27.9 C
Dushanbe

Нисбати Худоёров бо иттиҳоми “авбошӣ” парванда боз шудааст

Шуъбаи корҳои дохилаи ноҳияи Рашт нисбати Ҷунайдулло Худоёров, як фаъоли шабакаҳои иҷтимоӣ бо иттиҳоми “авбошӣ” парванда боз кардааст.

Сардори шуъбаи Вазорати корҳои дохилӣ дар ноҳия Рашт Самеъбой Фатҳуллоев ба Радиои Озодӣ парванда боз шудан нисбати Худоёровро тасдиқ кард. Ба гуфтаи ӯ, алайҳи Худоёров тибқи қисми 3-и моддаи 237-и Кодекси ҷиноии Ҷумҳурии Тоҷикистон парванда боз шудааст.

Гуфта мешавад, Ҷунайдулло Худоёров рӯзи 27-уми октябр дар муноқишаи байни хонаводагӣ бо оилаи гумонбарон дар қатли Алиризо Худоёров тарафи дигари муноқишаро бо табар таҳдид кардааст. Аммо худи Худоёров инро рад карда мегӯяд, ҳангоми муноқиша дар дасташ табар набуд.

“27-уми октябр модарам аз хонаи хоҳарам бармегашт. Дар роҳ Алишери Насриддин, узви оилаи гумонбар дар қатли Алиризо, ба модарам зарба мезанад. Сутунмуҳраи модарам осеб дидааст. Ман дар ҳезумшиканӣ будам. Ба ман хабар доданд. Табарро ба дасти писарам дода, давида рафтам. Бе ягон зӯрӣ муноқишаро ором кардам.”, мегӯяд Ҷунайдулло ба Озодӣ.

Дар ҳамин ҳол тарафи муқобил низ саддарсад намедонанд, ки ҳангоми муноқиша дар дасти Ҷунайдулло табар буд ё не.

“Ҳамон рӯз маросими дафни амакам, Мансур Ҳомидови 73-сола, буд. Дар назди масҷиди деҳа истода будем. Модари Ҷунайдулло аз роҳ мегузашт. Алишер бо шӯхӣ гуфт, ки аз марги амаки мо хурсанд шудед. Вай дар ҷавоб гуфт, агар ҳамоне ки набераамро корд зад, мефавтид, беҳтар буд. Ҷанҷол хест. Ҷунайдулло омаду таҳдид кард, аммо дар дасташ табар буд ё не, ба ёдам нест.”, нақл кардааст хонаводаи гумонбарон дар қатли Алиризо.

Муноқишаи оилаи Худоёровҳо бо як оилае ҳамдеашон баъд аз кушта шудани Алиризо Худоёрои 21-сола шиддат гирифт. Худоёровҳо бар ин боваранд, ки Алиризоро чанд нафар аз ҳамдеҳагонашон бо маслиҳати пешакӣ ба қатл расондаанд. Аммо оилаи гумонбаршудаҳо инро рад мекунанд.

Ҷунайдулло Худоёров сокини деҳаи Яшми ноҳияи Рашт соли 2018 бо иттиҳоми “салафият” боздошт ва барои 5 сол аз озодӣ маҳрум шуд, аммо соли 2019 бар асоси Қонуни авф озод гардид.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Сохти беш аз 100 дидбонгоҳи марзии ҷадид

Толибон дар марз байни Афғонистон ва кишварҳои ҳамсояи он зиёда аз 100 дидбонгоҳи марзии нав сохтанд.

Мулоқоти Эмомалӣ бо Дабири кулли СММ

Раисҷумҳури Тоҷикистон Эмомалӣ Раҳмон дар Ню-Йорк бо Дабири кулли Созмони Милали Муттаҳид Антониу Гутерриш мулоқот кард.

Озодии 10 зиндонӣ бо пардохти 6 миллиард доллар

10 нафар аз зиндониёни эронӣ ва амрикоӣ бо "пардохт"-и 6 миллиард доллар озод шуданд.

Зеленский ҷаҳонро аз оғози ҷанги ҷаҳонии сеюм ҳушдор дод

Владимир Зеленский, раисҷумҳури Украина 17-уми сентябр дар мусоҳибае бо...