Хона блог саҳифа 241

Ҳизби Имрон Хон пирӯзи интихобот шуд

Аз ҷониби
AZDA TV-2
-
0

Дар интихоботи сартосарии парлумонии Покистон ва иёлатҳои он намояндаҳои Ҳизби Таҳрики инсофи Покистон аксари орои мардумфро ба даст оварданд.

Бино ба иттилои расонаҳо, 8-уми феврали соли 2024 интихоботи парлумонии сартосарӣ ва иёлатӣ дар Покистон баргузор шуд. Аммо Кумитаи интихобот ва раъйпурсии ин кишвар баъди 48 соат аз баргузории интихобот натиҷаҳои онро эълон кард.

Бар асоси оморҳои расмӣ, номзадҳои Ҳизби Таҳрики инсофи Покистон бо раҳбарии Имрон Хон, ки пас аз мамнуъ эълон шудани иштироки ин ҳизб дар интихобот ба сурати мустақил номазадии худро пешбарӣ карда буданд, бо касби 93 курсӣ пештози ин рақобатҳои сиёсӣ мебошанд.

Ҳамзамон Ҳизби Муслим Лег-н бо раҳбарии Муҳаммад Миён Навоз Шариф низ тавонистааст, ки 75 курсӣ дар парлумонро соҳиб шавад. Ҳизби Мардуми Покистон бо раҳбарии Баловал Буту, писари Беназир Буту бошад, тавонистааст, ки ҳамагӣ 54 курсӣ дар парлумонро ба даст биоварад. Дар ин васат 60 курсиро ҳам занон ва 10 адади дигарро ақаллиятҳо миллӣ ва мазҳабӣ касб касб кардаанд. 74 курсии боқимандаро низ аҳзоб ва дигар номзадҳои мустақил соҳиб шудаанд.

Муҳаммад Навоз Шариф, раҳбари Ҳизби Муслим Лег-Н ва Биловал Буту раҳбари Ҳизби Мардуми Покистон эълон кардаанд, ки барои ташкили ҳукумат бо ҳам ба тавофуқ расидаанд. Бо ин вуҷуд ин ду ҳизб, ки аз бузургтарин ташаккулҳои сиёсӣ дар Покистон дониста мешаванд, ба танҳоӣ наметавонанд, ки ташкили ҳукумат кунанд. Зеро натавонистаанд ҳадди нисобро дар парлумон пур намоянд.

Парлумони Покистон 366 курсӣ дорад. Ҳизби Муслим Лег-Н бо раҳбарии Муҳаммад Навоз Шариф ва Ҳизби Мардуми Покистон ҳар ду дар маҷмуъ 129 курсии парлумонро ба даст овардаанд ва барои ташкили ҳукумати эътилофӣ дасти кам ба 54 курсии дигар ниёз доранд.

Аз сӯи дигар хеле аз номзадҳои Ҳизби Таҳрики инсофи Покистон, ки ба сурати мустақил номзадии худро пешбарӣ карда буданд, вале дар ин рақобатҳои пирӯз нашуданд, даъво доранд, ва ба додгоҳҳои маҳаллӣ шикоят бурдаанд, ки дар вақти баргузории интихобот ва шумориши оро барои ноком гузоштани онҳо мақомот ба тақаллубкорӣ даст задаанд. Иддаъоҳое, ки ҷониби ҳукумат дар ҳоли ҳозир онҳоро қабул надорад.

Гуфта мешавад, Имрон Хон, раҳбари Ҳизби Таҳрики инсофи Покистон соли 2022 аз қудрат барканор карда шуд. Соли 2023 бар асоси парвандае ба 3 соли зиндон маҳкум гардид. Охири январ ва ибтидои феврали соли ҷорӣ низ бар асоси се парвандаи дигар дар маҷмуъ ба 24 соли дигар маҳкум шуд. Мақомоти расмӣ ҳузури Имрон Хон ва ҳизбашро дар ин интихобот мамнуъ эълон карданд. Номзадҳои ин ҳизб ба сурати мустақил номзадии худро пешбарӣ карда, пирӯз шуданд.

Муҳаммад Навоз Шариф эълон карда буд, ки натиҷаҳои ин интихоботро мепазирад ва аз дигар ҳизбҳои даъват карда буд, ки барои раҳоии Покистон аз мушкилот ва берун рафтан аз буҳронҳои кунунӣ бо ҳизби ӯ ҳамроҳ шуда, дар якҷогӣ ҳукумати эътилофӣ ташкил кунанд. Аз сӯи дигар бархе коршиносон мегӯянд, ин эҳтимол низ вуҷуд дорад, ки талошҳои раҳбари Ҳизби Муслим Лег-Н барои ташкили ҳукумат ноком ва дубора ҳизби Имрон Хон сари қудрат биояд.

