Ҷустуҷӯ кунед
Ҷустуҷӯ
18.7 C
Dushanbe
Хона блог саҳифа 486

Маршал Дустум аз Афғонистон фирор карда аст, ин ҳақиқат дорад?

Аз ҷониби
shukhrat
-
0

Аз Афғонистон рафтани маршал Дустум боиси сару садоҳое гашта аст. Хабаргузории “Спутник” дар гузорише ба накл аз як манбаъ дар Маймана маркази маъмурии вилояти Форёб – яке аз пойгоҳҳои маршал Дустум, навишта, ки ин раҳбари низомӣ бо чархбол Афғонистонро тарк карда аст.

Тибқи бархе хабарҳо маршал Абдурашид Дустум дар набард бо Толибон захмӣ шуда аст. Аммо бар асоси фарзияи дигар маршал Дустум бемории қанд (диабет) дорад ва боз ба маризии вируси COVID- 19 гирифтор шуда, ки таҳаммули ин маризиҳо барояш сахт буда ниёз ба табобати ҷиддӣ ва касбӣ дошта аст.

Хешовандони маршал Дустум ҳам ин хабарро тайид карданд, ки ӯ бо чархбол Афғонистонро тарк карда аввал ба Тошканд ва аз онҷо ба Туркия рафта аст. Аммо ба гуфтаи яке аз дӯстони наздики маршал Дустум вазири умури иҷтимоии Афғонистон Башир Аҳмад Таян маршал Дустум барои ширкат дар форуми дипломатӣ ба Анталия сафар карда аст.

“Чунин овозаҳо дуруст нестанд, то ҷое, ки ман медонам маршал Дустум расман ба ин чорабини дар якҷоягӣ бо раиси Шӯрои олии мусолиҳаи миллӣ Абдуллоҳ Абдуллоҳ, вазири умури хориҷа Ҳаниф Атмар ва раиси Ҷамъияти исломии Афғонистон Салоҳиддин Раббонӣ даъват шуда буд”.

Тавре, ки дар сомонаи расмии Форум хабар дода шуда, мулоқот бо ширкати сарони давлатҳо, сарвазирон, вазирони умури хориҷа ва намояндагони ташкилотҳои минтақавӣ ва байналмилалӣ, олимон, коршиносон ва доираҳои тиҷоратии беш аз 50 кишвар дар 18 -июн дар Анталия оғоз ёфт.

Дар ҳамин ҳол номи Дустум дар листи ширкаткунандагон вуҷуд надорад. Абдурашид Дустум роҳбари ҳаракати миллии исломии Афғонистон, узбектабор, роҳбари диаспораҳои Узбекистон ва Туркманистон, яке аз шахсиятҳои бо нуфузи сиёсати муосири Афғонистон аст.

Тайи як моҳи ахир вай мустақиман дар минтақаҳои Форёб, Ҷузҷон ва Сари пул бо нерӯхои Толибон дар набард буд, ки ин шабу рӯзҳо нуктаҳои доғи Афғонистон ҳастанд.

Иброҳим Раисӣ барандаи интихоботи президентии Эрон эълон шуд

Аз ҷониби
shukhrat
-
0

Бино ба натиҷиҳои пешакии давраи 13-умин интихоботи президентии Эрон Иброҳим Раисӣ дар муқоиса бо дигар номзадҳо бо фарқияти хеле зиёд, тақрибан 18 миллион овоз пирӯзи интихобот эълон шуд. Табрику таҳният ба Раисӣ пеш аз эълони натиҷаҳо оғоз шуда буд.

Хабаргузории “Форс” навишт, ки Раисӣ раисҷумҳур шуд.

Бино ба навиштаи хабаргузории “Форс”, шумориши 90% овозҳо нишон дод, ки Иброҳим Раисӣ беш аз 17 миллону 800 ҳазор овоз (62%,), Муҳсин Ризоӣ 3 миллону 300 ҳазор (11%), Абдуносир Ҳимматӣ 2 миллону 400 ҳазор овоз (8%) ва Қозизода Ҳошимӣ ҳудуди як млн (3%)-и овозҳои интихобкунандагонро ба даст овардаанд. Гуфта мешавад, вазири корҳои дохилии Эрон натиҷаи ниҳоиро дар як нишасти расмӣ эълон хоҳад кард.

