Нусрат Раҳимӣ, сухангӯи вазорати корҳои дохилаи Тоҷикистон дар суҳбат бо Аздо тв боз шудани парвандаи ҷиноятӣ алайҳи ҳамлаварони вазири тандурустии Тоҷикистонро рад накард.

Сухангӯи Вазорати корҳои дохила дар бораи тафсилоти парванда алайҳи ҳамлаварони Ҷамолиддин Абдуллозода, вазири тандурустӣ ва ҳифзи иҷтимоии аҳолии Тоҷикистон, ки аз онҳо Фарух, Фахриддин ва Зиёдалӣ Сафаровҳо (Сафарзодаҳо)-ҷиянҳои Эмомалӣ Раҳмон ном бурда мешавад, гап нозада, гӯширо қатъ кард.

Тибқи иттилои дарёфтӣ подполковники милиса Сафарзода Фахриддин Холмумин, сардори Шуъбаи Вазорати корҳои дохила дар Шаҳринав, ки яке аз ин ҳамлаварон дониста мешавад, дар баробари иттиҳоми авбошӣ бо сӯиистифода аз мақоми давлатӣ низ гумонбар дониста мешавад.

Пеш аз ин хабари латукӯби вазири тандурустии Тоҷикистон Ҷамолиддин Абдуллозодаро муовинаш Ғафур Муҳсинзода рад карда гуфта буд, ки вай дар сафар аст, вале касе ӯро бовар накард.

Хабари латукӯби вазири тандурстии Тоҷикистонро то ҳол мақомоти интизомии кишвар расман шарҳ надодаанд, вале ин хабар дар расонаҳои машҳури ҷаҳон бозтоби густарда ёфтааст.

Хабаргузории “Вашингтон пост” навишт, ки вазири тандурустии Тоҷикистонро наздикони Президент латукӯб карданд. “Вашингтон пост” менависад, ки агарчи ҳукумати Тоҷикистон омода нест дар мавриди гирифторони COVID-19 маълумоти дақиқеро ироа кунад, вале ҳамла ба вазири беҳдошти Тоҷикистон, гузоришҳо аз гирифтор шудани наздикони Раҳмону вуруди воксинҳои нав аз Амрико далели паҳншавии барзиёди ин бемории ҳамагир аст.

Дар расонаҳои форсизабонони Эрон ва Афғонистон низ ин хабар бо унвонҳои гуногун бозтоби густарда дошт. Хабаргузории донишҷӯёни Эрон “Isna” ин матлабро нашр кард, аммо каме баъдтар онро аз саҳифааш пок намуд.

Инчунин Ҳасан Аббосӣ, рӯзноманигори шинохтаи эронӣ дар саҳифаи Твиттериаш навишт, ки “Вазири беҳдошти бекифоят кутак хӯрд”. Ба монанди ин даҳҳо рӯзноманигору корбарони шабакаҳои иҷтимоӣ ин хабарро бознашр карданд.

Ҳамчунин хабари латукӯби вазири тандурустии Тоҷикистон дар расонаҳои арабӣ низ бозтоб ёфта, аксар корбарон бо тамасхур онро бознашр кардаанд. Шабакаи маъруфи “Ал-Арабия” дар барномаи вижае хабарро зери унвони “Вазир қиммати (ноуҳдабароияш)-ро пардохт мекунад” бознашр кард.

Хабаргузории биритониёии “MailOnline” низ хабарро нашр кардааст.

Қарор буд пеш аз латукӯб ҷаноби Ҷамолиддин Абдуллозода дар нишасти матбуотии ниҳоди зертобеаш ширкат кунад, вале натавонист ва ба ҷои вай муовини якуми ӯ Ғафур Муҳсинзода ин нишастро баргузор кард.

Ёдовар мешавад, ки 26-уми июл вазири тандурустии Тоҷикитсон ҷаноби Ҷамолиддин Абдуллозода аз сӯи хоҳарзодаҳои президент Эмомалӣ Раҳмон Фарух, Фахриддин ва Зиёдалӣ Сафаровҳо (Сафарзодаҳо) мавриди ҳамла қарор гирифт ва дар натиҷа ҷоғи вазир осеб дидааст.

Дар нимсолаи аввали соли ҷорӣ аз маҷмӯи 969 млн сомонӣ аз ҳама кам ба соҳаи маориф сармоягузорӣ шудааст.

28-уми июл Саъдӣ Қодирзода, раиси Кумитаи давлатии сармоягузорӣ ва идораи амволи давлатии ҷумҳурии Тоҷикистон, ки дар нишасти матбуотии ниҳоди зертобеаш суҳбат мекард, гуфт дар нимсолаи аввали соли 2021 дар соҳаи маориф 103 миллион сомонӣ сармоягузорӣ шудааст, ки нисбат ба дигар соҳаҳо камтар аст.

Ба гуфтаи ӯ,  то 1-уми июли соли ҷорӣ ба соҳаҳои гуногун дар Тоҷикистон 38,1 млрд сомонӣ сармоягузорӣ шудааст. Аз ин миқдор маблағ сармоягузорӣ ба бахшҳои энергетика (969 млн сомонӣ), нақлиёт (632 млн), тандурустӣ (148 млн), Хоҷагии манзилию коммуналӣ (160 млн), кишоварзӣ (105 млн сомонӣ), маориф (ҳудуди 103 млн) ва дигар соҳаҳои иқтисод равона шудааст.

Камтаваҷуҳии мақомот ба соҳаи маориф дар ҳолест, ки бештари мактабҳои кишвар аз набуди муаллим ва китобҳои дарсӣ танқисӣ мекашанд. Аз ҷумла рӯзи 27-уми июл Маҳдӣ Орифзода, муовини аввали раиси ноҳияи Мир Сайид Алӣ Ҳамадонии вилояти Хатлон дар нишасти матбуотиш гуфт, ки “норасоии китобҳои дарсӣ дар ноҳия зиёда аз 13 ҳазор мебошад.”

Ҳамзамон дар мактабҳои миёнаи тамоми 72 шаҳру ноҳияи Тоҷикистон тибқи иттилои вазорати маориф ва илми Тоҷикистон аҳудуди 2 ҳазору ду сад омӯзгор аз фаннҳои гуногун намерсад.

Ҳамзамон 28-уми июл Ширин Амонзода, вазирин меҳнат, муҳоҷират ва шуғли аҳолии Тоҷикистон низ аз норасоии китобҳои дарсӣ дар муассисаҳои таълимӣ ва касбии вобаста ба ин вазорат хабар дод.