Хона блог саҳифа 859

Афғонистони ҷангзада барои Тоҷикистон техника истеҳсол мекунад

Аз ҷониби
admin-2
-
0

Дафтари матбуотии вилояти Нангарҳор хабар додааст, ки 12 мошини хирманкӯби сохти Афғонистон ба Тоҷикистон содир шудааст. Ба ин мошинҳои хирманкӯб, ки барои кӯбидани хирмани гандум истифода мешавад, Афғонистон худ ниёзи бештар дорад, аммо барои Тоҷикистон низ истеҳсол кардааст.

Ба гуфтаи мақомоти маҳаллии Нангарҳор ин хирманкӯбҳо сохти фабрикае ба номи “Ҷовид афғон” буда рӯзи сешанбе 16-уми июн ба Тоҷикистон фиристода шудааст. Ҳар кадом аз ин хирманкӯбҳо 1 ҳазору 750 кило вазн ва 400 ҳазори афғонӣ арзиш дорад. Гуфтанист, ки ин мошинҳо дар ду давра ба Тоҷикистон содир шудааст. Ба гуфтаи мақомот ин раванд ҳамчунон идома дорад ва қарор аст ба зудӣ даҳҳо мошинҳои хирманкӯби дигар низ ба Тоҷикистон содир бишавад. 

Мақомоти маҳаллии Афғонистон дар ҳоле аз содир кардани мошинҳои хирманкӯби сохти ин кишвар ба Тоҷикистон хабар медиҳад, ки пеш аз ин Афғонистон худ ин навъи мошинҳоро барои ҳалли ниёзҳои зироатӣ бо қимати гаронтаре аз хориҷи Афғонистон ворид мекард. 

21 аризаи шикоятӣ фақат барои як масъала, аммо ба додаш касе намерасад

Аз ҷониби
admin-2
-
0

Сокини шаҳри Хуҷанди вилояти Суғд, Холматова Маърифатхон барои ҳақи худро талаб кардан 21 маротиба ба мақомоти кишвар номаи шикоятӣ навиштааст, вале то ҳол ҷавоби қонеъкунандае нагирифтааст.

Ҷабрдида ба унвонии мо нома ирсол намуда хостааст, то мо онро ба гуши масъулин бирасонем, агар ки мешунаванд. Ӯ аз молики бозори “Сино”-и шаҳри Хуҷанд шаҳрванд Юлдошев Азим шикоят дорад. Ҷабрдида мегӯяд, молу мулки мо тоҷирони бозори номбурда бар асари сухтори бозор несту нобуд шуд. Мақомоти дахлдор пас аз тафтишот муайян намуданд, ки сабаби сухтор хунукназарии худи молики бозор будааст. Бо вуҷуди он ки ҷиноятҳои Юлдошов А. тасдиқ шуда буд ва мебоист, ки зарари тоҷиронро пардохт намояд, аммо пас аз чанде аз ҷониби муфаттишон ва прокуророн дидаву дониста ӯ бегуноҳ бароварда шуд ва баракс ду ҷавонеро, ки аслан ба ин амали ҷиноятӣ ҳеч рабте надоштаанд, туҳмат намуда бурда ҳабс карданд. 

Холматова мегӯяд, 21 аризаи шикоятӣ ба мақомоти кишвар навиштааст, ба 20 аризаи ӯ прокурори вилояти Суғд Воҳидов Ҳ. С, муовини пруокурори вилояти Суғд Ваҳҳобов В. М ва муовини прокурори генералӣ Рафизода М. Ҳ ҳамеша ҷавобҳои “аҳмақона” гардондаанд. Ва аризаи 21-умаш ҳоло ба Дастгоҳи иҷроияи президенти Ҷумҳурии Тоҷикистон ворид шудааст ва ҳоло дар қайди баррасӣ аст. 

Холматова мегӯяд, барои он ки Юлдошев бегуноҳ бароранд ва аз ҷавобгарии ҷиноятӣ озодаш бикунанд, бо маслиҳати пешакӣ прокурору муфаттишон қарор бароварданд, ки Юлдошев Азим молики маркази савдои “Сино” набуда ӯ наметавонад зарарҳои шуморо барқарор кунад. Ӯ навиштаст: “прокурори шаҳри Хуҷанд Воҳидов Ҳ. С ба (араизаи шикоятии) ман санаи 26.10.2018 с таҳти рақами №12/323а-18 ҷавоб додааст, ки Юлдошов А. роҳбар набуда, балки иҷорагир аст. Магар иҷорагир фармон мебарорад ё дар вилояти Суғд ин корҳо шуданаш мумкин?”