Барканории муовини Бег Сабур. Худи раис барканор намешавад?

Аз ҷониби
AZDA-TV
-
0

Илҳомҷон Атоев, муовини қудои раисҷумҳур, раиси Хадамоти алоқаи кишвар Бег Сабур аз вазифааш барканор шуд.

Дар қарори ҳукумат аз 9-уми феврал сабаби барканории Атоев “гузаштан ба кори дигар” гуфта мешавад, аммо вазифаи нави ӯ маълум нест. Инчунин то ҳол исми муовини нави Бег Сабур дар Хадамоти алоқа эълон нашудааст.

Гуфта мешавад, Илҳомҷон Атоев чанд сол боз муовини Бег Сабур буд ва дар нишастҳои матбуотӣ ба ҷойи раиси Хадамоти алоқа ӯ иштирок мекарду ба суолҳои рӯзноманигорон посух медод. Посухҳои ӯ ба суоли рӯзноманигорон баҳсбарангез ва хандахариш дар миёни мардум шуда буд. Аз ҷумла, Атоев сабабҳои суст будани суръати интернетро ба бунёди босуръати биноҳои баландошёна ва фаъол будани “bluetooth” дар телефонҳои мобилӣ гуфта буд.

Корбарони шабакаҳои иҷтимоӣ мепурсанд, ки оё баъд аз муовинаш Бег Сабур низ аз вазифа барканор мешавад. Чун корбарон бар ин боваранд, ки маҳз баъд аз идораи Хадамоти алоқаро ба даст гирифтани Бег Сабур ва тимаш ин соҳа дар кишвар аз рушд бозмонд. Ва тарзи идораи онҳо боис гаштааст, ки Тоҷикистон дар радабандиҳои ҷаҳонӣ дар робита ба сифати интернет ва нархи он дар байни кишварҳои дунё дар поёнтарин зинаҳо қарор бигирад.

Инчунин имрӯз дар дигар ниҳодҳои ҳукумат низ ҷойивазкунӣ сурат гирифт. Аз ҷумла, Иброҳимзода Дилшод Эмом бо сабаби ба кори дигар гузаштан аз вазифаи муовини раиси Муассисаи давлатии “Комиссияи олии аттестатсионӣ” озод ва ба ҷойи ӯ Шарифзода Мумин Машокир, ки ректори Донишгоҳи тиҷорати Тоҷикистон буд, таъйин шудааст.

Ҳамзамон Муҳаммадзода Парвиз Абдураҳмон аз вазифаи муовини директори Маркази тадқиқоти стратегӣ ва Ҷалолиддин Пириев аз мақоми муовини якуми раиси Кумитаи дин “бо сабаби ба кори дигар гузаштан” барканор шудаанд.

То ҳол вазифаҳои нави ин афрод ва ба ҷойи онҳо кӣ оварда омадааст маълум нест.

Дафтари матбуоти президент ҳамчунин аз иваз шудани сардорони чанд раёсати КДАМ бидун ному насаби онҳо хабар додааст.

Пештар аз ин низ дар дигар ниҳодҳо, шаҳру ноҳияҳо ва сохторҳои қудратии кишвар ҷойивазкуниҳо сурат гирифта буд.  

Тибқи маъмул дар Тоҷикистон ҳар сол моҳи январ тағйироти кадрӣ сурат мегирад, аммо аксари коршиносон ин тағйиротро шаклӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисосу донишу маҳоратро меъёр қарор намедиҳад, балки меъёр дар интихоби кадрҳо бештар шинос будану наздик будан ба хонавода аст.

Коршиносон тағйироти кадрӣ дар вазорату кумитаҳои Тоҷикистонро танҳо ҷойивазкунӣ меноманд, чун аксар мақомдорон аз як вазифа барканор шуда, бидуни дар назар гирифтани дастовардҳои шахсӣ ва донишу маҳорат ба вазифаи дигар таъйин мегарданд.

Ҳаҷ зиёрат ё тиҷорат?

Аз ҷониби
AZDA TV-2
-
0

Кумитаи дин, танзими анъана ва ҷашну маросими Тоҷикистон гуфт, ки то ҳол нархномаи хароҷоти сафари Ҳаҷ маълум нашудааст.

Бино ба иттилои расонаҳо, 9-уми феврал раиси Кумитаи дин, танзими анъана ва ҷашну маросими Тоҷикистон дар нишасти матбуотии ниҳоди зертобеаш гуфт, нархномаи хароҷоти сафари Ҳаҷ дар соли 2024 то ҳол аз ҷониби мақомоти салоҳиятдор муайян нашудааст.

