Як нафткаши исроилӣ дар соҳили баҳри Умон тариқи паҳпод мавриди ҳамла қарор гирифтааст ва бархе мақомоти исроилӣ ангушти иттиҳомро ба сӯӣ Эрон бурдаанд.

Имрӯз, 16-уми ноябри соли 2022, хабаргузории Форси Эрон вуҷуди ин ҳамларо “иддао”-и “The Associated Press” хонда гуфтааст, ки ин нафткаши “Pacific Zircon” мутаалиқ ба як миллиардери исроилӣ аст.

Ба қавли ББС, “ин нафткаш мутаалиқ ба ширкати “Киштиронии Уқёнуси ороми шарқӣ” (Eastern Pacific Shipping), мақарраш дар Сингапур буда, бо парчами Либириё ҳаракат мекарда ва он аз сӯи як паҳпод дар обҳои баҳри Умон ҳадаф қарор гирифтааст.”

Шабакаи Алҷазираи Қатар ҳам дар истинод ба Радиои артиши Исроил хабар дода, ки “яке аз масъулони баландпояи исроилӣ Эронро муттаҳам карда гуфтааст, дар ин ҳамла даст дорад.”

Хабаргузории амрикоии Assoсiаted Press ҳам ба нақл аз манобеи худ дар Амалиёти тиҷорати баҳрии Бритониё – як созмони бртиноиёие, ки рафту омади киштиҳоро дар минтақа назорат мекунад, гуфтааст, аз ин ҳодиса огоҳанд ва қазияро таҳқиқ мекунанд.

Гуфта мешавад, ширкати киштиронии Уқёнуси ороми шарқӣ бо нашри як иттилоияе дар ин бора гуфтааст, ки тамоми малавонҳои “Pacific Zircon” саломат ҳастанд ва ин киштӣ ҳомили гази моеъ аст ва дирӯз, 15-уми ноябри соли ҷорӣ, тақрибан соати 15:30 дақиқа дар ҳудуди 240 километрии соҳилҳои Умон мавриди ҳамла қарор гирифтааст.

Асри рӯзи 15-уми ноябр ду мушак ба қаламрави Лаҳистон исобат кард, ки гуфта мешавад, Русия онҳоро партоб кардааст. Аммо худи Кремлин онро рад кард.

Гуфта мешавад, дар пайи суқути ин мушакҳо ду нафар кушта шудааст.
Шӯрои амнияти миллии Лаҳистон шоми рӯзи 15-уми ноябр ҷаласаи изтирорӣ ташкил кард.

Анджей Дуда, раисҷумҳури Лаҳистон мегӯяд, “ҳоло дар бораи ин ки ин ду мушак аз куҷо ба хоки мо исобат кардааст, маълумоти дақиқе дар даст надорем ва таҳқиқот идома дорад”.

Коршиносон мегӯянд, чун Лаҳистон узви НАТО аст, исобати мушакҳои Русия ба қаламрави узви ин паймони ҳарбӣ мушкилоти ҷиддиеро дар пай хоҳад дошт. Аммо худи Русия мегӯяд, ҳеч гуна ҳамлае ба нуқтаҳои наздимарзии Украина бо Лаҳистон анҷом надодааст ва ин иттиҳом ба хотири ташдиди авзои ҳарбӣ сохта шудааст.

Амрико субҳи имрӯз эълон кард, натиҷаҳои аввалияи таҳқиқот нишон медиҳад, мушакҳое, ки дар хоки Лаҳистон суқут кардаанд, аз ҷониби Русия партоб нашуда, балки нерӯҳои украинӣ барои радди мушакҳои Русия онҳоро партоб кардаанд.

Ёдовар мешавем, ки рӯзи сешанбе, 15-уми ноябр Русия аксари шаҳрҳо ва зерсохторҳои Украинаро ба таври густарда мавриди бомборони шадид қарор дод.

Теъдоди сокинони кураи замин аз марзи 8 миллаирд нафар гузашт ва ин афзоиши аҳолӣ бархе кишварҳоро хушҳол ва баъзеи дигарро нигарон кардааст.

