Имрӯз дар рафти иҷлосияи ҳаштуми Маҷлиси миллии Маҷлиси Олии Ҷумҳурии Тоҷикистон аъзои Маҷлиси миллии кишвар барои боздошт ва ба ҷавобгарӣ кашидани Ширинзода Эраҷ, собиқ додраси Додгоҳи олии иқтисодии Тоҷикистон розигӣ доданд.

Имрӯз 17-уми декабр ин қарори аъзоёни Маҷлиси миллии кишвар, ки раҳбарии онро Рустами Эмомалӣ, писари бузурги раисҷумҳур Эмомалӣ Раҳмон бар дӯш дорад, бо пешниҳоди Юсуф Раҳмон, додситони кулли Тоҷикистон сурат гирифтааст.

“Дар ҷараёни иҷлосияи имрӯза пас аз баррасии пешниҳоди Прокурори генералии Ҷумҳурии Тоҷикистон аъзои Маҷлиси миллӣ ҷиҳати бекор карданидахлнопазирии судяи Суди Олии иқтисодии Ҷумҳурии Тоҷикистон Ширинзода Эраҷ Сифот, барои ба ҷавобгарии ҷиноятӣ кашидан ва ба ҳабс гирифтани ӯ ризоият доданд.”

Дар хабар гуфта намешавад, ки Ширинзода айнан ба кадом ҷиноят даст задааст, аммо Эмомалӣ Раҳмон бо як фармонаш чанд рӯз пеш ӯро аз мақомаш сабукдӯш кард ва сабаби барканорияшро содир намудани кирдоре мегӯянд, ки “шаъну эътибори судяро паст мезанад.”

Барканории ин додраси Додгоҳи олии иқтисодии кишвар дар ҳолест, ки худи Эмомалӣ Раҳмон Ширинзодаро соли 2019 бо медали “Хидмати шоиста” қадрдонӣ карда буд.

Пас аз мукофот гирифтани Ширинзода дар бораи “софдилона” кор кардани ӯ матлабе дар сомонаи Додгоҳи олии иқтисодии кишвар нашр шуда буд. Дар ин матлаб аз ҷумла чунин навишта шудааст:

“Ширинзода Эраҷ солҳои тӯлонӣ дар мақомоти судӣ софдилона ва поквиҷдонона  кор ва фаъолият  менамояд. Аз ин рӯ, Ширинзода Эраҷ барои фаъолияти босамар, сатҳи баланди дониши касбӣ, саривақт ва босифат баррасӣ кардани парвандаҳои судӣ, дуруст татбиқ намудани меъёрҳои моддӣ ва мурофиавӣ, саҳм доштан дар тарбияи ҳуқуқии шаҳрвандон ба чунин мукофот сазовор гардиданд.”

Ба ин монанд дар таърихи давлатдории Тоҷикистон даҳҳо мақомоти олӣ вуҷуд доранд, ки пас аз қадрдонӣ аз амалҳои “софдилона”-ашон аз мансабҳо барканор ва бархе зиндонӣ ҳам шудаанд.

Ҳукумати Тоҷикистон ширкати “Мармарӣ”-ро, ки дар кишвар ба парвариши чорво гӯшти мурғ машғул аст, барои 7 сол аз тамоми намуди андоз ва боҷи гумрукӣ озод кард.

Бино ба гузориши Радиои Озодӣ, созишномаи озод кардани ширкати “Мармарӣ” аз ҳама анвои андозҳо байни Ҳукумат ва масъулони ин ширкат моҳи сентябр ба имзо расидааст.

“Тибқи шартнома бо ҳукумат, моликони ширкати “Мармарӣ” аз пардохти андоз аз фоида, андоз аз истифодабарандагони роҳҳои автомобилгард, андози замин, андоз аз арзиши иловашуда дар раванди истеҳсол (кор ва хидматрасонӣ) ва таҳвили маҳсулот дар ҳудуди Тоҷикистон озод карда шудааст.”, омадааст дар хабар.

Дар баробари ин имтиёзҳо ширкати мазкур муваззаф шуда, ки “бо харҷи 25 миллион доллар шумораи говҳоро дар фермае дар ноҳияи Ёвон ба 3500 сар расонида, дар як сол 20 ҳазор тонна хӯроки чорво истеҳсол кунад. Дар маҷмааи паррандапарварии ноҳияи Данғара аз 2,7 миллион парранда дар як сол 5 ҳазору 86 тонна гӯшти мурғ омода намояд.”

Таҳқиқот нишон дода, ки ин ширкат ба Рустами Эмомалӣ, шаҳрдори Душанбе ва Раиси Маҷлиси миллии Маҷлиси Олии Тоҷикистон тааллуқ дошта, шахсони наздик ба ӯ ширкатро роҳбарӣ мекунанд.

