Шаш тан аз маҳбусони фаластинӣ, ки дар зиндони Исроил нигаҳдорӣ мешуданд, бо кандани нақби зери заминӣ аз зиндон фирор карданд.
Шойгу барои муҳоҷирон дар Русия кор ёфт
Онҳое, ки мехоҳанд ба Сибир кӯчанд ва бо рушди он машғул шаванд, бо як қатор имтиёзҳо, аз ҷумла “Ипотекаи Сибирӣ”, таъмин карда мешаванд.
Ба гуфтаи Сергей Шоёгу, визири мудофаи Русия барои рушди Сибир вуруди муҳоҷирони корӣ ба ин минтақа мусоид мешавад, то онҳо дар сохтмони шаҳрҳои нави Сибир иштирок кунанд.
Сергей Шойгу дар мусоҳиба бо РБК, ки рӯзи душанбе нашр шуд, изҳор дошт: “Эҳтимолан барои татбиқ кардани лоиҳаҳои сохтмонӣ аз ҷумҳуриҳои собиқ шӯравӣ мо вуруди захираҳои меҳнатӣ бояд вуҷуд дошта бошад”, – таъкид кард Шойгу.
Ба гуфтаи ӯ, пас аз омадани одамони нав, дар ин қаламрав тиҷорат, хадамоти гуногун ба роҳ монда мешавад, ки боиси воридшавии боз ҳам бештари одамон ва густариши минбаъдаи бахши хизматрасонӣ мегардад.
Вай инчунин меафзояд, ки барномаи рушди Сибир аз хурӯҷи аҳолии ин минтақа пешгирӣ мекунад. Ва механизми ҷалби муҳоҷирон ба Сибир таҳия шавад. Бояд қарзҳои имтиёзнок дар доираи “Ипотекаи сибирӣ” фикр кард ва онро ҷорӣ кард.
“Мо дар бораи барномаи дарозмуддати рушди минтақаи Сибир дар тӯли даҳсолаҳо сухан гуфта истодаем, ки он бояд на танҳо ба хориҷшавии оҳолӣ хотима бахшад, балки ин иқдом барои ҷалби аҳолӣ ба Сибир баштар хоҳад шуд ва шароити беҳтарро фароҳам меоварад”, – изҳор дошт Сергей Шойгу вазири мудофиаи Русия.
Гуфта мешавад, ҳукумати Русия барои иҷрои пешниҳодҳои барномаи “Рушди Сибир” онро ҳамин тирамоҳ омода хоҳад кард. Дар барнома таъсиси марказҳои илмӣ, аз ҷумла рушди навини энергетика, истеҳсоли моторҳои барқӣ, маснуоти чӯбӣ, батареяҳо ва ғайраро дар бар мегирад, дар назар аст.
Пирӯзии “Истиқлол” бар “Равшан”-и Кӯлоб
Дастаи “Истиқлол”-и Душанбе дар давраи ҳаштуми Чемпионати Кока-Колаи Тоҷикистон бо дастаи “Равшан”-и Кӯлоб бозӣ кард.
Ин бозӣ, ки рӯзи 5-уми сентябр дар майдони марказии шаҳри Ҳисор баргузор шуда, бо ҳисоби 3-0 ба фоидаи “Истиқлол” анҷом ёфт.
Бино ба иттилои сомонаи ФФТ, пас аз ин муваффақият, “Истиқлол”-и Душанбе бо касби 42 имтиёз аз Хуҷанд 10 имтиёз пеш шуд.
Дар ин бозӣ голҳоро дар дақиқаи 13 ва 60-ум Манучехр Ҷалилов ва дар дақиқаи 80-ум Ислом Зоиров заданд.
Коҳиши интишори коронавирус дар Тоҷикистон
Вазорати тандурустӣ ва ҳифзи иҷтимоии аҳолии Тоҷикистон дар гузориши охирини худ, ки рӯзи 5 сентябр нашр шуд, аз коҳиши интишори коронавирус дар кишвар хабар дод.
