Хона блог саҳифа 378

Афзоиши парвозҳо аз Русия ба Тоҷикистон

Аз ҷониби
amrullokhi
-
0

Агентии федеролии транспорти ҳавоии Русия эълом кардааст, ки теъдоди парвози ҳавопаймоҳо ба шаҳрҳои Душанбе ва Кӯлобро зиёдтар кардааст.

Бино ба иттилои расонаҳо, Агентии федеролии транспорти ҳавоии Русия (Росавиатсия) бо ворид кардани тағйирот дар масири парвозҳо ба шаҳрҳои Душанбе, Хуҷанд, Кӯлоб ва Бохтар теъдоди парвозҳои ширкати ҳавоии Урал (Уральские авиалинии)-ро зиёдтар кардааст.

Бар асоси ин тағйирот парвозҳои ширкати “Уральские авиалинии” аз шаҳри Уфа ба Душанбе то 5 маротиба ва аз Уфа ба Кӯлоб то 7 маротиба дар як ҳафта илова карда шуданд.

Пеш аз ин ширкати “Уралские авиалинии”аз “Росавиатсия” хоста буд, ки теъдоди парвозҳо ба шаҳрҳои Бохтар ва Кӯлоб, ки ҳафтае 3 маротибаӣ анҷом мешуд, то 7 маротиба дар як ҳафта афзоиш диҳад.

Ин дар ҳолест, ки пас аз оғози ҳамлаҳои Русия дар 24-уми феврали соли 2022 алайҳи Украина ва дар натиҷа ҷорӣ шудани таҳримҳои зиёде алайҳи Маскав хеле аз ширкатҳои ҳавопаймоии Русия аз даромадҳои ҳангуфти худ, ки аз парвозҳо ба кишварҳои аврупоӣ ба даст меоваранд, маҳрум шуданд.

Аз сӯи дигар, аксари шаҳрвандони Русия низ дар ин вазъияти буҳронӣ барои мусофират ва хушгузаронии рухсатиҳои худ кишварҳои Осиёи Марказӣ, ба хусус Тоҷикистону Узбекистон ва Қирғизистонро интихоб мекунанд, зеро молу хидматрасониҳо дар ин кишварҳо нисбатан арзонтар мебошанд.

Гуфта мешавад, ширкатҳои дигари ҳавопаймоии Русия, аз он ҷумла ширкатҳои “Аэрофлот” ва “Победа“ низ хостори касби иҷозаи парвози мусофиркашонӣ ва боркашониро аз шаҳрҳои мухталифи Русия ба Тоҷикистон пешниҳод карда буданд, аммо “Росавиатсия” бартариятро дар ин самт ба ширкати “Уралские авиалинии” додааст.

Боздошти як зодаи Тоҷикистон дар Туркия

Аз ҷониби
firuzihait
-
0

Пулиси зиддитеррор дар шаҳри Истанбули Туркия ду узви эҳтимолии гурӯҳи террористии ДОИШ-ро, ки шаҳрвандони Тоҷикистон ва Узбекистон будаанд, боздошт кардааст.

Бино ба иттилои расонаҳои туркӣ, гумонбарон қасд доштаанд дар шаби Соли нав бо истифода аз маводи тарканда ҳамлаи хунини террористиро дар яке аз марказҳои тафреҳии шаҳри Истанбул, ки одатан одамони зиёде ҷамъ меоянд, анҷом бидиҳанд.

Гуфта мешавад, кормандони пулис мошини онҳоро шаби 31-уми декабри соли 2022 чанд соат пеш аз оғози Соли нав дар ҳудуди ноҳияи Башакшеҳир пайдо кардаанд. Гумонбарон талош кардаанд, ки аз кормандони пулис фирор кунанд, аммо дар ҷараёни таъқиб кормандони пулис тавонистаанд ба чархҳои мошини онҳо чанд тир холӣ карда ва дар ниҳоят ҳардуро дастгир кунанд.