Ин дар ҳолест, ки Шӯъбаи тафтишотии РВКД вилояти Суғд дар парвандаи ҷиноятии №51900 дар ҷилди 11 пас аз санҷиши шиносномаи Юлдошев Азим соҳибмулк ва раиси маркази савдои “Сино” буданашро тасдиқ намуда буд. Ӯ дар аризаи 21-и худ, ки ба унвонии раиси Дастгоҳи иҷроияи президент, Озода Раҳмон навиштааст, мегӯяд, ки чаро прокурор ва муфаттишони вилояти Суғд ба камбудиҳои раиси бозори “Сино” Юлдошоев Азим чамш мепӯшанд ва ӯро ба ҷавобгарии ҷиноятӣ намекашанд? Қонун ва кодексҳои Ҷумҳурии Тоҷикистон ба кӣ даркор, дар ҳоле, ки мақомоти суду прокурорҳо худ ба он амал намекунанд. Холматова Маърифатхон дар сӯбат бо мо сабаби навиштани аризаҳои шикоятиашро чунин шарҳ дод: 

Ба арзи ҷабрдидагон нарасидану хунукназарӣ нисбати корафтодагоне, ки ба қавле “тағо” надоранд, аз ҷониби сохторҳои дахлдор хеле зиёд дида мешавад. Аксари чунин корафтодагон дар охир маҷбур мешаванд, ба раиси Дастгоҳи иҷроияи Расиҷумҳур ва ё ба худи шахси президент номаи шикоятӣ нависанд, вале аз санг садо меояду аз ҳукуматдорон не. То ба кай тағобозӣ? То ба кай ҷабру зулм болои мардуми бечора? Бас аст дигар! Ин садо садои ҷабрдидагон аст.

Кумаки 134 миллион долларии Бонки ҷаҳонӣ ба ширкати Барқи тоҷик

Аз ҷониби
admin-2
-
0

Вакилони Маҷлиси намояндагони Тоҷикистон созишнома миёни Бонки ҷаҳонӣ ва ҳукумати Тоҷикистонро ба тасвиб расониданд, ки бар пояи он Бонки ҷаҳонӣ барои тармиму навсозии қисмате аз зерсохтор ва низ ба манзури ба эътидол овардани вазъи молиявии ширкати “Барқи тоҷик” 134 миллион доллар қарзи бебозгашт хоҳад дод.

Усмоналӣ Усмонзода, вазири энергетика ва захираҳои оби Тоҷикистон, ки рӯзи 17 июн созишномаро ба вакилон муаррифӣ кард, гуфт, маблағҳо барои дастгирии молиявии «Барқи Тоҷик» ва беҳбуди идоракунии ширкат равона мешавад. 

Барнома, қарор аст, то соли 2026 амалӣ шавад. Вазъи молиявии «Барқи Тоҷик» ширкати монополисти давлатӣ дар бозори нирӯи барқ солҳост ногувор мемонад. Ба ҳолати оғози соли 2020 қарзи ширкат ба беш аз 26 миллиард сомонӣ (2 миллиарду 600 миллион доллар) расидааст. Аммо як шарти ҷудо шудани гранти Бонки Ҷаҳонӣ барои «Барқи Тоҷик» ин аст, ки Тоҷикистон бояд сол ба сол нархи нерӯи барқро боло бибарад. Бонки Ҷаҳонӣ ҳанӯз ҳангоми тасдиқи барномаи кумаки 134-миллиондолларӣ барои устувории «Барқи Тоҷик» гуфта буд, нархи нерӯи барқро дар Тоҷикистон боло баранд, вагарна ширкат аз нигоҳи молӣ устувор нахоҳад буд. 

Ҳукумати Тоҷикистон ҳам ин пешниҳоди бонкро қабул кардааст ва то соли 2025 қарор аст, нархи нерӯи барқ афзоиш биёбад. То соли 2021 ҳар сол ба қадри 15 дарсад ва аз соли 2022 то 2025 ҳашт дарсадӣ боло бурда шавад. Айни замон нархи нирӯи барқ барои аҳолӣ 22,66 дирам яъне (2,3 сент) аст. Аммо Бонки Ҷаҳонӣ мегӯяд, ин нарх хароҷоти тавлиди нерӯи барқро рӯйпӯш намекунад ва бояд афзуда шавад. Ба ҳисоби «Барқи тоҷик» нархи ҳар як киловатт/соат барқи тавлидкардааш 28 дирам баробар ба (2,8 сент) арзиш дорад ва бо ҷои фоида зарар мебинад. Аммо коршиносон мегӯянд, ҳисобдории «Барқи тоҷик» тоҷик шафоф нест ва намешавад бар пояи он нархи барқро арзон ҳисоб кард.