Тибқи иттилои Вазорати тандурустӣ, дар давоми як шабонарӯзи гузашта дар саросари ҷумҳурӣ 21 ҳолати нави гирифторшавии шаҳрвандон ба вируси COVID-19 ба қайд гирифта шуда ва ҳеч ҳолати марг бо сабаби ин беморӣ сабт нагардидааст
“Дар маҷмӯъ, аз аввали бақайдгирии ин беморӣ дар кишвар то рӯзи 5 сентябр дар кишвар 16984 нафар гирифторони коронавируси нави COVID-19 ба қайд гирифта шуда, аз ин шумора то санаи зикргардида 16849 нафар (99,2%) шифо ёфта, дар маҷмӯъ аз ин беморӣ 124 нафар фавтидаанд”, омадааст дар хабари вазорат.
Барои пешгирии бемории ҳамагир аз кишварҳои дуру наздик дар чорчӯби барномаи башардӯстонаи Созмони ҷаҳонии беҳдошт – COVAX ба Тоҷикистон беш аз 2 млн воя воксини “AstraZeneca”-и Аврупо, “CoronaVac”-и чинӣ ва “Moderna”-и Амрико барои шаҳрвандони кишвар ройгон тазриқ мешавад.
Баррасии ҳамкориҳои Тоҷикистону Италия
Вазири корҳои хориҷӣ ва ҳамкориҳои байналмилалии Ҷумҳурии Италия Луиджи Ди Майо рӯзи 4-уми сентябр ба Тоҷикистон омад.
Луиджи Ди Майо бо Вазири корҳои хориҷии кишвар Сироҷиддин Муҳриддин мулоқот анҷом додааст.
Зимни мулоқот ҷонибҳо ба рушди ҳамкорӣ дар соҳаҳои сиёсӣ, тиҷоратӣ, иқтисодӣ, гуманитарӣ ва амниятӣ таъкид намудаанд.
Вазирони корҳои хириҷа вазъ дар Афғонистон ва минтақаро баррасӣ намуда, ба ягонагии равишҳо дар мубориза бо терроризм, ифротгароӣ, қочоқи маводи мухаддир, ҷиноятҳои фаромиллӣ ва дигар таҳдидҳои амниятӣ таъкид карданд.
Бино ба иттилои Вазорати корҳои хориҷии Тоҷикистон, ҷонибҳо омодагии худро барои идомаи тамосҳо ва машваратҳо дар ҳама сатҳҳо оид ба масъалаҳои мубрами ҳамкориҳои Тоҷикистону Италия ва минтақа изҳор намуданд.
Талаби баста шудани сафорати Покистон дар Тоҷикистон
Иддае аз фаъолони ҷомеаи мадании тоҷик дар шабакаи иҷтимоии 6-уми сентябр соли 2021, фаъолони мадани тоҷик аз Вазорати хориҷаи Тоҷикистон хостаанд, ки ҳамлаҳои шаби гузашта ба Панҷшерро маҳкум кунад ва сафорати Покистон дар Тоҷикистон баста шавад. Панҷшер пас аз суқути Кобул дар санаи 15-уми августи соли ҷорӣ ба дасти Толибон то кунун дар муҳосира ва тайи 10 рӯзи ахир мавриди ҳамла қарор гирифтааст. Ин вокуниши фаъолони мадании тоҷик низ пас шиддат гирифтани ҳамлаҳои нерӯҳои Толибон ва ахбори зидду нақиз дар бораи суқути Панҷшер ба вуҷуд омадааст. Пеш аз ин нерӯҳои Ҷабҳаи муқовимати миллии Афғонистон (ҶММА) дар Панҷшер иттилоъ дода буданд, ки дар байни нерӯҳои Толибон, ки ба ин вилоят ҳамла мекунанд, шаҳрвандони покистонӣ низ ҳузур доранд. Инчунин гузориш шуда, ки шаби гузашта тайёраҳои бидуни сарнишини покистонӣ ба Панҷшер ҳамла кардаанд.
Қонуни афв қабул шуд
Имрӯз, 6-уми сентябр Парлумони Тоҷикистон Қонуни афвро, ки чанде пеш Эмомалӣ Раҳмон онро ба Маҷлиси намояндагон фиристода буд, қабул кард. Дар ин бора Радиои Озодӣ хабар дод.
Гуфта мешавад, муовини додситони кулли Тоҷикистон, Дилшод Талбакзода тарҳро дар ҳузури вакилони Маҷлиси намояндагон муаррифӣ намуда, иброз дошт, ки қонуни мазкур зиёда аз 16 ҳазор нафарро шомил мегардад.
Инчунин Талбакзода таъкид дошта, ки қонуни афв барои касоне, ки бо иттиҳоми терроризм, баромадан ба зидди сохти конститутсионии кишвар, одамкушӣ ва таҷовуз ба номус маҳкум шудаанд, татбиқ намешавад.