Бино ба иттилои сомонаи Countrymeters.info, ки ба шумориши аҳолии ҷаҳон ва масоили вобаста ба демография машғул аст, имрӯз, 15-уми ноябри соли 2022 хабар дод, ки теъдоди сокинони замин аз марзи 8 миллаирд нафар убур кардааст.

Ба қавли манбаъ, дар радабандии 5-гона кишварҳое, ки теъдоди аҳолии онҳо аз ҳама зиёдтар аст, нахуст Чин бо доштани 1,457,957,514 аҳолӣ, ки 18,15% сокинони заминро ташкил медиҳад, қарор дорад. Сипас Ҳиндустон бо 1,423,488,840 дорои 17,72% аҳолӣ, дар мақоми сеюм Иёлоти Муттаҳидаи Амрико 4,20% аҳолӣ ва ҷои чорум Индонезия 3,51% ва дар охир Покистон ҷойгир аст, ки бо доштани зиёда аз 232,2 миллион нафар 2,89% аҳолии кураи заминро ташкил медиҳад.

Гуфта мешавад, бар асоси ин омор дар ҳоли ҳозир нархи рӯзонаи марг дар дунё ҳудуди 100 ҳазор нафар, вале теъдоди навзодҳо дар дунё беш аз 230 ҳазор нафарро ташкил медиҳад.  

Маҷмаи умумии Созмони Миллали Муттаҳид (СММ) бо қабули қатъномае аз Русия хост ҷуброни хасоротҳои воридкардааш ба Украинаро бипардозад.

Маҷмаи умуми СММ рӯзи 14-уми ноябр қатъномаеро ба тасвиб расонд, ки тибқи он Русия вазифадор мешавад, барои нақзи қонунҳои байналмилалӣ дар ҳамла ба Украина ҷуброни хасорати воридкардаашро пардохт кунад.

Дар қабули ин қатънома аз 193 кишвари узв, 94 кишвар ба ҷонибдорӣ, 73 кишвар бетарф ва 14 кишвари дигар мухолифи он раъйи доданд. Ва дар ниҳоят бо 94 раъйи ҷонибдор қатънома қабул гардид.

Дар ин қатънома бар зарурати таъсиси “механизми байналмилалии ҷуброни хисорот, талафот ё осебе”, ки аз “амалҳои ғайриқонунӣ”-и Русия алайҳи Украина ба вуҷуд омадааст, таъкид мешавад.

Пеш аз қабули қаиънома сафири Украина дар СММ Сергей Кислитса гуфт, ки “Русия тамоми талоши худро барои нобуд кардани Украина дар ин ҳамлаҳо кардааст“. Вай аз бомборонҳои густардаи як моҳи ахири Русия ба шаҳрҳои Украина ёдовар шуда, афзуд, ки ин кишвар “роҳҳо, пулҳо, корхонаҳо ва нисфи шабкаҳои барқӣ, обанборҳои тавлиди барқро нобуд сохтааст.” Ӯ таъкид кард, ки “вақти он расидааст, ки Русия дар назди ҷомеаи ҷаҳонӣ барои ҳамалаҳои бедалел ва ҷиноятҳои кардааш ба ҷавобгарӣ кашида шавад“.

Ҳамзамон сафири Русия дар СММ Василий Небензя қабули ин қатъномаро ғайриқонунӣ хонда, аз кишварҳои узви ин ниҳоди байналмилалӣ хост, мухолифи он раъй диҳанд.

Ӯ кишварҳои ғарбиро ба он муттаҳам кард, ки хостаҳои худро алайҳи Русия бо ҳар роҳе мехоҳанд қонунӣ кунанд. Вай дар идомаи суҳбаташ ҳушдор дод, ки тасвиби қатънома “танҳо метавонад ташаннуҷ ва бесуботиро дар тамоми ҷаҳон афзоиш диҳад“. Ӯ ҷонибдорони ин қатъномаро ба даст доштан дар мусодираи ғайриқонунии дороиҳои Русия, ки мунҷамид шудаанд, муттаҳам кард.

Ёдовар мешавем, ки аз шуруи ҳамлаи Русия ба Украина, 24-уми феврали соли ҷорӣ ин бори панум аст, ки Маҷмаи умумии СММ алйҳи Русия қатънома қабул мекунад.