Коршиносон ва таҳлилгарони арсаи энергетикаи Тоҷикистон бар ин боваранд, ки яке аз сабабҳои ба қарз ғӯтавар шудани ширкати “Барқи тоҷик” ношаффофии муҳосибот ва мавҷудияти фасоди густарда дар идораи марказӣ ва сохторҳои маҳаллии он аст. Қаблан бо фишори Бонки ҷаҳонӣ ширкати мазкур ба се бахши алоҳида, аз ҷумла бахши истеҳсол ва низ бахши фурӯш ҷудо карда шуд то аз афзоиши фасод дар он ҷилавгирӣ ба амал ояд. 

Зоҳиран ба назар мерасад,ҳамоно авзоъ бидуни тағйир боқӣ мондааст. Инки Бонки ҷаҳонӣ ва дигар муассисаҳои молиявии байналмилалӣ барои ироаи кӯмак афзоиши нархи фурӯши неруи барқ ба аҳолиро тақозо мекунанд, чандин сол аст, ки такрор мешавад ва ҳукумати Тоҷикистон ҳам ба хотири дарёфти ин гуна маблағҳо нархро боло мебарад. Вале нархи хадамоти иҷтимоӣ ва аз ҷумла истифода аз неури барқ дар муқоиса бо боло бурдани маоши мардум хеле суръати боло дорад.

Гузашта аз ин нозирони барқ дар маҳаллҳо бо соҳибони корхонаҳои саноъатӣ муомила карда ва на ҳама вақт ҳаққи истифодаро то ба охир мегиранд. Ахиран Президенти Тоҷикистон дар бастаи амру фармонҳояш дар робита ба коҳиш додани таъсири манфии COVID-19 ба иқтисоди Тоҷикистон дастур дод, аз ҷумла нақшаи боло бурдани нархи барқ то охири сол ба таъхир гузошта шавад. 

Ҳамакнун маълум нест, ин дастури раисҷумҳур бо шарти гранти тақдимкардаи Бонки Ҷаҳонӣ чӣ гуна ҳамхонӣ хоҳад дошт. Ба ҷуз аз ВМКБ, боқӣ қаламрави Тоҷикистонро ширкати «Барқи Тоҷик» бо барқ таъмин мекунад. Ин ширкат айни замон 26 нирӯгоҳро дар ихтиёр дорад. Дар Вилояти Мухтори Кӯҳистони Бадахшон ширкати «Помир энержӣ» сокинонро бо барқ таъмин мекунад.

Ҳарими ҳавоии Тоҷикистон боз мешавад, вале на барои ҳама

Аз ҷониби
admin-2
-
0

Қарори шурӯи парвозҳо миёни Тоҷикистон ва давлатҳои дигар дар ҷаласаи ахири Ситоди мубориза бо COVID-19 қабул шудааст. Тибқи қарори Ситод, ҳарими ҳавоии Тоҷикистон аз аввали июл барои Дубайи Аморати Муттаҳидаи Араб ва Ӯзбекистон боз ва парвозҳо дар ин самтҳо аз сар гирифта хоҳад шуд. Таъкид шудааст, ки мусофирон бояд ҳатман маълумотномаи тиббӣ дошта бошанд.

Sputnik, ношири ин хабар бо такя ба манобеаш дар Ситоди мубориза бо  COVID-19 мегӯяд, барои парвозҳо ба самтҳои Русия, Туркия ва Чин феълан иҷозат дода нашудааст. Аммо қарор аст мавриди омӯзиши иловагӣ қарор дода шаванд.Ситоди ҷумҳуриявӣ афзудааст, ки дар баробари пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19, ҳамчунин парвозҳои транзитӣ ва чартерӣ барои интиқоли молу маҳсулот тариқи хатсайрҳои байналмилалӣ анҷом дода мешавад.

Ситоди ҷумҳуриявии мубориза бо COVID-19 масъулинро муваззаф кардааст, ки барои пешгирӣ аз хуруҷи мавҷи дуюми бемории сироятии коронавирус, захира ва нигоҳдории маводи доруворию маҳлулҳои безараргардонӣ, тақвияти корҳои фаҳмондадиҳӣ ҷиҳати пешгирӣ аз хуруҷи мавҷи дуюми ин беморӣ тадбирҳои таъхирнопазир андешанд. Дар як гузориши “Озодӣ” ҳам бо такя ба маълумоти мақомоти расмии Тоҷикистон ва ширкатҳои ҳавопаймоӣ таъкид шудааст, ки то охири моҳи июн парвозҳои доимӣ шуруъ намешавад ва баъд аз он машварат мекунанд, ки парвозҳоро чӣ гуна ва кай ба роҳ монанд.