Расонаҳои туркӣ аз шаҳрванди Узбекистон А.М ва аз шаҳрванди Тоҷикистон К.З.И, ки дар миёни ҷангҷӯёни ДОИШ бо лақаби “Абу Маймун” маъруф будааст, ном бурдаанд. Гуфта мешавад, пулис “Абумаймун”-ро ба ҳабс гирифта, нисбат ба шаҳварнди Узбекистон раванди ихроҷ аз Туркияро шуруъ кардааст.

То ҳол иттилои пурра дар бораи “Абумаймун” дастраси расонаҳо нест, аммо гуфта мешавад, вай дар “Давлати исломӣ” коршинос оид ба маводи таркандаи худсоз буда, ба аъзои созмони террористӣ ин корро меомӯзондааст. Ҳамчунин дар шабакаҳои иҷтимоӣ ба манфиати ин созмон фаъолияти таблиғотӣ мебурдааст.

Инчунин пулис хабар додааст, ки ин ҳамла мебоист монанд ба ҳамлаи 1-уми январи соли 2017 дар Истанбул, ки аз ҷониби ҳамин созмон содир шуда буд, ки дар натиҷа 39 кушта шуд, сурат бигирад. Он замон низ бо иттилои пулиси Туркия, ҳамлаи хунини террористии соли 2017-ро як зодаи Узбекистон анҷом дода буд.

Боздошти 10 нерӯи Ҷабҳаи муқовимат бо 40 ҳазор аслиҳа

Аз ҷониби
amrullokhi
-
0

Нерӯҳои амнияти Толибон дар вилояти Бағлон мегӯянд, дар натиҷаи як амалиёт 10 нафар аз нерӯҳои Ҷабҳаи муқовимати миллии Афғонистон, ки қасди фирор ба Тоҷикистонро доштанд, боздошт кардаанд.

Хабагузории давлатии Афғонистон “Бохтар” дар саҳфаи Твиттриаш хабар додааст, нерӯҳои амнияти Толибон дар вилояти Бағлон 10 нафар аз нерӯҳои ҶММ-ро бо шумули як фармондеҳ боздошт кардаанд.

Ба қавли манбаъ, ин афрод мехостанд 4-уми январи соли 2023 аз тариқи вулусволии Хусти вилояти Бағлон ба самти Тоҷикистон фирор кунанд, вале дар ҳудуди ин вилоят бо 40 ҳазор силоҳ боздошт шудаанд.

То замони таҳияи ин хабар ҷониби нерӯҳои Ҷабҳаи муқовимати миллӣ дар Афғонистон дар бораи ин хабар вокуниш нишон надоданд. Инчунин дар ин хабар гуфта нашудааст, ки ин афрод мехостанд ин миқдор силоҳро бо худ ба Тоҷикистон интиқол диҳанд ва ё дар ҷои дигаре пинҳон кунанд.

Гуфта мешавад, Толибон тамоми нерӯҳои муқовимате, ки алайҳи ин гурӯҳ ба муборизаҳои мусаллаҳона бархостаанд, “нерӯҳои шӯришгар” меномад ва аз замони сари қудрат омадани худ дар 15-уми авугусти 2021 то кунун  дар сангарҳои мухталиф бо онҳо ҷанг мекунад.

Шоҳзода Ҳарӣ дар Афғонистон 25 нафарро куштааст

Аз ҷониби
amrullokhi
-
0

Эътирофоти Шоҳзода Ҳарӣ дар хусуси қатли 25 нафар дар Афғонистон вокуниши расонаҳо ва мақомоти Афғонистонро ҳам ба бор овард.

Ба гузориши рӯзномаи “Индепендент“, шоҳзода Ҳарӣ, узви хонадони салтанатии Бритониё дар китоби хотироти худ навиштааст, ки соли 2012 дар замони анҷоми маъмурияти низомиаш дар вилояти Ҳилманд бо чархболи низомиаш аз навъи Апачӣ 25 нафарро куштааст ва аз ин кораш на ифтихор мекунад ва не хилоҷат мекашад.