Сулаймон Давлатзода, раиси Кумитаи дин, танзими анъана ва ҷашну маросими Тоҷикистон дар ҷамъи хабарнигорон гуфтааст: “Нархи сафари ҳаҷи фарзӣ то ба ҳол муайян нашудааст, нархи он бо ҳамкорӣ бо Хадамоти инҳисорӣ ва ширкатҳои ҳавопаймоӣ муайян карда мешавад.”

Кумитаи дин, танзими анъана ва ҷашну маросими Тоҷикистон ягона ниҳодест, ки масъулияти фиристодании зоирон дар мавсими Ҳаҷҷи фарзӣ ба Арабистони Саудиро дар ихтиёр дорад ва аз замоне, ки ҳукумат ин маъулиятро ба он додааст, дар муддати беш аз 14 соли ахир нархномаҳои он ҳамасола гаронтарин нархномаҳо дар минтақаи Осиёи Марказӣ, Афғонистону Эрону Покистон ва ҳатто Русия будааст.

Бо ин вуҷуд, бархе кормандони Кумитаи дин борҳо шуда, ки аз ҷониби мақомоти корҳои дохилӣ, амният, прокуратура ва ғайра ба гирифтани пора ва ё даст доштан дар фасод муттаҳам шудаанд.

Ҳамзамон фиристодани зоирони тоҷикистонӣ барои адои зиёрати умра низ ба сурати озод барои ҳама ширкатҳои сайёҳӣ дар Тоҷикистон иҷозат дода нашудааст. Ин корро Кумитаи дин ва ду ширкати хусусии дигар, ки ба он наздик мебошанд, анҷом медиҳанд.

Нархномаи зиёрати умраи ин се ниҳод нисбат ба нархномаҳои бархе ширкатҳои сайёҳӣ дар кишварҳои ҳамсоя ва Русия хеле гарон аст. Ба ҳамин хотир, бисёре аз тоҷикистониҳо барои анҷоми умра аз хидматрасониҳои ширкатҳои сайёҳии кишварҳои ҳамсоя ва бахусус Узбекистону Қазоқистон ва Русия истифода мекунанд.

Раиси Кумитаи дин, танзими анъана ва ҷашну маросими Тоҷикистон бо нороҳатӣ аз ин масъала ба хабарнигорон гуфт, ки “мутаасифона, ҳастанд нафароне, ки танҳо бо дар назар гирифтани на он қадар фарқияти зиёд, ҳудуди 1000-2000 сомонӣ худашонро сарсон карда, ба воситаи кишвари ҳамсоя мераванд. Онҳо дар бисёр ҳолатҳо фирефтаи эълонҳо ё миёнаравҳои бардурӯғ мешаванд. Масалан, арзонтарин нархи умра аз Тошканд аз 1100 то 1400 доллар аст. Вале онҳо дар назар намегиранд, ки хароҷоти аз Душанбе то Тошканд рафтан чӣ қадар аст”.

Вазорати ҳаҷ ва умраи Арабистони Саудӣ маъмулан барои ҳама кишварҳои исломӣ бар асоси нуфуси сокинони мусалмони онҳо, сари ҳар як миллион нафар 1000 адад саҳмия ҷудо мекунад, аммо бо вуҷуди ба 10 миллион нафар расидани шумори аҳолии Тоҷикистон то ҳол теъдоди зоирони кишвар дар мавсими Ҳаҷҷи фарзӣ дасти кам ба 6000 нафар нарасидааст.

Гуфта мешавад, Ҳаҷҷи фарзӣ панҷумин рукне аз аркони дини ислом аст, ки вобаста ба тавонмандиҳои ҷисмонӣ, молӣ ва бехатару дар амон будан барои ҳар як мусалмон ба ҷо овардани он як маротиба дар умр фарз аст. Ҳаҷҷи фарзӣ вақту замони муайян дорад.

Маносики Ҳаҷҷи фарзӣ аз қабили тавофи Каъбаву саъйи байни Сафо ва Марва, рафтан ба Минову истодан дар Муздалифа, майдони Арафоту санг задан ҳама корҳои маълум мебошанд. Аммо умра як амри ибодатӣ буда, ҳар мусалмоне ҳар вақте хоҳад, метавонад рафта бо анҷоми тавофи Каъбаву саъйи байни Сафо ва Марва онро анҷом диҳад.