 Намояндагони чанд ширкати ҳавопаймоӣ дар Душанбе ба Радиои Озодӣ гуфтаанд, то рӯзи 30-юми июн ба истиснои парвозҳои махсус ё чартерӣ парвозҳои доимӣ амалӣ намешаванд. Аз ҷумла, масъулони намояндагии ширкати «Ют Эйр» гуфтаанд, фазои Тоҷикистон ва Русия феълан бастааст ва то рӯзи 30-юми июн ҳавопаймоҳои онҳо парвозе анҷом нахоҳанд дод.

Намояндаи ширкати “Ют Эйр” дар Душанбе меӯяд:«Агар ҳукумати Русия ё Тоҷикистон фазоро кушоянд, ҳавопаймоҳои ширкат парвозро шуруъ мекунанд. Мо омода ҳастем, ки пагоҳ парвоз кунем, аммо ин кор аз беҳтар шудани вазъи беҳдоштӣ вобаста аст».

Ҳамин нуктаро намояндагони ширкати “Уралские авиалинии” ва “Узбекистон ҳаво йуллари” низ баён доштанд. Як масъули намояндагии ширкати “Узбекистон ҳаво йуллари” рӯзи 16-уми июн гуфт, оғози парвози ҳавопаймоҳои ширкат дар Узбекистон дуруст аст, аммо ҳанӯз Тоҷикистон барои анҷоми парвозҳо иҷозат надодааст ва онҳо ҳаққи ба Душанбе парвоз карданро надоранд.

Тоҷикистон аз нимаи дувуми моҳи март бо ҳадафи пешгирӣ аз сирояти коронавируси нав парвозҳои байналмилалиро қатъ кард. Ба ин сабаб садҳо шаҳрванди кишвар дар Русияву Туркия, Қазоқистону Ҳиндустон, Олмон ва Дубай дармонданд ва ҳукумат қисме аз онҳоро бо парвозҳои махсус ба Тоҷикистон интиқол дод.

Қаблан ширкатҳои мусофирбарии “Уралские авиалинии” ва «Ют Эйр»-и Русия аз фурӯши билетҳо ба самти Тоҷикистон хабар дода буданд, аммо мақомоти Оҷонси ҳавонавардии Тоҷикистон ин хабарро такзиб ва ба шаҳрвондон ҳушдор дода буданд, ки аз хариди билет худдорӣ кунанд.

Кореяи Шимолӣ барои саркӯби мухолифонаш бо ҳамсояааш ҷангиданист

Аз ҷониби
admin-2
-
0

Нимаи дуюми имрӯз сешанбе 16-уми июн Кореяи Шимолӣ Дафтари иртибототи байни ду Кореяро, ки дар шаҳри Кэсун дар қисмати шимолии Кореяи Ҷанубӣ байни марзи ин кишвар ҷойгир аст, мунфаҷир кард.

Бино бар гузориши оҷонсии (Yonhap News) мақомоти расмии Кореяи Ҷанубӣ дар изҳороти худ гуфтанд, ки Кореяи Шимолӣ Дафтари иртибототи ду Кореяро соати 14:49 ба вақти маҳаллӣ тарконданд. Сохтумони дафтари мазкур дорои чаҳор ошёна буда, пас аз нишасти тафоҳуми тарафайн дар сентиябри соли 2018 дар шаҳри Кэсун бо ризоияти ду раисҷумҳур ба хотири коҳиши танишҳои ду ҷониба ҳамчун Дафтари иртибототи ин ду кишвар сохта шуда буд.

Оҷонсии (Yonhap News) менависад, ки ин инфиҷор пас аз таҳдиди Ким Ё Чен, муовини раиси Ҳизби коргари Кореяи Шимолӣ ва хоҳари Ким Чен Ин, роҳбари ин кишвар сурат гирифтаст. Номбурда рӯзи 13 моҳи ҷорӣ бо таҳдиде ба Кореяи Ҷанубӣ хитоб намуда гуфта буд, “Ба зудӣ шоҳиди аз байн рафтани Дафтари иртибоботи ягона хоҳед шуд, ки аз он ҳеҷ фоидае нест.” Хабаргузории расмии Кореяи Шимоли эълом кард, ки ин дафтар ба хотири он мунфаҷир шуд, ки то “инсонҳои паст ва касоне, ки онҳоро паноҳ додаанд, баҳои сангини ҷинояташонро бипардозанд.”

Ёдарс мекунем, ки чанде пеш Кореи Шимолӣ аз мақомоти Кореи Ҷанубӣ талаб намуда буд, ки мухолифони ҳукуматашро боздошт намуда ба онҳо бисупорад, аммо мақомоти Кореяи Ҷануби талаби Шимолиро напазируфт. Ин боис шуд, ки робитаҳои ин ду давлати ҳамсоя куллан қатъ гардад.