Ҳарӣ дар идома гуфтааст, ки вақте ин афродро кушт, дар бораи онҳо ҳамчун “муҳраҳои шатранҷ фикр мекард, на ҳамчун одам” ва ба назари ӯ, онҳо муҳраҳое буданд, ки дар вақти анҷоми маъмурият бояд аз тахтаи шатранҷ барчида шуда, дур андохта мешуданд.

Анас Ҳаққонӣ, аз фармондорони Толибон дар Афғонистон дар вокуниш ба ин эътирофот гуфтааст, “онҳое, ки шумо куштед, муҳраҳои шатранҷ не, балки одамҳо буданд. Хонаводаҳое доштанд ва интизор буданд, ки онҳо ба хонаҳо бар мегарданд. Дар байни қотилони афғонҳо бисёриҳо нахостанд ҷиноятҳои ҷангии худро фош кунанд ва виҷодонашонро ором кунанд”

Вай мегӯяд, “ҳақиқат он чизест, ки шумо гуфтед; мардуми бегуноҳи мо барои аскарон, рохбарони ҳарбӣ ва сиёсии шумо (муҳраҳои) шоҳмот буд. Бо вуҷуди ин, шумо дар он “бозӣ” -и “майдони” сафед ва сиёҳ мағлуб шудаед.” Ва таъкид карда, умедворам барои иртикоби ин ҷиноятҳои ҷангӣ рӯзе ба Додгоҳи байналмилалӣ иҳзор хоҳед шуд ва мардум ҳам ин ҷинояти шуморо маҳкум мекунанд.

Гуфта мешавад, Шоҳзода Ҳарӣ бори аввал соли 2007 низ ба муддати 2 моҳ ҳамчун сарбоз дар вилояти Ҳилманд дар сафи нерӯҳои Бритониё алайҳи Толибон меҷангид, аммо вақте кишвараш фаҳмид, ки рози ҳузури ӯ дар Афғонистон фош шудааст, аз тарси он, ки кушта нашавад, Ҳариро гурезонданд ва 5 сол баъд пас омӯзишҳои барои касби таҷрубаҳои бештар дар майндонҳои набард ӯро ба Афғонистон фиристоданд ва ин дафъа ба муддати 20 ҳафта дар он ҷо монд.

Ин бори аввал нест, ки сарбозони бритониёӣ дар замони анҷоми маърмуриятҳои низомии худ дар Афғонистон ба иртикоби ҷиноятҳои ҷангӣ муттаҳам мешаванд, балки пеш аз ин ҳам дар чанд маврид таҳқиқоти расонаҳои ин кишвар фош карда буданд, даҳҳо нафар аз сарбозону афсарони он кишвар муртакиби ҷиноятҳои ҷангӣ шудаанд.

Созмонҳои ҳомии ҳуқуқи башар аз ҷумла Афви байналмилал ҳам бо маҳкум кардани ин ҷиноятҳои ҷангӣ хостори таҳқиқоти алоҳида дар хусуси ҷиноятҳои ҷангии сарбозони Бртиониё дар Афғонистон шуда буд.

Инчунин тайи 20 соли ҷанг дар Афғонистон, ки нерӯҳои НАТО бо раҳбарии Амрико ва Бритониё дар алайҳи Толибон ҷанг мекарданд, нерҳои амрикоӣ  ва нерӯҳои устролиёӣ низ ба иртикоби ҷиноятҳои ҷангӣ ва ҷиноятҳои алайҳи башарият, ки дар натиҷа мардуми бегуноҳ, аз он ҷумла занону кӯдакон мавриди қатлҳо омм ва занҷиравӣ қарор гирифтаанд, низ муттаҳам шуда буданд.

Додситонии кул ба зиндон маҳкум шудани Азиза Ҳайдароваро тасдиқ кард

Аз ҷониби
firuzihait
-
0

Додситони кулли Тоҷикистон бо нашри як иттилоия ба 10 соли зиндон маҳкуми шудани Азиза Ҳайдароваро тасдиқ карда, гуфтаҳои модари ӯро рад кардааст.