Рақибони интихоботии Раисӣ, Абдуносир Ҳимматӣ, Муҳсин Ризоӣ ва Қозизода Ҳошимӣ пешопеш ӯро барои пирӯзии мутлақаш табрик гуфтанд.

Ҳасани Рӯҳонӣ дар паёми табрикотии ғайрирасмии худ гуфт, “Маълум аст, ки шахси интихобшудаи мардум дар ин интихобот чи касе аст, ҳоло ки барои табрикоти расмӣ вақт аст, ман ҳам табрикотамро ба таъхир мегузорам, аммо шахси интихобшудаи мардум аллакай раъйи кофӣ ба даст овардааст”.

Барои ба поён расидани кори ҳукумати 12-уми Эрон тибқи қонун 45 рӯзи дигар боқимонда аст. Рӯҳонӣ изҳори умедворӣ кард, ки дар давоми беш аз як моҳи умри ҳукуматаш корҳои шоистае анҷом хоҳад дод.

Иброҳим Раисӣ, президенти 8-ум барои давлати 13-уми Эрон интихоб шуд. Ӯ қаблан дар мансабҳои зиёди давлатӣ кор кардааст ва ахиран дар вазифаҳои Додситони кулли махсуси руҳоният кор мекард.

Мулоқоти вазири умури хориҷаи Тоҷикистон бо намояндаи Иттиҳоди Аврупо

Аз ҷониби
shukhrat
-
0

Вазири умури хориҷаи Тоҷикистон Сироҷиддин Муҳриддин дар ҳошияи Форуми дипломатӣ дар шаҳри Анталияи Туркия бо намояндаи Иттиҳодияи Аврупо дар умури хориҷа сиёсат ва амният Жозеп Боррелл дидору гуфтугӯ намуд.

Дар ҷараёни ин мулоқот ҷонибҳо перомуни татбиқи стратегияи ҷадиди Иттиҳодияи Аврупо дар Осиёи Марказӣ суҳбат карданд.

Хабаргузории “Спутник” бо такя ба манбааш дар дафтари матбуотии Вазорати умури хориҷаи Тоҷикистон иттилоъ дода, ки ҷонибҳо рушди ҳамкориҳои дуҷонибаи Тоҷикистон ва Иттиҳодияи Аврупо, татбиқи стратегияи ҷадиди ИА дар Осиёи Марказӣ ва ҳамчунин амалисозии лоиҳаҳои муштаракро баррасӣ карданд.

Дар ҷараёни ин мулоқот аҳамияти рушди муносиботи Тоҷикистон ва ИА дар доираи Шӯрои ҳамкорӣ дар Кумитаи ҳамкорӣ қайд карда шуд.

Ба гуфтаи дафтари матбуотии Вазорати умури хориҷаи Тоҷикистон Муҳриддин ва Баррелл дар мавриди амният ва суботи минтақавӣ гуфтугӯи судманд доштанд. Доир ба вазъи Афғонистон, таҳдидҳои терроризм ва экстремизм низ диққати махсус доданд.

Ёдовар мешавем, ки Иттиҳоди Аврупо стратегияи ҷадиди худ барои Осиёи Марказиро дар соли 2019 тасвиб кард, стратегияи пештараи он соли 2007 қабул шуда буд.

Санад таъмини устуворӣ ва ҳамкории минтақавиро дар минтақа мадди назар дорад, аз ҷумла Иттиҳодияи Аврупо тасмим гирифта, ки ба навсозии иқтисодӣ ва сармоягузорӣ ба ҷавонон мусоидат намояд.

Сафари директори бюрои минтақавии БРСММ ба Тоҷикистон

Аз ҷониби
shukhrat
-
0

Раиси бюрои минтақавии Барномаи рушди Созмони Милали Муттаҳид, Маряна Сполярич Эггер рӯзҳои 20-22 ба Тоҷикистон меояд.

