Президенти Ассотсиатсияи байналмилалии федератсияҳои варзиши сабук Себастян Коу ишора намуд, ки бояд гурзандози тоҷик Дилшод Назаров аз мақомаш истеъфо диҳад.

Ин нуқтаро Себастян Коу дар як нишасти матбуотӣ пас аз ҷаласаи Шӯрои ҷаҳонии варзиши сабук ишора намуд.

“Дар гузашта ҳолатҳое буданд, ки роҳбарони федератсия ё мансабдорони баландпоя, ки қоидаҳои зидди допингро вайрон карданд, баъдан истеъфо доданд. Аз ин рӯ, бояд интизор шуд, ки ин варзишгар ба ҳайси раҳбари федератсияи маҳаллӣ фаъолият нахоҳад кард”, – гуфт Коу.

Ёдовар мешавем, ки Дилшод Назаровгурзандози тоҷик ва қаҳрамони Бозиҳои олимпии соли 2016 дар Рио-де-Жанейро барои истифодаи моддаи мамнӯъ барои ду сол аз иштирок дар мусобиқаҳо  маҳрум карда шуд. Дар ин бора дар сомонаи расмии ниҳоди мустақил бар зидди падидаҳои манфӣ дар варзиши сабук (AIU) хабар дода шуд.

Гуфта мешавад, ки натиҷаҳои варзишгар, ки тӯли ду сол аз 29 августи 2011 то 29 августи соли 2013 нишон дода буд, бекор карда мешаванд. Ҳамчунин Назаров аз  24 сентябри соли 2019 сар карда, барои ду сол аз мусобиқаҳои варзишӣ маҳрум карда шуд.

Дилшод Назаров, ягон медали олимпии худро аз даст надод, аммо иштирок дар Олимпиадаи соли 2020 дар Токиоро, ки моҳи июли соли 2021 оғоз мешавад, аз даст дод.

Қаҳрамони олимпӣ  дар вокуниш ба ин тасмим гуфт, ки ҳама талошҳояш барои рафъи иттиҳомот натиҷа надоданд ва мақсади ягона дур сохтани ӯ аз Олимпиадаи Токиё буд, зеро дар майдон ҳарифе пурқувваттар аз ӯ набуд.

Вазири умури хориҷаи ИМА Энтони Блинкен гуфт, ки амалҳои Чин ба низоми асосёфта бар қавонине, ки суботи ҷаҳониро кафолат медиҳанд, таҳдид мекунад.

Дар ҳоле, ки Пекин таҳдид кард алайҳи дахолати Вашингтон чораҳои қатъӣ хоҳад дид. Ин гуфтумонҳо дар ҷараёни оғозёбии як нишасти дурӯза дар Аляска байни вазоратҳои хориҷии ду кишвар сӯрат гирифт.

Дар ин нишаст Блинкин аз нигаронии амиқи Амрико дар бораи аъмоли Чин дар Шинҷон хабар дод ва ҳамзамон гуфт, ки Вашингтон Пекинро дар содир кардани “наслкушӣ” алайҳи мусалмонони уйғур, инчунин дар Ҳонгконг ва Тайван, “ҳамлаҳои” Электронӣ алайҳи Иёлоти Муттаҳида айбдор медонад. Ҳамзамон Блинкин Чинро ба фишори иқтисодӣ алайҳи муттаҳидонаш гунаҳкор донист.

Ин иттиҳомот дар ҳузури дипломати аршади Ҳизби комунист Чин Янг Жиечӣ ва вазири корҳои хориҷӣ Ван И садо дод. Дар ҳамин ҳол Ҷейк Салливан, мушовири амнияти миллии Ҷо Байден дар маросими ифтитоҳи ин нишаст таъкид кард, ки Иёлоти Муттаҳида дар пайи “муноқиша” бо Чин нест, балки аз рақобати шадид истиқбол мекунем.

Дар Аляска гуфтугӯҳо байни котиби давлатии ИМА Энтони Блинкен ва мушовири амнияти миллии Кохи Сафед Ҷейк Салливан ва аз тарафи дигар мансабдори аршади Чин Янг Жиечӣ ва вазири корҳои хориҷӣ Ванг И идома доранд.

