар ба як амри маъмулӣ табдил шудааст. Борҳо шуда, ки аз сабаби бадрафтории кеҳтарон ва хунукназарии масъулон наваскарони зиёде кушта шуда, ҷасади онҳо ба хонаводаҳояшон таҳвил дода шудааст. Шурӯъ аз сарбозшикор то бадрафторӣ дар қисмҳои низомии Тоҷикистон аксари ҷавонони тоҷикро аз адои хидмати ҳарбӣ гурезон кардааст.

Amnesty International аз мақомоти Тоҷикистон озодии фаъолони помириро талаб кард

Аз ҷониби
AZDA-TV
-
0

Cозмони ҳуқуқии “Афви Байналмилал” (Amnesty International) аз кишварҳои ҷаҳон даъват кард, ки паноҳҷӯёни зодагони Бадахшонро ба Тоҷикистону Русия истирдод накунанд. 

Дар изҳороте, ки ин созмон рӯзи 21-уми сентябри соли ҷорӣ нашр кардааст, гуфта мешавад, ки бисёре аз паноҳҷӯёни помирӣ дар баъзе аз кишварҳои Аврупо ва ҷойҳои дигар зери хатари ихроҷ қарор доранд ва дар сурати ихроҷ шудани онҳо ин кишварҳо пояи асосии ҳуқуқи башар ва қонуни паноҳандагонро вайрон мекунанд.

Ба гуфтаи ин созмон, қонуни паноҳандагон фиристодани шахсро ба ҷое, ки метавонад ба таъқиб ё нақзи ҷиддии ҳуқуқи башар дучор шавад, манъ мекунад ва помириҳое, ки ба Русияву Тоҷикистон ихроҷ мешаванд, ба боздошту шиканҷа ва зиндон ё нопадид шудан рӯ ба рӯ хоҳанд шуд.  

Дар идома “Amnesty International” аз ҷомеаи ҷаҳонӣ хостааст, ки вазъи ҳуқуқи одамонро дар Тоҷикистон, аз ҷумла Вилояти Мухтори Кӯҳистони Бадахшон, назорат карда, дар ҷаласаҳои байнулмилалӣ ва минтақавӣ дар миён гузоранд ва ба ҳалли он талош кунанд.

Ин созмони байналмилалӣ мегӯяд, ки табъизи густурда алайҳи помириҳо бояд мустақилона ва аз рӯйи инсоф таҳқиқ карда шавад ва зодагони Бадахшон аз ҳуқуқи иқтисодӣ, иҷтимоӣ ва шаҳрвандиву сиёсии худ пурра истифода кунанд. 

Инчунин дар изҳороти ин созмон гуфта шудааст, ки мақомоти Тоҷикистон аз моҳи майи соли 2022 саркӯби худро алайҳи помириҳо афзоиш дода, худсарона беш аз 200 сокини ин минтақаро, аз ҷумла фаъолони ҷомеаи шаҳрвандӣ ва ҳомиёни ҳуқуқи башарро боздошт карда, бо иттиҳомоти сохта ба зиндон андохтанд. 

Ҳамзамон созмони “Афви Байнулмилал” бо чанд шоҳиди ҳодисаҳои моҳи майи 2022 дар ВМКБ суҳбат кардааст, ки аз ҷониби мақомоти тоҷик бозпурсӣ шудаанд. 

Гуфта мешавад, маҳз пас аз ин ҳодисаҳо садҳо нафар аз зодагони Вилояти Мухтори Кӯҳистони Бадахшон маҷбур шуданд Тоҷикистону Русияро тарк намуда, ба кишварҳои Аврупоӣ паноҳ баранд. 

Шоҳидони ҳодисаҳои охири Бадахшон, ки ҳоло дар хориҷ аз кишвар қарор доранд гуфтаанд, ки ҳангоми бозпурсӣ натанҳо нисбат ба худ, балки дар ҳаққи модару хоҳару ҳамсарашон дашном шунида, бо мушту калтаку барқ шиканҷа шуданд.

Ин созмон аз мақомоти Тоҷикистон хоастааст, ки ҳама гуна шикоят дар бораи бадрафторӣ нисбат ба боздоштшудаҳо бояд дақиқан таҳқиқ ва гумонбарон ба ҷавобгарӣ кашида шаванд. 

Cозмони ҳуқуқии “Афви Байналмилал” ҳамзамон аз ҳукумати Тоҷикистон хостааст, ки интиқомгириро аз фаъолони помирӣ ва норозиёну мухолифони дигар бас карда, вакилону рӯзноманигорон ва пешвоёни ҷомеаи бадахшониҳоро бешарту қайде аз ҳабс озод кунад.

1...222223224...741саҳифаи 223 аз 741

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
smoke
18.1 ° C
18.1 °
18.1 °
52 %
1kmh
100 %
Thu
23 °
Fri
27 °
Sat
26 °
Sun
22 °
Mon
25 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст