Вазорати корҳои дохилии Туркия субҳи рӯзи душанбе аз боздошти 46 нафар бо гумони даст доштан дар таркиши дирӯза дар Истанбул хабар дод.

Мақомоти Туркия субҳи рӯзи душанбе хабар дод, ки як занеро бо номи Аҳлом Ал-Башир бо иттиҳоми гумонбари аслии ҳодисаи таркиш дар кӯчаи Истиқлоли Истанбул боздошт карда, аз паси ӯ 46 нафари дигарро низ боздошт гардидааст. Гуфта мешавад, ин зани боздоштшуда дар ҷосозӣ кардани маводи мунфаҷира дар кӯчаи Истиқлол, ки макони сайёҳӣ ва серодам аст, даст дорад.

Вазири корҳои дохилии Туркия Сулаймон Сойлу гуфт, “тафтишҳои пешакӣ нишон медиҳанд, ки шибҳи низомиёни курд дар ин кор даст доранд”.

Дар ҳамин ҳол

Ҳамчунин расонаҳои туркӣ хабар медиҳанд, ки ҳамроҳи ин зан 46 нафари дигарро низ бо гумони ҳамкорӣ ва даст доштан дар ин таркиш боздошт кардаанд ва ҳоло тафтишот идома дорад.

Ёдовар мешавем, ки рӯзи 13-уми ноябр дар кӯчаи Истиқлоли Истанбул, макони сайёҳӣ ва серодаме бо номи Тақсим таркиш ба вуқуъ пайваст, ки дар натиҷа 6 нафар кушта ва 81 нафари дигар захмӣ шуданд. Ҳолати 2 нафар аз маҷруҳон “хатарнок” гуфта мешавад.

Дар пайи ин ҳамлаи террористӣ аксари кишварҳои дунё бо ирсоли паёми таслият ва ҳамдардӣ ба раисҷумҳури Турикя Раҷаб Тайиб Эрдуғон ин амалро маҳкум карданд.

Нерӯҳои низомии Украина имрӯз ҷумъа, 11-уми ноябр пас аз ақибнишинии нерӯҳои Русия вориди Херсон шуданд. Владимир Зеленский дар як суханронияш имрӯз гуфт, “мо ин минтақаро пурра бармегардонем.”

Ин минтақаи ҷанубии Украина дар аввали даргирҳо ба дасти нерӯҳои Русия суқут карда буд, аммо имрӯз қисман дигарбора ба дасти нерӯҳои украинӣ баргашт.

Зеленский дар суханронии имрӯзааш таъкид кард, ки Украина ҳама минтақаҳои аз дастрафтаашро бармегардонад. “Ҳатто шаҳр аз ҳузури душманон комилан пок нагардида  буд, ки худи сокинони Херсон аллакай рамзҳои Русия ва ҳама гуна осори ишғолгарон дар ин шаҳрро аз кӯчаву биноҳо дур карданд”, – гуфт Зеленский.

Дар шабакаҳои иҷтимоӣ наворҳое нашр шуда, ки дида мешавад, мардум аз вуруди низомиёни Украина ба ин минтақа ба гармӣ истиқбол мекунанд.

Дар ҳамин ҳол Кремлин эълон кард, ки бо вуҷуди ақибнишинии артиши Русия ин минтақа ҳамоно “хоки Русия боқӣ мемонад”. Сухангӯи Кремлин Дмитрий Песков рӯзи ҷумъа баён дошт, ки Русия аз ин амалаш “пушаймон нест” ва дар масъалаи ҳамапурсии моҳи сентябр “ҳеч тағйире сурат нахоҳад гирифт.

Ёдовар мешавем, ки моҳи сентябри соли ҷорӣ Русия бо гузарондани ҳамапурсӣ чор минтақаи Украина, аз ҷумла Херсонро шомили хоки худ карда буд, ки онро Киев ва кишварҳои ғарбӣ напазируфтанд.

Пас аз гузарондани ҳамапурсӣ барои ҳамроҳ кардани Херсон ба хоки Русия, Амрико ва кишварҳои ғарбӣ таъкид карда буданд, ки ба Киев кумак хоҳанд кард, то минтақаҳои аз дастрафтаашро дигарбора озод кунад.

Ба гузориши расонаҳои украинӣ, вазъияти башарӣ дар Херсон ба шиддат нигаронкунанда мебошад. Мардум на барқ доранд ва на обу ноне барои хӯрдан.