Сарвазири Қирғизистон ба истеъфо рафт

Аз ҷониби
admin-2
-
0

Бино бар гузориши Дафтари матбуоти ҳукумати Қирғизистон сарвазири он, Муҳаммадқулӣ Абилғозиев, ки аз сӯи парлумони ин кишвар муттаҳам ба дахолат дар як парвандаи ҷиноӣ шуда буд, аз мансаби худ истеъфо додааст.

Тибқи ин гузориш Абилғозиев, сарвазири Қирғизистон, ки ба муддати ду ҳафта ҳузури худро дар давлати ин кишвар мутаваққиф карда буд, дар ниҳоят аз симати худ истеъфо дод. Вай сабаби истеъфои худро монеа эҷод накардан ба раванди тафтишот дар парвандаи вобаста ба фурӯши радиобасомадҳо арзёбӣ намуд.

Абилғозиев аз моҳи апрели 2018 сарвазири Қирғизистон таъин шуда буд, ӯ даст доштани худро дар ин қазияи ҷиноӣ бо сароҳат рад мекунад. Ҳамзамон меафзояд, ки дар фурӯши басомадҳои радиоӣ нақше надорад ва айбҳоеро, ки ба ӯ нисбат медиҳанд, беасосанд.

Абилғозиев мегӯяд, мақомоти тафтишотӣ то кунун ӯро бозпурсӣ накардаанд. Парлумони Қирғизистон давлат ва сарвазири ин кишварро дар иртибот бо ин парванда муттаҳам карда ва аз онҳо хоста буд, ки бегуноҳии худро дар назди қонун исбот кунанд.

Муҳлати будубоши муҳоҷирон дар Русия то се моҳи дигар дароз карда шуд

Аз ҷониби
admin-2
-
0

Владимир Путин, Президенти Русия ба хориҷиёне, ки муҳлати муваққатии будубош ё иқомати доимиашон ба охир мерасад, то 15 сентябр дар Русия ҳузур доштанро иҷоза дод.

Хабаргузории Фергана менависад, бар асари пандемияи коронавирус қаблан ин муҳлат то 15 июн муқаррар шуда буд. Мувофиқи фармони ахири раиси ҷумҳурии Русия то 15 сентябр ба ҷуз иҷозаи кор, патент ва иҷозаи ҷалбу истифодаи кормандони хориҷӣ, муҳлaти ҳуҷҷатҳои амалашон ба охир мерасида, аз қабили раводид (виза), иҷозаи зисти муваққатӣ, ҳуҷҷати иҷозаи зист, корти муҳоҷират ва ғайраро дароз кардан лозим нест. Акнун бидуни берун рафтан аз ҳудуди қаламрави Русия ҳуҷҷатҳоро нав кардан имкон дорад.

Дар давраи аз 16 июн то 15 сентябр шаҳрвандони хориҷӣ ва шахсони бешаҳрвандӣ, ки ба Русия бо тартиби бидуни талаботи гирифтани раводид меоянд, ҳуқуқ доранд, ки дар бораи додан (дароз кардани муҳлат), дубора ба расмият даровардани патент бе назардошти талабот ба муҳлати муқарраршудаи пешниҳоди ҳуҷҷатҳо ҷиҳати анҷоми расмиёти мақсади сафар ва хориҷ шудан аз Русия ариза диҳанд. Дар ҳамин муҳлат корфармоёне, ки барои ҷалбу истифодаи кормандони хориҷӣ иҷоза гирифтаанд, ҳуқуқ доранд, ки барои дароз кардани муҳлати иҷозатнома барои коргарони худ бо ариза муроҷиат кунанд.

“Чунин иҷозатнома бе назардошти талаботи мақсади сафари шаҳрванди хориҷӣ ё шахси бешаҳрвандӣ ба ҳама гуна муҳлат то 15 сентябри соли 2020 дода мешавад (муҳлаташ тамдид мешавад)”, — қайд мешавад дар фармон.

Пардохти маблағи патент аз 18 апрел бо фармони Путин бекор шуд. Ба корфармоён барои ба кор гирифтани хориҷиёни муҳлати амали патенташон гузашта ё чунин ҳуҷҷатҳо надошта иҷоза дода шуда, ба мақомоти ҳифзи ҳуқуқ ҷарима кардан барои он манъ шуд. Чунин сабукиҳо замони эпидемияи коронавирус бо сабаби баста шудани сарҳадҳо ҷорӣ шуданд. Вуруди хориҷиёнро ба кишвар ҳукумати Русия аз 18 март манъ кард, ки дар натиҷа мақоми ҳуқуқии аксарияти муҳоҷирони дар Русия ҳузурдошта зери суол қарор гирифт.

