Дар шабакаҳои иҷтимоӣ баҳсҳо атрофи иқдоми нав — муҷбур кардани ронандагони микроавтобусҳо ба истифодаи дастгоҳҳои пардохти ғайринақдӣ (POS-терминалҳо) шиддат гирифтааст.

Корбари фейсбук бо номи Али Ализод ин тасмимро “зарбаи сахт ба кори ронандагон” унвон карда, гуфтааст, ки аз ронандагон талаб мешавад аз ҳисоби шахсии худ POS-терминалҳоро бо нархи 2800 сомонӣ харидорӣ намоянд ва ҳар моҳ 900 сомонӣ барои хидматрасонӣ пардохт кунанд. Ба гуфтаи ӯ, чунин “навоварӣ” на танҳо ронандагонро зери фишор мегузорад, балки барои мусофирон низ нооромиву нороҳатиҳо меорад.

Дар ҳамин замина, дар шабакаҳои иҷтимоӣ баҳси дигаре низ сабт шудааст: як мусофир ҳангоми сафар ба ронанда шикоят кардааст, ки ӯро маҷбур карданд роҳкиро танҳо бо пули нақд супорад, дар ҳоле ки мусофир талаб дошт, ғайринақдӣ пардохт кунад.

Мутахассисон мегӯянд, ки барои ҷорӣ кардани чунин иқдом бояд имкониятҳои техникӣ ва шароити воқеии иқтисодии ронандагон ва мусофирон ба назар гирифта шавад, вагарна чунин навоварӣ метавонад ба ҷойи осон кардани равуои мардум, мушкилоти нав эҷод кунад.

Қарор аст, то миёнаҳои моҳи сентябр ҳамаи ронандагони нақлиёти ҷамъиятӣ (микроавтобусҳо) дар шаҳри Душанбе ба пардохти ғайринакдӣ гузаранд ва дар дохили мошинҳои худ дастгоҳҳои пардохти ғайринақдӣ (POS-терминалҳо ё валидаторҳо) насб кунанд.

Вазорати корҳои дохилии Тоҷикистон аз як ҷинояти куштани кӯдаки 6-сола тавассути падарандар хабар дод.

Ин ниҳод рӯзи сешанбе, 2-юми сентябр дар сомонааш хабар дод, ки кормандони ШВКД-2 дар н.Сино Бахтиёри Намоз, сокини 33-солаи ноҳияи Ҷалолиддини Балхиро бо гумони даст доштан дар қатли писари ҳамсараш дастгир карданд.

Вазорат мегӯяд, марди боздоштшуда дар содир намудани ҷинояти “аз беэҳтиётӣ ба марг расонидани кӯдаки хурдсол” гумонбар дониста мешавад. 

“Номбурда санаи 22-юми августи соли ҷорӣ, дар кӯчаи Ф.Муҳаммадиев Назаров С., 6-сола, ки фарзанди ҳамсараш мебошад, лату кӯб намуда, ба таври маҷбурӣ маҳсулоти тамокуро (нос) ба даҳони кӯдак андохтааст. Дар натиҷа ноболиғ Назаров С., дар роҳ ба сӯи беморхона ба ҳалокат расид.”, омадааст дар шарҳи хабар.

Вазорати корҳои дохилии Тоҷикистон Бахтиёри Намозро боздошт намуда, ӯ ҳоло дар ҳабси пешакӣ қарор дорад ва бар зидди ӯ бо моддаи 108-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишот идома дорад.

Ин бори аввал нест, ки ҳодисаҳои қатлу куштор аз ҷониби войлидан дар хонаводаҳои тоҷик сурат мегирад. Охири моҳи июли соли ҷорӣ хабари кушта шудани Хисрави 15-сола тавассути падараш, Парвиз Одинаве, сокини шаҳри Турсунзода ҳамаро такон дод. Пеш аз ӯ, 30-юми июни соли ҷорӣ Мадина Ҳалимова, сокини ноҳияи Фархор аз рашки зиёд 4 фарзандашоро дар дарё ғарқ карду кушт, ки он ҳам хеле дар байни ҷомеаи Тоҷикистон хабарсоз шуд.

Ҷомеашиносон бар ин назаранд, ки яке аз сабабҳои шиканҷа дар дохили хонаводаҳо ва ҳатто ба марг расондани фарзандон, ин тоб наовардани бузургсолон дар баробари мушкилоти ҳаёт аст. Аз ҷумла, мушкилоти оилавӣ, иқтисодӣ, фақру бекорӣ баъзе волидайнро ба он водор мекунад, ки қаҳру ғазаби худро болои зану фарзандон холӣ кунанд ва дар натиҷа, надониста даст ба ҷиноятҳои мудҳиш мезананд.