Ҳамзамон миуовини додситони кул таъкид дошт, ки онҳое, ки ба ҳукми абад маҳкум шудаанд дар ин тарҳ ворид намешаванд. Муҳлати татбиқи қонуни мазкур ду моҳ гуфта мешавад.
Ахбори зидду нақиз дар бораи суқути Панҷшер
Забиҳулло Муҷоҳид, сухангӯи Толибон дар Сухангӯи Толибон дар ин конфронс таъкид карда, ки “ин дарра имрӯз комилан поксози шуд”. Аммо Алӣ Майсам Назарӣ ин иддаъои Толибонро радда карда гуфтааст: “Иддаъои душмани мутаҷовиз мабнӣ бар тасарруфи Панҷшер нодуруст аст.” Сухангуи Толибон ҳамзамон изҳор дошт, ки ҳаргуна музокира ва мусолиҳа бо Ҷабҳаи муқовимати Миллӣ ба раҳбарии Аҳмад Масъуд мунтафӣ (пазируфтанӣ нест) аст. Ин дар ҳолес, ки дирӯз Аҳмад Масъуд, раҳбари ҶММА бо нашри паёме дар саҳифаи Фейсбукии худаш аз баёнияи ҷамъе аз уламои Афғонистон ҷонибдорӣ карда ва хоҳони гуфтугӯ ва музокира бо Толибон шуда буд. Ба гуфтаи Алӣ Майсам, нерӯҳои муқовимати миллӣ дар қароргоҳҳо, ки аз пеш иҷод шуда буд, ҳузур доранд ва аз шаби гузашта то акнун ҷанг дар нуқоти мухталиф идома дорад. ادعای دشمن متجاوز مبنی بر تصرف پنجشیر نادرست است. نیروهای مقاومت ملی در قرارگاهها که از پیش ایجاد شده بود، حضور دارند و از شب گذشته تا اکنون جنگ در نقاط مختلف ادامه دارد. مردم افغانستان مطمین باشند که مقاومت تا رسیدن به آزادی و عدالت به نصرت خداوند ادامه می یابد. — National Resistance Front of Afghanistan (@nrfafg) September 6, 2021
Боздошти як тоҷик дар Русия бо гумони куштори зан
Додгоҳи ноҳияи Калинини шаҳри Санкт -Петербург муҳоҷири кории тоҷик, Ҷамшед Сулаймонови 42-соларо бо иттиҳоми қатли як зан боздшот кард.
Тибқи маълумоти расонаҳои русӣ, 28-уми августи соли ҷорӣ тафтишот нишон дода, ки Ҷамшед Сулаймонов дар ҳолати мастӣ бо як зани 39-сола, фурӯшандаи мағозаи қаннодии “Невские Берега” дар шаҳри Санкт -Петербург муноқиша ва сипас ҳамла карда, ӯро аввал буғӣ ва баъди он бо корд ба қафаси синааш зада куштааст.
Аксари расонаҳо дар бораи ҳувияти мақтул чизе нагуфтаанд, аммо хабаргузории “МКRU”-и шаҳри Санкт -Петербург навишта, ки ин зан шаҳрванди Узбекистон буда, маъшуқаи гумонбар будааст.
“Сулаймонов шароб нӯшида ба ҷои кори зан омад, пас аз чанде байнашон муноқиша сар зад. Мард ӯро ба қатл расонд. Як соат пас аз ҳодиса ҳамсоягони гирду атроф ҷасади хунолуди занро аз назди дари ҳоҷатхонаи мағоза пайдо карданд. Дар наздикии ҷасад ду ресмон мехобид. Тафтишот нишон дод, ки зан аввал буғӣ шуда, баъдан бо корд кушта шудааст.”- мегӯянд наздикони зан ба “MKRU”.
Мақоқмоти тафтишотии Сангт-Петербург гуфтаанд, ки Сулаймонов пас аз куштор аз хазинаи мағоза 8 ҳазор рубли русӣ гирифта аз ҷои ҳодиса фирор кард, “аммо баъд аз як рӯз ӯро кормандони оперативӣ дар фурӯдгоҳи Шереметевои Маскав ҳангоми кӯшиши парвоз ба Тоҷикистон боздошт карданд. Ӯ ба гуноҳи худ пурра иқрор шуд.”
