Нақшаи даъвати тирамоҳӣ ба сафи қувваҳои мусаллаҳ дар Тоҷикистон 100% иҷро гардидааст. Дар ин бора ба “Авесто” рӯзи 12 ноябр сардори Маркази матбуоти Вазорати мудофиаи Ҷумҳурии Тоҷикистон Фаридун Маҳмадализода хабар додааст.

Ба гуфтаи Маҳмадализода комиссариатҳои ҳарбии қариб ҳамаи вилоят, шаҳру ноҳияҳои кишвар нақшаи даъват ба артишро то 6 ноябр иҷро кардаанд.

“Сарфи назар аз он, ки дар ҳама минтақаҳо нақшаи даъвати ҳарбӣ пурра иҷро шудааст, Комиссияи ҷумҳуриявӣ оид ба ташкили даъвати артиш ва комиссияҳои дахлдор дар маҳалҳо фаъолияти худро идома медиҳанд”.

Ёдовар мешавем, ки даъвати тирамоҳӣ ба сафи қувваҳои мусаллаҳи Ҷумҳурии Тоҷикистон аз 1 октябри соли ҷорӣ оғоз ёфта, то 30 ноябр идома хоҳад кард. То имрӯз чандин аксу наворҳо дар шабакаҳои иҷтимоӣ ва расонаҳо аз қонуншикании кормандони Комиссариятҳои ҳарбии Тоҷикистон нашр мешавад.

Баъд аз ҷанги шаҳрвандӣ дар Тоҷикистон ҷавононро барои ба хидмати ҳарбӣ бурдан аз роҳҳои зуроварӣ истифода мешавад, ки борҳо ин масъала дар сатҳҳои гуногун мавриди интиқод қарор гирифта буд.

Аммо масъулони Комиссариятҳои ҳарбӣ ҳаргиз нашудааст, ки фарзанди мансабдореро барои хидмат дар сафи Қувваҳои мусаллаҳи кишвар даъват ва ё “Облава” карда бошанд. Дар чунин мавсимҳо одатан фарзандони мардуми фақиру бе “тағо” дуздида мешаванд.

Аз ҷумла аз чанд шаҳру ноҳияҳои кишвар дар тамос ба “Аздо тв” дар бораи “Облава” баъд аз 100% иҷро гардидани даъват ба сафи қувваҳои мусаллаҳ гуфтанд. Ба гуфтаи ҳамсуҳбатони “Аздо тв” дар Шаҳринав, Ҳисор, Ваҳдат ва Бохтар ҷавонон аз ҷониби кормандони маҳаллии КДАМ “облава” гардида, ба комиссариятҳои ҳарбӣ равона мегарданд ва аз наздикони онҳо 20 ҳазор сомонӣ барои озод намуданашон талаб карда мешавад. Бисёри наздикони ин ҷавонон маҷбур шудаанд, то аз бонкҳо қарз бигиранд ва ё дороиҳои худро фурӯхта фарзандони худро наҷот диҳанд.

Пештар аз ин Маҳмурод Одинаев, муовини раиси ҲСДТ низ аз “облава” ва латукуб шудани писараш аз ҷониби кормандони комиссарияти ҳарбии шаҳри Ҳисор хабар дода буд.

Хадамоти фурӯши Шабакаҳои барқи шаҳри Душанбе бо иттиҳоми дуздидани зиёда аз 68 миллион сомонӣ маблағи барқ (150 миллион киловатт/соат) айбдор мешаванд. Прокуратураи генералии Тоҷикистон ба хотири таҳқиқи ин қазия дар сар то сари кишвар гурӯҳи махсус ташкил кардааст.

Ширкати “Барқи тоҷик” то ҳол дар ин маврид изҳороте нашр накардааст, ҳамчунин  намояндагони ин ширкат аз суҳбат бо Радиои Озодӣ худдорӣ кардаанд. Бино ба навиштаи Радиои Озодӣ ин гурӯҳи корӣ рӯзи 30 октябр таъсис ёфтааст.

Ин дар ҳолест, ки таърихи 17 октбяри соли равон Вазорати корҳои дохилии Тоҷикистон бо имзои муовини вазир Абдураҳмон Аламшозода ба раиси ширкати “Барқи тоҷик”  Мирзо Исмоилзода натиҷаҳои санҷиши шабакаҳои барқи Душанберо ирсол намуда, дар он аз талафоти беш аз 150 миллион киловатт соат нерӯи барқ ба маблағи 68 миллион сомонӣ (6,7 миллион доллар) хабар додааст.