Рӯзи ҷумъа, 11-уми ноябр вакили Шӯрои вилоятии Херсон Сергей Хлан дар ҳузури хабарнигорон дар Киев гуфт: “Вазъи нону хӯрок хеле мушкил аст, сӯзишворӣ нест, қариб як ҳафта аст, ки барқ ​​нест. Корхонаи нонпазӣ, ки дар Херсон кор мекард, аз кор мондааст, зеро барои кор ба нерӯи барқ ​​ниёз дорад. Вазъияти башардӯстона воқеан душвор аст.”

Ӯ мегӯяд, ҳоло дар ин шаҳр “интернети мобилӣ пайдо мешавад, аммо он чунон заиф аст, ки танҳо паём фиристода мешавад, на бештар.”

Гуфта мешавад, шаби гузашта нерӯҳои Русия пас аз ақибнишинии нерӯҳояш аз ҷониби рости дарёи Днепр пули Антонов ва нерӯгоҳи обӣ барқии “Каховска”-ро тарконданд. Ба иттилои расонаҳо, қабл аз ин ҳам аксари зерсохторҳои барқӣ дар ин шаҳр аз ҷониби нерӯҳои Русия хароб карда шуда буданд, вале бо хароб кардани нерӯгоҳи мазкур мардуми зиёде бебарқу об мондаанд.

Субҳи имрӯз дар шаҳри Самарқанди бостонӣ нишасти навбатии сарони Созмони кишварҳои туркзабон ба кори худ оғоз кард.

10-уми ноябри соли 2022 Президенти Узбекистон бо нашри чанд акс тариқи саҳфаи фейсбукиаш хабар дод, ки сарони кишварҳои Туркия, Қирғизистон, Қазоқистон ва Туркманистонро пазироӣ мекунад.

Имрӯз дар расми ифтитоҳои ин нишаст Шавкат Мирзиёев, Президети Узбекистон ба унвони раиси давраии Созмони кишварҳои туркзабон Раҷаб Тайиб Урдуғон, раиси ҷумҳури Туркия ва Қурбонгулӣ Бердимуҳаммедов, раиси Шӯрои мардумии Шӯрои миллии Туркманистонро бо нишони олитарин нишони ҷаҳони турк сарфароз кард ва инчунин нависандаи машҳури Қирғизистон Чингиз Айтматовро ҳам ба нишони Алишер Навоӣ қадрдонӣ карда, онро ба дасти Содир Ҷабборов, Президенти Қирғизистон супорид.

Гуфта мешавад, Созмони кишварҳои туркӣ як созмони минтақавиест, ки соли 2009 ҳамчун Шӯрои ҳамкориҳои кишварҳои тукрзабон таъсис ёфт ва дар ибтидо чор кишвар, Қазоқистону Қирғизистон, Туркия ва Озарбойҷон узви он буданд ва соли 2019 Узбекистон ба он пайваст ва ҳоло кишварҳои Туркманистон ва Маҷористон узви нозири он мебошанд.

Ширкати “Meta”, молики Фейсбук гуфтааст, аз дирӯз, 9-уми ноябри соли 2022 ба ихтисори бахши зиёди кормандонаш шуруъ кардааст. Ин ширкати бузурги технологӣ то имрӯз 87 ҳазор корманд доштааст.

Ба гузоирши “Wall Street Journal“, Марк Зукербег мудири ширкати “Meta” эълон карда, ки шуруъ рӯзи чоршанбе, 9-уми ноябр бахши зиёди кормандонашро дар бахшҳои гуногуни ин ширкат ихтисор ва баъзе дигарро ба истироҳатӣ дарозмуддат фиристод.

Гуфта мешавад, ба рухсатии дарозмуддат фиристодан шояд ҳазорҳо корманди ин ширкатро дарбар бигирад.

“Wall Street Journal” аз қавли раҳбари захираҳои инсонии “Meta” Лори Голер менависад: “ба кормандоне, ки ҷои кори худро аз даст медиҳанд, ҳадди ақал маоши чаҳормоҳа ва ҳамчунин ҳаққи барканорӣ низ дода мешавад”.

Марк Зукерберг, раҳбари “Meta” дар мавриди иллати ихтисор кардани кормандонаш мегӯяд, таваққуъ ва хушбинии аз ҳад зиёди ӯ дар бораи рушду тараққӣ боиси азоиши шумори кормандон дар ин ширкат шудааст.

“Meta” дар охири моҳи сентябр гузориш дода буд, ки беш аз 87 ҳазор корманд дар ин ширкат кор мекунанд.

Дар ҳамин ҳол гузориш мешавад, ки ширкатҳои бузурги тиҷоратии ҷаҳон, ба монанди “Amazon”, “Aple”, “Tweetter” ва ғайра низ талош доранд вобаста ба вазъияти иқтисодии ҷаҳонӣ сафи кормандонашонро кам кунанд ва ё бахши аъзами онҳоро ба рухсатии дарозмуддат бифиристанд.