Вазорати энергетика ва захираҳои оби Тоҷикистон мегӯяд, соли ҷорӣ фурӯши барқ ба кишварҳои ҳамсоя коҳиш ёфтааст.
Ҷумъа Далер Шофақир, вазири энергетика ва захираҳои оби кишвар рӯзи 31-уми июл зимни нишасти матбуотии ниҳодаш ба хабарнигорон гуфт, вазорат дар стратегияи худ ворид карда, ки “то соли 2030 то 10 фоизи барқе, ки тавлид мешавад, аз ҳисоби дигар манбаъҳои энергия, аз ҷумла энергияи офтобӣ ва бодӣ мебошад.”
Вазир дар ҳузури хабарнигорон таъкид кард, ки давоми 6 моҳи аввали соли ҷорӣ дар кишвар 10,7 миллард кВт/соат нерӯи барқ тавлид шудааст. Ба гуфтаи ӯ, ин нишондод назар ба ҳамин давраи соли гузашта бештар аз 3% мебошад.
Ҳамчунин вазири энергетикаи кишвар афзуд, дар соли ҷорӣ интиқол ва фурӯши барқ ба кишварҳои Афғонистон ва Узбекистон низ коҳиш ёфтааст. Вазир гуфт, давоми 6 моҳи аввали соли ҷорӣ дар муҷмуъ 974 миллион кВт/соат нерӯи барқ ба кишварҳои ҳамсоя фурӯхта шудааст, ки нисбат ба ҳамин давраи соли гузашта 85 млн кВт/соат кам аст.
Ба гуфтаи ӯ, дар ин 6 моҳи аввали сол Тоҷикистон ба ҳукумати Толибон дар Афғонистон 685 миллион кВт/соат ба маблағи 320 миллион сомонӣ ва ба Узбекистон 289 миллион кВт/соат ҳудуди 63 миллион сомонӣ нерӯи барқ фурӯхтааст.
Аммо дар хусуси қатъ шудани барқ дар баъзе навоҳии кишвар дар ин фасли гармо Ҷумъа Далер ин мушкилиро ба корҳои техникӣ ва қарздор будани мардум рабт дода, сокинонро гунаҳкор донист.
Қатъи нерӯи барқ дар Тоҷикистон яке аз мушкилотест, ки 30 сол боз идома дорад ва бо вуҷуди ба кор даромадани чархаҳои Нерӯгоҳи барқи обии “Роғун” боз ҳам дар кишвар шуруъ аз фасли тирамоҳ то моҳҳои апрел-май мардум барқ надоранд.
Ин дар ҳолест, ки мувофиқи омори расмии Ҳукумат, “Тоҷикистон бо дарназардошти захираҳои гидроэнергетикии худ дар ҷаҳон ҷои ҳаштумро баъд аз Хитой, Россия,ИМА, Бразилия, Конго, Ҳиндустон ва Канада ва ҷои аввалро дар байни кишварҳои Осиёи Марказӣ ишғол менамояд.“
Низ гуфта мешавад, ки Тоҷикистон дорои захираҳои бузурги гидроэнергетикӣ буда, айни замон танҳо4-5 дарсади он мавриди истифода қарор дорад. Худи мақомоти кишвар мегӯянд, “иқтидори гидроэнергетикии Тоҷикистон аз талаботи имрузаи ҳамаи кишварҳои Осиёи Марказӣ ба нерӯи барқ се маротиба зиёдтар мебошад.”
Вале бо вуҷуди бой будани Тоҷикистон аз ҳисоби захоири нерӯи барқ, мувофиқи гузориши Бонки ҷаҳонӣ дар хусуси дастрасӣ ба нерӯи барқ соли 2020 кишвари мо дар байни 190 кишвари дунё мақоми 163-юмро ишғол кард.
Суолҳои бепосухе, ки ҳамеша сокинон ва корбарон матраҳ мекунанд, ин аст, ки агар Тоҷикистон аз нигоҳи захираҳои гидроэнергетикӣ дар ҷаҳон дар мақоми 8-ум ва дар Осиёи Марказӣ дар мақоми аввал қарор дошта бошад, пас чаро кишвар 6 моҳи сол барқ надорад ва мақомот ҳамеша аз камбуди обу захираҳои гидроэнергетикӣ ба мардум мегӯянд? Ва агар мо дар Осиёи Марказӣ аз ин ҳисоб дар мақоми аввал бошем, чаро дар кишварҳои ҳамсоя моҳҳо “лимит” ҷорӣ несту дар мо ҳаст?
