Вазорати энергетика ва захираҳои оби Тоҷикистон аз афзоиши нигаронкунандаи қарзи сокинон барои истифодаи барқ хабар дод.
Тибқи омори расмӣ, танҳо аҳолии кишвар то моҳи июли соли равон аз ширкати “Барқи тоҷик” барои истифодаи нерӯи барқ беш аз 1,7 миллиард сомонӣ қарздоранд.
Тибқи ин омор, на танҳо мардум, балки чанде аз сохторҳои муҳими давлатӣ низ аз барқ қарздор мондаанд. Аз ҷумла, “Ширкати алюминийи тоҷик” бо қарзи 718 миллион сомонӣ, Агентии беҳдошти замин ва обёрӣ (238 миллион), бархе идораҳои буҷетӣ (108 миллион) ва корхонаҳои обу корез (16,4 миллион) дар садри рӯйхат қарор доранд.
Мақомот ҳамеша дар посух ба ин савол, ки чӣ гуна мардум аз барқ қаздоранд, мегӯянд, қисме аз ин қарзҳо аз солҳои пеш боқӣ мондаанд. Аммо сокинон ин иддаои мақомотро қабул надоранд ва мегӯянд, ки мардуми оддӣ наметавонад солҳо аз барқ қарздор боқӣ бимонад, зеро ҳама хуб медонад, ки дар сурати нападохтани пули барқ масъулон барқро қатъ мекунанд. Вале дар корхонаҳои давлатӣ ва нимадавлатӣ ин корро карда наметавонанд.
Аз ин хотир, бисёре аз таҳлилгарон ва рӯзноманигорон ҳаҷми зиёди қарзи мардумро аз идораи барқ шубҳаангез мешуморанд.
Ҳамчунин ҳамасола дар фасли зимистон интиқоли барқ барои мардум хеле маҳдуд мешавад ва қариб, ки мардум ба ҷуз рӯшноӣ барқро дар дигар чиз истифода намебаранд. Имсол бошад, ҳатто дар фасли тобистон низ сокинон аз маҳдудияти барқ хабар доданд.