Ба иборати дираг, агар рафтан ба дидори Каъбаву зиёрат кардани мақоми Иброҳим, рафтан ба Мадинаву дидори марқади ҳазрати Паёмабари ислом Муҳаммад (с) ва ёрони бовафои ӯ, ба мисли Абубакару Умар барои зиорон ибодат бошад, ин масъала барои Кумитаи дин, танзими анъана ва ҷашну маросими Тоҷикистон ва ширкатҳои наздик ба он тайи чанд соли ахир ба як тиҷорати пурдаромад табдил шудааст. Ба ҳамин хотир гарон будани нархномаҳои хидматрасонии онҳо хеле тоҷикистониҳоро маҷбур карда, ки рафта, ба қавле “пулро бегона” карда, аз хидматрасонии ширкатҳои кишварҳои ҳамсоя истифода кунанд.

Амруллоҳи Низом, махсус барои Azda.tv

Нархи аттестатҳо маълум шуд

Аз ҷониби
AZDA TV-2
-
0

Вазорати маориф ва илми Тоҷикистон нархи ҳуҷҷатҳои хатм (аттестатҳо)-и мактабҳоро барои соли ҷорӣ эълон кардааст.

8-уми феврали соли 2024 Сарраёсати маориф шаҳри Душанбе эълон кард, ки “маблағи ҳуҷҷатҳои хатм (аттестат дар бораи таҳсилоти умумии асосӣ ва аттестат дар бораи таҳсилоти миёнаи умумӣ) камтар аз 9 сомонӣ мебошанд.

Ба қавли манбаъ, нархи “ҳуҷҷатҳои хатм (аттестат дар бораи таҳсилоти умумии асосӣ ва аттестат дар бораи таҳсилоти миёнаи умумӣ) дар соли 2024 8 сомониву 63 дирам арзиш доранд ва дар сурате, ки масъулин аз он зиёдтар пул талаб карданд, тариқи телефонҳои боварӣ аз болои онҳо шикоят кунанд.

Гуфта мешавад, бо вуҷуди он ки дар Тоҷикистон ниҳодҳои фасодзада ва ба қавли худи Эмомалӣ Рамҳон, хеле аз раҳбарони мақомоти корҳои дохилӣ, амнияти миллӣ, додгоҳҳову додситонҳо ва Агентии давлатии назорати моливиявӣ ва мубориза бо коррупсия ба фасод даст зада, ба гирифтани пора ба маблағҳои хеле калон муттаҳам мешаванд, вале кормандони ин мақомот дар аксар маврид омӯзгоронро барои гирифтани пора дар ҳаҷми начандон зиёд боздошту зидонӣ мекунанд.

Аз як сӯ маъоши кам ва аз сӯи дигар зиёд шудани ҳазинаҳои зиндагӣ дар Тоҷикистон аксари омӯзгорони кишварро муҳтоҷу дастнигар карда, Вазорати маорифро дар ҷомеа ҳамчун яке аз ниҳодҳои фасодза машҳур кардааст.

Истирдоди як муҳоҷири тоҷик аз Русия бо иттиҳоми ҷонибдорӣ аз “ҲАМОС”

Аз ҷониби
AZDA-TV
-
0

Як муҳоҷири тоҷикро барои паҳн кардани наворҳои “ҲАМОС” дар Русия боздошт ва ба мақомоти интизомии Тоҷикистон сипурдаанд.

Бино ба иттилои манобеи Радиои Озодӣ, Муҳаммаднабӣ Ҷалилови 23-соларо чор нафар шоми 31-уми январи соли ҷорӣ аз ҷои иқоматаш дар Русия боздошт ва бо худ бурда буданд. Ӯ чанд муддат бе ному нишон буд, вале чанде рӯз пас дар боздоштгоҳи Кумитаи давлати амнияти миллии Тоҷикистон дар Душанбе пайдо шуд.

Шоҳидон мегӯянд, се нафар аз кормандони ФМС-и Русия ва як нафар, ки худро корманди мақомоти Тоҷикистон муаррифӣ кард, барои боздошти Ҷалилов омада буданд.

Ин муҳоҷир дар Тоҷикистон бо иттиҳоми “ташкили гурӯҳи ифротгаро ва ҳамкорӣ бо созмонҳои мамнуъ” боздошт шуда, ба ӯ аз панҷ то ҳашт соли зиндон таҳдид мекунад. Ҳамроҳи Ҷалилов се муҳоҷири дигари ихроҷшуда низ боздошт шудаанд.