Ба навиштаи хабаргузории “Спутник” ин сиёсатмадори аврупоӣ қабл аз Тоҷикистон ба Узбекистон ва Қирӯизистон ҳам сафар хохад кард. Вай зимни сафараш ба Тоҷикистон якчанд дидору мулоқотро бо намояндагони ҳукумати Тоҷикистон ва дигар шарикон мадди назар дорад, вале аз ҷузъиёташ чизе гуфта намешавад.

Маряна Сполярич Эггер, директори Бюрои минтақавии Барномаи рушди СММ

Мавзӯи асосии музокироти оянда танзими коҳиш додани авоқиби иҷтимоию иқтисодии таъсири пандемияи COVID -19 мебошад.

Тибқи гузориши “Спутник” рузи 22 июн Сполярич дар мизи мудаввари “Сармоягузорӣ ба оянда: имкониятҳо барои соҳибкории инноватсионӣ дар  Тоҷикистон” ширкат менамояд.

Барномаи рушди СММ дар Тоҷикистон дар чаҳор самти муҳим фаолият намуда, ба вазъи қишри осебпазири аҳолӣ, аз ҷумла занону ҷавонон, шахсони маъюб ва шахсони гирифтори ВНМО (ВИЧ) таваҷҷӯҳи хосса зоҳир мекунад.

Дар ҳамкорӣ бо ҳукумат, дигар агентиҳои СММ, бахши хусусӣ ва ҷомеаи шаҳрвандӣ, барномаи рушди СММ дар масоили риояи ҳуқуқи инсон ва ислоҳот бо далелҳои асосёфта кумак карда тақвияти имконот ва фаолияти ба рушди кишвар равонашударо дар ҳамаи минтақахои Тоҷикистон дастгирӣ мекунад.

Директори БРСММ дар сафараш ба Узбекистон дар Тошканд дар “Форуми байналмилалии занони соҳибкор” ширкат хоҳад кард.

Дар Қирғизистон бошад, Маряна Сполярич бо мақомоти ин кишвар мулоқоту гуфтугӯ, аз ҷумла вазъ дар марзи Тоҷикистону Қирғизистонро низ мавриди баррасӣ қарор хоҳад дод.

Имрӯз дар Эрон интихоботи президентӣ ҷараён дорад

Аз ҷониби
shukhrat
-
0

Имрӯз 18 июн дар Эрон интихоботи президентӣ доир гашт. Мардум аз соати 7-и субҳ ба вақти маҳаллӣ барои интихоби раисҷумҳури ҷадидашон пой сандуқҳои раъй ҳозир шуданд.

Дар ин даври интихоботи президентӣ 4 номзад: Муҳсин Ризоии Мирқоид, Иброҳим Раисӣ, Амир Ҳусейн Қозизода Ҳошимӣ ва Абдунасир Ҳимматӣ рақобат хоҳанд кард ва ғолиб бояд беш аз 50% овозҳоро ба даст орад. Шӯрои нигаҳбони давлати Эрон пешбарии 3 номзад, аз ҷумла Маҳмуд Аҳмадинажод, президенти собиқи Эронро рад кард.

Баъзе аз шаҳрвандони Эрон пас аз ради салоҳият шудани Аҳмадинажод ва дигарон гуфтанд, ки бо маҳдуд кардани имкони ширкати васеи номзадҳо аллакай натиҷаҳои интихобот аз пеш маълум карда шудааст. Тибқи таҳлилҳо аз 37 то 47 дарсад овоздиҳандагон эълом кардаанд, ки дар интихобот иштирок намекунанд.

Аммо расонаҳои Эрон субҳи имрӯз аз иштироки васеи шаҳрвандон дар интихобти имрӯза хабар доданд.

Тибқи иттилои Ситоди интихоботии Эрон, шумораи афроди қобили раъй дар ин интихобот беш аз 59 млн нафарро ташкил медиҳад, ки аз он 1.392.148 онҳоеанд, ки бори аввал барои овоз додан дар интихобот иштирок мекунанд.

