Вазирони корҳои хориҷии кишварҳои узви Созмони ҳамкориҳои исломӣ (СҲИ) вазъияти Навори Ғаззаи Фаластинро баррасӣ мекунанд.
Бино ба иттилои расмӣ, имрӯз, 5-уми марти соли 2024, нишасти изтирории вазирони корҳои хориҷии кишварҳои узви Созмони ҳамкориҳои исломӣ дар шаҳри Ҷиддаи Арабистони Саудӣ ба кори худ оғоз кард.
Ба қавли манбаъ, рӯзи 4-уми марти соли ҷорӣ Сироҷиддин Муҳриддин, вазири корҳои хориҷии Тоҷикистон, ки барои иштирок дар ин нишасти ҷаҳонӣ ба Арабситони Саудӣ сафар кардааст, бо дабири кулли Созмони ҳамкории исломӣ Ҳусайн Иброҳим Тоҳо мулоқот кардааст.
Гуфта мешавад, дар рафти ин мулоқот ҷонибҳо атрофи қазияҳои мубрами байналмилалӣ ва минтақавӣ, аз ҷумла дар бораи ҳолати бади буҳронӣ ва инсонӣ дар Фаластин Афғонистон гуфтугӯ кардаанд.
Пеш аз ин, 18-уми октябри соли 2023 низ вазирони корҳои хориҷии кишварҳои узви Созмони ҳамкориҳои исломӣ бо даъвати Арабистони Саудӣ дар шаҳри Ҷидда дар бораи ҳамлаҳои Исроил ба фаластиниҳо дар Навори Ғазза ва Каронаи Бохтарии рӯди Урдун ва дигар масолили марбут ба Фалистин гуфтугӯ када буданд.
Ҳамчунин 11-уми ноябри соли 2023 вобаста ба қазияи Фаластин ва бахусус Навори Ғазза нишасти сарони кишварҳои исломӣ ва сарони кишварҳои узви Лигаи кишварҳои арабӣ низ дар шаҳри Риёз, пойтахти Арабистони Саудӣ баргузор гардида буд. Тамоми ин нишастҳо бо нашри баёнияҳои тӯлонӣ хотима ёфта буданд.
Аммо, он чӣ аз қарорҳо дар он баёнияҳо таъкид гардида буд, бо гузашти беш аз 138 рӯз то ҳол нисфе аз онҳо амалӣ нашудаанд. Яке аз ҳадафҳои асосии нишасти изтирории имрӯзаи вазирони корҳои хориҷии узви Созмони ҳамкориҳои исломӣ низ баррасӣ ва бозбонии ҳамон қарорҳо унвон шудааст.
Гуфта мешавад, СҲИ пас аз Сомзони Милали Муттаҳид дувумин созмони бузурги ҷаҳонӣ аст, ки 57 кишвар узви он ҳастанд. Аксари кишварҳои узви ин созмонро кишварҳои осиёӣ ва африқоӣ ташкил медиҳанд.