Тибқи ин фармон, ҷараёни муҳлати ихтиёрӣ хориҷ шудани хориҷиён аз Русия, ки нибсташон дар бораи ихроҷи маъмурӣ қарор қабул шудааст, низ боздошта мешавад. Ба ин тариқ, то 15 сентябр нисбат ба хориҷиён дар бораи номақбул будани ҳузур, ихроҷ ва истирдод қарорҳо қабул карда намешаванд. Ғайр аз ин, то 15 сентябр ҷараёни муҳлати ҳузур дар хориҷа барои шахсоне, ки иҷозаи зисти муваққатӣ (РВП), ҳуҷҷати иҷозаи зист (ВНЖ) ё шаҳодатномаи барномаи давлатии мусоидат ба кӯчбандии ҳамватанони муқими хориҷи кишвар ба Русияро доранд, низ боздошта мешавад. Ҳамчунин сарвазири Русия Михаил Мишустин қаблан хабар дода буд, ки шаҳрвандони хорҷӣ барои муолиҷа ва нигоҳубини хешовандон ба Русия ворид шуда метавонанд. 

Қобили зикр аст, ки ВКД Русия нақшаи нави рушди сиёсати муҳоҷиратро таҳия намуд. Дар доираи он дар Русия пойгоҳи иттилоотие таъсис дода мешавад, ки маълумот дар бораи шаҳрвандони хориҷии ба кишвар омадаро дар бар хоҳад гирифт. Русия дар ҳоле ҳамчунин сабукиҳо ба муҳоҷиронро медиҳад,ки гуфта мешавад барои ин кишвар норасоӣ ва камбуди неруи корӣ ба шиддат эҳсос мешавад. Вале ба сабаби баста будани роҳҳо ҳамоно садҳо ҳазор аз шаҳрвандони тоҷик,ки ризқу рӯзии худро аз Русия пайдо мекарданд дар кишвари худ банда монда барои ояндаи худ ва фарзандонашон нигарон ҳастанд. Зеро дар Тоҷикистон бо вуҷуди таблиғоти якҷонибаи расонаҳои расмӣ набуди ҷойи корӣ ва маоши муносиб ҳамоно мушкили рақами аввал боқӣ мондааст.

Маҳмурод Одинаев, муовини раиси ҲСДТ: Ҳукумат сӯҳбатҳои телефонии моро гӯш мекуна

Аз ҷониби
admin-2
-
0

Баъд аз баста ва мамнӯъ эълон кардани Ҳизби наҳзати исломии Тоҷикистон танҳо ҲСДТ аст, ки ба унвони ҳизби мухолиф амал мекунад. Аммо масъулони ҳизб шикоят мекунанд, ки мақомот ҳар қадами масъулони ин ҳизби мухолифро таҳти контрол қарор дода ва ба кори онҳо ба таври ғайриқонунӣ мудохила мекунанд. 

Яке аз муовинони раиси Ҳизби сотсиал-демократи Тоҷикистон изҳор доштааст, ки мақомоти интизомӣ монеи мулоқоташ бо намояндагони сафорати Олмон дар Душанбе шудаанд. Маҳмурод Одинаев гуфтааст, мулоқот бояд рӯзи 12-уми июн сурат мегирифт ва ӯ дар бораи вазъи ҳизбҳои сиёсӣ ва мавридҳои шиканҷа дар Тоҷикистон чанд пешниҳод карданӣ буд. 

Маҳмурод Одинаев, муовини раиси ҲСДТ мегӯяд: «Аз сафорат низ ба ман занг зада, гуфта буданд, ки бо ниқоби тиббӣ ҳозир шавам. Чанд лаҳза пеш аз мулоқот, ногаҳон, маро ба идораи корҳои дохилии Ҳисор даъват карда, гуфтанд, ки «беҳтар аст, наравед». 

Маҳмурод Одинаев иддао дорад, ки дар бораи мулоқоташ касе хабар надошт ва тахмин мезанад, ки эҳтимол мақомот суҳбатҳои телефонии ӯро гӯш кардаанд ва нигаронияш низ аз ҳамин ҷост, ки мегӯяд: «Занги телефонии маро ба сафорати Олмон ба ҷуз аз худам каси дигар намедонист. Мақомот чӣ гуна аз он хабар ёфтанд? Ба хотири амнияти худ ва фарзандон сахт нигарон ҳастам. Фишорам боло рафт ва ба шифохонаи Ҳисор муроҷиат кардам.»