Юсуф Раҳмон Прокуратураи Генералии Ҷумҳури Тоҷикистон бо имзои фармоне дастур додааст, ки гурӯҳи тафтишотӣ корбурди сарфаҷӯёнаи барқ, таъмири васоили интиқоли он, дуздӣ ва талафоти нерӯ ва ҳамчунин роҳандозӣ нашудани тарзи нави пардохти пули барқро дар саросари ҷумҳурӣ аз масъалаҳои аввалиндараҷаи кори худ қарор диҳанд.

Тафишот ва ошкоршавии сарфи зиёди нерӯи барқ, дар ҳолест, ки ширкати “Барқи тоҷик” беш аз 2,5 миллиард доллар қарздор аст, солҳост наметавонад қарзҳои худро пардохт намояд.

Ба навиштаи Радиои Озодӣ дар шабакаҳои барқи Душанбе муфаттишон аз амали “як гурӯҳи ҷиноӣ хабар додаанд, ки аз роҳи дуздии барқ пулҳои калон ба даст меовардаанд”.

Мақомот гуфтаанд, ин “гурӯҳи ҷиноятӣ” иборат аз Ҳусейн Худойқулов, сардори Хадамоти фурӯши шабакаҳои барқи Душанбе, Манучеҳр Хурсандзод, сардори шабакаҳои барқи Душанбе ва Нурулло ном шахс, барномасози шӯъбаи муҳосибаи ин идора бо роҳи “тассаруф ва бо тарифҳои паст фурӯхтани барқ” маблағҳои ҳангуфте ба даст овардаанд.

Ҳусейн Худойқулов, сардори Хадамоти фурӯши шабакаҳои барқи Душанбе ба Радиои Озодӣ гуфтааст, ин иттиҳомот асос надоранд.

Бахши тоҷикии радиои “Садои Хуросон” бо истинод ба пойгоҳи хабарии “tajweek.tj” менависад, ки коршиноси масоили энержӣ Камолиддин Сироҷиддинов ба изҳороти масъулини ширкати “Барқи тоҷик” дар мавриди сабаби лимити барқ дар манотиқи кишвар аз соати 8:00 то 17:00, ки таҷдиди турбинаҳои нерӯгоҳи “Норак” гуфтаанд, эрод гирифта мегӯяд:

“Бо сабаби камбориш омадани имсол, аз 9 турбина дар нерӯгоҳи барқии “Норак” танҳо 3 тоаш кор мекунанд ва турбинаҳои дигар барои сарфаи оби сарбанд барои истифодаи зимистон кор намекунанд”.

Сироҷиддинов афзуд:

“Агар ҳоло оби сарбанди нерӯгоҳи “Норак” истифода шавад, дар зимистон об намемонад, аз ин рӯ масъулини ширкати “Барқи тоҷик” бояд ба мардум ҳақиқатро эълом кунанд ва бигӯянд, ки сабаби асосии лимити барқ дар кишвар ​​мушкилоти фаннӣ ва бозсозии турбинаҳо нест, балки буҳрони камбуди об аст”.

Масъулони ширкати давлатии “Барқи тоҷик” бо пахши гузорише дар бахши ахбори Шабакаи аввали телевизиони Тоҷикистон сабаби ҷорӣ кардани лимити барқ ​​дар аксари манотиқи кишварро идомаи бозсозии турбинаҳои нерӯгоҳи “Нарак” унвон карданд.

Ёдовор мешавем, ки чандест дар аксар манотиқи кишвар мисли солҳои пешин лимити барқ ҷорӣ шудааст. Сокинон аз он шикоят доранд, ки дар як шабонарӯз танҳо аз 10 то 12 соат барқ доранд, ҳатто дар баъзе минтақаҳо аз ин ҳам камтар барқ дода мешавад.

Ин дар ҳолест, ки Эмомалӣ Раҳмон борҳо дар суханрониҳояш гуфта буд, ки дигар лимити барқ аз байн бардошта шудааст ва бебарқиҳои зимистонаро ба афсона ташбеҳ карда буд.