Маълум нест муҳоҷирони ихроҷшуда бо кадом “созмони мамнуъ” ҳамкорӣ кардаанд, вале ба гуфтаи манобеи Радиои Озодӣ, “дар парванда зикр шудааст, ки ин гурӯҳ наворҳои хусусияти ифротидошта, аз ҷумла наворҳои “ҲАМОС” ва ҷангро дар Ғазза паҳн мекардаанд.”

То ҳол мақомоти Тоҷикистон боздошти ин муҳоҷирро расман шарҳ надодаанд ва пайвандонаш низ дар ин бора чизе намегӯянд.

Чанде пеш яке аз дӯстони Муҳаммаднабӣ Ҷалилов ба расонаҳо гуфта буд, ки сабаби боздошти ӯро намедонад, вале танҳо пас аз нопадид шуданаш фаҳмидааст, ки дар саҳифаҳояш дар шабакаҳои иҷтимоӣ наворҳои “ҲАМОС”-ро паҳн мекард.

Инчунин яке аз дӯстони дигари ин муҳоҷири тоҷик мегӯяд, ки шояд барномаҳои ютубии мухолифонро тамошо карда бошад, вале дар онҳо иштирок намекард.

Гуфта мешавад, Муҳаммаднабӣ сокини ноҳияи Ёвон буда, дар ширкате дар Русия ба ҳайси ҷангалбур кор мекард. Бино ба навиштаи расонаҳо, дар саҳифаи асосии Муҳаммаднабӣ дар Телеграм акси Абу Убайда, сухангӯйи Иззуддин Қассом, шохаи низомии гурӯҳи “ҲАМОС”, гузошта шудааст.

Гуфта мешавад, боздошти ӯ дар ҳоле сурат мегирад, ки мақомоти Тоҷикистону Русия ба фарқ аз Амрикову Иттиҳоди Аврупо гурӯҳи “ҲАМОС”-ро созмони террористӣ намедонанд.

Интихоботи хунин дар Покистон

Аз ҷониби
AZDA TV-2
-
0

Бо вуҷуди тадобири шадиди амниятӣ интихоботи парлумонии Покистон дар Балучистон ба хоку хун кашида шуд.

Имрӯз, 8-уми феврали соли 2024 интихоботи маҷлисҳои миллии Покистон ва иёлатҳои он дар фазои шадиди амниятӣ оғоз шуд. Бо ин вуҷуди чунин вазъият, дар ду маркази раъйдиҳӣ дар Балучистон таркишҳо сурат гирифт ва даҳҳо нафар кушта ва захмӣ шуданд.

Мақомоти Покистон ба сурати расмӣ эълон карданд, ки барои таъмини амният ва пешгирӣ аз ҳар гуна ҳодисаҳои террористӣ ҳудуди 500 ҳазар нафар аз кормандони полис ва амниятиро дар сартосари кишвар сафарбар кардаанд. Инчунин ҳар гуна тамосҳои телефонҳои мобилӣ ва интернетиро ба сурати муваққат қатъ карданд.

Ду таркише, ки дар иёлати Балучистони ин кишвар рух дод, даҳҳо нафар кушта ва захмӣ баҷо гузошт. ББС ба нақл аз шоҳидони ин ду ҳодиса ва мақомоти покистонӣ бо нашри гузорише гуфтааст, ки 28 нафар кушта ва зиёда аз 43 нафари дигар замхӣ шудаанд. Афроди кушташуда аксар онҳое будаанд, ки барои раъй додан дар интихоботи парлумонӣ аз дигар минтақаҳои Покистон ва кишварҳои хориҷӣ ба зодгоҳи худ баргашта буданд.

Гуфта мешавад, мақомоти покистонӣ таҳқиқоти худро оғоз карда, гуфтаанд, ки эҳтимол меравад, ин таркишҳо бар асари бамбҳои идорашаванда, аз пеш дар ин маконҳо ҷогузорӣ шуда, сипас аз дур тарконда шудаанд.

То ҳанӯз ҳеч гурӯҳе масъулияти ин таркишҳоро бар уҳда нагирифтааст.

Дар Русия тоҷиконро барои иштирок дар ҷанги Украина маҷбур мекунан

Аз ҷониби
AZDA.TV
-
0

Бархе муҳоҷирони тоҷики муқими Русия аз он шикоят доранд, ки мақомоти кишвар онҳоро маҷбур доранд то барои рафтан ба ҷанги Украина шартнома банданд.