Имтиёзҳои тиллоии Ҳукумати кишвар ба ин ширкат ва амсолаш дар ҳолест, ки солона дар Тоҷикистон даҳҳо ширкатҳои хурду бузург ба хотири анзодҳои ҳангуфт ва тафтишҳои зиёди мақомот фаъолияти худро қатъ мекунанд.

Ҷомеаи шаҳварвандии Бадахшон бо нашри як изҳорот гуфтааст, ки қонун барои ҳама як аст, омилини қатли се нафар ва захмӣ кардани чанд каси дигар дар Хоруғ бояд шиносоӣ гардида, муҷозот шаванд.

Ҷомеаи шаҳрвандии Вилояти Мухтори Кӯҳистони Бадахшон бо нашри изҳороти видеоӣ дар бораи ҳодисаҳои рӯзҳои 25-28-уми ноябри соли ҷорӣ дар ноҳияи Роштқалъа ва шаҳри Хоруғ аз камтаваҷҷуҳии мақомот ва поймол шудани ҳуқуқи шаҳрвандон интиқод кардааст.

Дар ин изҳорот гуфта мешавад, ки дар рафти амлиёти боздошт дар ноҳияи Роштқалъа бар иловаи қатли Гулбиддин Зиёбеков ду нафари дигаре низ аз сокинони вилоят маҷрӯҳ ва барои ҳамеша маълул шуданд.

Инчунин дар рафти багузории ҳамоишҳои эътирозии сокинон дар майдони Исмоили Сомонии шаҳри Хоруғ, ки мардум барои додхоҳӣ ба назди раҳбарияти вилоят ҷамъ шуда буданд, дар натиҷаи тирборони мақомот 17 нафар захӣ гардид, ки аз ин теъдод ду нафарашон ҳам дар ҳамон рӯзҳои аввал ҷони худро аз даст доданд.

Ҳамзамон дар ин изҳорот таъкид мешавад, ки “дар филми “Нерӯи қонун” фақат масъалаи ҷавобгарӣ барои латукӯби кормандони мақомотҳои қудратӣ ба роҳ монда шудаасту дар бораи ба ҷавобгарӣ кашидани ду нафар кушта шуда ва 15 нафар аз тири яроқи оташфишон захмӣ шуда, ягон гапу гузоре нест.”

Пеш аз тарки майдони марказии Хоруғ хостаҳои ҷомеаи шаҳрвандӣ ва мардум аз мақомот чунин буд:

1. Ҳодисаи қатли Гулбиддин Зиёбеков таҳқиқ ва омилони он ба ҷавобгарӣ ва муҷозот кардани ҷинояткорон;
2. Иштирокчиёни ҳамоишҳои эътирозӣ афв карда шаванд;
3. Баровардани низомиён ва блокпостҳои иловашуда дар ҳудуди шаҳри Хоруғ;
4. Дастрасӣ ба алоқаи молибӣ ва Интернет;
5. Аз кор сабукдӯш кардани Сардори Раёсати Кумитаи давлатии амнияти миллӣ дар ВМКБ.

Хостаҳои асосии намояндагони Ҳукумати Ҷумҳурии Тоҷикистон аз мардум дар он хулоса мешуд:

1. Роҳи дорои аҳамияти байналмилалӣӣ Қулма-Хоруғ-Душанбе бояд фавран кушода шавад;
2. Майдони Исмоили Самонии шаҳри Хоруғро мардум тарк намоянд.

Дар изҳорот таъкид мешавад, ки фаъолияти аперативӣ-ҷустуҷӯӣ фақат дар доираи талаботи Қонуни ҶТ “Дар бораи фаъолияти апреративӣ-ҷустуҷӯӣ” сурат бигирад. Ҳар касе, ки ҷиноят содир намояд, ӯро фақат суд ҷазо медиҳад, на мақомоти корҳои дохилӣ ва мақомоти КДАМ ва не мақомоти Прокуратураи генералӣ. Дар Тоҷикистон фақат суд ҳуқуқи ҷазо доданро дорад, на дигар мақомот.

Фаъолони ҷомеаи шаҳрвандӣ дар ин изҳороти худ ёдовар мешаванд, ки дар Тоҷикистон барои шикори харгӯш, оҳӯ ва моҳигирӣ иҷозатномаи расмиеро аз мақомоти махсус мегиранд, вале дар Вилояти Мухотори Кӯҳистон Бадахшон исонҳо арзиш надоранд ва онҳо бидуни ҳукми суд мепарронанд.