Бино ба иттилои расонаҳои эронӣ, раванди интихобот соати 7-и субҳи рӯзи ҷумъа 18 июн оғоз ёфт ва то нисфи шаб ба вақти маҳаллӣ идома хоҳад кард ва имкон дорад, ки вақти овоздиҳӣ то соати 02:00-и рӯзи шанбе дароз карда шавад.

Тибқи фарзияҳои қаблӣ, Иброҳим Раисӣ сиёсатмадори муҳофизакор барандаи интихобот мешавад. Аммо пас аз эълони натиҷаҳои ниҳоӣ дақиқ хоҳад шуд.

Русия қасд дорад муҳоҷирони меҳнатиро бо қатораҳо вориди кишвар кунад

Аз ҷониби
shukhrat
-
0

Русия ҷиҳати овардани муҳоҷирони меҳнатӣ ба кишвар ба дунболи ҷустуҷӯи роҳу чора аст ва пешниҳод карда мешавад, ки муҳоҷирон бо қатораҳо ба Русия оварда шаванд.

“Спутник” ба нақл аз рӯзномаи “Коммерсант” навишта, ки Вазорати кишоварзии Русия роҳи нави ворид кардани муҳоҷирони меҳнатиро ба кишвар кор мекунад. Ин вазорат бо роҳи оҳани Русия нақша доранд барои ворид кардани коргарони мавсими қатораҳои чартерӣ ташкил кунанд. Чунин тадбир барои таъмини соҳаи кишоварзӣ бо коргарон зарур аст.

Дар маҷмӯъ соҳаи кишоварзии Русия ба беш аз 38 ҳазор муҳоҷир ниёз дорад. Вазорати кишоварзии Федератсияи Русия таъкид кард, ки айни замон муҳоҷирон метавонанд ба кишвар танҳо бо ҳавопаймо ба кор биёянд, ки ин арзиши интиқоли онҳоро ба маротиб боло мебарад.

Агар интиқоли як муҳоҷир тавассути ҳавопаймо 80 ҳазор рублро ташкил диҳад, пас омадан бо қатора ин рақамро то 12 ҳазор коҳиш медиҳад. Ташкили интиқоли коргарон тавассути роҳи оҳан бояд вазифаи дарёфти захираҳои меҳнатии корфармоёнро ба таври назаррас сабук мекунад.

Муҳоҷирон аллакай бархе корҳои кишоварзиро пазмон шуда буданд, аммо ҷамъоварии фаоли ҳосил аз нимаи моҳи июл оғоз хоҳад шуд ва хоҷагиҳои деҳқони ба чинакчиён, ҷобаҷогузорон ва дигар коргарон ниёз доранд.

ҶСК “Роҳи оҳани Русия ” хабар дод, ки онҳо омодаанд интиқоли шаҳрвандони хориҷиро барои кор дар Русия таъмин кунанд, аммо барои ин бояд муштарӣ барои ҳамлу нақл интихоб карда шавад, ки баъдан боз шартнома баста мешавад.

Кумаки 25 млн долларии БОР ба Тоҷикистон барои хариди воксин

Аз ҷониби
shukhrat
-
0

Бонки осиёии рушд ба Тоҷикистон барои харидории воксин 25 млн доллари амрикоӣ кумак мекунад.

Бино ба иттилои хабаргузории “Форс”, Бонки осиёии рушд барои хариди воксин ва тақвияти потенсиали Тоҷикистон дар заминаи иҷрои барномаи эмгузаронии шаҳрвандон ба маблағи 25 млн доллар кумак мекунад.

“Воксинаҳои зидди коронавирус ҳаёти мардумро наҷот медиҳанд ва барои беҳбуд бахшидани иқтисодиёт дар Тоҷикистон ва дигар кишварҳо ҳаётан муҳим мебошанд”,- гуфт Масасого Асакава, раиси Бонки осиёии рушд.

