Як гурӯҳ аз сокинони ноҳияи Кӯҳистони Масчоҳ дар мавриди бемасъулиятии раиси ноҳия ва аз дигар ҳисоб ба манфиати худ ҷамъовардани маблағҳову сохтани хонаи бо ҳашамат шикоят кардаанд.

Ин гурӯҳи сокинон бо ирсоли аксҳо ба сомонаи хабарии “Бомдод” арз намуданд, ки раиси ноҳияи Масчоҳ Бобозода Хайруллои Бобо аввал ободониро аз худ оғоз намуда дар мавзеи Каргтӯдаи деҳаи Оббурдон дар даромадгоҳи маркази ноҳия қариб ним гектар заминро гирифта, хонаи замонавии дуошёна барои худ бунёд намудааст.

Сокинон мегӯянд, ки раиси нав тӯли як соли раисиаш дар ноҳияи Кӯҳистони Мастчоҳ ҳамагӣ як ҳоҷатхона сохтааст, ки “он ҳам нотамом монда, на ягон қоидаҳои санитарӣ дораду на таҷҳизоти равшанидиҳанда ва на дару на бомпӯши дуруст. Аҷибаш ин, ки дар ин ҳоҷатхона 62 ҳазор сомонӣ аз маблағҳои буҷаи давлат хароҷот карда аст.”

Ба навиштаи сокинон раиси ноҳияи ҳамагӣ 0,11 г. замини корами обӣ доштааст, вале ба таври расмӣ ягон тиҷорат надорад, чӣ гуна тавониста бо 2 ҳазор сомонӣ маоши раисиаш дар муддати камтар аз як сол хонаи дуошёна бисозад?

“Даромади солонааш тахминан 26 то 30 ҳазор сомонӣ мебошад, ки он барои бомпӯши хона мерасаду халос. Оё ин ҳайратовар нест?» –  навиштаанд, сокинони норозӣ.

Ҳамчунин сокинон дар мавриди то ҳол ба вазифаҳои холи таъин нашудан аз ҷониби Раиси ноҳия навиштаанд, «Бобозода Х.Б дар як вақт Раиси ноҳия, муовини аввали Раиси ноҳия, муовин оид ба корҳои идеология, мудири шуъбаи молия, раиси буҷаи идораи молия, раиси комиссия оид ба тақсимоти заминҳои наздихавлигӣ ва ғайра мебошад, чунки ин вазифахо ҳамааш вакант мебошанду ин вазифаҳо як сол боз ҳеҷ не ки харидори дилхоҳ пайдо кунанд.

“Дар шуъбаи кор бо кадрҳои дастгоҳи Раиси ноҳия ариза ва ҳуҷҷатҳои мукаммали 75 нафар мутахассиси болаёқат барои таъмин намудан ба ҷойи кор ба қайд гирифта шудаанд ва ин дар ҳолест, ки дар қайди мақомоти иҷроияи ҳокимияти давлатии ноҳия 26 воҳиди корӣ (вазифаи холӣ) ба қайд гирифта шудаанд. Ба ақл бар намеояд, ки аз ин 75 мутахассис дар давоми як сол 26 нафарашон лаёқат надошта бошанд, ки ба ин вазифаҳо таъин шаванд”,- омадааст, аз шикояти сокинон.

Сокинон ҳамчунин аз дағалӣ ва нописандии Бобозода ибрози нигаронӣ намудаанд, ки ӯ худро намояндаи Президент муарифӣ намуда, ба касе ҳарфи хуб намегӯяд, ҳатто таҳдид кардааст, ки касе берун аз ноҳия ариза фиристад, ӯро “мешиканад”.

Шикояткунадагон навиштаанд, ки “Агар ин гуфтаҳои мо дурӯғ ва ё туҳмат бошанд, бигзор Бобозода ба таври ВОКУНИШ бо далел, яъне як ба як расм, навор, номи иншоот ва дар кадом деҳа сохта шуданашро пешниҳод намояд”.

Гуфта мешавад, ки Бобозода Хайрулло Бобо 27 январи соли 2020 раиси ноҳияи Кӯҳистони Мастчоҳ таъйин гардид. Пеш аз ин ӯ раҳбарии шуъбаи молияи ҳукумати ин ноҳияро ба душ дошт ва пеш аз он дар Донишкадаи кӯҳӣ-металлургӣ дарс мегуфтааст.