Аляска барои се нишасти тӯлонӣ, ки то субҳи рӯзи ҷумъа идома хоҳад ёфт, ҳамчун қаламрави бетараф интихоб шудааст.

Тибқи гузориши “Алҷазира” як мақоми амрикоӣ ба хабарнигорон гуфт, ки “ин нишастҳо аввалин қадамҳо барои дарки манофеъ, аҳдоф ва авлавиятҳои мо мебошад.”

“Мо дар раванди таҳияи стратегияи ҳамаҷонибаи Чин қарор дорем”, ин мулоқот “танҳо оғози ин раванд аст.” Ин макоми амрикоӣ дар суҳбат бо хабарнигорон изҳор дошт, ки “мо баъзе масъалаҳои мушаххасеро пешниҳод хоҳем кард, ки ба назари мо Пекин бояд барои тағйири мавқеъияти худ коре бояд анҷом диҳад”.

Кремл дар равобит бо ИМА ҳамеша ба беҳтарин натиҷа умед мебандад, аммо худро барои бадтарин шароити муносибатҳо омода мекунад,- гуфт котиби матбуотии президенти Русия Дмитрий Песков дар посух ба суоли хабарнигорон дар бораи эҳтимоли шуруъи “ҷанги сард” -и нави кишварҳо.

Тибқи гузориши “РИА Новости” гуфтаҳои Песков дар ҳоле садо дод, ки пештар Президенти ИМА ба як рӯзноманигор, ки оё Путин “қотил” аст, посухи мусбат дод.

Вақте, ки барандаи маъруфи телевизиони “ABC” Ҷорҷ Стефанопулос ҳангоми муколамаи рӯзи чоршанбе бо суоли мустақим аз Байден пурсид, ки оё вай президенти Русияро “қотил” мешуморад, Байден дар посух гуфт: “Бале, ман чунин мешуморам.”

Дар худи ҳамон мусоҳиба президенти ИМА гуфт, ки Путин ҷуброни “дахолат” -ро дар интихоботи солҳои 2016 ва 2020 пардохт хоҳад кард, ки онро Маскав ҳамеша рад мекунад.

Дар навбати худ Владимир Путин пас аз изҳороти шадиди президенти Амрико Ҷо Байден дар паёмаш ба ӯ пешниҳод кард, ки гуфтугӯи ошкоро ва оммавии ду раҳбар рӯзи ҷумъа ё душанбе ташкил карда шавад.

Дар посух Кохи Сафед гуфт, ки президентҳо аллакай сӯҳбат кардаанд ва ИМА бо раҳбарияти Русия дар тамос аст. Дар ҳоле, ки Кохи Сафед тасдиқ кард, ки Байден аз Путинро “қотил” номиданаш пушаймон нест.

Сухангӯи “Кремл” Димтирий Песков гуфт, ки дар гуфтугӯи ду раҳбар метавонист мавзӯъи иттиҳомоти беасоси Вашингтон алайҳи Маскав матраҳ шавад. Песков афзуд, ки технология имкон медиҳад, ки ин гуфтугӯ аз тариқи алоқаи баста бо тарзи аланӣ сурат бигирад.

“Бо пахши зинда – азбаски изҳороти муайяне аз ҷониби оқои Байден дода шуданд, изҳоротҳо хеле бесобиқаанд ва ба хотири он нагузорем, ки ин изҳорот ба муносибатҳои бе ин ҳам бади дуҷонибаи Русия ва Амрико осеб расонанд. Президент Путин пешниҳод кард, ки ин вазъро ба шакли оммавӣ баррасӣ кунанд, зеро барои мардуми ду кишвар ҷолиб хоҳад буд.”

Пас аз изҳороти Байден, Вазорати корҳои хориҷии Русия сафираш дар Амрико Анатолий Антоновро барои машварат ба Маскав даъват кард. Вазорат гуфта, ки онҳо мехоҳанд аз “таназзули бебозгашт” -и муносибатҳо ҷилавгирӣ кунанд. Вашингтон гуфт, ки сафири Амрико дар Русия боқӣ хоҳад монд.