Бино ба гуфтаи ӯ, ба воситаи ин лоиҳа ва ҳамкориҳои зич бо шарикони рушди Тоҷикистон, Бонки осиёии Рушд бори дигар уҳдадории худро барои кумак ба ин кишвар барои пешгирӣ аз паҳншавии бемории ҳамагир ва ҳарчи зудтар баргаштан ба ҳолати оддиро таъйид мекунад.

Гуфта мешавад, ки лоиҳаи мазкур татбиқи барномаи миллии эмгузаронии Тоҷикистонро дастгирӣ мекунад. Дар чорчӯби он барои харидан ва таҳвили тақрибан 3 миллион дозаи воксина бо лавозимот барои беш аз 1,3 миллион нафар, тақрибан 14 дарсади аҳолии Тоҷикистон сармоягузорӣ хоҳад кард.

Ҳукумати Тоҷикистон нақша дорад, ки тақрибан 62,5 дарсади аҳолии худро, ки синнаш аз 18 боло аст, эм кунад.

Роҳбарони Русия ва Амрико гуфтанд, ҳаргиз набояд вориди ҷанги ҳастаӣ шуд

Аз ҷониби
shukhrat
-
0

Раисони Федератсияи Русия ва Амрико пас аз мулоқот бо якдигар дар Женеваи Шветсария дар баёнияи муштараке бар оғози гуфтугӯҳои дуҷонибаи стратегӣ дар ояндаи наздик ва назорати силоҳи ҳастаӣ таъкид намуданд.

Тибқи гузориши хабаргузории “Форс” Владимир Путин, раисҷумҳури Русия ва Ҷо Байден раисҷумҳури Амрико дар ин баёния хотирнишон карданд, ки Иёлоти Муттахидаи Амрико ва Русия то кунун нишон додаанд, ки ҳатто дар даврони пуртаниш метавонанд дар ҳадафҳои муштараки қобили пешбинӣ дар ҳавзаи роҳбурди, коҳиши хатари даргириҳои низомӣ ва таҳдиди ҷанги атомӣ пешрафт кунанд.

Путин ва Байден дар ин баёния ба тамдиди паймони старти ҷадид миёни Русия ва Амрико ишора карда афзуданд, ки тамдиди ин паймони намунавӣ аз аҳду паймони ду кишвар дар заминаи назорати силоҳи атомист.

Раисони ҷумхури Русия ва Амрико дар идома бо таъкид бар инки ҷанги ҳастаӣ ғолиб надорад ва ҳаргиз набояд вориди чунин ҷанге шуд.

Инчунин қайд карданд, ки мутобиқ бо ҳадафҳои муштарак, Амрико ва Русия дар ояндаи наздик як гуфтугӯи дуҷонибаи босубот ва роҳбурдиро оғоз хоҳанд кард.

Дар ҳамин ҳол Байден пас аз дидор бо Путин дар як нишасти хабарӣ эълом кард, ки беҳбуди равобит ва ҳамкориҳо миёни Амрико ва Русия натанҳо ба нафъи ду кишвар, балки ба нафъи ҳамаи кишварҳои ҷаҳон аст.

Ёдовар мешавем, ки музокироти Владимир Путин раисҷумҳури Русия ва Ҷо Байден раисҷумҳури Иёлоти Муттаҳидаи Амрико рӯзи 16 июн баъд аз зуҳр дар Женева баргузор шуд ва барои гуфтугӯ байни раисҷумҳури Русия ва Амрико на камтар аз 5 соат ҷудо шуда буд.

Дар ин фурсат ин ду роҳбар як қатор масоили мубрам, аз ҷумла мушкилоти мубрами муносибати Русия ва Амрикоро баррасӣ карданд.

Иддаои як шарҳванди Қирғизистон: марзбонони тоҷик маро боздошт карда, пуламро рабуданд

Аз ҷониби
shukhrat
-
0

Бино ба гузориши расонаи қирғизии “24.kg” 15 июни соли ҷорӣ, ҳомии ҳуқуқ, Гулгаки Мамасалиева шаҳрванди Қирғизистон дар ноҳияи Лейлеки вилояти Ботканд аз ҷониби низомиёни тоҷик боздошт шудааст. Худи вай ин хабарро ба хабаргузорӣ тасдиқ кардааст.