Дар ин иттилоия, ки рӯзи 6-уми январ дар сомонаи Додситони кулли Тоҷикистон нашр шудааст, гуфта мешавад, ки дар мурофиаи додгоҳӣ дар суди ноҳияи К.Мастчоҳ “тасарруфи хонаи як сокини шаҳри Хуҷанд” ва “қаллобии котибаи собиқ” аз ҷониби Ҳайдарова Азиза исбот шудааст.

Гуфтанист, Барно Ҳайдарова, модари Азиза Ҳайдарова дар суҳбат бо Радиои Озодӣ гуфта буд, ки муфаттишон духтарашро ба зидди Рустам Саидаҳмадзода, додраси пешини Додгоҳи ноҳияи Бобоҷон Ғафуров, ки ӯ низ дар боздошт аст, истифода карданӣ ҳастанд ва баҳси хона як баҳона аст. Ба гуфтаи модари Азиза Ҳайдарова, он хонаеро, ки ҳосили қаллобӣ меноманд се сол пеш бо пули дар Русия ба даст овардааш, харидааст.

Додситонии кулли Тоҷикистон дар ин бора мегӯяд, ки “ҷиноятҳои содирнамудаи Ҳайдарова А.А. ба парвандаи ҷиноятӣ ва лаҳзаҳои айби эълонгардида нисбати собиқ судяи суди ноҳияи Б.Ғафуров Сайдаҳмадзода Р.С. ягон алоқамандӣ надорад”.

Ёдовар мешавем, ки Азиза Ҳайдароваи 23-сола,котибаи додраси собиқи ноҳияи Бобоҷон Ғафуров Рустам Саидаҳмадзода, рӯзи 10-уми июни соли ҷорӣ ба гумони қаллобӣ дастгир ва дертар ба 10 соли зиндон маҳкум шуд. Худи Азиза Ҳайдарова ва пайвандонаш ҳукмро ноодилона дониста, бозбинишяро талаб карданд.

Рустам Саидаҳмадзода рӯзи 29-уми июн дар Душанбе дастгир ва ба “додани хабари дурӯғ” ва “баромадан аз ҳадди ваколатҳои мансабӣ” гумонбар дониста шудааст. Худи Рустам Саидаҳмадзода ин айбномаи мақомотро рад кардааст.

Тоҷикистонро сармои шадид интизор аст

Аз ҷониби
amrullokhi
-
0

Агентии обуҳавошиносии кишварамон ҳушдор додааст, ки Тоҷикистонро бодуҳавои номусоид ва сармои шадид фаро хоҳад гирифт.

Акс аз манбаъҳои боз

Бино ба иттилои АМИТ “Ховар”, “9-11 январ бо сабаби воридшавии анбӯҳи ҳавои сард аз самти аврупоии Федератсияи Россия дар бештари манотиқи кишвар сардшавии ҳаво дар назар аст.”

Агентӣ иттилоъ дода, ки 10-11 январ дар бархе ноҳияҳои вилоятҳои Суғд, Хатлон ва ноҳияҳои тобеи ҷумҳурӣ ҳарорати ҳаво то 10-15 дараҷа паст мешавад. Ҳамзамон Агентӣ дар ин рӯзҳо бориши бошиддати барф дар минтақаҳои алоҳидаи ноҳияҳои тобеи ҷумҳурӣ ва ғарби Вилояти Мухтори Кӯҳистони Бадахшонро аз эҳтимол дур намедонад.

Ҳамчунин гуфта мешавад, 9-10 январ дар ноҳияҳои алоҳидаи вилоятҳои Суғд, Хатлон ва ноҳияҳои тобеи ҷумҳурӣ шиддатёбии вазиши шамол бо суръати то 15-20 метр дар як сония пешгӯӣ мешавад. Ва рӯзҳои 7-10 январ дар нишебиҳои ҷанубии қаторкӯҳҳои Ҳисор сар задани тарма аз эҳтимол дур нест.

