Эмомалӣ Раҳмон дар нахустин рӯзи соли 2024 бо судури Амре даст ба қонуншиканӣ задааст.
Бино ба иттилои расмӣ, 1-уми январи соли ҷорӣ Эмомалӣ Раҳмон бо судури се амре дар бораи баргузор кардани 3 озмуни ҷумҳурияӣ фармони қаблии худро дар бораи “қабули пардохтҳо тариқи ғайринақдӣ амалӣ карда шаванд”-ро зери по кард.
Эмомалӣ Раҳмон барои баргузории се озмуни ҷумҳуриявӣ бо судури амрҳои алоҳида аз Вазорати молияи кишвар хостааст, ки 12 440000 (дувоздаҳ миллиону чор саду чил ҳазор)-ро аз ҳисоби “маблағҳои фонди захиравии Президенти Ҷумҳурии Тоҷикистон, ки барои соли 2024 пешбинӣ гардидаанд, ба Дастгоҳи иҷроияи Президенти Ҷумҳурии Тоҷикистон ба таври нақд ҷудо намояд.”
Ин дар ҳолест, ки 22-уми июни соли 2023 Эмомалӣ Раҳмон бо судури Фармоне гуфта буд, ки шуруъ аз 1-уми августи соли 2023 “пардохти андозҳо, боҷҳои давлатӣ барои додани иҷозат ва иҷозатномаҳо, пардохтҳои дигари ҳатмӣ ба буҷет, ҷаримаҳо, маблағи суғуртаи ҳатмии давлатӣ, хизматрасониҳои тиббӣ, хизматрасониҳои коммуналӣ, намудҳои дигари хизматрасониҳои давлатӣ, инчунин қабули
маблағҳо аз ҷониби вазорату идораҳо ва ташкилотҳои давлатӣ тариқи ғайринақдӣ амалӣ карда шавад.”
Дастгоҳи иҷроияи Президенти Тоҷикистон яке аз ташкилотҳои давлатӣ ба ҳисоб меравад. Дар ин Фармони Эмомалӣ аз 22-уми июни соли 2023 гуфта шудааст, ки “аз ҷониби вазорату идораҳо, ташкилотҳои давлатӣ ва ташкилотҳои қарзии молиявии ҷумҳурӣ ба таври нақдӣ қабул намудани пардохти хизматрасониҳои музднок манъ карда шавад.”
Гуфта мешавад, Тоҷикистон дар сатҳи кишварҳои дунё яке аз кишварҳои фасодзадатир шинохта мешавад. Президент Эмомалӣ Раҳмон ҳам борҳо дар суханрониҳои худ вуҷуди фасод дар ҳукуматшро эътироф ва омилони онро мазаммат кардааст.
Вай дар охирин паёми солонааш ба парламент, ки чанд рӯзе пеш садо дода буд, аз аъзои ҳукумат ва дигар раҳбарону мансабдорони давлатӣ гила карда гуфт: “Мо, роҳбарон аз боло то поён ҳама фақат фикри нафси бади худро мекунем!”