Дар ҳоли ҳозир раёсати Ҳизби сотсиал-демократи Тоҷикистон тасмим дорад, бо пахши изҳороте аз мақомоти интизомии Ҳисор шарҳи ҳодисаро тақозо кунад. Бар асоси қонуни Тоҷикистон «оид ба ҳифзи маълумоти шахсӣ», ки ду сол пеш дар моҳи июни соли 2018 аз тарафи Маҷлиси Намояндагон қабул шуд, ки «ҳифзи маълумоти шахсӣ аз тарафи давлат кафолат дода мешавад». Аммо дар Тоҷикистон мардум, бахусус дигарандешони сиёсӣ, аз гӯш шудани сӯҳбатҳои телефониашон изҳори нигаронӣ мекунанд. Ҳангоми сӯҳбатҳои телефонӣ, вақте навбат ба ягон мавзӯи ҳассос мерасад, тарафи дигар зуд равиши гуфтугӯро ба самти дигар мебарад, ки «ин гапи телефонӣ нест». 

Мақомот ҳамвора гӯш кардани гуфтугӯҳои ҳамаи сокинонро рад кардаанд, вале мегӯянд, барои пайдо кардани изи ҷиноятҳо ва бо ризояти мақомоти дахлдор ба таври истисноӣ баъзе сӯҳбатҳоро гӯш ва сабт мекунанд. Ин танҳо мавриде нест,ки масъулони ҳизби мухолифи СДТ дучори фишору таъқиби мақомот мешаванд. Дар гузашта чанд навбат ба Раҳматулло Зоиров, раиси ин ҳизб низ бархурдҳои мушобеҳе, ки боиси нақзи ҳуқуқҳои инсонӣ ва ҷамъиятӣ шуда буд, рух додааст.

Дар моҳи марти соли ҷорӣ низ мақомоти Тоҷикистон бо эълони онки ҲСДТ натавонист садди 5%-и интихобтиро тай кунад аз вуруди номзадҳои ин ҳизб ба парлумони кишвар ҷилавгирӣ карда буданд.

(no title)

Аз ҷониби
admin-2
-
0

Сарфу харҷи маблағи буҷаи давлатии Тоҷикистон ношаффоф аст ва норӯшаниҳои зиёд дорад. Бо чунин арзёбии вазъи буҷаи Тоҷикистон, Вазорати хориҷии Амрико ба мақомоти ин кишвар ҷиҳати шаффофияти масрафи маблағҳои буҷаи давлатӣ чанд тавсия ва пешниҳод ироа кардааст. 

Вазорати хориҷии Амрико, ки рӯзи 15 июн гузориши солонаи худ таҳти унвони «Ҳисобот дар бораи шаффофияти молиявӣ 2020»- роҷеъ ба вазъи ҳисоботи молиявӣ дар кишварҳои ҷаҳонро мунташир кардаст, мегӯяд, ҳарчанд тарҳи буҷа ва шакли қабулшудаи он аз ҷониби ҳукумати Тоҷикистон нашр мешавад ва дар бораи харҷи маблағҳои буҷа низ ҳисоботе нашр мекунанд, аммо «маълумот дар бораи ӯҳдадориҳои қарзӣ ва дар бораи хароҷоти вазорату идораҳо вуҷуд надорад, ҳамчунин кумакҳо ба корхонаҳои давлатӣ ва даромади онҳо зикр нашудааст. Буҷаи даромадҳоро вобаста ба манбаъҳояш тақсим мекунад, вале даромад аз маъданҳои табиӣ нишон дода нашудааст. Корхонаҳои бузург ва муҳими давлатӣ ҳисоботи молиявӣ ва аудите, ки дар дастраси ом бошад, надоранд. Ҳукумат ҳисобҳои бузурги ғайрибуҷавиро пеш мебурд. Буҷаҳои ҳарбӣ ва иктишофӣ аз ҷониби парлумон тасдиқ карда намешаванд ва таҳти назорати ҷомеа қарор надоранд.»

Вазорати хориҷии Амрико бо зикри ин пинҳонкориҳои мақомот дар харҷу сарфи буҷети давлатӣ ҳамчунин зикр кардааст, дар дастраси озод танҳо маълумоти умумӣ дар бораи ҳисоботи ниҳоди назоратӣ дар бораи ҳисобҳои ҳукумат гузошта шудаасту халос. Меъёрҳо ва тартибе, ки ҳукумати кишвар тавассути онҳо қарордодҳо оид ба маъданҳои табииро мебандад ва ё барои истихроҷи маъданҳо иҷозатнома медиҳад, дар қонун нишон дода шудааст. Вале зоҳиран ҳукумат дар амал ин қонуну қоидаҳоро риоя намекунад. 

