Вазири дифои ҳукумати муваққати Толибон дар Кобул аз мақомоти Тоҷикистон хостааст, ки аз вуруди террористҳо ба хоки Афғонистони ҷилавгирӣ кунанд.
Бино ба иттилои расмӣ, Муҳаммадяъқуб Муҷоҳид, вазири дифои ҳукумати муваққати Толибон 31-уми декабри соли 2023 дар Кобул ба расонаҳо гуфт, ки тайи ду соли гузашта даҳҳо нафар шаҳрвандони Тоҷикистон ва Покистонро боздошт кардаанд.
Ба гуфтаи вазири дифои Иморати исломӣ, ин даҳҳо нафар аз шаҳрвандони Тоҷикистон ва Покистон дар ҳангоми амалиётҳои махсуси нерӯҳои амниятии Толибон бар зидди гурӯҳҳои “шароратафкан” дар хоки Афғонистон боздошт шудаанд.
Пеш аз ин ҳам Толибон чандин бор эълом карда буданд, ки бархе шаҳрвандони Тоҷикистонро, ки дар сафи шохаи низомии ДИИШ-Хуросон дар Афғонистон алайҳи Толибон меҷанганд, кушта ва дар амалиётҳои махсус боздошт кардаанд.
Инчунин чанд моҳ пеш як филми мустанаде ҳам дар шабакаҳои иҷтимоӣ нашр гардида буд, ки дар он нишон дода мешуд, чандин нафар аз шаҳрвандони Тоҷикистон, ки ба доми ДИИШ уфтода, бо роҳҳои мухталиф ба Афғонистон рафта буданд, аз ҷониби нерӯҳои амниятии Толибон боздошт гардида, дар бораи дар куҷо ва чӣ гуна ба доми диишиҳои уфтодани худро нақл мекарданд.
Гуфта мешавад, мақомоти Тоҷикистон ба сурати расмӣ ба ин иттиҳомот ва иддаоҳои Толибон то замони нашри ин матлаб вокунише накардаанд. Аммо дар гузашта, ҳам мақомоти Тоҷикистон ва ҳам бархе мақомоти Русия борҳо эълон карда буданд, ки хатари ворид шудани нерӯҳои силоҳбадасти ғайриқонунӣ аз хоки Афғонистон ба Тоҷикистон амнияти кишвар ва минтақаро таҳдид мекунад.
Инчунин Эмомалӣ Раҳмон ҳам ахиран эълон кард, ки тайи як соли ахир Тоҷикистон ҳудуди 75 адад дидбонгоҳҳои сарҳадии ҷадидеро дар тӯли марзҳои муштараки Тоҷикистон бо Афғонистон сохта, ба истифода додааст. Аммо, ҳоло вазири дифои Толибон мегӯяд, ки Тоҷикистон бояд контрули марзҳои заминӣ ва ҳавоии худро сахттар кунад, то террористҳо ба хоки Афғонистон ворид шуда натавонанд.
