Шумори муҳоҷироне, ки дар шашмоҳаи аввали соли 2020 аз Тоҷикистон бо ҳадафи кор ба хориҷа сафар кардаанд, 57 дарсад кам шудааст. Ин оморро Гулрӯ Ҷабборзода, вазири меҳнат, муҳоҷират ва шуғли аҳолии Тоҷикистон дар нишасти хабарии рӯзи 23 июл эълон кардааст.

Хонум Ҷабборзода гуфтааст, дар тӯли нимсолаи аввал беш аз 129 ҳазор шаҳрванди Тоҷикистон бо ҳадафи кор ба хориҷа сафар карданд ва ин омор назар ба ҳамин давраи соли гузашта беш аз 170 ҳазор нафар кам мебошад.

Гулрӯ Ҷабборзода ин ҳолатро бо пандемияи коронавирус дар кишварҳои мизбони муҳоҷирон ва баста шудани марзҳои кишварҳо рабт дод. Русия макони аслии кору даромади шаҳрвардони Тоҷикистон ба шумор меравад ва дар солҳои қаблӣ, бино ба ҳисобҳои ғайрирасмӣ, соле ҳудудан як миллион шаҳрванди Тоҷикистон дар ин кишвар дар ҷустуҷӯи кор қарор дошт. Ӯ гуфтааст, дар нимсолаи аввал беш аз 90 ҳазор шаҳрванди Тоҷикистон ба ватан баргаштанд. Вазири меҳнати Тоҷикистон нагуфтааст, ки дар ин давра барои коҳиши шиддати бекорӣ дар кишвар ба чи иқдомоте даст зада ва чи қадар ҷойҳои корӣ ташкил дода шудааст. Афзун бар ин дар сурати идомаи чунин шароит сарнавишти мардум ва хонаводаҳои тоҷик, ки тӯли ин 28 соли истиқлолият вобастаи Русия шудаанд чи хоҳад шуд?

Қаблан мақомот аз коҳиши интиқолҳои пулии муҳоҷирон ба Тоҷикистон ҳам хабар доданд. Рӯзи 22 июл мақомоти Бонки миллии Тоҷикистон хабар доданд, ки дар шаш моҳи аввали имсол муҳоҷирон ба Тоҷикистон 195 миллион доллар камтар пул интиқол додаанд, ки нисбат ба соли гузашта 14,8 дарсад камтар аст. Ҷамшед Нурмаҳмадзода раиси Бонки миллӣ он рӯз дар нишастӣ матбуотӣ гуфт, дар ин шаш моҳ муҳоҷирони корӣ ба кишвар 999 миллион доллар интиқол доданд. Тоҷикистон яке аз он кишварҳои дунёст, ки иқтисодаш сахт пойбанди пули муҳоҷиронӣ корӣ мебошад.

Як зани 45-сола аз ноҳияи Бобоҷон Ғафуров як зани 25-солаи ҳамин ноҳияро бо роҳи фиреб ва ғайриқонунӣ ба шаҳри Дубайи Иморати Муттаҳидаи Араб бурда онро ба танфурӯшӣ маҷбур месохтааст. Айни замон бо ҷурми одамфурӯшӣ гумонбар дониста аз ҷониби Вазорати корҳои дохилаи Тоҷикистон дастгир шуд. Дар ин бора торнамои ВКД хабар дод.

Ин зан қаблан ҳам бо моддаи 130 қими 2 КҶ Ҷумҳурии Тоҷикистон, яъне одамрабоӣ дастгир шуда буд, – омадааст дар хабар.

Шарҳи мақомот:

Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия зани 45-солаи сокини ноҳияи Б.Ғафуров, ки пеш бо моддаи 130 иловаи-1 қисми 2 Кодекси ҷиноятии Ҷумҳурии Тоҷикистон суд шудааст, бо гумони хариду фурӯши одамон дастгир карда шуд.
Номбурда моҳи марти соли 2019 дар ҳудуди шаҳри Хуҷанд, бо маслиҳати пешакӣ бо духтараш зани 27-солаи сокини ноҳияи мазкур, ҷавонзани 25-солаи сокини ҷамоати деҳоти Д.Холматови ноҳияи Б.Ғафуровро барои ба шаҳри Дубайи Аморати Муттаҳидаи Араб сафар намудан ва дар он ҷо ба фоҳишагӣ машғул шудан, ҷалб намудаанд.
Сипас, аз ҳисоби худашон чиптаи ҳавопаймо ба хатсайри «Тошкант-Дубай» омода карда, тавассути фурудгоҳи шаҳри Тошканти Ҷумҳурии Ӯзбекистон ба шаҳри Дубай интиқол дода, дар он ҷо шиносномаи миллӣ ва хориҷии ҷабрдидаро гирифта, ӯро дар асорати қарзии 15 ҳазор доллари амрикоӣ гузоштаанд.
Аз рӯи ҳодисаи мазкур тафтишот идома дорад.

Хуршед Зиёӣ, сардори Маркази тадқиқоти стартегии нaзди Ҳукумати Ҷумҳурии Тоҷикистон рӯзи 24 июл зимни нишасти матбуотии ниҳодаш гуфт, табиати Тоҷикистон ҳамагуна вирусро нобуд месозад, аз он ҷумла вируси COVID-19-ро.

“Нури ултрафиолети офтоби мо ҳама гуна навъи вирусро нобуд крада метавонад. Бисёр вақт мепурсанд, ки агар ҳама кор дар нури офтоб аст, пас чаро дар Арабистони Саудӣ вирусро маҳв карда натавонистанд? Ман он ҷо се сол ба ҳайси тарҷумон карда, метавонам бигӯям, ки осмони онҳо ҳамеша чангу ғуборолуд аст, ки ба паҳншавии нури ултрафиолет монеъа мешавад. Коронавирусро на гармӣ, балки маҳз нури ултрафиолет нобуд мекунад”, – иброз дошт  Хуршед Зиёӣ.

Ин андешаи Хуршед Зиёӣ, ки мегӯяд коронавирусро нури ултрафиолет нобуд месозад, борҳо аз ҷониби муҳаққиқон рад шудааст ва то ҳол ҳеч марказҳои тадқиқотӣ ва олимони вирусшинос онро тасдиқ накардаанд.

“Азия-Плюс” менависад, Зиёӣ бар ин назар аст, ки вируси COVID-19 дар Тоҷикистон ба қиёс аз дигар кишварҳо чандон фоҷеабор ва пурзарар набуд. Ӯ сари вақт андешидани чораҳои пешгирӣ аз ин бемориро аз ҷониби мақомот сабаби аслии камфоҷиа будани он донист. Ба назари ӯ тавсияҳои Ҳукумату Вазорати тандурустӣ сабаб шуд, ки ҷараёни фоҷеабори ин беморӣ пешгирӣ бишавад.

Ин мақомдор дар ҳоле аз зарари кам расондаи COVID-19 дар Тоҷикистон мегӯяд, ки чанде пеш Давлаталӣ Саид, муовини сарвазири Ҷумҳурӣ аз созмонҳои молии байналмилалӣ кумак хоста, гуфта буд, ки иқтисоди Тоҷикистон дар натиҷаи зарари зиёди COVID-19 дар ҳолати “форс-мажор” қарор дорад.