Аммо то ҳанӯз назари наздикон ва ё гумонбар дастрас нест. Ва ангезаи аслии ин куштор аз забони худи гумонбар нақл нашудааст.
Гуфта мешавад, дар ҳолати исботи гуноҳ ин шаҳрванди Тоҷикистонро то 20 сол ҳукми зиндон таҳдид мекунад.
Рӯзи дарҳои боз дар Китобхонаи миллии Тоҷикистон
Имрӯз 03-юми сентябр дар Китобхонаи миллии Тоҷикистон бахшида ба муносибати 30-солагии Истиқлоли кишвар “Рӯзи китоб” ва “Рӯзи дарҳои боз” баргузор шуд. Дар ин бора АМИТ “Ховар” аз қавли масъулони Китобхонаи миллӣ хабар дод.
Дар ин рӯз аз шуъбаҳои гуногуни китобхона, аз ҷумла шуъбаи хидматрасонӣ ба муштариён, шуъбаи хидматрасонии библиографӣ, шуъбаи илмҳои дақиқ, шуъбаи адабиёти хориҷӣ, шуъбаи кӯдакон ва наврасон, шуъбаи матбуоти даврӣ, маркази тоҷикшиносӣ, ва ғайра китоб ва дастовардҳои Китобхонаи миллии Тоҷикистонро барои иштирокдорон ба намоиш гузоштанд.
Дар Тоҷикистон шуруъ аз соли 2007 ин ташаббус дар арафаи Ҷашни истиқлол дар Китобхонаи миллӣ доир мегардад. Гуфта мешавад, ҳадаф аз баргузории он ҷалби таваҷҷуҳи омма ба китоб ва китобхона аст.
Бо вуҷуди ҳамасола баргузор гардидани чунин намоишҳои китоб дар кишвар, нависандагон ва адибону донишмандон аз буҳрони бесаводӣ ва китобхон набудани қишри ҷавон ва дар умум сокинони кишвар шикоят мекунанд.
23-уми август дар боғи Рӯдакии кишвар низ намоиши китоб баргузор гардида буд. Дар намоиши мазкур муаллифон ва нашриёти кишвар 160 номгӯи китоб бо 25 ҳазор адад пешкаши дӯстдорони китоб намуда буданд. Аммо муаллифон аз кам будани харидорон изҳори нигаронӣ мекарданд.
Муаллифони китоб мегӯянд, бо заҳматҳои зиёд китоб таълиф мекунанд, вале харидор пайдо намекунем. Аммо коршиносон китоб нахаридани сокинони кишварро ба чанд омил рабт медиҳанд.
Ба назари онҳо, вазъияти сахти иқтисодии кишвар, ки дар натиҷа сокинон корҳои муносиб пайдо намекунанд ва даромади хубе ҳам на доранд аз иллатҳои асосии харидор пайдо накардани китобҳост. Аксари онҳое, ки дар раъси қудрат қарор доранд ва ё ба тиҷорат машғул ҳастанду даромади фаровонтаре доранд, ба китобхонӣ ва хариди китобҳо камтар таваҷҷуҳ мекунанд.
Шикояти муаллифон аз харидор наёфтани китобҳояшон дар ҳолест, ки баъзе омӯзгорон ва масъулони Вазорати маориф ва илми кишвар ҳамасола аз нарасидани китобҳои дарсӣ нигаронии ҷиддӣ мекунанд.
Ин дар ҳолест, ки чанде пеш Маҳдӣ Орифзода, муовини аввали раиси ноҳияи Мир Сайид Алӣ Ҳамадонии вилояти Хатлон дар нишасти матбуотиш гуфта буд, ки “норасоии китобҳои дарсӣ дар ноҳия зиёда аз 13 ҳазор мебошад.”
Соли гузашта низ аз ноҳияи Қубодиёни вилояти Хатлон гузориш шуда буд, ки дар як синф барои 30 талаба як китоб рост меояд.
Дар ҳамин замина Эмомалӣ Раҳмон дар суханронияш бахшида ба “Рӯзи дониш” 1-юми сентябр ба буҷети Вазорати маориф ишора намуда гуфт, “буҷети давлатии соли 2021 барои соҳаи маориф 5 миллиарду 597 миллион сомонӣ пешбинӣ гардидааст, ки ин нисбат ба соли 2020-ум 11,2 фоиз зиёд мебошад”.