Як сабти садоӣ аз раҳбари ҷамъияти тоҷикон дар шаҳри Самараи Русия бо номи Суннатулло ба дасти Azda tv расид, ки дар он номбурда ба муҳоҷирон хабар медиҳад, ки мақомоти вилояти Самара ӯро даъват карда, таҳдид кардаанд онҳое, ки шаҳрвандии Русияро гирифтаанд бояд то рӯзи 1-уми марти соли ҷорӣ дар комиссариятҳои ҳарбӣ барои рафтан ба ҷанги Украина сабти ном кунанд ва шартнома бибанданд. Ӯ мегӯяд, нафароне, ки то 5 фарзанд доранд аз рафтан ба ҷанг маъофанд, аммо аон поён маҷбурӣ аст. Ва агар онҳое, ки шарҳвандӣ доранду бо хоҳиши худ сабти ном намекунанд, барои умурбод аз Русия ихроҷ хоҳанд шуд.

Ба гуфтаи Суннатулло, мақомоти вилояти Самара гуфтаанд, ки ҳатто онҳое, ки шаҳрвандӣ ҳам надошта бошанд ташвиқ кунед то биёянд ҳамчун довталаб сабти ном кунанд. Агар онҳо барои ҷанг рафтан шартнома бибанданд, барояшон шарвандии Русия дода мешавад.

Раиси ҷамъияти тоҷикони Самара ҳамчунин мегӯяд, ки ин супориши қатъӣ аст ва шухӣ нест бояд онро ҷиддӣ гирифт. Ӯ ҳамчунин гуфт, чунин навъи супориши қатъии мақомоти вилояти Самара ба диаспораҳои қирғизу узбекҳо ҳам дода шуда, ки ҳаммиллатони худро барои рафтан ба ҷанги Украина ташвиқ кунанд.

Ҳамзамон як муҳоҷири дигар аз шаҳри Уфаи Русия ба Azda tv гуфт, ки дар шаҳри мо ҳоло маҷбур надоранд, вале чанд маротиба ба масҷиди ҷумъа омданд ва мардумро барои рафтан ба ҷанг ташвиқ карданд, ки ба ҷанг равед бароятон шаҳрвандӣ дода мешавад ва ҳамчунин маблағи зиёде ба хонаводаҳоятон низ медиҳем.

Аммо як муҳоҷири дигар гуфт, ки мақомоти низомии шаҳри Свердловский ба масҷидҳо рафта, хеле бо тундӣ ҳарф заданд, ки чаро ченчену қафқозиҳо мусалмонанд ба ҷанг мераванд, вале шумо тоҷикону узбекон ва қирғизҳо хеле кам меравед.

Мақомоти Русия борҳо гуфтаанд, ки қасди ҷалби сарбозон ва ё басиҷи навро надоранд, аммо муҳоҷирон мегӯянд, аз ҳар тараф онҳоро таҳдид мекунанд, ки дар аввалҳои моҳи март мақомти Русия “рейд”-и умумиро барои ҷалби сарбозон аз ҳисоби муҳоҷирон оғоз мекунанд.

Масъалаи сарбозгирии иҷборӣ аз ҳисоби уҳоҷирони Осиёи Миёна дар Русия аз оғози ҷанги ин кишвра бо Украина гузориш шуда буд. Ва чандин нафар аз тоҷикони бешаҳрвандӣ низ дар ин ҷанг кушта шудаанд. Агарчи қонуниҳои ҷории Тоҷикистон иштироки шаҳрвандонашро дар ҷангҳои хориҷ аз кишвар ҷиноят медонад, вале мақомоти расмии дар Душанбе ба сарбозгирии иҷбории русҳо аз ҳисоби тоҷикистониён вокунише намекунад.

Толибон: Нерӯи барқро тариқи пешпардохт аз Тоҷикистон мехарем

Аз ҷониби
AZDA TV-2
-
0

Ширкати “Бришно”-и Афғонистон эълон кардааст, ки аз ин пас нерӯи барқро аз кишварҳои ҳамсоя, аз ҷумла аз Тоҷикистон тариқи пешпардохт мехарад.

Бино ба иттилои расмӣ, Ҳикматуллоҳ Майванд, сухангӯи ширкати барқрасони “Бришно”-и Афғонистон гуфтааст, ки Толибон тавонистаанд дар соли 2023 қарзҳои нерӯи барқи воридотӣ аз кишварҳои Тоҷикистону Узбекистон, Туркманистон ва Эронро, маҷмуан беш аз 627 миллион доллари амрикоиро ташкил медод, пардохт кунанд.

Ба қавли сухангӯи ширкати барқрасони “Бришно”, қисми зиёде аз ин қарзҳои пардохтшуда аз замони ҳукумати Ашраф Ғанӣ боқӣ монда буд ва дар замони ҳукумати Толибон ба далели маҳдуд шудани доду гирифтҳои бонкӣ падохти онҳо бо мушкил рӯбарӯ шуд.

