Шикояти сокинон аз болои кормандони Кумитаи андози Тоҷикистон нисбат ба соли гузашта  зиёд гардидааст. Дар ин бора хабаргузории “Спутник” аз манбааш аз Кумитаи андоз иттилоъ медиҳад.

Бино ба иқрори худи масъулони Кумитаи андоз шикоят аз болои кормандони ин иниҳод бештар шудааст. Ин ниҳод дар суҳбат бо “Спутник” гуфтанд,

“таҳлили муроҷиатҳои андозсупорандагон шаҳодат медиҳад, ки сарфи назар аз талаботи қонунгузорӣ, таъкидҳои роҳбарияти Кумитаи андоз, ҳоло ҳам кормандони мақомоти ҳудудии андоз дар муносибат бо шаҳрвандон ва андозсупорандагон дар баъзе ҳолатҳо талаботи муқарраршуда ва одоби хизматиро риоя наменамоянд”.

Тавассути рақами телефонии “151” ва рақами телефони боварии Раиси Кумитаи андоз дар нуҳ моҳи соли 2020, 185 адад арзу шикоят ворид шудаанд, ки нисбат ба ҳамин давраи соли гузашта 71 адад ва ё 38,4% кам гардидааст, – гуфтаанд, аз кумитаи андоз.

Бино ба гуфтаи ин ниҳод, “Шикоятҳо бештар оид ба масъалаҳои сари вақт иҷро накардани уҳдадориҳои мансабӣ аз ҷониби кормандони мақомоти андоз ва дағалона рафтор намудани онҳо, шикоятҳои беном оиди бе қайди мақомоти андоз анҷом додани фаъолияти соҳибкорӣ ва аз тарафи соҳибкорон ҳангоми муомилоти пулӣ истифода нашудани мошинҳои назоратӣ – хазинавӣ, инчунин, мавҷуд будани ҳолатҳои ришваситонӣ аз ҷониби кормандони мақомоти андоз ворид гаштаанд”.

Шумораи  шикоятҳои воридгардида ба мақомоти ҳудудии андози шаҳри Душанбе 45 адад (24,3%), вилоятҳои Суғд 39 адад (21,1%), Хатлон 57 адад (30,8%), шаҳру ноҳияҳои тобеи ҷумҳурӣ, дар маҷмӯъ, 38 адад (20,5%) ва дастгоҳи марказии Кумитаи андоз 6 адад (3,2%) рост омадааст.

Ба навиштаи Спутник  “ҳамчунин , дар ин давра аз ҷониби андозсупорандагон нисбати 11 корманди мақомоти андоз думаротибагӣ шикоят ворид гардидааст”.

Дар нуҳ моҳи соли 2020 барои дар сатҳи дахлдор риоя ва иҷро накардани уҳдадориҳои мансабӣ, дағалона вайрон намудани муқаррароти Кодекси одоби касбии кормандони мақомоти андоз ва роҳ додан ба дигар камбудиҳо, дар асоси 100 арзу шикоят ба 58 корманди мақомоти андоз муҷозоти гуногуни интизомӣ татбиқ карда шудааст”. – иброз доштаанд дар Кумитаи андоз.

Дар Тоҷикистон ба хизматрасониҳои электронӣ андозбандӣ пешбинӣ гардид, палатаи поёнии парлумони Тоҷикистон тағйироту илова ба Кодекси андозро ҷонибдорӣ намуд.

Вазири молияи Тоҷикистон Файзиддин Қаҳҳорзода, зимни муаррифии тағйирот дар парлумон гуфт, боби алоҳида барои ба андозбандӣ ҷалб намудани шахсони хориҷӣ равона шудааст, ки тавассути интернет дар Тоҷикистон хизмат мерасонанд.

Ба гуфти Қаҳорзода бо рушди технология хариду фурӯши молҳо, иҷрои корҳо ва хизматрасониҳои электронӣ тавассути шабакаҳои интернет аз ҷониби ширкатҳои хориҷӣ зиёд шуда истодааст.

Вазири молияи Тоҷикистон дар идома иброз дошт, ки тибқи моддаи 193 замимаи 1, Кодекси андоз шахсони хориҷие, ки мустақиман ё тавассути шахсони миёнарав ба шахсони воқеӣ хизматрасониҳои электрониро анҷом медиҳанд ва маҳали чунин хизмат­расониҳо Ҷумҳурии Тоҷикистон ба ҳисоб меравад, ҳамчун андозсупоранда эътироф карда мешаванд.

“Садои Мардум” аз қавли Қаҳҳорзода навиштааст:

“Ҳамчунин, тибқи моддаи 193 замимаи 2 шахсони хориҷӣ уҳдадор мегарданд, ки на дертар аз 20 рӯзи тақвимӣ аз рӯзи оғоз намудани хизматрасониҳои электронӣ дар Ҷумҳурии Тоҷикистон ба мақоми ваколатдори давлатӣ аз тариқи реҷаи онлайн ариза пешниҳод намуда, ҳамчун супорандаи андоз аз арзиши иловашуда ба қайд гирифта шаванд”.

Ҳамчунин дар идома иброз доштааст, ки барои дақиқ намудани амалиёти андозбандишаванда дар моддаи 193 замимаи 5 мафҳуми хизматрасониҳои электронӣ шарҳ дода шудааст ва 16 ҳолати пешбинигардида аз таҷрибаи ҷаҳонӣ бармеояд.

“Ворид намудани тағйироти мазкур барои боз ҳам мукаммал гардидани қонунгузории андози Ҷумҳурии Тоҷикистон, аз ҷумла, дар самти андозбандӣ намудани даромади ширкатҳои хориҷӣ аз ҳисоби хизматрасонии электронӣ, ба тадриҷан зиёд гардидани даромадҳо ба буҷети давлатӣ мусоидат хоҳад намуд”, –  гуфтааст вазир.