Ба гуфтаи худи Гулгаки, ин ҳодиса рӯзи 15 июн, соати 19.00 ба вақти маҳаллӣ дар минтақаи Эски-Оочуии рустои Кулундинск рух додааст.

Ин шаҳрванди Қирғизистон ба хабаргузории “24.kg” гуфта, ки марзбонони тоҷик ӯро ҳангоми убур аз назди постгоҳ ба муддати якуним соат боздошт карда, борхалтаҳои ӯро тафтиш карданд. Ӯ иддао мекунад, ки марзбонони тоҷик аз 1000 суми қирғизиро аз борхалтаҳои ӯ рабудаанд.

Ҳамчунин иддао карда, ки марзбонон ба наздиконаш занг зада барои раҳоияш 1000 доллар талаб кардаанд. Аммо то ҳол дар ин маврид шарҳи расмии ҷониби Тоҷикистону Қирғизистон нашр нашудааст. Ва ин ҳам дар ҳолест, дирӯз 16 июн раисони вилоятҳои Суғду Бодканд дар чорроҳаи ҷамоати Чоркӯҳи шаҳри Исфара гуфтушунид доир намуданд.

Гуфта мешуд, ки дар мулоқот сари масъалаҳои муҳиме, ба монанди тақсими оби полезӣ дар Маркази обтақсимкунии “Головной” ва “Хоҷабақирғон”, сохтмони иншоот дар минтақаҳои баҳсии марзӣ, боздошти сокинону чорвои онҳо баҳсу баррасӣ сурат гирифта, ҷонибҳо дар ин масоил ба тавофуқ расиданд.

Дабири кулли СММ аз коҳиш ёфтани ҳаҷми интиқоли пули муҳоҷирон нигарон аст

Аз ҷониби
shukhrat
-
0

Дабири кулли Созмони Милали Муттаҳид Антонио Гутерриш дар паёме бахшида ба рӯзи байналмилалии интиқоли оилавӣ, аз буҳрони эҳтимолии оилаҳои муҳоҷирон изҳори нигаронӣ кард.

Ба навиштаи хабаргузории “Спутник” Гутерриш таъкид намуд, ки бисёре аз таҳлилгарон чунин мешуморанд, ки буҳрон ҳангоми пандемия метавонад ба интиқоли маблағҳо ва оилаҳое, ки ба онҳо такя мекунанд таъсири манфӣ мерасонад.

Дабири кулли Созмони милал аз он изҳори хӯшҳолӣ кард, ки интиқоли маблағҳо хеле устувор ва бо эътимод аст. Аммо тибқи омори Бонки ҷаҳонӣ интиқоли пул ба кишварҳои бо даромади кам ва миёна ҳанӯз ҳам дар соли 2020 1,6 дарсад коҳиш ёфта он ба 540 миллиард доллар расид.

Инчунин дабири кулли СММ қайд кард, ки сабабҳои зиёде вуҷуд доранд, ки чаро интиқолҳо бештар коҳиш наёфтанд. Якеаш ин аст, ки муҳоҷирон эҳтиёҷоти оилаҳои худро тавассути кам кардани истеъмоли шахсӣ ва истифода аз пасандозҳои худ афзалият медиҳанд.

Гутерриш дар идомаи суҳбаташ афзуд, дар оянда мо бояд саъю талоши худро барои дастгирӣ ва муҳофизати муҳоҷирон идома диҳем тавре, ки дар давраи пандемияи “Covid-19” маълум гашт дар пешниҳодоти хадамотӣ ва фаолияти иқтисодӣ дар маҷмуъ чунин нақши асосӣ ва муҳим доранд.

1...485486487...660саҳифаи 486 аз 660

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
scattered clouds
18.7 ° C
18.7 °
18.7 °
45 %
1.6kmh
32 %
Mon
18 °
Tue
31 °
Wed
32 °
Thu
34 °
Fri
36 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст