Субҳи имрӯз, 8-уми феврал Эмомалӣ Раҳмон, Президенти Тоҷикистон бо сафари серӯза озими вилояти Суғд шуд.

Тибқи иттилои АМИТ “Ховар” Президенти Тоҷикистон дар ин сафари худ дар кори “таъсиси боғу токзори нав, ифтитоҳи якчанд иншооти соҳаҳои маъмурӣ, иҷтимоӣ, корхонаву коргоҳҳои саноатӣ, марказҳои фарҳангию фароғатӣ” ширкат мекунад.

Ҳамзамон дар назар аст, ки Эмомалӣ Раҳмон бо гуруҳҳои алоҳидае аз мардум дидор ва суханронӣ кунад.

Ин дар ҳолест, ки дар гузашта борҳо таҷриба нишон додааст, ки аксар коргоҳу корхонаҳое, ки Эмомалӣ Раҳмон зимни сафарҳои худ ба шаҳру ноҳияҳо онҳоро ифтитоҳ карда буд, пас аз чанд рӯз аз фаъолият бозмонданд.

Гуфта мешавад, аксар корхона ва коргоҳҳое, ки Президент Эмомалӣ Раҳмон дар рафти ин сафари серӯзаи худ ба вилояти Суғд дар рафти таъсис ва ифтитоҳи онҳо ширкат мекунад, коргоҳу корхонаҳои хусусӣ буда, бо пули тоҷирону соҳибкорон сохта шудаанд.

Имрӯз 8-уми феврал раиси Кумитаи телевизион ва радиои Тоҷикистон Нуриддин Саид зимни нишасти хабарии ниҳодаш гуфт, ки ба “Гурӯҳи 44” барои гуфтани суханҳояшон дар телевизиони Бадахшон “эфир” дода намешавад.

Нуриддин Саид мегӯяд, ҳар иттилооте, ки таблиғгари сиёсати ҳукумат набошад ва бар хилофи манфиати миллӣ бошад, ҳаққи пахш кардани онро надорад. Ӯ дар мисоли “Гурӯҳи 44” гуфт, ки “ҳеҷ гоҳ эфирро ба чунин шахсиятҳо намедиҳанд”.

“Гурӯҳи 44” аз ҳисоби афроди ҷомеаи шаҳрвандии Вилояти Мухтори Кӯҳистони Бадахшон пас аз гиридиҳамоиҳои сокинони ин вилоят дар охирҳои моҳи ноябр дар шаҳри Хоруғ муштаракан барои ба эътидол овардани вазъ ташкил шуд ва ҳамчун ҳайати музокиракунанда аз тарафи мардум бо намояндагони ҳукумат дониста мешуд.

Давоми фаъолияти худ “Гурӯҳи 44” борҳо аз қонуншиканӣ аз ҷониби мақомоти маҳаллӣ ва сохторҳои қудратӣ хабар дода, дар ин робита онҳо ба раиси палатаи болоии Парлумон Рустами Эмомалӣ ва Раисҷумҳур Эмомалӣ Раҳмон муроҷиат карда буданд. Аз ҷумла онҳо дархост намуда буданд, ки вазъ зери назорат гирифта шавад, чунки мақомоти қудратӣ бо амалҳои худ сулҳу суботро дар вилоят ва кишвар зери хатар мегузоранд.

Дар пайи пахши наворҳои зиёд аз телевизион Бадахшон ва сиёҳ кардани чеҳраҳои саршиноси ин вилоят, “Гурӯҳи 44” бо муроҷиатҳои пай дар пай ва навиштани нома ба Кумитаи телевизион ва радиои Тоҷикистон хоста буд, ки ба онҳо иҷозат дода шавад то ним соат дар телевизиони Бадахшон суханҳои худро ба мардум бирасонанд.

Аммо Нуриддин Саид имрӯз ба хабарнигорон гуфт, номаи онҳо ба унвонии Кумита телевизион ва радиои кишвар нарасидааст ва агар ҳам мерасид ба онҳо иҷозати суханронӣ дода намешуд.