Қабули ин тағйирот дар ҳолест, ки чанде қабл Нусратулло Давлатзода, раиси Кумитаи андози Тоҷикистон, гуфта буд, ки дар назар доранд аз хизматрасонии ширкатҳои бузург ба монанди Google, Apple, Microsoft, Facebook ва дигарҳо андоз аз арзиши иловашуда ситонанд.

Ба гуфтаи раси кумитаи андоз интернет на танҳо барои ба даст овардани иттилоот истифода мешавад, балки бо истифода аз он хизматрасонии зиёди пулакӣ расонда мешавад.

Ҳамчунин, Давлатзода афзуд:

“Аз ҷумла фурӯши бозиҳои электронӣ, филмҳо, китобҳо, барномаҳои мусиқӣ, чиптаҳои ҳавопаймоӣ, иҷораи меҳмонхонаҳо, манзил, барномаҳои сафар ва дигар хизматрасониҳою мол, ки ҳамаи инро мо ҳамарӯза истифода мебарем. Чунин хизматрасониҳо асосан аз ҷониби ширкатҳои хориҷӣ расонда мешавад, ки бо сабаби номукаммал будани қонунгузорӣ худро дар мақомоти андоз ба қайд намегиранду аз андозсупорӣ берун мемонанд”.

Ба гуфтаи ӯ дар Русия пас аз ҷорӣ шудани андоз аз арзиши иловашуда ба хизматрасонии ширкатҳои бузург ба монанди Google, Apple, Microsoft ва Facebook ва ғайра дар 9 моҳи соли 2019 ҳудуди 60 миллиард рубл ба буҷаи ин кишвар ворид шудааст.

Вазири молияи Тоҷикистон  дар мавриди аз ширкатҳои интернети андоз ситониро ба чанда мисол аз кишварҳо ёдовар шуд ба гуфтаи ӯ  омӯзиши қонунгузории андози шарикони асосии тиҷоратии ҷумҳурӣ дар ин самт нишон дод, ки бо андоз аз арзиши иловашуда андозбандӣ намудани хизмат­расониҳои электронии шахсони хориҷӣ дар қонунгузории андози Федератсияи Русия, ҷумҳуриҳои Ӯзбекистон, Беларус ва як қатор кишварҳои Аврупо (Испания, Юнон ва Венгрия) пешбинӣ шудааст.

“Айни ҳол ҷумҳуриҳои Қазоқистон, Қирғизистон ва як қатор давлатҳои мутараққӣ, аз қабили Япония, Франсия ва Ҳиндустон вобаста ба андоз­бандӣ намудани хизматрасониҳои электронӣ, ки фарогири тамоми бахшҳои иқтисодиёт гардидааст, чораҷӯӣ намуда истодаанд”, –  гуфт, вазир.

Эмомалӣ Раҳмон рӯзи 30 октябр баъди расман ба сари мансаби Президент омаданаш, фармони аввали худро дар бораи бахшидани 378 нафар маҳкумшуда ба имзо расонид.

Хадамоти матбуоти Президент хабар дод, ки “Дар бораи бахшиши ҷазои шахсоне, ки ба маҳрум сохтан аз озодӣ маҳкум шудаанд” дар асоси принсипҳои инсондӯстона, меҳру шафқат, ғамхорӣ ба оила ва кӯдакону наврасон 378 нафар маҳкумшударо бахшида, онҳоро аз адои минбаъдаи ҷазо озод намуд.

Дар бораи дигар ҷузъиёти фармони мазкур маълумот дода нашудааст.

Ҳамчунин моҳи октябри соли 2019 Эмомалӣ Раҳмон ба муносибати ҷашни 25-солагии Конститутсия Қонуни ҶТ “Дар бораи авф”-ро имзо карда буд, ки дар он дар нисбати зиёда аз 20 ҳазор нафар шахсоне, ки ҷиноят содир кардаанд, татбиқ шуд.

Дар баробар ин моҳи майи соли гузашта Эмомалӣ Раҳмон дархостҳо дар бораи бахшиши ҷазои 99 нафар шахсонеро, ки ба маҳрум сохтан аз озодӣ маҳкум шудаанд, рад кард. Зикр шуда буд, ки дархости ин шахсон баъди баррасӣ бо таваҷҷуҳ ба хусусият ва дараҷаи хавфнокии ҷамъиятии ҷиноятҳои содирнамудаи онҳо рад карда шуд.

Оё дар ин авф маҳкумшудаҳои пурсару садо ба монанди Зайд Саид, Бузургмеҳр Ёров ва аъзоёни ҲНИТ шомил мешаванд ё не то ҳол маълум нест, вале коршиносон бар ин назаранд, ки ҳар маҳкумшудае, ки ба гуноҳи худ эътироф кунад ва шахсан аз Президент Раҳмон бахшиш пурсад, он шомили чунин авфҳо мегардад. Дар ҳамин ҳол Радио Озодӣ менависад:

“Созмонҳои байналмилалии ҳомии ҳуқуқ борҳо аз Тоҷикистон талаб кардаанд, ки Бузургмеҳр Ёров, Зайд Саидов ва аъзои боздошшудаи Ҳизби мамнуи наҳзати исломиро озод кунад. Вале манобеи Радиои Озодӣ гуфтанд, номи ҳеч яке аз ин афрод дар рӯйхати афвшудаҳо шомил нашудааст, чун бисёри онҳо аз президент талаби бахшиш накардаанд”.