То ҳол дар ин маврид вокунише аз ҷониби ҳокимияти иҷроияи маҳаллии ноҳияи Мастчоҳ дар расонаҳо нашр нашудааст.

Як сарбози тоҷик бо номи Ҳасанов Сафархон Ҳисайнович бедарак шудааст. Гуфта мешавад, номбурда рӯзи 25-уми декабри соли ҷорӣ аз хонаи худашон баромада ба қисми низомӣ рафтааст, вале то ҳол аз ӯ хабаре нест. Дар ин бора дар шабакаи иҷтимоии фейсбук баҳсҳои гарме шуруъ шудааст.

Модари ин сарбоз барои ҷустуҷӯйи фарзандаш аз сокинони кишвар кумак хостааст.

Ба гуфтаи модари сарбоз фарзандаш рӯзи 25-уми декабри соли равон аз хонаашон аз ноҳияи Фархор баромада, ба қисми низомии 0307, воқеъ дар ноҳияи Шаҳритӯс раҳсипор шудааст, вале тайи чанд рӯз аст, ки аз ӯ нишоне нест.

Модари сарбоз мегӯяд, фарзандаш рӯзи 25 декабр занг зада гуфтаааст, ки ба қисми низомӣ рафта расидааст, вале то ҳол аз ӯ дигар хабаре нест ва тамос ҳам нагирифтааст.

То ҳол назари масъулони қисми низомие, ки Ҳасанов С. онҷо адои хидмат мекард, дар ин маврид дастрас нест.

Ин бори аввал нест, ки дар Тоҷикистон сарбозҳо ба куҷое ғайб мезананд. Чанде пеш Радиои Озодӣ аз ғайб задани Иброҳим Абдузоиров, сокини 20-солаи ноҳияи Абдураҳмони Ҷомӣ, ки моҳи апрели имсол довталабона (ихтиёрӣ) ба артиш рафта буд, навишт, ки тӯли ҳафт моҳ аст, волидонаш ӯро ҷустуҷӯ доранд.

Ҳамчунин чанде пеш волидони Сироҷиддин Ятимов ва Қандилҷон Воҳидов аз он шикоят мекарданд, ки гӯё фарзандони сарбозашон ғарқ шуданду ҷасади онҳоро мақомот пайдо накардааст.

Тибқи иттилои расмӣ, Сироҷиддин Ятимов ва Қандилҷон Воҳидов, сарбозони қисми низомии нерӯҳои марзбонӣ дар ноҳияи Рӯшон рӯзи 30-юми сентябри имсол барои наҷоти як хонандаи мактаб худро ба дарё андохта ғарқ шуданд. Вале падари С.Ятимов дар сӯҳбат бо “Аздо тв” ин фарзияи моқомотро бо чанд далел рад карда ва шубҳанок хонда буд. Ӯ гуфта буд, ки ҳодиса на ба он шаклест, ки масъулони қисмҳои низомӣ мегӯянд.

Ба ҳамин монанд ҳодисаҳои зиёде дар қисмҳои низомии ҷумҳурӣ сурат мегирад, ки рӯз то рӯз адои хизмат намудани ҷавонон дар сафи Қувваҳои мусаллаҳро душвортар мекунад. Бадрафторӣ нисбати сарбозон дар қисмҳои низомӣ ба як мушкилии доимӣ табдил ёфта ва боис шуда, ки сокинон камтар майли хидмати ҳарбӣ дошта бошанд.

ИНЧУНИН, БИХОНЕД:

Ду сарбози ғарқшуда дар Тоҷикистонро чаро то имрӯз пайдо накарданд? (САДО)

Гадоев Мазҳариддин собиқ масъули шуъбаи ҳуқуқии ҲНИТ дигарбора равонаи зиндон шуд. Дар ин бора ба “АЗДО ТВ” яке аз аъзоёни паноҳбурдаи ҲНИТ дар Аврупо, Саидисоқ Бобоев хабар дод.

Ба гуфтаи Бобоев, Мазҳариддин Гадоевро баъд аз 4 моҳи озод шудан аз зиндон дигарбора боздошт намуда, ба 3 соли зиндон маҳкум кардаанд. Гадоев ҳанӯз соли 2015 дар пайи парвандаи пурсарусадои ҲНИТ барои 3 сол равонаи зиндон шуда буд. Вале баъд аз анҷоми муҳлат, бо сабабҳои номаълум ӯ 1 соли дигар дар зиндон нигоҳдорӣ шудааст.