“Дар водиҳо бориш дар шакли барф ва дар қаторкӯҳҳо боридани барфи зиёд, дар роҳҳо, асосан дар ағбаҳо боридани барф ба амал меояд. Дар аксари ноҳияҳои баландкӯҳ  шамоли сахт ва боридани барфи зиёд дар назар аст. Инчунин дар қитъаҳои роҳи Душанбе-Хуҷанд, Душанбе-Рашт-Лахш, Душанбе-Сангвор, Душанбе-Шоҳин-Дарвоз-Хоруғ, Хоруғ-Ишкошим, Хоруғ-Мурғоб яхбандӣ ва фаромадани тарма аз эҳтимол дур нест.”, омадааст дар хабар.

Тоҷикистону Қирғизистон даст доштани шаҳрвандонашон дар эътирозҳои Қазоқистонро рад карданд

Аз ҷониби
firuzihait
-
0

Вазоратҳои корҳои хориҷии Тоҷикистон ва Қирғизистон даст доштани шаҳрвандонашон дар эътирозҳои моҳи январи соли 2022 дар Қазоқистонро рад карданд.

Намояндаи дафтари матбуоти Вазорати корҳои хориҷии Тоҷикистон дар вокуниш ба изҳороти Берик Асилов, додситони кулли Қазоқистон, ба Радиои Озодӣ навиштааст, ки дар ин бора аз роҳҳои расмӣ аз Қазоқистон маълумот нагирифтаанд ва шаҳрвандони Тоҷикистон дар ошӯбҳои оммавии моҳи январи соли 2022 дар Қазоқистон ширкат надоштаанд.

Инчунин Вазорати корҳои хориҷӣ гуфтааст, ки баъд аз нашри хабарҳо дар бораи иштироки шаҳрвандони кишвар дар эътирозҳои Қазоқистон, сафорати Тоҷикистон ба ниҳодҳои дахлдори Қазоқистон муроҷиат кард ва ин далелҳо тасдиқи худро наёфт.

Дар ҳамин ҳол, Вазорати корҳои хориҷии Қирғизистон низ изҳороти Додситонии Қазоқистонро рад карда, мегӯяд, ки ягон шаҳрванди Қирғизистон дар Қазоқистон дар гирдиҳамоиҳо ва эътирозҳои оммавию ғоратгарӣ иштирок накардааст.  

Ба гуфтаи ВКХ-и Қирғизистон, баъзе аз шаҳрвандони кишварашон ба далели “вазъияте, ки аз онҳо вобаста намебошад” дар маркази “ҳодисаҳои январӣ”-и Қазоқистон қарор гирифтаанд.

Вокуниши вазоратҳои хориҷии ин ду кишвар дар ҳолест, ки Додситонии кулли Қазоқистон Берик Асилов рӯзи панҷшанбе хабар дод, ки дар ҳодисаҳои моҳи январи соли гузашта дар Қазоқистон, ки бо кушта шудану боздошти чандин нафар анҷомид, шаҳрвандони Узбакистон, Русия, Қирғизистон ва Тоҷикистон ҳузур доштаад.

Дар эътирозҳои Қазоқистон шаҳрвандони Тоҷикистон низ ҳастанд

Аз ҷониби
AZDA TV
-
0

Додситонии кулли Қазоқистон рӯзи панҷшанбе хабар дод, ки дар ҳодисаҳои моҳи январи соли гузашта дар Қазоқистон шаҳрвандони Узбакистон, Русия, Қирғизистон ва Тоҷикистон ҳузур доштаад.

“Шаҳрвандони хориҷӣ ҳамчун гумонбар бо гумони иштирок дар бетартибиҳои оммавӣ ва ҷиноятҳои дигар боздошт шудаанд. Дар миёни онҳо шаҳрвандони Узбакистон, Русия, Қирғизистон ва Тоҷикистон низ ҳастанд”, – мегӯяд Берик Асилов додситони кулли Қазоқистон.