Ҳикматуллоҳ Майванд дар бораи он ки имкони арзон шудани баҳои нерӯи барқ дар Афғонистон вуҷуд дорад ё не, мегӯяд, “Бале, дар сурати зиёд шудани тавлидоти дохилӣ ин имкон вуҷуд дорад, ки қимати нерӯи барқ дар Афғонистон арзонтар шавад.”

Пеш аз ин бархе расонаҳои Афғонистон иттилоъ дода буданд, ки дар соли 2023 Толибон 110,4 миллион доллар қарзҳои ширкати “Бришно”-и Афғонистонро ба Тоҷикистон падохт кардаанд. Аммо акнун Толибон мегӯянд, ки аз ин пас нерӯи барқи воридотии Тоҷикистонро тариқи пешпардохт мехаранд.

Гуфта мешавад, дар байни кишварҳои ҳамсояи Афғонистон танҳо Тоҷикистон ягона кишварест, ки бо вуҷуди доштани сафир дар Афғонистон ва консули Толибон дар Вилояти Мухтори Кӯҳистони Бадахшон аз минбарҳои баланди дихилӣ ва созмонҳои ҷаҳонӣ бар зидди Толибон ҳарф мезанад ва иддао мекунад, ки ҳукумати Иморати исломиро қабул надорад, вале доду гирифт ва тиҷоратҳои калонро пинҳонӣ бо онҳо анҷом медиҳад.

Тағйироти кадрӣ дар агнентии зиддифасод

Аз ҷониби
AZDA TV-2
-
0

Президенти Тоҷикистон бо анҷоми як иқдом баъзе раҳбарони калидии агентии зиддифасодро аз мансабҳояшон барканор кард.

Бино ба иттилои расмӣ, 7-уми феврали соли 2024, Хадамоти матбуоти Президенти Тоҷикистон хабар дод, ки Эмомалӣ Раҳмон муовини якум ва муовини директори Агентии назорати давлатии молиявӣ ва мубориза бо коррупсияи Тоҷикистон (маъруф ба агентии зиддифасод) ва сардорони раёсатҳои онро аз вазифаҳои ишғолкардаашон барканор кардааст.

Ба қавли манбаъ, ба курсиҳои муовини якум, муовин директори Агентии назорати давлатии молиявӣ ва мубориза бо коррупсияи Тоҷикистон ва дар мувофиқа бо прзедент “сардорони раёсатҳои Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар Вилояти Мухтори Кӯҳистони Бадахшон, шаҳри Душанбе, вилоятҳои Суғду Хатлон, минтақаи Кӯлоби вилояти Хатлон, сардорони баъзе аз раёсатҳои дастгоҳи марказии Агентии назорати давлатии молиявӣ ва мубориза бо коррупсия аз ҳисоби кадрҳои кордону варзида ва ҷавону ояндадор” таъйин гардидаанд.

Хадамоти матбуоти Президенти Тоҷикистон дар бораи сабабҳои озод кардани муовини якум ва муовини директори Агентии зидди фасод гуфтааст, ки онҳо “ба кори дигар” гузаштанд, аммо маълум нест ба кадом кор гузаштаанд.

19-уми январи соли ҷорӣ дар ҷаласаи Шӯрои амнияти Тоҷикистон Эмомалӣ Раҳмон амр карда буд, ки “Сардори раёсати Агентии назорати давлатии молиявӣ ва мубориза бо коррупсия дар вилояти Хатлон ва муовинони ӯ, сардори шуъбаи агентии назорати давлатии молиявӣ дар шаҳру ноҳияҳои минтақаи Кӯлоб ва сардори Раёсати назорати субъектҳои хоҷагидорӣ, лоиҳаҳои сармоягузории Агентӣ бо супориши Президенти мамлакат аз мақомот озод карда шаванд.”

Гуфта мешавад, Эмомалӣ Раҳмон дар солҳои гузашта вақте ин ҳама раҳбарони Агентии назорати давлатии молиявӣ ва мубориза бо коррупсияро дар сатҳи шаҳру вилоятҳо таъйин карда буд, ҳамаро кордону поквиҷдон, ҷавону ояндадор гуфта ба мардум муаррифӣ карда буд.

Аммо имсол дар ҷаласаи Шӯрои амният ҳамаи онҳоро ба доштани “сатҳи пасти касбӣ, ноуҳдабароӣ нисбати иҷрои вазифаҳои хидматӣ, роҳ додан ба ҳолатҳои коррупсионӣ, зиёд шудани ҷиноятҳои дорои хусусиятҳои экстремистиву террористӣ, қочоқи маводи мухаддир, даст задани баъзе кормандони мақомоти ҳифзи ҳуқуқ, назоратӣ ва сохторҳои низомӣ ба қочоқи маводи нашъаовар ва молу маҳсулот” муттаҳам карда буд.