Сабаби боздошти Гадоевро ба фаъолияташ дар солҳои 2010, ки имоми яке аз масҷидҳои ноҳияи Қубодиён будааст, рабт додаанд. Гуё ӯ дар масҷид ба наврасон дарси Қуръон дода, мардумро ба ифротгароӣ ташвиқ мекардааст. Ҳукми суди Мазҳариддин Гадоев дар додгоҳи шаҳри Бохтар хонда шудааст.

Ин бори аввал нест, ки аъзоёни собиқи ҲНИТ дубора пас аз озод шудан боз равонаи зиндон мешаванд. Пештар аз ин Юсупов Зайниддин, масъули бахши ҲНИТ дар н.Фархорро пас аз озод шудан боз ба як соли зиндон маҳкум кардаанд.

Ӯ дар соли 2015 дар пайи парвандаи пурсарусадои ҲНИТ барои 10 сол паси панҷара рафт ва моҳи феврали соли гузашта ба озодӣ баромада буд.

Ҳамин гуна чанде пеш дар Тоҷикистон Ҷалолиддини Маҳмуд узви собиқи Раёсати олии ҲНИТ-ро дубора барои 6 солу 8 моҳ равонаи зиндон карданд. Ӯ соле пеш бар асоси қонуни авф озод шуд.

Ҷалолиддин Маҳмуд моҳи феврали соли 2015 бо иттиҳоми ғайриқонунӣ нигоҳ доштани силоҳ дастгир ва ба 5 соли зиндон маҳкум шуда буд.

Агентии назорати давлатии молиявӣ ва мубораза бо фасод дар ҷумҳурии Тоҷикистон аз боздошт шудани як мақоми баландпояи ҳукумати шаҳри Душанбе бо иттиҳоми қаллобӣ хабар медиҳад.

Тибқи иттилоъи ин агентӣ шаҳрванд, Мухторов Беҳруз Муҳтоҷович, ки дар вазифаи сармутахассиси Раёсати сармоягузорӣ ва идораи амволи давлатии мақомоти иҷроияи ҳокимияти давлатии шаҳри Душанбе кор мекарда,  аз шаҳрванд Сониева Ш.М. 24 ҳазор сомонӣ пора гирифтааст.

Ба иддаои Агентӣ ин мансабдори зертобеи Шаҳрдорӣ, ки раёсаташро писарбузурги расиҷумуҳури кишвар Рустами Эмомалӣ бар уҳда дорад, аз шаҳрванд Сониева моҳи феврали соли 2019 бо роҳи фиреб ва суиистифода аз боварӣ, яъне тавассути музояда шахсӣ карда додани манзили истиқоматии коммуналии мақомоти иҷроияи ҳокимияти давлатии шаҳри Душанбе, маблағи 24.000 сомонӣ талаб карда гирифта аст.

Ҳамзамон Агентии зидди фасод  Мухторовро низ дар гирифтани 225.370 сомонӣ муттаҳам мекунад. Гуфта мешавад номбурда ба тарзу усули дар боло зикргардида, моҳи апрели соли 2019 аз шаҳрванд Қудратов Н.А. барои шахсӣ карда додани манзили истиқоматии коммуналӣ, ин маблағро гирифтааст.

Бино ба иттилои маркази матбуотии Раёсати мубориза бо фасод, нисбати Мухторов Б.М. Оиди ҳолатҳои мазкур бо моддаи 247 қисми 4 банди “б” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди анҷоми тафтиши пешакӣ барои моҳиятан баррасӣ намудан ба суд ирсол карда шуда аст. Дар ҳамин ҳол назари муттаҳам дар ин қизия ё вакили дифои ӯ маълум нест ва Агентӣ дар ин бора ҳеҷ ишора накарда аст.

Мушкилии фасод ва ришваситонӣ дар Тоҷикстон ба таври густурда доман паҳн карда, дар се даҳсолаи ахир, ки Тоҷикистонро Эмомалӣ Раҳмон раҳбарӣ мекунад, ба яке аз кишварҳои фасодзадаи дунё табдил шудааст.

Соли 2019 Тоҷикистон дар шохис (индекс)-и пазириши фасод, ки ҳамсола созмони Transparency International таҳия мекунад, дар миёни 180 кишвар мақоми 152-юмро касб кард. Тоҷикистон дар шохиси фасод бо кишварҳое чун Никарагуа, Мадагаскар ва Камерун ҳамҷивор аст.