Амриддин Аловатшоев дар пайи шиканҷаи сахти мақомоти Тоҷикистон ду рӯз беҳуш хобидааст.

Амриддин Аловатшоев, яке аз раҳбарони мардуми Бадахшон, ки аз Маскав рабуда шуда буд, дар боздоштгоҳи муваққатии Душанбе мавриди шиканҷаи шадид қарор гирифта, беш аз ду рӯз дар ҳолати беҳушӣ қарор доштааст. Дар ин бора Алим Шерзамонов муовини раиси ПМТ дар саҳфаи фейсбукаш хабар дод.

“Бино ба иттилои расида, ду рӯз қабл Амриддин Аловатшоев мавриди шиканҷаи шадид қарор гирифта, дар пайи он беш аз ду рӯз дар ҳолати беҳушӣ қарор гирифтааст. Ӯ то ҳол ба адвокат дастрасӣ надорад ва ба ӯ ёрии тиббӣ низ расонида намешавад”- менависад Алим Шерзамонов.

То ҳол мақомот ба ин хабар вокуниш нишон надодааст.

Дар ҳамин ҳол “Pamir Daily News” дар истинод ба манобеи худ хабар медиҳад, ки Аловатшоевро охирҳои моҳи январ ба амакаш нишон додаанд, аммо амакаш пас аз суҳбат бо кормандони КДАМ дар бораи дар чӣ вазъият қарор доштани Амриддин чизе ба мардум ва расонаҳо намегӯяд.

Амриддин Аловатшоев, яке аз раҳбарони мардумии Бадахшон 11-уми январи соли ҷорӣ дар Русия боздошт ва ба Тоҷикистон оварда шуда буд. Мақомоти тоҷик то рӯзи 2-юми феврал боздошт ва ба Тоҷикистон истирдод шудани ӯро рад мекарданд.

Юсуф Раҳмон Додситони кулли кишвар дар нишасти матбуотӣ, ки рӯзи 2-юми феврал баргузор гардид гуфт, ки Аловатшоев аз соли 2018 дар пайгард қарор дошт ва бо дархости ҷониби Тоҷикистон боздошт ва истирдод шуд, аммо ӯ нагуфт, ки бар зидди Аловатшоев бар асоси кадом моддаи Кодекси ҷиноятии Тоҷикистон парванда боз шудааст.

Ин дар ҳолест, ки худи ҳамон рӯз, яъне 2-юми феврал Рамазон Раҳимзода, вазири корҳои дохилаи Тоҷикистон низ бо хабарнигорон нишасти матбуотӣ дошт, ӯ гуфт, ки Аловатшоев Амриддин бо дархости ҷониби Тоҷикистон боздошт ва Душанбе истирдод нашудааст, балки худи ӯ “аз Русия баргашт ва мо ӯро дастгир кардем, чунки нисбати ӯ барои ташкили гирдиҳамоӣ дар шаҳри Хоруғ парвандаи ҷиноятӣ оғоз шуда буд.”

Юсуф Раҳмон, Додситони кулли Тоҷикистон мегӯяд, нисбати Аловатшоев аз пеш парванда оғоз шуда буд ва дар пайгард қарор дошту бо дархости Тоҷикистон боздошт ва истирдод шудааст, аммо Рамазон Раҳимзода гуфтаҳои ӯро рад мекунад ва мегӯяд, ӯ дар пайгард қарор надошт, худи ӯ ба кишвар баргашт ва баъдан боздошт шуд. Инҷо кӣ ҳақиқатро мегӯяд номаълум аст.  

Наздикон ва нафароне, ки Аловатшоевро мешиносанд, мегӯянд, ки ӯ ҳеҷ гоҳ ба корҳои ҷиноӣ даст назадааст.

Амриддин Аловатшоев, дар миёни диаспораҳои сокинони ВМКБ дар Русия эътибори зиёд дорад. Ӯро марди дорои обрӯву эътибор ва ҳамеша омодаи дастгирии ҳамватанон медонанд.