Маълумоти асосӣ дар бораи даромадҳо аз истихроҷимаъданҳои табиӣ дар дасти ом гузошта нашудааст. Аз ин ҷиҳат вазорати хориҷии Амрико ба мақомоти тоҷик пешниҳод додааст, ки шаффофияти молиявӣ дар Тоҷикистонро метавон аз ин роҳҳо беҳбуд бахшид:

— омода кардани асноди пурраву муфассали буҷавӣ; 

— аз байн бурдани ҳисобҳои ғайрибудҷавӣ ва ё таҳти назорат ва аудити лозим қарор додани онҳо;

— дар амал риоя кардани қонунҳо ва асноди меъёрӣ ҳангоми бастани қарордодҳо ва додани иҷозатнома ба истихроҷи маъданҳои табиӣ;

-таъмини дастрасии ом ба маълумоти асосӣ дар бораи даромадҳо аз истихроҷи маъданҳои табиӣ.

Бархе аз коршиносони умури иқтисодӣ тавсияҳои Амрико ҷиҳати таъмини шаффофият дар харҷи маблағҳои бюҷети Тоҷикистонро дуруст ва саривақтӣ арзёбӣ карда мегӯянд, ки на танҳо харҷу масраф, балки сарчашма ва манобеи таъминоти бюҷети давлатӣ ҳам машкук аст ва на ҳама вақт дар қонун зикр карда мешаванд. Барои мисол дар чанд соли ахир ду манбаи асосии бюҷет, алюминий ва пахта ба таври норӯшан инъикос карда мешаванд. Афзун бар ин маблағҳои интиқолии муҳоҷирон низ саҳеҳ ва воқеӣ зикр карда намешавад. Ба гуфтаи ин коршиносон яке дигар аз нуқси ҷиддӣ дар бюҷети давлатӣ адами арқоми баҳраҳои қарзи хориҷӣ ва ё ба истилоҳ “хизматрасониҳо ба қарзҳои хориҷӣ” аст, ки гуфта мешавад солона аз садҳо миллион доллар ҳам бештар мебошад.

Пекин аз мавҷи дигарбораи коронавирус хабар медиҳад

Аз ҷониби
admin-2
-
0

Бинобар гузориши хабаргузории “euronews.com” мақомоти давлатӣ дар Чин 15 июн аз дигарбора ба ҳолати қарантина баргадонидани 10 минтақаи шаҳри Пекин хабар доданд. Ин иқдом дар ҳоле сурат мегирад, ки бино бар гузориши Вазорати беҳдошти ин кишвар дар зарфи 24 соати гузашта 49 ҳолати нави гирифторӣ ба ин беморӣ сабт шудааст.

Мақомоти давлатии Пекин пас аз бақайдгирии ҳолатҳои нави беморони гирифтор ба КОВИД-19 дар ноҳияи Ҳоқдиен, ки гуфта мешавад аз як бозори яклухтфурӯшӣ маншаъ гирифтааст, даҳ маҳаллаи ин ноҳияро бори дигар таҳти муқаррароти қарантина қарор додаанд. Ва мақомоти Чин аз сокинон даъват намудаанд, ки то як муддати дигар аз хонаҳояшон берун набароянд.

Пештар аз ин расонаҳои маҳаллӣ дар Пекин аз қарантина шудани 11 маҳаллаи дигар дар ноҳияи Фангтой воқеъ дар ҷануби Пекин хабар дода буданд, ки бар асари он чанд бозору корхонаи ин ноҳия таътил шуда буд.

Чин дар охирҳои моҳи декабри гузашта бо бақайд гирифтани нахустин ҳолатҳои гирифторӣ ба КОВИД-19 хабар дода буд ва маншаъи хуруҷи ин вируси тозаро бозори фурӯши маводҳои ғизоии дарёиӣ ва ҳайвоноти гуногун дар шаҳри Вуҳон унвон карда буд. Мақомоти Чин пас аз ин хабар дар саросари шаҳри Вуҳон бо мақсади пешгирӣ аз вируси ҷадиди корона қарантинаи шадидро ҷорӣ намуданд. Ва шаҳри Вуҳон аз хостгоҳи аслии вируси КОВИД-19 дониста шудааст.

Ин вирус аз нахустин рӯзҳои сабт ва шиносоияш дар Чин то кунун беш аз 83 ҳазор нафарро дар ин кишвар мубтало карда ва ҷони беш аз 4600 нафарро рабуд. Аммо дар сар тосари олам бошад то ин лаҳза тибқи оморҳои расмӣ зиёда аз 8 млн ба КОВИД-19 мубтало шудаанд, ҳудуди 437 ҳазор фавтидаанд ва хушбахтона қариби 4 млн нафар шифо ёфтаанд.

1...858859860...864саҳифаи 859 аз 864