Тайи тамоми солҳои кишвародории Эмомалӣ Раҳмон фасод аз мушкилии асосии кишвар буда, дар соли 2007 бо мақсади муқовимат бо фасод дар Тоҷикистон Оҷонсии назорати давлатии молиявӣ ва мубориза бо фасод таъсис дода шуд. Аммо коршиносон  бар ин назаранд, ки фаъолияти ин оҷонсӣ барои васеъ шудани доираи фасод бештар мусоидат мекунад.

Номи  Оҷонсии назорати молиявӣ ва мубориза бо фасод дар соли 2017 дар сархати расонаҳо бо расвоии бузурге ҷой гирифта буд, ки он замон 17 корманди ин ниҳод барои сӯистифода аз мақом зиндонӣ ва 40 нафар бо гумони даст доштан боздошт шуданд.

Агентии зидди фасод сари чанд вақт аз бозтошт шудани кадом омӯзгор ва ё корманди ҷамоат барои гирифтани ришва ва ҳангоми додани пора дастгир шуданаш хабарҳо нашр мекунад. Аммо ба андешаи коршиносон шикори чунин “моҳичаҳо” барои аз байн бурдани фасод дар кишвар муваффақ буда наметавонад ва танҳо барои хок пошидан ба чашми мардум аст, ки бигӯянд масъулон кор мекунанд.

Дар миёни мардум чунин гапҳое ҳам ҳаст, ки “об аз боло лой аст” ё барои аз байн бурдани фасод шикори наҳангони бузург лозим аст. Ба гуфтаи огоҳони умур, тамоми “наҳангҳои бузург” аз наздикону хешовандони расиҷумуҳаранд.

Ахиран Баҳром Иноятзода, раиси пешини шаҳри Кӯлоб ба 12 соли зиндон маҳкум шуд, коршиносон дастгиру зиндонӣ шудани ӯро ба интиқод аз қудои раисҷумҳур Бег Сабур рабт доданд.

Бек Сабур, қудои раисҷумҳур бо ин ки борҳо бо суистифода аз мақоми давлатӣ дар сархати расонаҳо қарор гирифт ва Хадамоти алоқа зери роҳбарии ӯ рукуд кард, ҳамоно дар мансаби сардори Хадамоти алоқа аз соли 2011 боқӣ монда аст.

Мирзоев Саидасрор Давлатович, роҳбари ҷамъияти тоҷикони Самара бо номи “Пaйванд” ва узви Шӯрои ҷамъиятии сафорати Тоҷикистон дар Русия, боздошт гардида, айни ҳол дар боздоштгоҳи муваққатии Толятти қарор дорад. Дар ин бора сомонаи “ТАҶИНФО” хабар дод.

Бино ба навиштаи ин сомона, шаҳрвандии роҳбари ҷамъияти тоҷикони Самараро ҳанӯз 23-юми декабри соли ҷорӣ додгоҳи шаҳри Самара бекор кардааст. То ҳол маълум нест, ки Мирзоев Саидасрор бо кадом иттиҳом боздошт шудааст.

Аммо як манбаъ бо шарти зикр нашудани номаш ба “Аздо тв” гуфт, “бо эҳтимоли зиёд як гурӯҳи муҳоҷирони аз миллатҳои гуногун ва ҳатто баъзе тоҷикон ба мақомоти Самара пора додаанд то Саидасрорро дастгир ва аз Русия ихроҷ кунанд”.

Дар идома манбаи “Аздо тв” гуфт, ҳукми иҷборан ихроҷ намудани Мирзоев аз Русияро додгоҳ содир кардааст, вале ҳимоятгари ӯ ба ин қарор розӣ нашудааст. Мирзоев Саидасрор дар байни муҳоҷирон бо лақаби “Ганс” маъруф буда, яке аз бузургтарин бозорҳои шаҳри Самараро идора мекард.

Ёдовар мешавем, ин бори аввал нест, ки раҳбарони ҷамъияти тоҷикон дар шаҳрҳои Русия боздошту ҳабс ва ё ихроҷ мешаванд. Пештар аз ин Каромат Шарипов раҳбари “Ҷунбиши муҳоҷирони тоҷик” соли 2017 аз ҷониби мақомот боздошт гардида, шаҳрвандияш бекор карда шуд. Баъдан ӯро ба Тоҷикистон истирдод карданд. Роҳбарони ҷамъияти тоҷикони Владимир ва Перм то ҳол дар маҳбас қарор доранд