Ин ҳама таърифу тавсиф ва иттиҳомоти Эмомалӣ Раҳмон нисбати мансабдорони наву куҳна дар ҳоле сурат мегирад, ки январи соли ҷорӣ созмони “Шаффофияти байналмилалӣ” бо нашри як гузориш дар бораи вуҷуд доштани фасод дар сатҳи давлатҳои дунё Тоҷикистонро дар мақоми 162 қарор дода, онро дар 20-гонаи фасодзадатарин кишварҳои ҷаҳон қарор дод.

Бар асоси гузоришҳои солонаи ин созмон, фасод дар Тоҷикистон нисбат ба солҳои гузашта дар сатҳи ҳукумат ва мақомоти он бештар реша давондаааст. Ба гуфтаи таҳлилгарон, соли 2023 сиёҳтарин саҳфа дар робита ба рушду реша давондани фасод дар Тоҷикистон ба ҳисоб меравад.

Хадамоти зиддиинҳисорӣ аз афзоиши нархи гандуму коҳиши нархи орд гуфт

Аз ҷониби
AZDA.TV
-
0

Воридоти гандум ба Тоҷикистон дар соли 2023 нисбат ба соли қаблӣ 2,8% камтар ворид гашт, ки дар натиҷа нархи он дар бозорҳо беш аз 17% гарон шуд. Аммо нархи орд 19,5% коҳиш ёфтааст.

Дар ин бора имрӯз, 7-уми феврал Қурбонзода Сафаралӣ, муовини якуми сардори Хадамоти зиддиинҳисории назди ҳукумати Тоҷикистосн зимни нишасти матбуотии ин ниҳод ба хабарнигорон иттилоъ дод.

Қурбонзода гуфт, ки дар соли 2023 аз хориҷи ҷумҳурӣ миқдори 1 миллиону 23,6 ҳазор тонна гандум ба маблағи 288,7 миллион доллар, бо нархи миёнаи 282 доллар барои як тонна ворид карда шудааст. Ба гуфтаи ӯ, ин омор нишон медиҳад, ки нисбат ба ҳамин давраи соли гузашта воридоти он 28,1 ҳазор тонна, яъне 2,8% камтар ворид шуда, вале нархи он 49 доллар афзоиш ёфтааст.

Муовини якуми сардори Хадамоти зиддиинҳисорӣ мегӯяд, истеҳсоли гандум дар дохили кишвар давоми соли 2023 860,8 ҳазор тонна будааст, ки он нисбат ба соли қабдӣ 145,5 ҳазор тонна ё 20,3% зиёд мебошад.

Аммо бархе корбарон мепурсанд, ки агар омори пешниҳоднамудаи Хадамоти зиддиинҳисорӣ дақиқ бошад, пас чаро бо вуҷуди беш аз 20 дарсад афзоиш ёфтани истеҳсоли гандум дар дохили кишвар боз ҳам нархи он дар бозорҳо арзон нашуд?

Қурбонзода дар мавриди воридоти орд низ гузориш дода гуфт, ки дар соли 2023 ба кишвар 53,7 ҳазор тонна орд ба маблағи 17,2 миллион доллар бо нархи миёнаи 303 доллар ворид карда шудааст, ки нисбат ба ҳамин давраи соли гузашта 59 доллар ё 19,5% коҳиш ёфтааст.

Тибқи оморҳои расмӣ, аз ҳаҷми умумии гандуму орди воридгардида ба Тоҷикистон 93,4% ба Ҷумҳурии Қазоқистон ва 6,6% ба Русия рост меояд.

Истеҳсоли орд дар дохили кишвар бошад соли гузашта 605,6 ҳазор тонна истеҳсол карда шудааст, ки нисбат ба ҳамин давраи соли гузашта 7,6 ҳазор тонна ё 1,2% зиёд мебошад. Хадамоти зиддиинҳисорӣ нархи яклухти як халта орди навъи якумро дар корхонаҳои ордбарорӣ 260-270 ва дар бозорҳо бошад аз 280 то 290 сомонӣ гуфт.

Аммо сокинони кишвар мегӯянд, нархи як халтаи орду гандум дар бозорҳои кишвар аз нархи муайяннамудаи Хадамоти зиддиинҳисорӣ гаронтар аст, вале касе онро назорат намекунад.

1...240241242...798саҳифаи 241 аз 798