Бархе сокинони пойтахт аз рафторҳои ғайриқонунии маъмурони пулиси минтақавӣ шикоят кардаанд.
Як сокини шаҳри Душанбе ба номи Абубакр Давлатбоев дар шабакаи иҷтимоии Facebook аз рафтори як нозири минтақавӣ изҳори норозигӣ кардааст. Вай менависад: “Агар соати 9–10 шаб дар назди хонаат бошӣ, бе ягон сабаб, оё участковый бо либоси одӣ ҳақ дорад бе иҷозат кисаҳоят ва телефонатро кофта бинад? Ман ду дафъа ба чунин ҳолат дучор шудам — дар фосилаи 1 метр аз дарвозаам, бе ягон далел, ҳам маро ва ҳам мошинамро кофтукоб кард. Ман намефаҳмам — чаро?
Ӯ ҳамчунин пурсидааст, ки агар маъмури пулис “бо либоси ғайрирасмӣ бошад, куҷо бояд аз болои чунин амалаш шикоят бурд?”
Баъзе корбарон дар шарҳҳо навиштаанд, ки нозири минтақавӣ бидуни далели расмӣ ҳақ надорад дар шаб, он ҳам бо либоси ғайрирасмӣ шахсро мавриди тафтиш қарор диҳад.
Онҳо ба Давлатбоев маслиҳат додаанд, ки аз болои нозир ба прокуратура шикоят нависад.
Ин дар ҳолест, ки чанде пеш Шоҳрух Саидзода, сардори Раёсати ВКД дар шаҳри Душанбе дар як ҷаласаи расмӣ аз нозирони минтақавӣ талаб карда буд, ки бо шаҳрвандон хушмуомила бошанд,
Шикоятҳо аз рафторҳои ғайриқонунии кормандони пулис, махсусан нозирони минтақавӣ зиёданд. Сокинон онҳоро ба суистифода аз мақом ва қадам фаро гузоштан аз салоҳияти хидматӣ муттаҳам мекунанд.