Вай зикр кард, ки 573 нафар дар парвандаҳои марбут ба ҳодисаҳои январ, аз ҷумла ду парвандаи марбут ба амалҳои террористӣ маҳкум шудаанд.

Додситни кули ин кишвар мегӯяд, айни замон 18 нафар аз ташкилотчиёни асосии бетартибиҳои оммавии соли гузашта муайян карда шудаанд. “Парвандаи 13 нафари онҳо аллакай дар додгоҳ фиристода шудааст.

Ёдовар мешавем, ки моҳи январи соли гузашта дар Қазоқистон ба сабабҳои мушкилоти иқтисодӣ эътирозҳои саросарӣ сард зад, ки дар натиҷа бо мудохилаи нерӯҳои “Посдори сулҳ”-и Созмони Амнияти Аҳдномаи Дастаҷамъӣ он маҳор карда шуд ва дар пайи он даҳҳо нафар боздошт гардид.

Серфарзандтарин марди дунё соҳиби 60-умин фарзандаш шуд

Аз ҷониби
amrullokhi
-
0

Дар рӯзҳои аввали январи соли ҷорӣ як сокини 50-солаи Покиситон, ки се ҳамсар дорад, соҳиби 60-умин фарзанди худ шуд.

Акс аз манбаъҳои боз

Бино ба иттилои

Акс аз манбаъҳои боз

Гуфта мешавад, Ҷонмуҳаммад якумин нафаре нест, ки дар иёлоти Балучистони Покистон мехоҳад бо зиёд кардани теъдоди фарзандонаш соҳиби шуҳрат шавад, балки пеш аз он ҳам марде бо номи Абдулмаҷид Мангал бо доштани 56 фарзанд аз 6 ҳамсар маъруф шуда буд.

Покистон яке аз кишварҳои исломӣ дар Ҷануби Осиё мебошад. Ин давлат бо доштани беш аз 225 миллион нафар аҳолӣ яке аз серҷамъияттарин кишварҳои ҷаҳон пас Чину Ҳиндустон, Амрико ва Индонизияву Бангладеш аст.

Курсие, ки чанд моҳ боз холӣ буд соҳибашро пайдо кард

Аз ҷониби
firuzihait
-
0

Дар пайи ҷойивазкунии имрӯза, Баҳриддин Сироҷиддинзода ба вазифаи раиси Агентии содироти Тоҷикистон таъйин шудааст.

Баҳриддин Сироҷиддинзода то ба ин вазифа таъйин шуданаш аз моҳи феврали соли 2020 ба ҳайси муовини якуми директори Агентии беҳдошти замин ва обёрӣ кор мекард.

Гуфта мешавад, курсии раиси Агентии содироти кишвар баъд аз боздошти раиси собиқи ин ниҳод Шавкат Бобозода, яъне аз моҳи сентябри соли 2022 холӣ буд.

Радиои Озодӣ замони боздошти раиси собиқи ин ниҳод хабар дода буд, ки “Шавкат Бобозода боздошт шуда, зидди ӯ бар пояи банди 247, қисми 4-и Кодекси ҷиноӣ (қаллобӣ дар ҳаҷми махсусан калон) парванда кушодаанд. Шавкат Бобозода ҳоло дар боздоштгоҳи муваққатии Вазорати корҳои дохилӣ нигоҳдорӣ шуда, парвандаашро муфаттишони Додситонии кул таҳқиқ мекунанд”.

Бино ба навиштаи манбаъ, боздошти Шавкат Бобозода бар асоси шикояти як ширкати хориҷӣ сурат гирифта, ба он гумонбар дониста мешавад, ки беш аз 300 ҳазор долларро аз ин ширкат гирифта, шартномаи қаблан ҳосилшударо иҷро накардааст.

То ҳол таҳқиқи парвандаи Шавкат Бобозода ба анҷом нарасидааст ва мақомот низ расман дар ин бора чизе намегӯяд.

1...377378379...800саҳифаи 378 аз 800