Созмони Паймони Амнияти Дастаҷамъӣ қасд дорад аз тобистони соли ҷорӣ амнияти марзҳои Тоҷикистон бо Афғонистонро тақвият бахшад.
Дар ин бора рӯзи 12-уми март Дабири кулли СПАД Имангали Тасмагамбетов ба хабаргузории ТАСС иттилоъ додааст. Ӯ гуфта, ки аллакай пешнависи тарҳи тақвияти марзҳои Тоҷикистон бо Афғонистон тавассути Шӯрои доимии ин созмон таъйид ва ба кишварҳои узв пешниҳод гардидааст.
Дабири кулли СПАД дар ин мусоҳиба гуфта, ки барои тақвияти марзҳои Тоҷикистон бо Афғонистон аз сӯи ин созмон талошҳои зиёде ҷараён дорад.
Тоҷикистон, ки узви созмон аст, бо Афғонистон беш аз 1300 километр марзи муштарак дорад. Пас аз омадани Толибон ба сари қудрат дар ин кишвари ҳамсоя аз моҳи августи соли 2021 мақомоти тоҷик борҳо аз эҷоди гурӯҳҳои террористӣ дар назди марзҳояш нигаронӣ карда буданд.
Вале ба гуфтаи коршиносон, дар нигарониҳои Тоҷикистон аз Афғонистон оҳанги хавфи воқеӣ дида намешавад, зеро дида мешавад, ки рӯз ба рӯз мақомоти тоҷик муомилоти тиҷоратии пасипардагии худ, бахусус тиҷорати барқро бо Толибон бештар мекунанд.
Ёдовар мешавем, ки Созмони Паймони Амнияти Дастаҷамъӣ дар соли 1992 дар Тоҷшканд, пойтахти Узбекистон ташкил шуд, ки ҳоло кишварҳои Русия, Белорусия, Қазоқистон, Қирғизистон ва Тоҷикистон узви он ҳастанд. То моҳи феврали ҳамин соли Арманистон низ узви он буд, вале 23-уми феврал Сарвазири ин кишвар Никол Пашиниён эълон кард, ки аз ин созмон хориҷ шудааст.
