Ба гузориши “Ховар” ҳаҷми истеҳсоли маҳсулоти кишоварзӣ дар вилояти Хатлон то моҳи октябри соли ҷорӣ ба 21 миллиарду 832 миллиону 485,7 ҳазор сомонӣ расидааст.

Гуфта мешавад, ин миқдор истеҳсол шудани маҳсулот дар саросари вилоят назар ба ҳамин давраи соли гузашта 6,3 дарсад (ё 1 миллиарду 299 миллиону 455,2 ҳазор сомонӣ) зиёд аст.

“Тибқи маълумоти расмӣ, дар вилояти Хатлон дар ҳамаи бахшҳои хоҷагидории соҳаи растанипарварӣ ба ҳолати 1 ноябри соли равон як миллиону 47,2 ҳазор тонна ғалладона, 1 миллиону 513,1 ҳазор тонна сабзавот, 204,5 ҳазор тонна картошка, 651,4 ҳазор тонна полезӣ, 220,1 тонна мевагиҳо, 115,4 тонна ангур ва 24,7 ҳазор бех ниҳолу кӯчат ва гулҳо истеҳсол гардидаанд, ки дар қиёс ба ҳамин давраи соли гузашта мутаносибан истеҳсоли ғалладона 106,4%, сабзавот 106,6%, полезӣ 104,6%, мевагиҳо 109,3%, ангур 110,8% ва ниҳолу кӯчат 123,7 фоизро ташкил медиҳад.”

Афзоиши маҳсулоти кишварзиро хадамоти таблиғотии ҳукумати кишвар аз дастуроти Эмомалӣ Раҳмон вобаста медонанд. Ӯ дар ҳар мулоқоташ мардумро гушзад мекунад, ки ҷаҳонро гуруснагӣ таҳдид мекунад ва ҳар нафар бояд “захираи хӯрокаи дусола” дошта бошад.

Аммо дар баробари ин суханҳои батакрори Эмомалӣ Раҳмон, мақомоти кишвар шароитро барои деҳқонону хоҷагидорон чандон фароҳам намекунад, ки битавонанд бидуни фишори мақомоти андозу дигар масъулин озод фаъолияти деҳқонии худро пеш баранд ва барои мардум маҳсулоти кишоварзӣ истеҳсол кунанд.

Агарчи Ҳукумати кишвар дар гузоришоти расмияш аз лоиҳаҳои бузурги кишоварзӣ ёдовар мешавад, вале ба гуфтаи баъзе деҳқонони хатлонӣ, имтиёзҳои Ҳукумат бештар барои деҳқонони чинӣ ва дигарон аст, ки дар Хатлон заминҳои зиёдеро харидаанд ва кишту кор мекунанд, вале аксари кишоварзони худӣ ба хотири фишорҳои мақомоти андоз тарки ин соҳа мекунанд.

Бонки Рушди Авруосиё (БРА) имрӯз дар Душанбе эълом дошт, ки пас аз омӯзиши чанд тарҳи энержии бузург дар Тоҷикистон, барои бунёди онҳо сармоягузорӣ хоҳад кард.

Ба гузориши “Авесто”, Виктор Лебедев, мудири Сарраёсати тарҳҳои стратегии Бонки Рушди Авруосиё, имрӯз дар нишасти хабарие ба рӯзноманигорон гуфта, ки “дар Тоҷикистон теъдоде аз тарҳҳои энержӣ барои маблағгузорӣ ба таври муфассал мавриди омӯзиш қарор доранд. Аз ҷумла, маблағгузорӣ дар бораи ду лоиҳа дар рӯдхонаи Зарафшон ва НБО “Роғун” мавриди назар аст.”

Ин намояндаи БРА дар Душанбе таъкид карда, ки қарор аст боки мазкур барои рушди маҷмааи обу энержии кишварҳои Осиёи Марказӣ то 400 миллион доллари амрикоӣ сармоягузорӣ кунад ва дар оянда вобаста ба суботи молии лоиҳаҳо ҳаҷми маблағгузориро афзоиш хоҳад дод.

Директори Сарраёсати лоиҳаҳои стратегии БРА ҳамчунин қайд карда, ки татбиқи лоиҳаҳои энержӣ ба афзоиши содироти нерӯи барқ ​​аз Тоҷикистон ба кишварҳои дигар, аз ҷумла ба кишварҳои Осиёи Марказӣ мусоидат мекунад.

Дар соли 2008 замоне, ки Ҳукумат тарҳи Роғунро шуруъ кард, он замон арзиши ин тарҳ то 3 миллиард доллар гуфта мешуд, аммо соли 2016 ин маблағ ба 3,9 миллард расид. Аммо дар соли ҷорӣ Вазорати энержии Тоҷикистон арзиши ин лоиҳаро 5 миллард доллар эълон кардааст.